Maitibkolka Kadi Gapu ken Jesus?

 1. Idi damo nga impakaammom ti mensahe ti Biblia iti sabsabali, ania ti nakasdaawam a reaksionda?

MALAGIPMO kadi idi nabigbigmo a nasarakamon ti kinapudno? Nalaka a maawatan ken nakalawlawag dagiti pannursuro ti Biblia a naammuam! Impagarupmo a maragsakan ti amin no maammuanda dagiti nasursurom. Kombinsidoka a gapu iti mensahe ti Biblia, maaddaanda iti naragsak a biag ita ken nagsayaat a namnama iti masanguanan. (Sal. 119:105) Isu a sigagagar nga impakaammom iti amin a gagayyem ken kakabagiam dagiti kinapudno a naammuam. Ngem ania ngay ti napasamak? Nasdaawka ta adu kadakuada ti saan a namati iti imbagam.

2-3. Idi kaaldawan ni Jesus, ania ti reaksion ti kaaduan kenkuana ken iti mensahena?

² Ditay koman pagsiddaawan no apay a saan a mamati ti dadduma iti mensahe nga ikaskasabatayo. Idi kaaldawan ni Jesus, saan a namati ti kaaduan, uray no nagaramid kadagiti milagro, a mangpaneknek a supsuportaran isuna ti Dios. Kas pagarigan, pinagungar ni Jesus ni Lazaro—maysa a milagro a saan a makontra dagiti bumusbusor kenkuana. Nupay kasta, dagiti lider dagiti Judio saanda latta nga inawat ni Jesus kas ti Mesias. Kayatda pay ketdi a patayen ni Jesus ken ni Lazaro!—Juan 11:47, 48, 53; 12:9-11.

³ Ammo ni Jesus a saan a bigbigen ti kaaduan nga isu ti Mesias. (Juan 5:39-44) Imbagana kadagiti adalan ni Juan a Mammautisar: “Naragsak daydiay saan a maitibkol gapu kaniak.” (Mat. 11:2, 3, 6) Apay a nagadu ti saan a namati ken Jesus?

 4. Ania ti usigentayo iti daytoy nga artikulo?

⁴ Iti daytoy nga artikulo, ken iti sumaruno, usigentayo ti dadduma a rason no apay nga adu ti saan a namati ken Jesus idi umuna a siglo. Usigentayo met no apay nga ipalpalubos ti adu ita a maitibkolda. Kangrunaanna, ammuentayo no ania ti aramidentayo tapno bumileg ti pammatitayo ken Jesus ket ditay maitibkol.

 5. Apay a nalabit impagarup ti dadduma a saan a ni Jesus ti naipadto a Mesias?

⁵ Adu ti naitibkol gapu iti lugar a nagtaudan ni Jesus. Binigbigda a nalaing a mannursuro ni Jesus ken makaaramid kadagiti milagro. Ngem para kadakuada, maysa laeng isuna nga anak ti pobre a karpintero. Ken taga-Nazaret isuna, maysa a siudad a mabalin a matagtagibassit idi. Uray ni Natanael, a nagbalin nga adalan ni Jesus, imbagana idi damo: “Adda kadi asinoman a naimbag nga agtaud iti Nazaret?” (Juan 1:46) Mabalin a saan a bilib ni Natanael iti siudad a pagnanaedan ni Jesus. Wenno mabalin a pampanunotenna ti padto iti Mikias 5:2 a mangibagbaga a mayanak ti Mesias iti Betlehem, saan nga iti Nazaret.

 6. Ania koma ti nakatulong kadagiti tattao idi kaaldawan ni Jesus tapno bigbigenda nga isu ti Mesias?

⁶ Ania ti kuna ti Kasuratan? Impadto ni propeta Isaias a dagiti bumusor ken Jesus dida ikankano ‘dagiti detalye ti henerasion’ maipapan iti Mesias. (Isa. 53:8) Naipadto ti adu kadagita a detalye. No inadalda la koma ti amin a detalye, naammuanda koma a ni Jesus ket nayanak iti Betlehem ken kaputotan ni Ari David. (Luc. 2:4-7) Isu a ti lugar a nakayanakan ni Jesus ket maitunos iti padto iti Mikias 5:2. Ania ngarud ti nagbalin a problema? Dagus a nagkonklusionda uray no kurang ti ammoda a detalye maipapan kenkuana. Gapu iti dayta, naitibkolda.

