Ti Panagturpos ti Maika-128 a Klase ti Gilead

Naibaon Dagiti Misionero Tapno ‘Agaramidda Kadagiti Adalan’

“TAPNO maipakaammo ti naimbag a damag iti amin a nasion, nasken nga adda dagiti Kristiano a sidadaan a mangpanaw kadagiti pamilia ken lugarda tapno ikasabada ti naimbag a damag iti sabali a pagilian.” Dayta ti kinuna ni David Splane, a kameng ti Bagi a Manarawidwid dagiti Saksi ni Jehova tapno maisagana ti panunot ti tallaong para iti makapagagar ken makapabileg a programa.

Dayta a programa ket ti naangay idi Marso 13, 2010 a panagturpos ti maika-128 a klase ti Watchtower Bible School of Gilead. Agarup 8,000 ti timmabuno, agraman dagiti gagayyem, kapamilia, ken sangaili manipud iti 27 a pagilian.

“Saan a Nagur-uray Lattan Dagiti Adalan”

Kas tserman, linuktan ni Kabsat Splane ti programa babaen ti panangtalantanna iti bilin ni Jesus: “Inkayo ngarud ket mangaramidkayo iti ad-adalan kadagiti tattao iti amin a nasion.” (Mateo 28:19, 20) Impaganetgetna nga imbaon ni Jesus dagiti adalanna tapno danonenda dagiti tattao. Idi Pentecostes 33 K.P., dagiti tattao manipud Mesopotamia, Makin-amianan nga Africa, ken iti adu a paset ti Imperio ti Roma napanda idiay Jerusalem ket nangngegda ti naimbag a damag. Nupay kasta, “saan a nagur-uray lattan dagiti adalan a mapan kadakuada dagiti tattao iti amin a nasion,” kinuna ti espiker. “Nasken a mapanda iti kaadaywan a paset ti daga tapno sapulenda dagiti tattao.”​—Aramid 1:8.

“Saan laeng nga imbaga ni Jesus no ania ti aramiden dagiti adalanna,” kinuna ni Kabsat Splane. “Insurona pay no kasano nga aramidenda dayta. Saanna laeng nga imbaga nga agkararagda; insurona pay no kasano ti agkararag. Saanna laeng nga imbaga a mangasabada; impakitana pay no kasano ti mangasaba. Saanna laeng nga imbaga nga agbalinda a nasayaat a mannursuro; impakitana pay dagiti nasayaat, epektibo a wagas ti panangisuro.”

Kas panangpatalged iti rikna dagiti nagannak dagiti agturpos, inadaw ti tserman dagiti sasao ni Jesus kadagiti adalanna: “Adtoy! addaak kadakayo iti amin nga al-aldaw agingga iti panungpalan ti sistema ti bambanag.” (Mateo 28:20) Impanamnama ni Kabsat Splane iti tallaong nga itultuloy ni Jesus nga aywanan dagiti estudiante uray inton addadan kadagiti lugar a pakaibaonanda.

“Mapankayo ket Agpasindayagkayo”

Ni Anthony Morris a kameng ti Bagi a Manarawidwid pinaregtana ti klase a kunkunana: “Mapankayo ket agpasindayagkayo.” Kinunana nga adda dagiti maitutop ken di maitutop a kita ti panagpasindayag. Ti di maitutop a panagpasindayag iramanna ti panangpadayaw iti bagitayo. Nadeskribir iti 1 Corinto 1:31 ti maitutop a panagpasindayag: “Ti agpasindayag, agpasindayag koma mainaig ken Jehova.” Kinuna ni Kabsat Morris: “Maysa dayta a banag a maipagpannakkel​—ti maaddaan iti nauneg a pannakaawat ken pannakaammo maipapan ken Jehova a Dios. Kinapudnona, ti panangawit iti nasantuan a naganna ken ti panagbalin a maysa kadagiti Saksi ni Jehova ti katan-okan a pribilehiotayo amin.”​—Jeremias 9:24.

