Mikias 6:8—“Pannagna a Sipapacumbaba iti Diosmo”

“O tao, imbagana kenka no ania ti naimbag. Ket ania aya ti kayat ni Jehova nga aramidem? Ti laeng panangipakitam iti kinahustisia, ti panangipategmo iti panagbalin a napudno, ken ti panagbalinmo a naemma iti pannakipagnam iti Diosmo!”—Mikias 6:8, Baro a Lubong a Patarus.

“Imparangna kenca, O tao, daydiay naimbag; ket ania aya ti iparebbeng ni Jehova kenca, no di laeng agaramid a sililinteg, ken iti kinamanangngaasi ken pannagna a sipapacumbaba iti Diosmo?”—Mikias 6:8, Ti Biblia.

Kaipapanan ti Mikias 6:8

Ilawlawag ni propeta Mikias a saan a narigat para kadagiti tattao a paragsaken ni Jehovaa a Dios. (1 Juan 5:3) Naisumario iti daytoy a bersikulo iti tallo a nabagas a sasao no ania ti ekspektaren ti Dios kadatayo. Ti umuna a dua ket maipapan iti pannakilangen ti maysa iti sabsabali, ti maikatlo met ket maipapan iti relasion ti maysa iti Dios.

‘Panangipakita iti hustisia.’ Kayat ti Dios nga agbalin a patas dagiti agdaydayaw kenkuana. Kayatna a sawen daytoy a ti panagpampanunot ken ar-aramid ti maysa ket masapul a maitunos iti estandarte ti Dios iti naimbag ken dakes. (Deuteronomio 32:4) Kas pagarigan, dagidiay mangsursurot ti estandarte ti Dios, aramidenda ti amin tapno napudno ken patas ti panangtratoda iti amin a tattao, aniaman ti napalabas, nasionalidad, wenno kasasaadda iti biag.—Levitico 19:15; Isaias 1:17; Hebreo 13:18.

‘Panangipateg iti panagbalin a napudno.’ Daytoy a sasao ket mabalin a maipatarus met kas ‘panangayat iti napudno nga ayat.’ (Mikias 6:8, footnote) Iti orihinal a Hebreo, saan laeng a “kinamatalek” iti maysa a tao ti kaipapanan ti sao a napudno no di ket panangipakita iti kinaimbag ken asi iti sabsabali a nalablabes pay ngem iti makiddaw. Saan laeng a kidkiddawen ti Dios kadagidiay mayat a mangparagsak kenkuana nga ipakitada ti kinaimbag ken asi no di ket ipategda wenno ayatenda dagitoy a kualidad. Kayatna a sawen a masapul a pagragsakan dagiti agdaydayaw kenkuana a tulongan ti dadduma, nangnangruna dagiti agkasapulan. Agbalin a naragsak dagidiay manangted.—Aramid 20:35.

‘Panagbalin a naemma iti pannakipagna iti Dios.’ Iti Biblia, ti sao a ‘pannakipagna’ mabalin a kaipapananna ti “panangsurot iti maysa a kita iti panagbiag.” Makipagpagna ti maysa iti Dios no surotenna ti pamay-an ti panagbiag a makaparagsak iti Dios. Nagsayaat a pagtuladan ni Noe. “Nakipagna ni Noe iti pudno a Dios” gapu ta imbilang ti Dios a nalinteg ken “awan pagkuranganna no idilig kadagiti tattao idi panawenna.” (Genesis 6:9) Ita, ‘makipagpagnatayo iti Dios’ no agbiagtayo maitunos kadagiti pannursuro nga adda iti Saona, ti Biblia. Maaramidtayo daytoy no agbalintayo a naemma, kayatna a sawen, akseptarentayo dagiti limitasiontayo ken bigbigentayo a masapul nga agdependetayo iti Dios iti amin a banag.—Juan 17:3; Aramid 17:28; Apocalipsis 4:11.

Konteksto ti Mikias 6:8

Maysa idi a propeta ni Mikias iti nagkauna nga Israel bayat ti maikawalo a siglo B.C.E. Iti dayta a tiempo, napno ti daga iti idolatria, panangallilaw, ken panangidadanes. (Mikias 1:7; 3:1-3, 9-11; 6:10-12) Saan a sursuroten ti kaaduan nga Israelita dagiti kidkiddawen ti Dios a mabasa iti linteg nga intedna ken Moises, a maawagan iti Mosaiko a Linteg. Kasta met, adu ti namati a maay-ayoda latta ti Dios no aramidenda dagiti narelihiosuan a kostumbre wenno ar-aramid ken mangipaayda kadagiti daton.—Proverbio 21:3; Oseas 6:6; Mikias 6:6, 7.

Ginasut a tawen kalpasan ti panawen ni Mikias, imbaga manen ni Jesus a maragsakan ti Amana kadagidiay mangipakita iti ayat, hustisia, ken asi ngem saan a maragsakan kadagidiay pammarang laeng ti panangipakitada iti debosionda iti Dios. (Mateo 9:13; 22:37-39; 23:23) Matulongannatayo ti sasao ni Jesus tapno maawatantayo no ania ti namnamaen ti Dios kadagiti agdaydayaw kenkuana ita.

Buyaem ti ababa a video tapno maammuam no ania ti pakabuklan ti libro a Mikias.