MANAGEBANGHELIO

Manangaskasaba iti ebanghelio wenno naimbag a damag; maysa a mensahero iti naimbag. Ti Griego a eu·ag·ge·li·stesʹ (managebanghelio) ket nainaig unay iti sao a eu·ag·geʹli·on, “naimbag a damag” wenno “ebanghelio.” (Kitaenyo ti NAIMBAG A DAMAG; kasta met ti Na 1:15, Rbi8 ftn; Mt 4:23, Rbi8 ftn.) Ni Jehova ti Naindaklan a Managebanghelio, wenno Manangyeg iti naimbag a damag. Kalpasan a nagbasol ni Adan, naimbag a damag a maammuan iti Genesis 3:15 nga adda bin-i a mangrumek iti ulo ti serpiente. Nangted dayta iti namnama iti sangatauan. (Ro 8:20) Kas panangiraman ken Abraham iti daytoy a kari maipapan iti bin-i, indeklara ni Jehova kenkuana ti naimbag a damag. (Ga 3:8; Ge 12:1-3) Iti Isaias 52:7, naipadto nga addanto “mangip-ipan iti naimbag a damag” maipapan iti pannakaisubli dagiti Judio manipud Babilonia. Daytoy a teksto ket inadaw ni apostol Pablo idi tinukoyna ti trabaho a panagebanghelio dagiti Kristiano. (Ro 10:15) Ni anghel Gabriel ket maysa a managebanghelio ta impakaammona ken Zacarias ti naimbag a damag maipapan ti um-umay a pannakayanak ni Juan a Manangbautisar ken kasta met nga impakaammona ken Maria ti maipapan iti pannakayanak ni Jesus. Ti maysa nga anghel ket nagserbi kas managebanghelio kadagiti pastor idi tiempo ti pannakayanak ni Jesus. (Lu 1:18-38; 2:10) Ni Juan a Manangbautisar ket maysa a managebanghelio, ta nailanad nga “intultuloyna nga indeklara ti naimbag a damag kadagiti tattao.” (Lu 3:18) Amin dagiti adalan ni Jesus ket managebanghelio ta nakipasetda iti ministerio iti publiko nga isu ti panangiwaragawag iti naimbag a damag.​—Ara 8:4.

Naisangsangayan a Managebanghelio Kas Misionero. Nupay nabilin ti amin a Kristiano nga agbalinda a managebanghelio, naisangsangayan ti pannakaaramat ti sao iti Efeso 4:8, 11, 12, a nangdeskribiran ni Pablo “kadagiti sagut a tattao” nga inted ni Kristo iti kongregasion idi immuli ni Jesus sadi ngato: “Ket intedna ti sumagmamano kas apostol, ti sumagmamano kas mammadto, ti sumagmamano kas managebanghelio, ti sumagmamano kas papastor ken mannursuro, . . . maipaay iti pannakapabileg ti bagi ti Kristo.” Ti espesipiko a trabaho dagita a managebanghelio ket kas iti trabaho dagiti misionero. Masansan nga isuda ti manglukat iti baro a teritoria a saan pay a nakaskasabaan iti naimbag a damag. Iti Efeso 4:11, dagiti managebanghelio ket immun-una a nadakamat ngem kadagiti papastor ken mannursuro, agsipud ta kalpasan a maikasaba ti naimbag a damag ken addan dagiti nagbalin nga adalan, dagiti papastor ken mannursuro met ti mangitultuloyen a mangpabileg.

Maysa ni Felipe a naisangsangayan a nadakamat kas managebanghelio. Isu ti nangirugrugi iti trabaho kalpasan ti Pentecostes idiay siudad ti Samaria nga addaan dakkel a panagballigi. Maysa nga anghel ti nangibaga ken Felipe nga ikasabana ti naimbag a damag maipapan ken Kristo iti maysa nga Etiope a eunuko, nga iti kasta binautisaran ni Felipe. Kalpasanna, ni Felipe ket innala ti espiritu tapno mangasaba idiay Asdod ken iti amin a siudad a madalananna nga agturong iti Cesarea. (Ara 8:5, 12, 14, 26-40) Adu ti inaramid ni Pablo a panagebanghelio. (2Co 10:13-16) Ni Timoteo ket maysa a managebanghelio, wenno misionero. Ket impaganetget a naimbag ni Pablo ti panagebanghelio idi binagbagaanna ni Timoteo kas panagpinnakadada, a kunana: “Sika, nupay kasta, agtalinaedka a sipupuot iti amin a bambanag, anusam ti dakes, aramidem ti trabaho ti managebanghelio, naan-anay nga itungpalmo ti ministeriom.” Inkasaba ni Timoteo ti naimbag a damag a kadua ti dadduma pay Kristiano, kasta met a nangipastor ken nangisursuro kas maysa a manangaywan idiay Efeso.​—2Ti 4:5; 1Ti 1:3.

Panagebanghelio iti “Tiempo ti Panungpalan.” Ti kasaknapan a panagebanghelio ket maaramid iti “tiempo ti panungpalan,” sigun iti nabatad a sasao ni Jesus iti Mateo 24:14: “Daytoy naimbag a damag ti pagarian maikaskasabanto iti intero a mapagnaedan a daga . . . ket iti kasta umayton ti panungpalan.” Iti agdama a tiempo, dagiti nasion ket addaan kadagiti misionero mainaig iti ekonomia, politika, ken medisina ken dadduma pay nga umasping kadagita. Ngem dagiti Kristiano ket nabilin a mangasaba maipapan iti Pagarian ti Dios ken agaramid kadagiti adalan ni Jesu-Kristo. (2Ti 4:2; 1Co 9:16; 1Pe 1:12, 25; 4:17) Kastoy ti iwarwaragawag ti anghel nga agtaytayab iti nagtangatangan nga addaan iti agnanayon a naimbag a damag: “Agbutengkayo iti Dios ket idayawyo, agsipud ta dimtengen ti oras ti panangukomna, ket ngarud agdaydayawkayo iti Daydiay nangaramid iti langit ken iti daga ken baybay ken kadagiti ubbog ti dandanum.” (Apo 14:6, 7) Daytoy ti naimbag a damag nga idanon dagiti Kristiano a managebanghelio wenno misionero. Yantangay ti dadduma a tattao a kas ken Felipe a managebanghelio ket dineskribir ti Biblia kas misionero wenno ebanghelisador iti naisangsangayan a kaipapanan, kasta met a makapagserbi ita ti dadduma a Kristiano kas misionero iti naisangsangayan a kaipapanan, a mapanda pay ketdi iti sabali a pagilian tapno mangasaba. (Ara 21:8) Nupay kasta, amin a Kristiano ket nabilin ken obligado nga agbalin nga managebanghelio sadinoman ti ayanda, nga ikaskasabada ti naimbag a damag iti amin a kita ti tattao.​—Ro 10:9, 10.