Ti Biag ken Ministerio ni Jesus

Panangngaasi iti Agkukutel

BAYAT a sarsarungkaran ni Jesus ken dagiti uppat nga adalanna dagiti siudad ti Galilea, ti damag maipapan kadagiti nakaskasdaaw a bambanag nga ar-aramidenna ti nagsaknap iti intero a distrito. Ti damag maipapan kadagiti ar-aramidna ti dimmanon iti maysa a siudad a sadiay adda maysa a lalaki nga agkukutel. Isut’ insalaysay ni mangngagas a Lucas kas “nalungpos iti kukutel.” Iti nakaro unayen a kasasaadna, daytoy nakaam-amak a sakit, ti agin-inot a mangdadael iti langa dagiti nadumaduma a paspaset ti bagi. Gapuna daytoy nga agkukutel ti adda iti nakaay-ay-ay a kasasaad.

Idi nakagteng ni Jesus iti siudad, immasideg ti agkukutel kenkuana. Sigun iti linteg ti Dios, ti maysa nga agkukutel ti umawag a kas pammakdaar, “Narugit, narugit!” tapno salakniban dagiti dadduma manipud iti iyaasidegda unay ket irisgo ti pannakaalisda. Ita nagrukob ti agkukutel ket indawatna ken Jesus: “Apo, no kayatmo, mabalinnak a dalusan.”

Anian a pammati ti adda iti daytoy a lalaki ken Jesus! Kaskasdi, anian a nakaay-ay-ay ti namagbalinan daytoy a sakit kenkuana! Ania ita ti aramiden ni Jesus? Ania koma met ti inaramidyo? Natignay ti asina, inyawat ni Jesus ti imana ket sinagidna ti lalaki, a kunkunana: “Kayatko. Madalusanka koma.” Ket naigiddato a ti kukutel pimmanaw kenkuana.

Kayatyo kadi ti maaddaan iti manangngaasi unay a kas iti daytoy nga agbalin nga ariyo? Ti panangtrato ni Jesus iti daytoy nga agkukutel ti mangted panagtalek a bayat iti panagturayna iti Pagarianna ti padto ti Biblia matungpalto: “Mangngaasinto kadagiti napanglaw ken makasapul.” Wen, tungpalento ni Jesus ti tarigagay ti pusona a mangtulong kadagiti isuamin nga addaan an-anayen.

Uray pay sakbay ti panangagasna iti agkukutel, ti ministerio ni Jesus ti mangpatpatauden iti dakkel a panagragsak kadagiti tattao. Kas kaitungpalan iti padto ni Isaias, binilin ni Jesus ti naagasan a tao: “Kitaem ta dika ibaga iti uray siasino.” Kalpasanna isu ti binilinna: “Inka, agparangka iti saserdote ket idatonmo ti maipaay iti pannakagugormo kadagiti imbilin ni Moises, a pakapaneknekanda.”

Ngem ti lalaki napalalo ti ragsakna a dina mailemmeng ti milagro a bukbukodna. Isut’ rimmuar ket rinugianna nga insaknap ti damag iti uray sadino, a nalawag a nangpataud iti kasta unay a panaginteres ken panagusiuso kadagiti tattao ket gapu itoy saan a makapanen a sipapanayag ni Jesus idiay siudad. Gapuna nagtaeng ni Jesus kadagiti napakni a luglugar a sadiay awan dagiti aggigian, ket dagiti tattao a naggapu iti isuamin a disso immayda a dimngeg kenkuana ken paagasan dagiti saksakitda. Lucas 5:12-16; Marcos 1:40-45; Mateo 8:2-4; Levitico 13:45; 14:10-13; Salmo 72:13; Isaias 42:1, 2.

◆ Ania ti mabalin nga epekto ti kukutel, ket ania a pammakdaar ti masapul nga ited ti agkukutel?

◆ Kasano a nagdawat ti maysa nga agkukutel ken Jesus, ket aniat’ maadaltayo manipud sungbat ni Jesus?

◆ Kasano a di nagtulnog daydiay lalaki a naagasan ken Jesus, ket ania dagiti imbungana?