Naimbag a Damag Maipaay Kadagiti Tattao iti Amin a Nasion

“Dakayto dagiti saksik . . . agingga iti kaadaywan a paset ti daga.”​—ARAMID 1:8.

 1. Kas mannursuro iti Biblia, ania dagiti ipaayantayo iti atension, ken apay?

DAGITI nasagudayan a mannursuro saanda laeng nga ipaayan iti atension no ania ti ibagada kadagiti estudianteda no di ket no kasano nga ibagada dayta. Kasta met laeng ti aramidentayo kas mannursuro iti kinapudno ti Biblia. Ipaayantayo iti atension agpadpada ti mensahe nga ikaskasabatayo ken dagiti wagas ti panangasabatayo. Saan nga agbalbaliw ti mensahetayo, ti naimbag a damag ti Pagarian ti Dios, ngem adda dagiti panawen a kasapulan nga ibagaybagaytayo dagiti wagastayo. Apay? Tapno ad-adu ti makasabaantayo.

 2. No ibagaybagaytayo dagiti wagas ti panangasabatayo, siasino ti tultuladentayo?

² Babaen ti panangibagay ti wagas ti panangasabatayo, matuladtayo dagiti nagkauna nga adipen ti Dios. Usigentayo, kas pagarigan, ni apostol Pablo. Kinunana: “Kadagiti Judio nagbalinak a kas maysa a Judio . . . Kadagidiay awanan linteg nagbalinak a kas awanan linteg . . . Kadagiti nakapuy nagbalinak a nakapuy, tapno magun-odko dagiti nakapuy. Nagbalinak nga amin a bambanag iti amin a kita ti tattao, tapno iti amin a pamay-an maisalakanko ti sumagmamano.” (1 Corinto 9:19-23) Epektibo dagiti mannakibagay a wagas ni Pablo. Agbalintayo met nga epektibo no siaannad nga ibagaybagaytayo ti wagas ti pannakisaritatayo kadagiti tattao.

“Agingga iti Ungto ti Daga”

 3. (a) Ania ti maysa a karit iti trabahotayo a panangasaba? (b) Kasano a matungtungpal ita dagiti sasao ti Isaias 45:22?

³ Ti maysa a dakkel a karit kadagidiay mangikaskasaba iti naimbag a damag ket ti kalawa ti teritoria​—“iti intero a mapagnaedan a daga.” (Mateo 24:14) Itay napan a siglo, adu nga adipen ni Jehova ti nangikagumaan a mangdanon kadagiti baro a pagilian tapno maisaknapda ti naimbag a damag. Ania ti resultana? Nakaskasdaaw a sangalubongan a panagrang-ay. Iti rugrugi ti maika-20 a siglo, manmano laeng a pagilian ti naipadamag a makaskasabaan, ngem iti agdama, aktibo dagiti Saksi ni Jehova iti 235 a pagilian! Talaga a maiwarwaragawag ti naimbag a damag ti Pagarian agingga “kadagiti ungto ti daga.”​—Isaias 45:22.

4, 5. (a) Siasino dagiti dakkel ti naitulongda iti pannakaisaknap ti naimbag a damag? (b) Ania ti komento ti dadduma a sanga nga opisina maipapan kadagiti ganggannaet nga agserserbi kadagiti sakupda a teritoria?

⁴ Ania ti pakaigapuan ti kasta a panagrang-ay? Adu a banag. Dakkel ti naitulong dagiti misionero a nasanay iti Watchtower Bible School of Gilead ken, iti nabiit pay, ti nasurok a 20,000 a nagturpos iti Ministerial Training School. Nakatulong met ti adu a Saksi nga, iti bukodda a gastos, immakarda kadagiti pagilian nga agkasapulan iti ad-adu nga agibumbunannag. Dagiti kasta a managsakripisio a Kristiano​—lallaki ken babbai, ubbing ken nataengan, di kasado ken naasawaan​—adda napateg a pasetda iti pannakaikasaba ti mensahe ti Pagarian iti intero a daga. (Salmo 110:3; Roma 10:18) Maapresiar unay dagita a kakabsat. Imutektekantayo ti insurat ti dadduma a sanga nga opisina maipapan kadagiti ganggannaet nga agserserbi kadagiti sakupda a teritoria nga addaan iti dakdakkel a panagkasapulan.

