Matungtungpal a Padto

IDI dinamag dagiti adalan ni Kristo Jesus no ania ti pagilasinan ti di makita a kaaddana iti pannakabalin ti Pagarian, impadto ni Jesus nga “agadunto ti kinadakes.” (Mateo 24:3, 12) Matungtungpalen aya daytoy a padto iti kaaldawantayo?

Ay ket wen! Kunaen ti The United Nations and Crime Prevention, nga impablaak ti NU idi Oktubre 1991: “Dakkel a parikut ti kaaduan a nasion iti lubong ti nakaro a krimen. Saanen a matengngel ti kaaduan a nasion ti krimen iti uneg ti pagilianda ken dimmegdeg ti krimen iti internasional a komunidad. . . . Makapadanag ti panagsaknap ti krimen dagiti organisado a grupo dagiti kriminal, ket nakaam-amak dagiti nagbanaganna no iti pisikal a kinaranggas, pammutbuteng ken panagkunniber dagiti opisial ti gobierno. Pinullo a ribo nga awan basolna a biktima ti napapatayen ti terorismo. Nagbalinen a sangalubongan a trahedia ti makadadael a negosio dagiti makaadikto a narkotiko. Makapadanag dagiti porma ken kasaknap ti awan-panangilalana a panangdadael iti aglawlaw ket maibilangen dayta kas maysa a krimen maibusor iti lubong a mismo.”

Panangdangran: Ngimmato manipud 150 a panangdangran iti tunggal 100,000 a tao idi 1970 agingga iti agarup 400 iti tunggal 100,000 idi 1990.

Panagtakaw: Ngimmato manipud nasurok laeng a 1,000 iti tunggal 100,000 idi 1970 agingga iti 3,500 iti tunggal 100,000 idi 1990.

Ginagara a panangpapatay: Kadagiti napanglaw a pagilian, ngimmato manipud 1 agingga iti 2.5 iti tunggal 100,000 iti nagbaetan ti 1975 ken 1985. Kadagiti narang-ay a pagilian ti ingangato iti isu met la a periodo ket manipud kurang a 3 agingga iti nasurok a 3.5.

Krimen a nainaig iti droga: Kunaen ti libro: “Dakdakkel ti gastos ken ad-adu ti armas dagiti kangrunaan a sindikato ti droga ngem dagiti Gobierno dagiti babassit a nasion, ken kabaelandan a lapdan ti pannakaipatungpal dagiti reglamento ken linteg dagiti industrialisado a pagilian.”

Pakadagupan a kapartak ti krimen: Manamnama nga agdoble manipud 4,000 iti tunggal 100,000 idi 1985 agingga iti agarup 8,000 inton tawen 2000.

Ti sangalubongan nga ilalanlan ti krimen ket maysa laeng a paset ti padto ni Jesus a mangipakita nga agbibiagtayon iti “panungpalan ti sistema dagiti bambanag.” (Mateo 24:3) Kinuna ni Jesus: “Inton makitayo dagitoy a maar-aramid, ammuenyo a ti pagarian ti Dios asidegen.”​—Lucas 21:31.