Serioso a Banag ti Panangtarus Kadagiti Pagilasinan!
“Impapanko nga agsakit laeng ti ulo ni Andreas. Ngem awanen ti ganasna a mangan ken nangato ti gurigorna. Kimmaro ti sakit ti ulona, isu a nagdanagak. Idi simmangpet ni lakayko, impadoktormi ni Andreas. Ineksamen ti doktor dagiti sintomas ket dagus nga impaipanna ni Andreas iti ospital. Saan laeng gayam a sakit ti ulo ti rikriknaenna. Ni Andreas ket addaan iti meningitis. Nataming ti sakitna ket immimbag manen.”—Gertrud, maysa nga ina idiay Alemania.
TI KAPADASAN ni Gertrud ket napasaran met ti adu a nagannak. Mapaliiwda dagiti pagilasinan a mangipakita a nalabit agsakit ti anakda. Nupay saan nga amin a sakit ket serioso, mabalin a pagbabawyanto dagiti nagannak no iyaleng-alengda dagiti sintomas nga agsakit dagiti annakda. Napateg unay ti panangpaliiw kadagiti pagilasinan ken panangaramid kadagiti maitutop a tignay. Serioso a banag dayta.
Pudno met dayta no mainaig kadagiti dadduma pay a banag malaksid iti salun-at. Maysa a maitutop a pagarigan ket ti didigra a tsunami idi Disiembre 2004 kadagiti lugar iti aglawlaw ti Indian Ocean. Dagiti ahensia kadagiti pagilian a kas iti Australia ken Hawaii namonitorda ti napigsa a ginggined iti makin-amianan a Sumatra ken nasaksakbay a naammuanda ti posible a napeggad nga epektona. Kaskasdi, awan ti ahensia dagiti tattao kadagiti agpegpeggad a lugar tapno maipakaammo kadakuada ti aniaman a ballaag ket makapagtignayda. Kas resulta, nasurok a 220,000 ti natay.
Dagiti Adayo a Napatpateg a Pagilasinan
Idi adda ditoy daga, nangipaay ni Jesu-Kristo iti leksion maipapan iti panangpaliiw kadagiti pagilasinan ken no kasano ti rumbeng a panagtignay. Sarsaritaenna ti banag nga adayo a napatpateg. Isalaysay ti Biblia: “Immasideg kenkuana dagiti Fariseo ken dagiti Saduceo ket, tapno sulisogenda, kiniddawda kenkuana a mangipakita kadakuada iti pagilasinan manipud langit. Kas sungbat kinunana kadakuada: ‘No dumteng ti rabii nakayugalianyo a kunaen, “Nasayaatto ti paniempo, ta ti tangatang lumabaga a kas iti apuy”; ket iti bigat, “Nalam-ekto, natutudo a panawen ita, ta ti tangatang lumabaga a kas iti apuy, ngem nalulem ti buyana.” Ammoyo no kasano nga itarusan ti langa ti tangatang, ngem dagiti pagilasinan dagiti tiempo saanyo a kabaelan nga itarusan.’”—Mateo 16:1-3.
Iti panangdakamatna kadagiti “pagilasinan dagiti tiempo,” impasimudaag ni Jesus a dagiti Judio a dumdumngeg kenkuana idi umuna a siglo rumbeng nga ammoda ti kinaganat ti tiempo a pagbibiaganda. Iti di agbayag, mapasaran idi ti Judio a sistema ti bambanag ti didigra a mangapektar kadakuada amin. Sumagmamano nga aldaw sakbay ti ipapatayna, dinakamat ni Jesus kadagiti adalanna ti maipapan iti sabali pay a pagilasinan—ti pagilasinan ti kaaddana. Ti imbagana iti dayta a gundaway ket napateg unay iti tunggal maysa kadatayo ita.