⁵ “Dagitoy a dungdunguen a kakabsat idadauluanda ti panangasaba kadagiti naiputputong a lugar, tumulongda iti panangbuangay kadagiti baro a kongregasion, ken adda maar-aramidanda agpaay iti naespirituan a panagrang-ay dagiti lumugar a kakabsat.” (Ecuador) “No pumanaw ti ginasut a ganggannaet nga agserserbi ditoy, maapektaran ti kinatalged dagiti kongregasion. Maysa a bendision a kaduami ida.” (Dominican Republic) “Iti adu a kongregasion iti pagilianmi, dakkel a porsiento ti buklen dagiti kakabsat a babbai, no dadduma agingga iti 70 a porsiento. (Salmo 68:11) Kaaduan kadakuada ti kabbaro iti kinapudno, ngem dagiti di kasado a payunir a babbai a naggapu kadagiti sabali a pagilian mangipapaayda iti di magatadan a tulong babaen ti panangsanayda kadagita a kabbaro. Dagitoy a ganggannaet a kakabsat a babbai ket pudno a bendision kadakami!” (Maysa a pagilian iti Makindaya a Europa) Napanunotyo met kadi ti agserbi iti sabali a pagilian?a​—Aramid 16:9, 10.

“Sangapulo a Lallaki Manipud Kadagiti Amin a Pagsasao”

 6. Kasano nga impasimudaag ti Zacarias 8:23 a maipasangotayo iti karit a panangasaba iti nadumaduma a pagsasao?

⁶ Dakkel met a karit ti kinaadu ti lenguahe a maus-usar iti intero a lubong. Impakpakauna ti Sao ti Dios: “Mapasamakto kadagidiay nga aldaw a sangapulo a lallaki manipud kadagiti amin a pagsasao ti nasnasion kumpetdanto, wen, pudno a kumpetdanto iti pandiling ti maysa a lalaki a Judio, a kunkunada: ‘Kumuyogkaminto kadakayo, ta nangngegmi a ti Dios adda kadakayo.’” (Zacarias 8:23) Iti moderno-aldaw a kaitungpalan daytoy a padto, ti sangapulo a lallaki isimboloda ti dakkel a bunggoy, a naipadto iti Apocalipsis 7:9. Ngem imutektekanyo ta iti padto ni Zacarias, ti “sangapulo a lallaki” ket aggapu saan laeng nga iti amin a nasion no di ket “manipud kadagiti amin a pagsasao ti nasnasion.” Adda kadi nakitatayon a kaitungpalan daytoy a napateg a detalye ti padto? Wen, adda.

 7. Aniada nga estadistika ti mangipakita a maikaskasaban ti naimbag a damag iti tattao “manipud kadagiti amin a pagsasao”?

⁷ Usigenyo ti sumagmamano nga estadistika. Limapulo a tawenen ti napalabas, maipabpablaak ti literaturatayo iti 90 a lenguahe. Iti agdama, ngimmato dayta a bilang iti nasurok nga 400. ‘Ti matalek ken naannad nga adipen’ inkagumaanna a maipaayan iti literatura uray dagiti pagsasao a manmano ti mangus-usar. (Mateo 24:45) Kas pagarigan, dagiti literatura ti Biblia ket magun-odanen iti Greenlandic (lenguahe ti 47,000 a tattao), Palauan (lenguahe ti 15,000), ken Yapese (lenguahe ti awan pay 7,000 a tattao).

“Maysa a Dakkel a Ruangan” nga Agturong Kadagiti Baro nga Oportunidad

8, 9. Ania a paspasamak ti nangilukat iti “maysa a dakkel a ruangan” para kadatayo, ket kasano a nagtignay ti rinibu a Saksi?

⁸ Ngem mabalin a ditay kasapulanen ita ti mapan iti sabali a pagilian tapno iranud ti naimbag a damag kadagiti amin a pagsasao. Kadagiti nabiit pay a tawtawen, ti isasangpet ti minilion nga imigrante ken refugee kadagiti nabaknang a pagilian ket nangpataud iti adu a komunidad dagiti imigrante a nagduduma ti pagsasaoda. Kas pagarigan, idiay Paris, France, agarup 100 a lenguahe ti maus-usar. Idiay Toronto, Canada, adda 125 a lenguahe; ken idiay London, England, nasurok a 300 a ganggannaet a lenguahe ti maus-usar! Dagitoy a ganggannaet nga agnanaed iti teritoria ti adu a kongregasion linuktanda ti “maysa a dakkel a ruangan” nga agturong kadagiti baro nga oportunidad a mairanud ti naimbag a damag kadagiti tattao iti amin a nasion.​—1 Corinto 16:9.

