Kayat Manen Dagiti Apostol ti Agbalin a Natan-ok

Bayat ti panagdaliasat ni Jesus ken dagiti apostol nga agpaabagatan idiay Perea a mapan idiay Jerusalem, binallasiwda ti Karayan Jordan iti asideg ti Jerico. Adda kakaduada a nagdaliasat a mapan mangselebrar iti Paskua ti 33 C.E.

Immun-una ni Jesus ngem dagiti apostol, ta kayatna ti masapa a makadanon iti siudad para iti Paskua. Ngem maamak dagiti adalan. Sakbay dayta, idi natay ni Lazaro ken idi mapan koma ni Jesus idiay Judea manipud Perea, imbaga ni Tomas iti dadduma: “Kumuyogtayo uray no mairamantayo a matay.” (Juan 11:​16, 47-53) Gapuna, napeggad ti mapan idiay Jerusalem, isu a nainkalintegan ti panagamak dagiti adalan.

Tapno maisaganada iti mapasamak iti masanguanan, impakni ni Jesus dagiti apostol ket imbagana kadakuada: “Sumang-attayo idiay Jerusalem, ket mayawatto ti Anak ti tao kadagiti panguluen a papadi ken eskriba. Ikeddengdanto a mapapatay sa iyawatda kadagiti Gentil tapno mapagkakatawaan, masapsaplit, ken mailansa iti kayo. Ngem mapagungarto iti maikatlo nga aldaw.”​—Mateo 20:​18, 19.

Daytoy ti maikatlo a gundaway nga imbaga ni Jesus kadagiti adalan ti maipapan iti ipapatay ken panagungarna. (Mateo 16:21; 17:​22, 23) Ngem iti daytoy a tiempo, imbagana nga isu ket mapapatay iti kayo. Dimngegda kenkuana nupay saanda a naawatan ti kaipapanan dayta. Nalabit namnamaenda ti pannakaisubli ti pagarian ti Israel ditoy daga, ta kayatda ti maidaydayaw a kadua ni Kristo iti pagarian ditoy daga.

Ti ina dagiti apostol a da Santiago ken Juan, a mabalin a ni Salome, ket kaduada a nagdaliasat. Pinanaganan ni Jesus dagitoy dua nga apostol iti “Annak ti Gurruod,” nalabit gapu iti nadarasudos a panagtigtignayda. (Marcos 3:17; Lucas 9:54) Addaan dagitoy dua iti ambision nga agbalin a natan-ok iti Pagarian ni Kristo. Ammo ni nanangda dayta. Immasideg ken Jesus ni nanangda, nagparintumeng iti sanguananna, ket nagkiddaw iti pabor. Simmungbat ni Jesus: “Ania ti kiddawmo?” Kinunana: “Inton agturayka iti Pagariam, pagtugawem koma ti dua nga annakko iti makannawan ken makannigidmo.”​—Mateo 20:​20, 21.

Kinapudnona, kiddaw da Santiago ken Juan dayta. Kaibagbaga ni Jesus ti pannakaibabain a mapasaranna, isu nga imbagana kadakuada: “Saanyo nga ammo ti kidkiddawenyo. Kabaelanyo kadi ti uminum iti kopa nga asidegen nga uminumak?” Insungbatda: “Kabaelanmi.” (Mateo 20:22) Kaskasdi, saanda a maawatan ti kaipapanan daytoy para kadakuada.

Ngem kinuna ni Jesus kadakuada: “Pudno nga uminumkayto iti kopak. Ngem saan a siak no di ket ti Amak ti mangpili no siasino ti agtugaw iti makannawan ken makannigidko.”​—Mateo 20:23.

Idi naammuan dagiti sangapulo nga apostol ti kiddaw da Santiago ken Juan, nakaungetda. Imbaga kadi dayta da Santiago ken Juan idi nagsusupiatan dagiti apostol no asino ti katan-okan kadakuada? (Lucas 9:​46-48) Aniaman ti napasamak, ipakita ti kiddaw a saan pay nga inyaplikar dagiti Sangapulo ket Dua ti balakad ni Jesus nga agbalinda a napakumbaba. Kayatda pay laeng ti agbalin a natan-ok.

Rinisut ni Jesus daytoy a parikut ken ti tumaud a problema. Inayabanna dagiti Sangapulo ket Dua ket naayat a binalakadanna ida. Kinunana: “Ammoyo a dagidiay maibilbilang nga agturturay kadagiti nasion dominaranda dagiti iturayanda ken dagidiay natatan-ok usarenda ti autoridadda kadakuada. Saan koma a kasta ti aramidenyo. Ngem asinoman a mayat nga agbalin a natan-ok, isu koma ti agserbi kadakayo, ken asinoman a mayat nga agbalin a kangrunaan kadakayo, isu koma ti agbalin nga adipen ti amin.”​—Marcos 10:​42-44.

Imbaga ni Jesus ti ulidan a masapul a tuladenda​—ti ulidanna. Inlawlawagna: “Immay ti Anak ti tao, saan a tapno pagserbian, no di ket tapno agserbi ken itedna ti biagna kas pangsubbot iti adu.” (Mateo 20:28) Iti agarup tallo a tawen, nagserbi ni Jesus para iti sabsabali. Ken aramidenna dayta agingga iti ipapatayna para iti amin a tao! Masapul a patanoren dagiti adalan ti kababalin nga adda ken Kristo, ti agserbi imbes a pagserbian, ti agbalin a nababbaba imbes nga agbalin a natan-ok.