 7. Apay nga adu ita ti saan a dumngeg kadagiti adipen ni Jehova?

⁷ Kasta met la kadi ti problema ita? Wen. Nanumo ti biag ti kaaduan nga adipen ni Jehova. Adu ti mangibilang kadakuada kas ‘awanan adal ken ordinario a tattao.’ (Ara. 4:13) Kuna ti dadduma a saan a mabalin a mangisuro dagiti adipen ti Dios maipapan iti Biblia ta saanda met a naggraduar kadagiti mabigbigbig a seminario wenno narelihiosuan nga eskuelaan. Adda met dagiti mangibaga a dagiti Saksi ni Jehova ket “relihion dagiti Americano,” nupay kinaagpaysuanna, agarup 1 laeng iti kada 7 a Saksi ni Jehova ti agnanaed iti United States. Naibaga met iti dadduma a dagiti Saksi ket saan kano a mamati ken Jesus. Iti panaglabas dagiti tawen, naawagan dagiti adipen ni Jehova iti “Komunista,” “espia ti America,” ken “extremist.” Naitibkol dagiti nakangngeg kadagita nga estoria ta saanda nga ammo wenno akseptaren no ania a talaga ti agpayso.

 8. Sigun iti Aramid 17:11, ania ti masapul nga aramiden dagiti tattao no kayatda a maammuan no siasino dagiti adipen ti Dios ita?

⁸ Ania ti aramiden ti maysa tapno saan a maitibkol? Masapul nga ammuen dagiti tattao dagiti umiso a detalye. Dayta ti inaramid ni Lucas a maysa kadagiti nangisurat iti Ebanghelio. Inkagumaanna a ‘sukimaten a naimbag amin’ a detalye. Kayatna a dagiti agbasa kadagiti insuratna ‘masiguradoda nga umiso’ dagiti naammuanda maipapan ken Jesus. (Luc. 1:1-4) Dagiti Judio iti nagkauna a Berea ket kas ken Lucas. Idi damo a nangngegda ti naimbag a damag maipapan ken Jesus, inkomparada dayta iti Hebreo a Kasuratan tapno masiguradoda no agpayso met laeng dagiti nangngegda. (Basaen ti Aramid 17:11.) Kasta met ti masapul nga aramiden dagiti tattao ita. Masapul nga ikomparada ti ibagbaga ti Kasuratan ken dagiti insuro kadakuada dagiti adipen ti Dios. Masapul met nga adalenda dagiti naaramidan ti ili ni Jehova iti agdama a tiempotayo. No mangaramidda iti umiso a “background check” wenno agsukimatda a naimbag, saandanto laeng a basta agkonklusion wenno nalaka a mamatpati iti mangngegda.

 9. Ania ti napasamak idi saan a kayat ni Jesus ti mangipakita iti pagilasinan manipud langit?

⁹ Idi kaaldawan ni Jesus, saan a kontento ti dadduma kadagiti nagsayaat nga insurona. Kayatda pay a paneknekanna nga isu ti Mesias babaen ti panangipakitana iti “pagilasinan manipud langit.” (Mat. 16:1) Nalabit gapu dayta iti di umiso a pannakaawatda iti Daniel 7:13, 14. Nupay kasta, saan pay nga idi ti tiempo nga inkeddeng ni Jehova a matungpal dayta a padto. Umdas koman dagiti isursuro idi ni Jesus tapno makombinsirda nga isu ti Mesias. Ngem idi dina kinayat ti mangipakita iti kidkiddawenda a pagilasinan, naitibkolda.—Mat. 16:4.

10. Kasano a tinungpal ni Jesus ti insurat ni Isaias maipapan iti Mesias?

¹⁰ Ania ti kuna ti Kasuratan? Maipapan iti Mesias, insurat ni propeta Isaias: “Saanto nga agikkis wenno agpukkaw, ken saannanto nga ipangngeg ti timekna iti kalsada.” (Isa. 42:1, 2) Intungpal ni Jesus ti ministeriona a dina inturong iti bagina ti pammadayaw. Saan a nagibangon iti dadakkel a templo ken saan a nagisuot kadagiti espesial a narelihiosuan a bado. Dina met imbilin a maawagan isuna kadagiti natan-ok ken narelihiosuan a titulo. Idi nabista, dina pinadas a pagbiliben ni Ari Herodes babaen ti panangaramidna iti milagro nupay agpegpeggad idin ti biagna. (Luc. 23:8-11) Nangaramid met ketdi ni Jesus kadagiti milagro, ngem ti panangikasabana iti naimbag a damag ti kapatgan kenkuana. “Dayta ti panggep nga immayak,” imbagana kadagiti adalanna.—Mar. 1:38.

