PAGILASINAN

1. [Heb., ʼohth; Gr., se·meiʹon]. Maysa a banag, tignay, kasasaad, wenno di gagangay a pasamak wenno buya nga adda napateg nga ipaspasimudaagna iti agdama wenno iti masanguanan. Ti pagilasinan (Heb., ʼohth; Gr., se·meiʹon) mabalin a pammaneknek iti kinaumiso wenno iti autoridad, pakdaar nga adda dumteng a peggad, wenno mangitudo iti nainsiriban a dana a suroten.

Ti kaunaan a nadakamat a karaman kadagiti adu a pagilasinan nga impaay ni Jehova a mangiwanwan iti tao ket ti silsilaw iti langit, ti init ken bulan. (Ge 1:14) Agserbida a mangipatuldo iti tiempo, ken kas makitkita a pagilasinan maipapan iti kaadda ti Dios ken dagiti kualidadna. (Sal 19:1-4; Ro 1:19, 20) Kas nadakamat iti Jeremias 10:2, nabatad a ‘nagaligaget’ dagiti nasion gapu iti panagsapulda iti partaan kadagitoy a silsilaw kasta met kadagiti bituen, a kas iti astrolohia.

Usar Dagiti Pagilasinan. Nangipaay ni Jehova kadagiti pagilasinan kas pammasiguro a pudno ken mapangnamnamaan ti sasaona. (Jer 44:29; 1Sm 2:31-34; 10:7, 9; 2Ar 20:8-11) Impakita dagitoy a ti Dios ket idaldalanna idi ni Moises ken ti dadduma pay nga adipenna (Ex 3:11, 12; idiligyo ti Uk 6:17, 20-22), ti maysa nga apostol (2Co 12:12), ti kongregasion Kristiano (1Co 14:22).

Saan a kanayon a masapul ti pagilasinan tapno laeng mapaneknekan nga adda panangidalan ti Dios, kas iti kasasaad ni Juan a Manangbautisar. (Jn 10:41; Mt 11:9-11) Kasta met, makaaramid iti pagilasinan ti maysa nga ulbod a mammadto, ngem maibutaktak nga isu ket ulbod babaen iti pamay-an nga inted ni Jehova.​—De 13:1-5; 18:20-22; Isa 44:25; Mr 13:22; 2Te 2:9; Apo 13:13, 14; 19:20.

Ti sumagmamano a pagilasinan ket agserbi a pammalagip, mangipalagip, pakalaglagipan. (Ge 9:12-14; 17:11; Ro 4:11) Dagiti Sabbath ken ti Paskua ket nagpaay a mangipalagip a pagilasinan kadagiti Judio. (Ex 13:3-9; 31:13; Eze 20:12, 20) Mabalin nga agserbi a pakailasinan ti literal wenno simboliko a pagilasinan.​—Nu 2:2; Ex 12:13.

Pagilasinan a Nakiddaw ken Jesus. Bayat ti ministerio ni Jesus, nangaramid iti adu a pagilasinan a timmulong iti adu tapno mamatida kenkuana. (Jn 2:23) Ngem dagita a pagilasinan saanda a natukay dagiti natangken panagpuspusona a tattao tapno maaddaanda iti pammati. (Lu 2:34; Jn 11:47, 53; 12:37; idiligyo ti Nu 14:11, 22.) Idi a dagiti panguluen ti relihion namindua a kiniddawda ken Jesus a mangipakita kadakuada iti pagilasinan manipud langit, nalabit kayatda a paneknekanna nga isu ti Mesias babaen ti panangaramidna iti pagilasinan a naipadto iti Daniel 7:13, 14, a ti “anak ti tao” agparang buyogen dagiti ulep iti langlangit tapno alaenna ti pannakabalinna iti Pagarian. Ngem saan pay nga idi ti panawen a panangtungpal ti Dios iti dayta a padto, ket saan nga agpasikat ni Kristo tapno laeng mapagustuanna ti kabukbukodanda a tarigagay. (Mt 12:38; 16:1) Imbes ketdi, imbagana a ti laeng pagilasinan a maited kadakuada isu “ti pagilasinan ni Jonas a mammadto.” (Mt 12:39-41; 16:4) Idi nakaruaren ni Jonas iti tian ti nakadakdakkel nga ikan iti tallo nga aldaw a kaaddana iti dayta, napan nangasaba idiay Nineve. Isu a nagbalin ni Jonas a “pagilasinan” iti kabesera ti Asiria. “Ti pagilasinan ni Jonas” ket nakita ti kaputotan a nagbiagan ni Jesus idi nagyan ni Kristo iti tanem iti las-ud ti tallo nga aldaw ket kalpasanna napagungar, a ti pammaneknek iti dayta a pasamak ket inwaragawag dagiti adalanna. Ngarud ni Kristo ket nagserbi a pagilasinan iti dayta a kaputotan, ngem saan latta a nakombinsir iti dayta ti kaaduan a Judio.​—Lu 11:30; 1Co 1:22.