Kalpasanna, tapno ipaganetget ti espiker ti kinapateg ti panangipakaammo iti nagan ni Jehova, inestoriana ti kapadasan ti maysa a misionero idiay Africa. Maysa a misionero a kaduana ni baketna ti madama nga agbibiahe tapno mangipaay iti naibatay-Biblia a palawag idi a napasardengda iti maysa checkpoint. Maysa nga agkabannuag a soldado ti nangipaturong iti paltog kenkuana ken nagsaludsod maipapan iti kinasiasinona. Nalagip ni baketna ti nasursurona iti Gilead, ket inyarasaasna ken lakayna, “Ibagam a maysaka a Saksi ni Jehova ket mapanka agpalawag.” Impangagna ti balakad ni baketna, ket napalubosanda a lumasat iti checkpoint. Kabigatanna, nangngeg ti agassawa ti brodkas iti radio maipapan iti bilin ti presidente kadagiti soldado, a sapulenda dagiti mammapatay nga agpampammarang a misionero! Gapu ta nagpabigbigda kas Saksi ni Jehova imbes a kas misionero, saan a nagpeggad ti agassawa. Kinuna ni Kabsat Morris kas panangingudo iti palawagna: “Inton makasangpetkayo iti teritoriayo, mapankayo ket agpasindayagkayo. Agpasindayagkayo gapu iti amin nga itungpal ni Jehova bayat nga us-usarennakayo maipaay iti agnanayon a dayagna.”

“Itungpalyo Kadi ti Misionyo?”

Ni Geoffrey Jackson, a kameng ti Bagi a Manarawidwid ken dati a misionero, tinulonganna dagiti agturpos a mangutob iti dayta a saludsod. Inyimtuodna, “Ania ti kayattayo a sawen no ibagatayo a misionero ti maysa a tao?” Inlawlawagna a ti sao a “misionero” ket nagtaud iti ebkas a Latin a tumukoy iti maysa a tao wenno maysa a grupo a nakaawat iti naisangsangayan nga annongen. Kas Saksi ni Jehova, misiontayo nga ikasaba ti naimbag a damag tapno matulongantayo dagiti tattao a suminged iti Dios. Aramidentayo daytoy a trabaho kas panangtulad ken Jesu-Kristo, a di pulos nakalipat iti misionna ditoy daga. Kinuna ni Jesus ken ni Romano a Gobernador Poncio Pilato: “Maigapu itoy nga immayak iti lubong, tapno saksiak ti kinapudno.”​—Juan 18:37.

Ti espiker tinulonganna dagiti agturpos a mangutob iti salaysay ti Biblia maipapan iti gubat iti Jerico. Iti las-ud ti innem nga aldaw, dagiti mannakigubat nga Israelita sinapsapada ti bimmangon, insuotda ti kabalda, ket nagmartsada iti aglikmut ti Jerico, sa nagawidda met laeng kalpasanna. “Kasla karkarna ken minamaag dayta iti panangmatmat ti tao,” kinuna ti espiker. Innayonna pay a nalabit napanunot ti dadduma a soldado a kasla saysayangenda laeng ti panawenda. Ngem iti maikapito nga aldaw, nabilin dagiti Israelita a likmutenda ti siudad iti mamimpito a daras, ket kalpasanna iriawda ti dakkel nga ikkis ti gubat. Ania ti resulta? Interamente a narba dagiti pader ti Jerico!​—Josue 6:13-15, 20.

Nangdakamat ni Kabsat Jackson iti uppat a leksion a masursuro iti dayta a pasamak. (1) Nasken ti panagtulnog. Masapul a surotentayo ti pamay-an ni Jehova, a ditay ipagarup a nasaysayaat ti pamay-antayo. (2) Napateg ti pammati ken panagtalek ken Jehova. “Babaen iti pammati a narpuog dagiti pader ti Jerico,” saan ket a babaen ti panagusar iti pangrebba nga alikamen. (Hebreo 11:30) (3) Masapul ti panaganus. No kasta ti aramidenyo, ‘kamakamennakayto’ ti bendision ni Jehova. (Deuteronomio 28:2) (4) Dikay sumuko. Diyo pulos liplipatan ti misionyo. Kas pananggupgop iti palawagna, kinuna ni Kabsat Jackson: “No laglagipenyo dagita a leksion, maitungpalyo ti misionyo a mangidaydayaw ken mangipadayag ken Jehova.”

