HERODIAS

Ti asawa ni Herodes Antipas. Ni Herodias, babaen iti anakna a ni Salome, kiniddawna ti ulo ni Juan a Manangbautisar idi 32 K.P., ket naited dayta kenkuana. (Mr 6:22-28) Ti amana a ni Aristobulo (anak ni Herodes a Dakkel iti maikadua nga asawana a ni Mariamne I) ken ti inana ket agkasinsin. Kabsatna ni Herodes Agripa I, a nangpapatay ken apostol Santiago a kabsat ni Juan.​—Ara 12:1, 2.

Immuna a nakiasawa ni Herodias iti ulitegna, ti kabsat ni amana, sabali pay nga anak ni apongna a Herodes a Dakkel babaen iti maikatlo nga asawana a ni Mariamne II. Dayta immuna nga asawana ket kadawyan a maaw-awagan Herodes Felipe tapno maiduma iti Felipe nga agturay iti distrito ti Iturea ken Traconite. (Lu 3:1) Ni Herodes Felipe, nga uliteg ken asawa ni Herodias, pinutotna ni Salome, nabatad a bugbugtong nga anakna. Nupay kasta, isu indiborsio ni Herodias ket nakiasawa iti kabsat-iti-ama ni Herodes Felipe a ni Herodes Antipas, maysa met nga anak ti apongna a ni Herodes a Dakkel babaen iti maikapat nga asawana a ni Malthace. Ni Herodes Antipas, nga agturay iti distrito (iti literal, “ti tetrarka”) iti daydi a tiempo, ken inawagan ni Jesu-Kristo iti “dayta a sora” (Lu 13:31, 32), indiborsiona met ti immuna nga asawana, maysa nga anak a babai ti Nabataeano nga ari a ni Aretas ti Arabia, tapno maasawana ni Herodias.

Ngarud, adda rason ni Juan a Manangbautisar a mangkondenar iti panagasawa da Herodias ken Herodes Antipas, yantangay agpadpada a maiparit ken imoral dayta iti sidong ti linteg dagiti Judio, ket gapu iti panangaramidna iti dayta naipisok ni Juan iti pagbaludan ket idi agangay naputolan ti ulona. Gapu iti natured ken nalinteg a panangkondenar ni Juan, timmaud ti napait a gura ni Herodias ket ginundawayanna ti oportunidad a maipapatayna ti mammadto​—Mt 14:1-11; Mr 6:16-28; Lu 3:19, 20; 9:9.

Ti kabsat ni Herodias a ni Herodes Agripa I nagsubli manipud Roma idi 38 K.P., a nadutokan idin nga ari. Daytoy ti namagluksaw unay ken Herodias, ta ti asawana, nupay maysa nga anak ti ari, nagtalinaed laeng nga agturay iti distrito. Gapuna saan a namingga a nangpilpilit iti asawana agingga a napan met idiay Roma a mangin-inanama a makoronaan met kas ari nga addaan iti pagarian. Kinuna ni Flavius Josephus a ti kabsat ni Herodias a ni Agripa sililimed a nagipatulod iti sursurat ken Emperador Caligula, a kadagita a surat ak-akusaranna a makikumkumplot ni Antipas kadagiti taga Partia. Kas nagbanaganna, napagtalaw ni Antipas ket naipan idiay Gaul; kimmuyog kenkuana ni Herodias.​—Jewish Antiquities, XVIII, 240-256 (vii, 1, 2); The Jewish War, II, 181-183 (ix, 6).