Sadino ken Kaano a Nayanak ni Jesus?

Imbilin ti emperador ti Imperio ti Roma a ni Cesar Augusto a masapul nga agparehistro ti amin. Gapuna, masapul nga agawid da Jose ken Maria iti siudad a nakayanakan ni Jose, ti Betlehem, iti abagatan ti Jerusalem.

Adu a tattao ti adda idiay Betlehem tapno agparehistro. Ti laeng lugar a nasarakan da Jose ken Maria a pagdagusan ket ti pagyaponan kadagiti asno ken dadduma pay nga animal. Dita a nayanak ni Jesus. Binungon ni Maria ti ubing iti lupot sana impaidda iti kulluong, ti panganan dagiti animal.

Mabalin nga immaniobra ti Dios nga ibilin ni Cesar Augusto daytoy a linteg ti panagparehistro. Apay? Tapno maipasngay ni Jesus idiay Betlehem, ti ili ti apongna a ni Ari David. Nabayagen nga impakpakauna ti Kasuratan nga iti dayta a siudad a mayanak ti naikari nga Agturay.—Mikias 5:2.

Talaga a nagpateg daytoy a rabii! Iti away, adda nagsilnag a lawag a nagparang iti maysa a grupo dagiti agpaspastor. Dayag ni Jehova dayta! Imbaga ti maysa nga anghel ti Dios kadagiti agpaspastor: “Dikay agbuteng! Immayak tapno ipakaammok ti naimbag a damag a pakaragsakan unay ti amin a tattao. Ta ita, nayanak kadakayo iti siudad ni David ti maysa a manangisalakan, ti Kristo nga Apo. Ket daytoy ti pagilasinanyo: Makakitakayto iti kayyanak nga ubing a nabungon iti lupot a naipaidda iti kulluong.” Pagammuan ta nagparang ti ad-adu pay nga anghel a kunkunada: “Madaydayaw koma ti Dios idiay langit, ket ditoy daga maadda koma ti talna kadagiti tattao a parparaburanna.”—Lucas 2:10-14.

Idi nagpukawen dagiti anghel, kinuna dagiti agpaspastor iti maysa ken maysa: “Intayon idiay Betlehem tapno makitatayo ti impakaammo kadatayo ni Jehova.” (Lucas 2:15) Nagdardarasda a napan ket nasarakanda ti kayyanak a ni Jesus iti mismo a lugar nga imbaga ti anghel. Idi impadamag dagiti agpaspastor ti imbaga kadakuada ti anghel, nasdaaw ti amin a nakangngeg. Impateg ni Maria amin nga imbagada ken pinampanunotna ti kaipapananda.

Ita, adu ti mamati a nayanak ni Jesus iti Disiembre 25. Ngem idiay Betlehem, matutudo ken nalam-ek iti bulan ti Disiembre. Agtinnag pay ketdi ti niebe no dadduma. Iti dayta a tiempo ti tawen, saan a mabalin nga agpatnag nga agyan iti ruar dagiti agpaspastor ken ti arbanda. Kasta met, saan la ketdi nga ibilin ti emperador ti Roma kadagiti tattao a mayat idi a bumusor kenkuana nga agdaliasatda iti adu nga aldaw iti panawen ti lam-ek tapno agparehistroda. Nalawag ngarud a nayanak ni Jesus iti tiempo a saan pay a nalam-ek, nalabit iti bulan ti Oktubre.