Ti Biag ken Ministerio ni Jesus

Nagkurang Aya ti Pammati ni Juan?

NI Juan a Mammautisar, nga itan ket addan idiay pagbaludan iti makatawen, immawat ti report maipapan ti panagungar ti anak ti maysa a balo idiay Nain. Ngem kayat ni Juan a mangngeg a direkta manipud ken Jesus ti maipapan iti kinapateg daytoy, gapuna isut’ nagbaon iti dua kadagiti adalanna nga agsaludsod: “Sika kadi Daydi Umay wenno urayenmi ti sabali?”

Kasla karkarna dayta a saludsod, nangnangruna ta ni Juan ket nakitana ti espiritu ti Dios a bimmaba ken ni Jesus ken nangngegna ti timek a pananganamong ti Dios idi isut’ bautisaranna ngangnganin dua a tawen sakbayna. Mabalin a ti saludsod ni Juan ti pangipatuan dagiti dadduma a ti pammatina ket kasla kimmapuyen. Ngem saan a kasta. Ni Jesus ti saan koma nga agsao a sidadayaw ken ni Juan, nga isut’ inaramidna iti daytoy nga okasion, no ni Juan ket nangrugi nga addaan panagduadua. Ngarud, apay, nga insaludsod ni Juan daytoy?

Mabalin a ni Juan ket kayatna laeng ti maaddaan ti pammatalged manipud ken ni Jesus nga Isu ti Mesias. Daytoy ti makapabileg ken ni Juan bayat ti panagladladingitna idiay pagbaludan. Ngem kaawatan nga adda pay dakdakel a banag iti saludsod ni Juan ngem iti dayta. Nalawag a kayatna a maammuan no adda pay ti sabali nga umay, maysa a kasuno, ti kayariganna, a mangiringpas iti kaitungpalan amin dagiti bambanag a naipadto nga aramidento ti Mesias.

Sigun kadagiti padto ti Biblia pagaammo unay ni Juan, a Daydiay pinulotan ti Dios ket agbalin a maysa nga ari, maysa a manangispal. Kaskasdi ni Juan nagtalinaed pay met laeng a balud, uray no adun a bulan kalpasan ti pannakabautisar ni Jesus. Gapuna kaawatan a ni Juan salsaludsodenna ken ni Jesus: ‘Sika aya daydiay mangipasdekto iti Pagarian ti Dios iti pammarang a pannakabalin, wenno addanto pay ti maysa a sabali, maysa a kasuno, nga isut’ pagurayanmi iti kaitungpalan amin dagiti padpadto maipapan iti kinadayag ti Mesias?’

Imbes nga ibagana kadagiti adalan ni Juan, ‘Siempre siak daydiay umay!’ Iti dayta met laeng nga oras ni Jesus ti nangaramid iti nakaskasdaaw a panangipakita babaen iti panangpaimbagna kadagiti adu a tattao iti amin a kita ti saksakit ken an-anayenda. Kalpasanna kinunana kadagiti adalan: “Inkayo, ket saritaenyo ken Juan dagiti bambanag a nakita ken nangngegyo: a dagiti bulsek makakitada, dagiti pilay magnada, dagiti agkukutel nadalusanda ket dagiti tuleng makangngegda, dagiti natay nagungarda, ket dagiti napanglaw naikaskasaba kadakuada ti naimbag a damag. Ket naragsak ti siasinoman a dinto makasarak kaniak iti pakaitibkolan.”

Iti sabali a pannao, yantangay ti saludsod ni Juan mabalin nga isingasingna ti panangnamnama iti panangaramid ni Jesus iti ad-adu pay ngem ti ar-aramidenna, kas iti panangwayawayana ken ni Juan a mismo, ni Jesus ti mangibagbaga kenkuana iti dina pananginanama ti ad-adu wenno dakdakkel pay ngem kadagitoy.

Idi nakapanawen dagiti adalan ni Juan, nagturong ni Jesus kadagiti umariwekwek ket imbagana kadakuada a ni Juan isu ti “mensahero” nga impadto ni Jehova idiay Malakias 3:1 ken isu met ti mammadto nga Elias a naipadto idiay Malakias 4:5, 6. Gapuna intantan-okna ni Juan kas katupag ti asinoman a mammadto a nagbiag sakbayna, nga inlawlawagna:

“Pudno kunak kadakayo, Awan ti timmakder iti naiyanak kadagiti babbai ti sabali a dakdakkel ngem ni Juan a Bautista; ngem ti kababassitan unay iti pagarian ti langit dakdakkel ngem isu. Nanipud kadagiti aldaw ni Juan Bautista agingga ita ti pagarian ti langit magun-odan babaen iti nainget a pigsa, ket dagiti napinget ti makagun-od kenkuana.”

Ipakpakita ni Jesus ditoy a ni Juan ket dinto maadda idiay nailangitan a Pagarian, yantangay ti kababassitan sadiay ket dakdakkel ngem ni Juan. Insagana ni Juan ti dalan a maipaay ken Jesus, ngem ti ipapatayna ti mapasamakto sakbay a sinilioan ni Kristo ti tulag kadagiti ad-adalan nga agbalinto a kaduana nga agturay iti Pagarianna. Daytat’ gapuna no apay a kinuna ni Jesus a ni Juan ket awanto idiay nailangitan a Pagarian. Imbes ketdi ni Juan maysanto a naindagaan nga iturayan ti Pagarian ti Dios. Lucas 7:18-30; Mateo 11:2-15.

◆ Apay nga insaludsod ni Juan no ni Jesus isu Daydi Unay wenno addanto pay ti sabali a namnamaenda?

◆ Ania dagiti padto a kinuna ni Jesus a tungpalento ni Juan?

◆ Apay a ni Juan Bautista ket dinto maadda idiay langit a kadua ni Jesus?