⁹ Rinibu a Saksi ti nangawat iti dayta a karit babaen ti panagadalda iti sabali a lenguahe. Narigat dayta para kadagiti kaaduan; ngem sibabaknang a nasubadan dayta iti rag-o a resulta ti panangtulong kadagiti imigrante ken refugee a mangadal iti kinapudno a masarakan iti Sao ti Dios. Iti nabiit pay a tawen, iti maysa a pagilian iti Makinlaud a Europa, dandani 40 porsiento kadagiti nabautisaran kadagiti kombension distrito ket ganggannaet.

10. Kasanoyo nga inusar ti bokleta a Good News for People of All Nations? (Kitaenyo ti kahon a “Dagiti Linaon ti Bokleta a Good News for People of All Nations,” iti panid 26.)

¹⁰ Pudno, kaaduan kadatayo ti awan iti kasasaad nga agadal iti ganggannaet a pagsasao. Kaskasdi, makatulongtayo kadagiti imigrante babaen ti panangusar a naimbag iti kaipabpablaak a bokleta a Good News for People of All Nations,b a naglaon iti makaay-ayo a mensahe ti Biblia iti adu a lenguahe. (Juan 4:37) Us-usarenyo met laeng kadi iti ministerio daytoy a bokleta?

No Di Mangipangag Dagiti Tattao

11. Ania pay a karit ti adda kadagiti dadduma a teritoria?

¹¹ Bayat a kumarkaro ti impluensia ni Satanas ditoy daga, masansan a maipasangotayo iti sabali a karit​—adda dagiti teritoria a manmano dagiti manangipangag. Siempre, saantay a pagsiddaawan dayta yantangay impakpakauna ni Jesus ti kasta a kasasaad. No maipapan iti kaaldawantayo, kinunana: “Ti ayat ti ad-adu lumamiisto.” (Mateo 24:12) Kinapudnona, adu ti saanen a mamati iti Dios ken saanen a mangraem iti Biblia. (2 Pedro 3:3, 4) Kas resultana, iti dadduma a paset ti lubong, manmano ti agbalin nga adalan ni Kristo. Ngem dina kayat a sawen a sayang ti panagregget dagiti dungdunguentayo a kakabsat a Kristiano a simamatalek a mangaskasaba kadagita a di mangipampangag a teritoria. (Hebreo 6:10) Apay a saan a sayang? Usigenyo dagiti sumaganad.

12. Ania ti dua a panggep ti panangasabatayo?

¹² Ti Ebanghelio ni Mateo itampokna ti dua a kangrunaan a panggep ti trabahotayo a panangasaba. Ti maysa isu ti ‘panangaramid iti ad-adalan kadagiti tattao iti amin a nasion.’ (Mateo 28:19) Maikadua, agserbi ti mensahe ti Pagarian kas maysa a “pangsaksi.” (Mateo 24:14) Agpada a napateg dayta a dua a panggep, ngem naisangsangayan ti pategna ti maikadua. Apay?

13, 14. (a) Ania ti maysa a naisangsangayan a paset ti pagilasinan ti kaadda ni Kristo? (b) Ania ti nasken a laglagipentayo, nangnangruna no mangasabatayo kadagiti saan unay a mangipangag a teritoria?

¹³ Ti mannurat iti Biblia a ni Mateo inlanadna ti saludsod dagiti apostol ken ni Jesus: “Anianto ti pagilasinan ti kaaddam ken ti panungpalan ti sistema ti bambanag?” (Mateo 24:3) Kas sungbat, kinuna ni Jesus a ti maysa a naisangsangayan a paset dayta a pagilasinan isu ti sangalubongan a trabaho a panangasaba. Tuktukoyenna ngata ti panangaramid kadagiti adalan? Saan. Kinunana: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion.” (Mateo 24:14) Iti kasta, impakita ni Jesus a ti mismo a trabaho a panangikasaba iti Pagarian ket napateg a paset ti pagilasinan.

¹⁴ Gapuna, bayat nga ikaskasabatayo ti naimbag a damag ti Pagarian, laglagipentayo nga uray ditay kanayon a makaaramid kadagiti adalan, makaipaaytayo met iti maysa a ‘panangsaksi.’ Aniaman ti reaksion dagiti tattao, ammoda ti ar-aramidentayo a panangasaba, ket iti kasta, makipaspasettayo iti panangitungpal iti padto ni Jesus. (Isaias 52:7; Apocalipsis 14:6, 7) Ni Jordy, maysa nga agtutubo iti Makinlaud a Europa, kinunana: “Makaparagsak a maammuan nga us-usarennak ni Jehova iti panangitungpal iti Mateo 24:14.” (2 Corinto 2:15-17) Awan duadua a kasta met ti panagriknayo.

