Ti Biag ken Ministerio ni Jesus

Ania ti Nainkalintegan iti Panaginana?

ITI sabali manen a Panaginana simmarungkar ni Jesus iti maysa a sinagoga nga asideg iti Baybay ti Galilea. Adda idi ti maysa a tao nga adda imana a nagango. Sipsiputan a naimbag dagiti eskriba ken dagiti Pariseo no ni Jesus ti mangagas kenkuana. Kamaudiananna insaludsodda: “Maipalubos aya ti mangagas iti aldaw ti panaginana?”

Patien dagiti narelihiusuan a papangulo a Judio a ti panangagas maipalubos laeng iti Panaginana no ti biag ket agpegpeggad. Isursuroda, kas pangarigan, nga iti Panaginana saan a maipalubos ti panangisubli ti nabullo a tulang wenno mangpatapat iti nailigos a saka. Gapuna dagiti eskriba ken dagiti Pariseo salsaludsodanda ni Jesus iti panagreggetda iti panangalada iti maysa a banag a pangidarumanda kenkuana.

Ngem, ammo ni Jesus ti pampanunotda. Maigiddato iti dayta, ammona nga isuda ti nakapataud iti maysa nga aglablabes, di nainkasuratan a panangmatmat no aniat’ mangbukel iti panagsalungasing kadagiti pagalagadan iti aldaw ti Panaginana a panangiparit iti trabaho. Gapuna insagana ni Jesus ti maysa a dramatiko a panagsango babaen ti panangibagana iti tao a nagango ti imana: “Agtakderka iti tengnga.”

Ita, idi sinangona dagiti eskriba ken dagiti Pariseo, kuna ni Jesus: “Asino ngata ti tao nga adda kadakayo nga adda maysa a karnerona, ket no daytoy matnag koma iti maysa nga abut iti aldaw ti panaginana, saanna aya nga iggaman ken aonen?” Gapu ta ti maysa a karnero irepresentarna ti maysa a nagpuonan a pinansial, dida baybay-an dayta iti abut agingga iti sumaganad nga aldaw, nalabit tapno agsakit ken mapukawna ti pategna. Malaksid pay, kuna ti Kasuratan: “Ti nalinteg a tao ipatpategna ti biag ti animalna.”

Babaen ti panamagdiligna, intuloy ni Jesus: “Ket, saan aya a napatpateg ti maysa a tao ngem ti maysa a karnero! Gapuna maipalubos kadagiti aldaw panaginana ti agaramid ti naimbag.” Agsipud ta saanda a masungbatan ti kasta a lohikal, naayat a panagrason, dagiti narelihiusuan a papangulo nagulimekda.

Ket ni Jesus minatmatanna ida a sirururod, ken napaladingit iti kinatangken dagiti puspusoda. Kalpasanna kinunana iti tao: “Unnatem ta imam.” Ket inunnatna ket ti imana nagimbag.

Imbes a maragsakanda koma ta naisubli a naan-anay ti ima daydi a tao, rimmuar ketdi dagiti Pariseo ket dagdagus a nagnunumoda a kadua dagiti paspasurot ni Herodes a papatayenda ni Jesus. Daytoy a napolitikaan a partido kaawatan iramanna dagiti miembro ti narelihiusuan a Saduseo. Iti gagangay, daytoy a napolitikaan a partido ken dagiti Pariseo ti silalatak nga agbibinnusor iti maysa ken maysa, ngem ita isuda ti sangsangkamaysa a maibusor ken ni Jesus. Mateo 12:9-14; Marcos 3:1-6; Lucas 6:6-11; Proverbio 12:10; Exodo 20:8-10.

◆ Ania ti buya a maipaay iti dramatiko a panagsango ni Jesus ken dagiti narelihiusuan a papangulo?

◆ Aniat’ pammati dagiti Judio maipapan iti panangagas iti Panaginana?

◆ Ania nga ilustrasion ti inusar ni Jesus a pangsungbat iti di umiso a panangmatmatda?