Dadduma Pay a Naitampok iti Programa

“Ipategyo ti Biblia ken ti Autorna.” Dayta ti tema nga impalawag ni Maxwell Lloyd, kameng ti United States Branch Committee. Kinunana iti klase, “Masapul nga ibilangyo ti Biblia kas sibibiag a libro.” Kalpasanna, impaayna kadakuada dagitoy a pammaregta: Diyo pulos ipalubos a lumammiis ti ayatyo ken Jehova a Dios. Saanyo nga ekspektaren a maawatan ti amin ti isursuroyo. Isuroyo dagiti kinapudno iti Biblia iti simple a pamay-an tapno umukuok dagita iti puso dagiti iyad-adalanyo. Agtalinaedkayo a napakumbaba. Diyo iparikna nga ad-adu ti ammoyo. Mangisurokayo babaen ti ulidan. Makita koma dagiti iyad-adalanyo a talaga nga ipatpategyo ti Biblia.

“Paliiwenyo a Nalaing Dagiti Wak.” Dayta ti paulo ti palawag ni Michael Burnett, instruktor iti klase ken dati a misionero. Kinunana nga adda dagiti gundaway nga agdanagtayo. Ngem laglagipentayo daytoy a balakad ni Jesus: “Paliiwenyo a nalaing a dagiti wak saanda nga agmula iti bin-i wenno uray agani, . . . ket kaskasdi taraonan ida ti Dios.” (Lucas 12:24) Sigun iti Linteg ti tulag, maibilang dagiti wak kas narugit ken makarumen ket saan a mabalin a pagtaraon dagita. (Levitico 11:13, 15) Kaskasdi, tartaraonan ida ti Dios. “Isu a no adda dagiti nakaro a pakadanaganyo maipapan iti masanguanan, panunotenyo laeng dagiti wak,” kinuna ni Kabsat Burnett. “No ti narugit, makarumen a tumatayab ket ay-aywanan ti Dios, anian a nangnangruna pay nga aywanannakayo ta nadaluskayo iti imatangna.”

“Awan ti Dakes nga Ar-aramidek Kenka.” Ti sabali pay nga instruktor iti Gilead a ni Mark Noumair tinulonganna ti tallaong a mangusig iti pangngarig ni Jesus mainaig kadagiti trabahador iti kaubasan. Dadduma kadakuada ti nagmalmalem a nagtrabaho. Adda met dagiti nagtrabaho iti maysa laeng nga oras. Kaskasdi, agpapada ti tangdanda! Gapu iti dayta, nagtanabutob dagiti nagtrabaho iti napapaut. Inlawlawag ti apo ti kaubasan kadagiti nagreklamo: “Awan ti dakes nga ar-aramidek kenka. Saan kadi a nakianamongka kaniak iti maysa a denario? Alaem no ania ti kukuam ket inkan.” (Mateo 20:13, 14) Ania ti leksion? Saanmo nga idilig ti bagim iti sabsabali. “Mangikkat iti rag-o dagiti negatibo a panangidilig iti bagi,” kuna ni Kabsat Noumair. “Gapu iti dayta, amangan no panawanyo pay ketdin ti annongenyo, a baybay-anyon ti nagpateg a pribilehioyo nga agserbi.” Impalagip ti espiker a ni Jesus ti mangiturturong iti naespirituan a panagani iti kaaldawantayo ket mabalinna nga aramiden kadagiti pasurotna no ania ti pakaay-aywanna. Awan ti dakes nga ar-aramiden kenka ni Jehova ken ni Jesus no ikeddengda nga ipaayan ti sabsabali iti kanayonan nga annongen. Ipamaysam ketdi ti kukuam, ket dimo pulos ipalubos a dagiti “tangdan” ti sabsabali ti mangupay kenka a mangaramid iti trabaho nga impaannong kenka ni Jehova.

Dagiti Kapadasan ken Interbiu

No awan ti klase ken awan ti leksion nga isagsagana dagiti estudiante iti Gilead, mapanda mangasaba a kadua dagiti lokal a kongregasion dagiti Saksi ni Jehova. Ni Sam Roberson, maysa kadagiti instruktor iti Gilead, pinagsaludsodanna ti sumagmamano nga estudiante maipapan kadagiti kapadasanda. Kas pagarigan, ni Kabsat Alessandra Kirchler nakasaona ti maysa a babai a maburburiboran gapu iti bisio ti anakna a panagsigarilio. Idi simmarungkar ni Allessandra, nagawit iti magasin nga Agriingkayo! a naglaon iti artikulo a mainaig iti panagsigarilio. Awan ti tao iti balay, isu nga imbatina lattan ti magasin. Idi agangay, nadanon met laeng ni Alessandra ti babai ket naawis a sumrek iti balay. Inapresiar ti babai ti artikulo ket kinuna, “Mapampanunotko no ania ngata ti kayat nga isuro kaniak ti Dios ta susuotennak.” Impakita ni Alessandra manipud iti Biblia a saan a ti Dios ti makinggapuanan kadagiti dakes a mapaspasarantayo. (Santiago 1:13) Ti babai ken ti anakna a lalaki ket siraragsak a makipagad-adal itan iti Biblia.