No Adda Mangbusor iti Mensahetayo

15. (a) Ania ti impakdaar ni Jesus kadagiti pasurotna? (b) Apay a mabaelantayo ti mangasaba uray adda ibubusor?

¹⁵ Ti nakaro nga ibubusor ket sabali pay a karit iti panangikasaba iti naimbag a damag ti Pagarian. Pinakdaaran ni Jesus dagiti pasurotna: “Puntiriakayto ti pananggura ti amin a nasnasion maigapu iti naganko.” (Mateo 24:9) Kas kadagiti nagkauna a Kristiano, magurgura, mabusbusor, ken maidaddadanes met dagiti agdama a pasurot ni Jesus. (Aramid 5:17, 18, 40; 2 Timoteo 3:12; Apocalipsis 12:12, 17) Iti dadduma a pagilian, parparitan ida ti gobierno. Ngem kas panagtulnogda iti Dios, dagiti pudno a Kristiano kadagita a pagilian itultuloyda nga ikasaba ti naimbag a damag ti Pagarian. (Amos 3:8; Aramid 5:29; 1 Pedro 2:21) Kasano a maar-aramidanda dayta, agraman ti amin a Saksi iti intero a lubong? Pabpabilgen ida ni Jehova babaen ti nasantuan nga espirituna.​—Zacarias 4:6; Efeso 3:16; 2 Timoteo 4:17.

16. Kasano nga impakita ni Jesus ti panagnaig ti panangasaba ken ti espiritu ti Dios?

¹⁶ Intampok ni Jesus ti dakkel a nakainaigan ti espiritu ti Dios iti trabaho a panangasaba idi kinunana kadagiti pasurotna: “Umawatkayto iti pannakabalin inton dumteng kadakayo ti nasantuan nga espiritu, ket dakayto dagiti saksik . . . agingga iti kaadaywan a paset ti daga.” (Aramid 1:8; Apocalipsis 22:17) Napateg ti panagsasaganad dagiti pasamak iti daytoy a teksto. Umuna, immawat dagiti adalan iti nasantuan nga espiritu, kalpasanna intungpalda ti sangalubongan a panangsaksi. Babaen laeng iti tulong ti espiritu ti Dios a naaddaanda iti bileg a mangitultuloy iti ‘panangsaksi iti amin a nasion.’ (Mateo 24:13, 14; Isaias 61:1, 2) Maitutop ngarud a ni Jesus inawaganna ti nasantuan nga espiritu kas “ti katulongan.” (Juan 15:26) Kinunana nga isuro ken iwanwan ti espiritu ti Dios dagiti adalanna.​—Juan 14:16, 26; 16:13.

17. No maipasangotayo iti nakaro nga ibubusor, kasano a matulongannatayo ti nasantuan nga espiritu?

¹⁷ Kadagiti ania a pamay-an a matulongannatayo ti espiritu ti Dios no maipasangotayo iti nakaro nga ibubusor gapu iti panangikasaba iti naimbag a damag? Pabilgennatayo ti espiritu ti Dios, ken sarangtenna dagidiay mangidaddadanes kadatayo. Kas panangyilustrar, usigentayo ti maysa a pagteng iti biag ni Ari Saul.

Sinaranget ti Espiritu ti Dios

18. (a) Ania a dakkel a panagbalbaliw ti napasamak ken ni Saul? (b) Ania dagiti pamay-an ni Saul a nangidadanes ken ni David?

¹⁸ Nasayaat ti nangrugian ni Saul kas umuna nga ari iti Israel, ngem nagsukir ken ni Jehova idi agangay. (1 Samuel 10:1, 24; 11:14, 15; 15:17-23) Kas resultana, ti espiritu ti Dios impaidamnan ti tulongna iti ari. Siraranggas a nakapungtot ni Saul ken ni David, ti napulotan a sumaruno nga ari ken mangtagtagiragsak iti tulong ti espiritu ti Dios. (1 Samuel 16:1, 13, 14) Agparang a nalaka a mabiktima ni David. Arpa laeng ngamin ti iggemna idinto ta pika ti iggem ni Saul. Maysa nga aldaw, bayat nga agtoktokar ni David iti arpa, “inggayang ni Saul ti pika ket kinunana: ‘Gayangek ni David a sumalpot iti diding!’ ngem naglisi ni David manipud sanguananna, iti namindua.” (1 Samuel 18:10, 11) Kalpasanna, impangag ni Saul ti anakna a ni Jonatan, ti gayyem ni David, ket inkarina: “Kas sibibiag ni Jehova, [ni David] saanto a mapapatay.” Idi agangay, “inkagumaan [manen] ni Saul a gayangen ni David a sumalpot iti diding babaen ti pika.” Ngem ni David “naglisi manipud sanguanan ni Saul, iti kasta naigayangna ti pika iti diding.” Nagtalaw ni David, ngem kinamat ni Saul. Iti dayta a napeggad a kasasaad, ti espiritu ti Dios sinarangetna ni Saul. Iti ania a pamay-an?​—1 Samuel 19:6, 10.

