Kamaudiananna, ti simboliko nga aldaw a panagobra nagpatingga iti ipapatay ni Jesus, ket dimtengen ti oras a panangted ti tangdan kadagiti nagobra. Ti karkarna a pagalagadan a panangbayad kadagiti maud-udi nga umun-una ti nasurot, kas nailawlawag: “Ket idi sumipngeten, ti apo ti kaubasan kinunana idi pagtaltalkanna, ‘Ayabam dagiti mangmangged ket tangdanam ida iti sangsangkapada, manipud kadagiti naudi agingga kadagiti immun-una.’ Idi ngarud simmangpet dagidi simrek iti asideg ti oras a maikasangapulo ket maysa, immawat ti tunggal maysa kadakuada iti maysa a denario. Ket idi immay dagiti immun-una, impagarupda nga umawatdanto iti nawadwadwad; ngem kasta met nga immawat ti tunggal maysa a tao iti maysa a denario. Ket idi nakaawatdan nagtanabutobda iti maisalungasing iti ama ti sangakabbalayan, a kunkunada, ‘Dagitoy naudi nagtrabahoda iti maymaysa nga oras laeng; ket intuladmo ida kadakami a nagtrabaho a nagmalmalem iti kainitan!’ Ket isu simmungbat ket kinunana iti maysa kadakuada, ‘Gayyem, diak agaramid kenka ti ranggas. Dika aya nakitulag kaniak iti maysa a denario? Alaem ti kukuam ket inkan. Kayatko nga ikkan daytoy naudi iti kapadpada ti naited kenka. Saan aya a maipalubos kaniak nga aramidek ti kayatko iti kukuak? Wenno dakes aya ta matam agsipud ta naimbagak?’” Kas panangigibusna inulit ni Jesus ti punto nga impaayna nga immun-una, a kunkunana: “Iti kasta dagiti maudi isudanto dagiti umuna, ket dagiti umuna isudanto dagiti maudi.”

Di nagbayag dagiti immuna a nakitulagan nakitada a dagiti adalan ni Jesus ket natangdanandan, ket nakitada ida a mangus-usaren iti simboliko a denario. Ngem kayatda ti dakdakkel pay ngem ti nasantuan nga espiritu ken kadagiti nainayon a pribilehio ti Pagarian. Ti panagtanabutobda ken isusuppiatda ti naipakita iti langa ti panangidadanesda kadagiti adalan ni Kristo, dagiti “maud-udi” a nagobra iti kaubasan.

Dayta kadi umuna-siglo a kaitungpalan ti kakaisuna a kaitungpalan ti pangngarig ni Jesus? Saan, dagiti klero ti Kakristianuan iti daytoy maika-20 a siglo ti, babaen dagiti saad ken responsabilidadda, isuda “dagiti umun-una” a naawis nga agobra iti simboliko a pagubasan ti Dios. Ibilbilangda dagiti dedikado a manangaskasaba a naitimpuyog iti Watch Tower Bible and Tract Society kas “dagiti maud-udi” a maaddaan ti maikari a pannakaituding iti serbisio ti Dios. Ngem, iti kinapudnona, dagitoy mismo a lalaisen dagiti klero ti immawat ti denario​—ti dayaw nga agserbi kas dagiti napulotan nga embahador ti nailangitan a Pagarian ti Dios. Mateo 19:30–20:16.