Pagilasinan ti Kaadda ni Kristo. Sakbay unay ti ipapatay ni Jesus, inyimtuod kenkuana dagiti apostolna: “Anianto ti pagilasinan ti kaaddam ken ti panungpalan ti sistema ti bambanag?” (Mt 24:3; Mr 13:4; Lu 21:7) Adda nalawag a nagdumaan daytoy a panagsaludsod ken dagiti panagkiddaw dagiti panguluen ti relihion iti pagilasinan. Dagidiay a panguluen saanda a binigbig ni Jesus kas Mesias ken Ari a Nadutokan idinto ta addadan sadiay a makakitkita ken Jesus ken dagiti ar-aramidenna. (Jn 19:15) Iti naminsan, nagkiddawda iti pagilasinan “tapno isu sulisogenda” (Lu 11:16); kasta met a nalabit ti dadduma ket kasla ken Herodes a kayatda laeng ti makakita kadagiti pagilasinan nga aramiden ni Jesus. (Lu 23:8) Saan a kasta dagiti adalan a nagimtuod maipapan iti pagilasinan ti kaadda ni Kristo ta binigbigdan ni Jesus kas Mesias ken Ari. (Mt 16:16) Ngem imbaga ni Jesus a ti Pagarian “saan nga umay a buyogen ti nakadkadlaw a pannakapaliiw.” (Lu 17:20) Gapuna (nupay di umiso nga impagarup dagiti apostol a ti Pagarian ket maipasdek ditoy daga; Ara 1:6), saanda idi a kayat ti agbalin a kas kadagiti Judio a panguluen no iti idadateng ti Pagarian, a bulsekda no maipapan iti kaadda ni Jesus. Ngarud, saan a namilagruan a pagilasinan a maaramid a mismo sadiay ti damdamagenda, no di ket pagilasinan nga agserbi a senial iti masanguanan.

Kas sungbat ni Jesus dineskribirna ti ragup a “pagilasinan” a buklen ti adu a pammaneknek, a pakairamanan ti gubgubat, ginggined, pannakaidadanes dagiti Kristiano, ken pannakaikasaba ti Pagarian. (Mt 24:4-14, 32, 33) Madama idi a pagsarsaritaanda ti pannakadadael ti Jerusalem ken ti templona idi a dagiti adalan nagdamagda ken Jesus iti “pagilasinan” (Lu 21:5-7), isu a ti sungbatna ket padpadto nga agaplikar iti Jerusalem ken Judea, a natungpal bayat ti panagbiagda. (Lu 21:20; Mt 24:15) Ngem karaman met iti sungbatna ti maipapan iti pannakaipasdek ti Pagarian ti Dios ken dagiti epekto dayta iti intero a sangatauan.​—Lu 21:31, 35.

“Pagilasinan ti Anak ti tao.” Iti dayta met laeng a gundaway kinuna ni Jesus kadagiti adalanna: “Ket iti kasta ti pagilasinan ti Anak ti tao agparangto iti langit, ket kalpasanna dagiti amin a tribu ti daga saplitendanto ti bagbagida iti panagun-unnoy, ket makitadanto ti Anak ti tao nga um-umay kadagiti ulep ti langit nga addaan pannakabalin ken dakkel a dayag.” (Mt 24:30; Lu 21:27) Sakbay unay nga imbagana dayta, dinakamatna ti maipapan ken mammadto Daniel. (Mt 24:15; Da 9:27; 11:31) Ket nabatad a sigun iti sasao nga inaramat ditoy ni Jesus, tuktukoyenna itan ti Daniel 7:13, 14, a sadiay ti maysa a sirmata inladawanna ti iyaadani “buyogen dagiti ulep iti langlangit . . . ti maysa a kasla anak ti tao” iti ayan ti “Kadaanan iti Al-aldaw” ken ti panangawatna iti ‘pagarian a saanto a madadael.’ Ipamatmat daytoy a “ti pagilasinan ti Anak ti tao” ket nainaig iti tiempo inton ipakaten ni Jesus ti pannakabalin ti Pagarian. Inyaplikar ni Jesus iti bagina ti termino nga “Anak ti tao” ken ti padto iti Daniel 7:13, 14.​—Mt 26:63, 64; Mr 14:61, 62.

