Dagiti pamay-an iti panagaramat iti iket a pagdaklis idi un-unana ket nalabit kaasping unay dagiti pamay-an a nausar iti Makintengnga a Daya kadagiti kallabes a tiempo. Maitinnag daytoy nga iket manipud kadagiti barangay tapno mapalawlawan ti maysa a pangen ti ik-ikan, ket maipatakdang dagiti atiddog a tali a naikapet kadagiti agsumbangir nga ungto ti iket, ket ti sumagmamano a tattao iti agsumbangir a tali in-inut nga iguyodda nga ipatakdang ti iket kas sinan-arko. (Mt 13:47, 48) Ti sabali pay a pamay-an isu ti panamagsinnabet kadagiti ungto ti iket tapno maporma ti maysa nga umakikid a sinansirkulo. Kalpasanna, dagiti mangngalap bumatokda ket guyodenda ti makimbaba a paset a naikkan ti padagsen, iti kasta mangaramidda iti pannakalansad. Kalpasan daytoy, mayaon ti iket ken maikarga iti maysa a barangay wenno ad-adu pay. (Lu 5:6, 7) No dadduma, umuna a maiguyod ti iket ken maipan iti ab-ababaw a danum sakbay a maala ti nagyanna.​—Idiligyo ti Jn 21:8, 11.

Nadalus ken Narugit. Nupay ti sirib ni Ari Solomon saklawenna ti pannakaammo iti nakaparsuaan, a pakairamanan ti ik-ikan (1Ar 4:33), awan uray maysa nga espesipiko a kita ti ikan ti nainaganan iti Kasuratan. Nupay kasta, iti Mosaiko a Linteg, napagduma ti nadalus ken narugit nga animal iti danum. Ti laeng an-animal iti danum nga addaan pigar ken siksik ti naibilang a nadalus a pagtaraon. Karaman kadagiti naibilang a narugit isu ti paltat, igat, igat-berkakan, pagi, pating, kappi wenno rasa, ken udang, nga adu kadagita ti agtartaraon iti basura ken agruprupsa a banag ken masansan a nakontaminaran iti bakteria a pakaigapuan ti tipus ken paratyphoid fever. (Le 11:9-12) Gapuna, dagiti mangngalap nga Israelita kasapulan idi nga ilasinda dagiti nasayaat nga ikan manipud kadagidiay di nasayaat a pagtaraon, maysa a punto a naitampok iti pangngarig ni Jesus maipapan iti iket.​—Mt 13:47, 48.