Ti Biag ken Ministerio ni Jesus

Pannakagunggona kadagiti Pangngarig ni Jesus

IDI immay dagiti adalan ken Jesus kalpasan ti panagpalawagna idiay igid ti baybay, adda panagusiusoda maipapan iti baro a metodo ti panangisurona. Ay, nangnangngeganda idin a nagusar kadagiti pangngarig ngem saan a kasta ti kawadwadna. Gapuna kayatda a maammuan: “Apayapay kasaom ida kadagiti pangngarig?”

Maysa a rason ket tapno matungpalna ti sasao ti mammadto: “Luktakto ti ngiwatko kadagiti pangngarig, ipalawagkonto dagiti banag a nailemmeng manipud idi pannakabangon ti lubong.” Ngem adda pay dakdakkel a gapu ngem iti daytoy. Ti panangusarna kadagiti pangngarig sinerbianna ti panggep a mangtulong a mangipanayag iti kababalin ti puso dagiti tattao.

Iti kinapudnona, kaaduan a tattao interesadoda laeng ken ni Jesus kas maysa a nalaing a managestoria ken managaramid iti datdatlag, saan a kas maysa a mapagserbian nga Apo ken suroten nga awan agumna. Dida kayat ti pariribuk kadagiti panangmatmatda kadagiti bambanag wenno ti wagas ti panagbiagda. Dida kayat a ti mensahe ti sumagepsep iti kasta ti kawadwadna. Gapuna kinuna ni Jesus:

“Gapuna kasaok ida kadagiti pangngarig, ta kitkitaenda, dida makita, ket dengdenggenda, dida mangngeg ken dida maawatan; ket matungpal kadakuada ti padto ni Isaias, a kunana, ‘ . . . Ta ti puso daytoy nga umili nabibineg.’”

“Ngem,” intuloy ni Jesus, “naragsak dagiti matayo ta makakitada, ken dagiti lapayagyo ta makangngegda. Ta pudno kunak kadakayo, Adu dagiti mammadto ken nalinteg a tinarigagayanda a kitaen dagiti makitayo ket dida nakita ida, ken denggen dagiti mangngegyo ket dida nangngeg ida.”

Wen, dagiti 12 nga apostol ken dagidiay kaduada ti addaan umawat a puspuso. Gapuna kinuna ni Jesus: “Ta kadakayo naited ti panangammo kadagiti sagrado a palimed ti pagarian ti langit, ngem kadakuada saan a maited.” Gaput’ tarigagayda ti pannakaawat, impaayan ni Jesus dagiti adalanna ti panangilawlawag ti pangngarig ti agmulmula.

“Ti bin-i isu ti sao ti Dios,” kinuna ni Jesus, ket ti daga isu ti puso. Maipapan iti bin-i a naimula iti denna ti natangken a dalan, inlawlawagna: “Kalpasanna umay ti Diablo ket ikkatenna ti sao iti pusoda tapno dida patien ken dida maisalakan.”

Iti kasumbangirna, ti bin-i a naimula iti daga a nakabatbato kaipapananna ti puspuso dagiti tattao nga immawat iti sao a siraragsak. Nupay kasta, gapu ta ti sao ket saan a nakaramut unay kadagita a puspuso, dagitoy a tattao matnagda inton tiempo ti pannakasuot wenno no umay ti pannakaidadanes.

Ket no maipapan iti bin-i a nagtinnag kadagiti kasisiitan, intuloy ni Jesus, kaipapanan daytoy dagiti tattao a nakangngeg iti sao. Dagitoy, nupay kasta, ket nalpesda kadagiti panagagawa ken gamgameng ken ragragsak iti daytoy a biag, ket naan-anay a nalpesda ket awan inyegda a pulos iti kinanaan-anay.

Kamaudiananna, no maipapan iti bin-i a nagtinnag iti nadam-eg a daga, kinuna ni Jesus, dagitoy dagidiay, kalpasan ti pannakangngegda iti sao nga addaan iti nasayaat ken naimbag a puso, tinaginayonda dayta ket nagbungada a binuyogan ti panagibtur.

Anian a nabendisionan dagitoy nga ad-adalan a nangsapul ken ni Jesus tapno magun-odanda ti pannakailawlawag ti pannursurona! Inranta ni Jesus a maawatan dagiti pangngarigna, tapno makaited ti kinapudno kadagiti dadduma. “Maiyeg aya ti maysa a silaw tapno maikabil iti uneg ti salop wenno iti sirok ti pagiddaan?” insaludsod ni Jesus. Saan, “daytat’ naikabil iti pagsilawan.” Gapuna innayon ni Jesus: “Gapuna, imdenganyo ti mangngegyo.” Mateo 13:10-23, 34-36; Marcos 4:10-25, 33, 34; Lucas 8:9-18; Salmo 78:2; Isaias 6:9, 10.

◆ Apay a nagsao ni Jesus kadagiti pangngarig?

◆ Kasanot’ panangipakita dagiti adalan ni Jesus a naidumada kadagiti umariwekwek?

◆ Ania a panangilawlawag ti inted ni Jesus iti pangngarig ti agmulmula?