Ni Melvin Jones manipud iti Service Department pinagsaludsodanna ti tallo a nakaturposen iti Gilead: da Jon Sommerud, nga agserserbi idiay Albania; Mark Anderson, nga agserserbi idiay Kenya; ken James Hinderer, nga agserserbi iti Theocratic Schools Department. Immanamong dagiti tallo a saan laeng a dagiti pamunganayan a kinapudno iti Biblia ti masursuro dagiti estudiante iti panagadalda iti Gilead. Maisuro pay kadakuada no kasano nga iyaplikarda dagita a kinapudno, siasinoman dagiti estudiante wenno sadinoman ti pagserbianda.

Kalpasanna, maysa kadagiti estudiante ti nangibasa iti makatukay a surat ti panagyaman manipud iti klase. Ni John Barr, nga agtawen iti 96, a kalakayan a kameng ti Bagi a Manarawidwid, ti nangserra iti programa babaen ti kararag, a kiniddawna a bendisionan ni Jehova ti trabaho ti maika-128 a klase ti Gilead.

[Tsart/Mapa iti panid 31]

ESTADISTIKA TI KLASE

8 bilang dagiti pagilian a nairepresentar

54 bilang dagiti estudiante

27 bilang dagiti agassawa

35.2 promedio nga edad

19.1 promedio a tawen sipud bautismo

13.8 promedio a tawen iti amin-tiempo a ministerio

[Mapa]

(Para iti aktual a pannakaurnosna, kitaem ti publikasion)

Maibaon dagiti naggraduar iti 25 a pagilian a nailanad ditoy baba:

PAKAIDESTINUAN DAGITI MISIONERO

HONDURAS

GUATEMALA

NICARAGUA

DOMINICAN REPUBLIC

ARUBA

GUYANA

ECUADOR

BOLIVIA

PARAGUAY

LATVIA

ROMANIA

KOSOVO

SERBIA

ALBANIA

GUINEA

LIBERIA

CÔTE D’IVOIRE

GHANA

NAMIBIA

RWANDA

MADAGASCAR

MONGOLIA

TAIWAN

CAMBODIA

INDONESIA

(TERITORIO NGA ADDA ITI AYWAN TI SANGA NGA OPISINA ITI AUSTRALIA)

[Ladawan iti panid 30]

Indemostra dagiti estudiante ti Gilead ti maysa kadagiti kapadasanda iti panangasaba

[Ladawan iti panid 31]

Ti Maika-128 a Klase a Nagturpos iti Watchtower Bible School of Gilead

Iti listaan ditoy baba, nanumeruan dagiti intar manipud iti sango nga agpalikud, ken nailista dagiti nagan manipud iti kannigid nga agpakannawan iti kada intar.

(1) Keller, E.; Ostopowich, I.; Jacobsen, S.; Arias, M.; Dieckmann, Y.; Tanaka, J.; Harada, K.

(2) Camacho, L.; Kirchler, A.; Rodríguez, S.; Ward, B.; Trenalone, K.; Victoria, V.; Oxley, F.; Nguyen, K.

(3) Oxley, O.; De Dios, A.; Lindström, C.; Allen, J.; Meads, T.; Waddington, J.; Victoria, E.

(4) Harada, H.; Lindström, A.; Orsini, E.; Logue, D.; Missud, T.; Bergeron, S.; Camacho, G.; Ward, T.

(5) Kirchler, W.; Nguyen, H; Kremer, E.; Burgaud, C.; Titmas, N.; De Dios, C.; Rodríguez, A; Waddington, M.

(6) Dieckmann, J.; Allen, C.; Titmas, R.; Arias, J.; Bergeron, E.; Keller, J.; Ostopowich, F.; Burgaud, F.

(7) Tanaka, K.; Kremer, J.; Jacobsen, R.; Trenalone, J.; Logue, J.; Meads, D.; Missud, D.; Orsini, A.