Ni Habacuc, a binilin ti Dios innem a siglo ti napalabasen a mangisurat ti maipapan iti pannakaibanag ti nasantuan a panangukomna, kinunana met a daytat’ “iti nadutokan a panawen.” Ket kas pammakdaar maibusor iti di panagan-anus, wenno nalabit uray pay ti panagduadua, inkarina babaen iti panangibilin ti Dios: “Ket saanto nga agulbod. Nupay no agtaktak, isu urayem; ta pudno nga umayto. Dinto agbayag.”​—Habacuc 2:2, 3.

Ngem no ti panangukom ti Dios ket “iti nadutokan a panawen” ken no dayta “dinto agbayag,” apay a kuna ni Habacuc “nupay no agtaktak”? Kaawatan tapno maipakita a sumagmamano iti ili ti Dios ket manginanama iti dayta nga umay a nasapsapa ngem ti aktual nga iyaayna. Apay? Agsipud ta ti eksakto nga oras ti iyaayna didanto maammuan.

Dagiti pammakdaar a sasao ni Habacuc ipamatmatna nga adda ti kasla pannakataktak ti panangukom ni Jehova, nga agserbi kas pakasuotan ti pammati. Nainkalintegan a daytoy a pannakasuot dinto tumaud agingga iti kamaudianan ti kaputotan a sasawen ni Jesus. Maipapan iti pangarigan nga adda iti pangrugian daytoy nga artikulo, panunotenyo daytoy: Kaano ti serioso a panangrugiyo nga agduadua nga iyaay wenno isasangpet ti bisitayo? Siempre saan nga iti alas nuebe iti bigat, wenno iti tengnga ti aldaw, nalablabit saan pay nga iti naladawen a kamalmanna. Nalablabit ti pammatiyo ti masuot apaman a dandani umayen ti panagsipngetna. Nupay kasta, laglagipenyo nga uray iti alas 11:30 t.r. kaskasdi a ti bisitayo addaan pay supisiente a panawen a dumteng kas kaitungpalan ti karina!