11. Ania dagiti di umiso a kapanunotan ti dadduma ita?

¹¹ Kasta met la kadi ti problema ita? Wen. Adu ita ti bilib iti nagdadakkel a katedral a naglaon iti nagngingina nga obramaestra dagiti artist, kadagiti lider ti relihion nga addaan iti nagtatan-ok a titulo, ken kadagiti seremonia a nalipatanen ti kaaduan ti nagtaudan ken kaipapanan dagita. Ania ngay ti masursuro dagiti tattao maipapan iti Dios ken kadagiti panggepna no umatenderda kadagiti kasta a narelihiosuan a panagtataripnong? Ngem dagiti umatender kadagiti gimongtayo masursuroda dagiti kayat ni Jehova nga aramidentayo ken no kasanotayo nga agbiag maitunos iti pagayatanna. Nadalus ken adu ti pakausaran dagiti Kingdom Hall-tayo, ngem saanda a nagarbo. Dagiti mangidadaulo kadatayo ket saan nga agisuot iti abito wenno espesial a bado; saanda met a kayat a maawaganda iti nagtatan-ok a titulo. Ti Sao ti Dios ti nakaibasaran dagiti pannursuro ken patpatientayo. Nupay kasta, adu ita ti maitibkol ta pagarupenda a simple unay ti panagdaydayawtayo ken dagiti isursurotayo ket saan a maitunos iti kayatda a denggen.

12. Kas nailawlawag iti Hebreo 11:1, 6, ania koma ti rumbeng a nakaibatayan ti pammatitayo?

¹² Ania ti aramidentayo tapno ditay maitibkol? Imbaga ni apostol Pablo kadagiti Kristiano nga agnanaed idiay Roma: “Adda pammati gapu iti nangngeg. Adda met nangngeg gapu ta naikasaba ti sao maipapan ken Kristo.” (Roma 10:17) Masapul ngarud a naibatay ti pammatitayo iti panagadal iti Kasuratan, saan a kadagiti di nainkasuratan a narelihiosuan a seremonia, kasanoman kapintas a kitaen dagita. Masapul nga addaantayo iti nabileg a pammati a naibatay iti umiso a pannakaammo ta “imposible a naan-anay a maparagsak ti Dios no awan ti pammati.” (Basaen ti Hebreo 11:1, 6.) Saan ngarud a kasapulan a makakitatayo iti nakaskasdaaw a pagilasinan manipud langit tapno mapaneknekan a nasarakantayon ti kinapudno. Ti panagadaltayo a naimbag kadagiti makapabileg-pammati a pannursuro ti Biblia ket umdasen tapno kombinsidotayo nga adda kadatayo ti kinapudno ken maikkat ti aniaman a panagduaduatayo.

13. Apay nga adu ti nangkondenar ken Jesus?

¹³ Idi kaaldawan ni Jesus, nasdaaw dagiti adalan ni Juan a Mammautisar gapu ta saan nga agay-ayunar dagiti adalan ni Jesus. Inlawlawag ni Jesus nga awan ti rason nga agayunarda gapu ta sibibiag pay laeng isuna. (Mat. 9:14-17) Nupay kasta, dagiti Fariseo ken ti dadduma pay a bumusbusor ken Jesus kinondenarda isuna gapu ta dina sursuroten dagiti kostumbre ken tradisionda. Nakaungetda idi pinaimbagna dagiti masakit iti aldaw ti Sabbath. (Mar. 3:1-6; Juan 9:16) Iti sabali a bangir, sipapannakkel nga ibagbagada a sursurotenda ti Sabbath; ngem okey laeng kadakuada ti panagnegosio iti templo. Nakapungtotda idi kinondenar ida ni Jesus gapu iti dayta. (Mat. 21:12, 13, 15) Permi met ti pungtot dagiti kinasabaan ni Jesus iti sinagoga idiay Nazaret ta nagusar kadagiti pasamak iti historia a mangipakita nga agimbubukodanda ken awan pammatida. (Luc. 4:16, 25-30) Ti ninamnamada ket naiduma kadagiti inaramid ni Jesus.—Mat. 11:16-19.

14. Apay a kinondenar ni Jesus dagiti tradision ti tao a saan a maitunos iti Kasuratan?

¹⁴ Ania ti kuna ti Kasuratan? Imbaga ni Jehova babaen ken propeta Isaias: “Kuna dagitoy a tattao nga umasidegda kaniak, ken daydayawendak iti bibigda, ngem adayo kaniak ti pusoda; ken agbutengda laeng kaniak gapu kadagiti bilin ti tao a naisuro kadakuada.” (Isa. 29:13) Rumbeng laeng a kondenaren ni Jesus dagiti tradision ti tao a saan a maitunos iti Kasuratan. Dagidiay mangibilang a napatpateg dagiti linteg ken tradision ti tao ngem iti Kasuratan linaksidda ni Jehova ken ti imbaonna a Mesias.

