12. Aniat’ naikari maipapan iti nakaam-amak nga aldaw ni Jehova?

¹² Ti dakkel ken nakaam-amak nga aldaw ni Jehova (4:1-6). Daytoy ti um-umay nga aldaw a manglamut kadagiti nadangkes, a di mangibati iti ramut wenno sanga. Ngem ti init ti kinalinteg agraniagto kadagidiay agbuteng iti nagan ni Jehova, ket maagasandanto. Pinatigmaanan idan Jehova a lagipendat’ Linteg ni Moises. Sakbay ti dakkel ken nakaam-amak nga aldawna, inkari ni Jehova nga ibaonnan Elias a propeta. “Ket isublinanto ti puso dagiti amma kadagiti annak, ket ti puso dagiti annak kadagiti ammada; di la ket ta umayak ket kabilek ti daga a maipamaysa iti pannakaduprak.”​—4:6.

15. Asinot’ “Elias” nga impadton Malakias?

¹⁵ Sa, iti Malakias 4:5, 6, inkari ni Jehova: “Adtoy! Ibaonkonto kadakayo ni Elias a propeta.” Asino daytoy nga “Elias”? Ni Jesus ken ti anghel a nagparang ken Zacarias impakatda dagitoy a sao ken Juan a Mammautisar, ket impakitada nga “isublinanto dagiti amin a banag” ken “tapno isaganaannan Jehova ti ili nga awan pagkuranganna” nga umawat iti Mesias. Ngem, kuna ni Malakias a ni “Elias” isut’ pakpakauna “ti dakkel ken nakaam-amak nga aldaw ni Jehova,” gapuna ipasimudaagna nga adda pay masanguanan a kaitungpalanna inton aldaw a panangukom.​—Mat. 17:11; Luc. 1:17; Mat. 11:14; Mar. 9:12.