Idi agarup 96 K.P., 26 a tawen kalpasan ti pannakadadael ti Jerusalem, nagsurat ni Juan maipapan iti bambanag a mapasamak iti masanguanan, ket nasirmatana nga “um-umay [ni Jesu-Kristo] a buyogen dagiti ulep, ket isu makitanto ti tunggal mata, ken dagidiay nangduyok kenkuana.” (Apo 1:1, 7) Gapuna, daytoy a sasao maipapan iti mapasamak kalpasan ti 96 K.P. ken ti kinuna ni Kristo a “pagilasinan ti Anak ti tao” ket agpada a tumukoy ken Jesus iti iyaayna buyogen dagiti ulep ken makita ti amin a tattao. (Kitaenyo ti ULEP.) Ngem masapul a laglagipen a nupay ti Griego a berbo a ho·raʹo, “makita,” a naaramat iti Mateo 24:30 ken Apocalipsis 1:7 ket mabalin a literal a kaipapananna ti “makakita iti maysa a banag, matmatan,” mabalin met nga aramaten iti mangiladawan a pamay-an, a kaipapananna ti pannakakita babaen iti isip, “mailasin, matarusan.”​—A Greek-English Lexicon, da H. Liddell ken R. Scott, rinebisar ni H. Jones, 1968, p. 1245, bin. 1.

Maipaay iti panamagdidilig iti “milagro,” “tanda,” ken “pagilasinan,” kitaenyo ti MILAGRO; TANDA.

2. [Heb., nes]. Ti Hebreo a sao a nes ket agparang a tumukoy iti nakapirme a teddek wenno kayo a naipasdek iti nangato a disso; agpadpada a literal ken piguratibo ti pannakaaramatna. Ngarud, daytoy ket saan a maysa a pagilasinan wenno senial a mangipalnaad iti mensahe, kas iti “pagilasinan nga asuk” (Uk 20:38, 40) wenno “apuy a pagilasinan” (Jer 6:1), nga adda sabali a Hebreo nga awag kadagita. Imbes ketdi, mabalin nga agpaay ti kasta a teddek kas pagdadanonan dagiti umili wenno buybuyot no aguummongda. (Isa 5:26; 13:2; 18:3; 30:17; 31:9; Jer 4:6, 21; 50:2; 51:12, 27; idiligyo ti Sal 60:4, Rbi8 ftn.) Kas pagarigan: Idi nga iti maysa a gundaway nagreklamo dagiti Israelita maipapan iti manna ken iti kaawan ti danum, dinusa ida ni Jehova babaen ti panangibaonna kadagiti nagita a serpiente iti tengngada. Idi impakita dagiti Israelita ti panagbabawida, ni Jehova binilinna ni Moises a mangsukog iti maysa a serpiente ket ikabilna dayta iti maysa a pagilasinan a teddek (nes). “Madagdagus a nangaramid ni Moises iti serpiente a gambang ket inkabilna iti pagilasinan a teddek; ket napasamak a no ti maysa a serpiente nakagatna ti maysa a tao ket minatmatanna ti gambang a serpiente, nagtalinaed ngarud a sibibiag.” (Nu 21:5-9) Nabatad a daytoy a pagilasinan a teddek ket permanente a naipatakder iti maysa a lugar ken awan duadua nga adda iti nangato a disso tapno makita dayta dagiti Israelita a kinagat dagiti serpiente.

Umasping iti dayta, ti Jerusalem a naipadto a maibangon manen ket nagbalin a pagilasinan dagiti natda a Judio idi 537 K.K.P. a panawandan ti dagdaga a nakaiwarawaraanda ket agsublida iti nalangalang a Jerusalem tapno bangonenda manen ti templo. (Isa 11:11, 12; idiligyo ti Isa 49:22; 62:10, 11.) Nupay kasta, daytoy a padto ket saan laeng a nagaplikar iti daydi a tiempo ti maikanem a siglo. Mabasa iti Isaias 11:10: “Ket mapasamakto iti dayta nga aldaw nga addanto ti ramut ni Jesse a sitatakder kas maysa a pagilasinan a maipaay iti il-ili.” Inyaplikar ni apostol Pablo dagitoy a sasao ken Kristo Jesus, daydiay mangituray iti nasnasion. (Ro 15:8, 12) Kasta met, tinukoy ni Jesus ti bagina kas ‘ti ramut ni David’ nga anak ni Jesse. (Apo 22:16) Gapuna ni Kristo Jesus dayta a pagilasinan kas agturturay nga Ari a sitatakder iti nailangitan a Bantay Sion.​—Idiligyo ti Heb 12:22; Apo 14:1.