15. Ania ti di magustuan ti adu ita maipapan kadagiti Saksi ni Jehova?

¹⁵ Kasta met la kadi ti problema ita? Wen. Adu ti makasuron no saan a makiraman dagiti Saksi ni Jehova kadagiti di nainkasuratan a tradision, kas iti birthday ken Christmas. Makaunget met ti dadduma no saan a makipaset dagiti Saksi ni Jehova kadagiti nasionalistiko a selebrasion wenno dida sursuroten dagiti kostumbre iti panagminatay a saan a maitunos iti Sao ti Dios. Maitibkolda ta mabalin a sipapasnek a patienda a ti pamay-an ti panagdaydayawda ti an-anamongan ti Dios. Ngem dida maparagsak ti Dios no surotenda dagiti tradision ti lubong imbes a dagiti nalawag a pannursuro ti Biblia.—Mar. 7:7-9.

16. Sigun iti Salmo 119:97, 113, 163-165, ania ti masapul nga aramidentayo ken masapul a liklikantayo?

¹⁶ Ania ti aramidentayo tapno ditay maitibkol? Masapul a paunegentayo ti ayattayo kadagiti linteg ken prinsipio ni Jehova. (Basaen ti Salmo 119:97, 113, 163-165.) No ay-ayatentayo ni Jehova, liklikantayo ti aniaman a tradision a saanna a pakaragsakan. Ditay ipalubos nga adda aniaman a mangagaw iti ayattayo ken Jehova.

17. Ania ti ninamnama ti adu idi kaaldawan ni Jesus a nakaitibkolanda?

¹⁷ Idi kaaldawan ni Jesus, adda dagiti mayat iti dagus a napolitikaan a panagbalbaliw. Ninamnamada a wayawayaan ida ti Mesias iti panagturay dagiti manangirurumen a Romano. Ngem idi padasenda a pagbalinen ni Jesus nga arida, dina kinayat. (Juan 6:14, 15) Madanagan met idi ti dadduma, a pakairamanan dagiti papadi. Ngamin, baka mangaramid ni Jesus iti napolitikaan a panagbalbaliw ket makagura dagiti Romano, a nangted iti pannakabalin ken autoridad kadagita a lider ti relihion. Gapu kadagita a pakadanagan, adu a Judio ti naitibkol.

18. Ania dagiti padto ti Biblia maipapan iti Mesias a di inkankano ti adu?

¹⁸ Ania ti kuna ti Kasuratan? Nupay ibaga ti adu a padto nga agbalinto ti Mesias a naballigi a Mannakigubat, impakita ti dadduma a padto a masapul a matay nga umuna gapu kadagiti basoltayo. (Isa. 53:9, 12) Apay ngarud a di umiso dagiti ninamnamada? Idi kaaldawan ni Jesus, adu ti di nangikankano kadagiti padto a saan a nangikari iti dagus a solusion kadagiti problemada.—Juan 6:26, 27.

19. Ania dagiti namnamaen ti adu ita a nakaitibkolanda?

¹⁹ Kasta met la kadi ti problema ita? Wen. Adu ita ti maitibkol gapu ta neutraltayo iti politika. Namnamaenda nga agbotostayo no eleksion. Ngem para ken Jehova, no pilientayo ti maysa a tao a mangituray kadatayo, laklaksidentayo Isuna. (1 Sam. 8:4-7) Mabalin a pampanunoten met dagiti tattao a masapul nga agibangontayo kadagiti eskuelaan ken ospital ken tumulong kadagiti pobre. Maitibkolda ta nakapokustayo iti trabaho a panangasaba, saan nga iti panangsolbar kadagiti agdama a problema ti lubong.

20. Kas ipaganetget ti sasao ni Jesus iti Mateo 7:21-23, ania koma ti pagpokusantayo?

²⁰ Ania ti aramidentayo tapno ditay maitibkol? (Basaen ti Mateo 7:21-23.) Nakapokustayo koma iti imbilin ni Jesus nga aramidentayo. (Mat. 28:19, 20) Ditay koma agpasinga kadagiti isyu iti politika ken kagimongan. Ay-ayatentayo dagiti tattao ken maseknantayo kadagiti problemada. Ngem ammotayo a ti kasayaatan a panangtulongtayo kadakuada ket isuro kadakuada ti Pagarian ti Dios ken tulongan ida nga agbalin a gagayyem ni Jehova.

21. Ania koma ti determinasiontayo?

²¹ Iti daytoy nga artikulo, inusigtayo ti uppat a nakaitibkolan ti adu idi umuna a siglo isu nga inlaksidda ni Jesus ken mabalin met a dagita ti rason a laksiden ti dadduma ita dagiti pasurot ni Jesus. Ngem dagita la kadi ti masapul a liklikantayo? Saan. Iti sumaruno nga artikulo, usigentayo ti uppat pay a pakaitibkolan. Determinadotayo koma a saan a maitibkol ken pagtalinaedentayo a natibker ti pammatitayo!