19. Kasano a ti espiritu ti Dios sinalaknibanna ni David?

¹⁹ Nagkamang ni David iti mammadto a ni Samuel, ngem nangibaon ni Saul kadagiti buyotna a mangkemmeg ken ni David. Nupay kasta, idi dimtengda iti paglemlemmengan ni David, “immay ti espiritu ti Dios kadagiti mensahero ni Saul, ket nangrugida a nagtignay a kasla mammadto.” Kasta unay a riningbawan ida ti espiritu ti Dios isu a naan-anay a nalipatanda ti rason a nakaibaonanda. Namindua pay a nangibaon ni Saul kadagiti lallaki a mangala ken ni David, ket kasta met laeng ti napasamak. Kamaudiananna, mismo a ni Ari Saul ti napan nangsapul ken ni David, ngem uray ni Saul dina nasaranget ti espiritu ti Dios. Kinapudnona, isu ket pinaralisa ti nasantuan nga espiritu “iti intero dayta nga aldaw ken iti intero dayta a rabii”​—a nangted ken ni David iti gundaway a makapagtalaw.​—1 Samuel 19:20-24.

20. Ania a leksion ti maadaltayo iti salaysay maipapan iti panangidadanes ni Saul ken ni David?

²⁰ Naglaon iti nabileg a leksion daytoy a salaysay maipapan kada Saul ken David: Dagiti mangidaddadanes kadagiti adipen ti Dios dida kabaelan a sarangten ti espiritu ti Dios. (Salmo 46:11; 125:2) Panggep ni Jehova a ni David ti agbalin nga ari iti Israel. Awan ti asinoman a mabalin a mangbalbaliw iti dayta a panggep ni Jehova. Iti kaaldawantayo, inkeddeng ni Jehova a ti “naimbag a damag ti pagarian maikaskasabanto.” Awan ti asinoman a mabalin a manglapped iti pannakatungpal dayta.​—Aramid 5:40, 42.

21. (a) Ania ti ar-aramiden ti dadduma a bumusbusor ita? (b) Iti ania a makapagtalektayo?

²¹ Dadduma a papangulo ti relihion ken politika usarenda dagiti kinaulbod ken uray ti kinaranggas tapno lapdandatayo. Nupay kasta, no kasano a ni Jehova sinalaknibanna ni David iti naespirituan, salaknibanna met dagiti adipenna ita. (Malakias 3:6) No kasta, kas ken David, sikokompiansa a maikunatayo: “Iti Dios inkabilko ti panagtalekko. Saanakto nga agbuteng. Ania ti maaramidan kaniak ti naindagaan a tao?” (Salmo 56:11; 121:1-8; Roma 8:31) Buyogen ti tulong ni Jehova, itultuloytayo koma a sarangten dagiti amin a karit bayat nga itungtungpaltayo ti bilin ti Dios nga ikasaba ti naimbag a damag ti Pagarian kadagiti tattao iti amin a nasion.

[Footnotes]

Malagipyo Kadi?

• Apay nga ibagaybagaytayo dagiti wagas ti panangasabatayo?

• Aniada a baro nga oportunidad ti linuktan ti “maysa a dakkel a ruangan”?

• Ania ti maibambanag gapu iti panangasabatayo, uray kadagiti saan unay a manangipangag a teritoria?

• Apay nga awan ti asinoman a bumusbusor ti makapasardeng iti pannakaikasaba ti naimbag a damag ti Pagarian?

[Kahon iti panid 22]

Dakkel a Pannakapnek

“Naragsak ken sangsangkamaysada nga agserserbi ken ni Jehova.” Kasta ti kasasaad ti maysa a pamilia nga immakar idiay Bolivia manipud Espania. Napan sadiay ti maysa nga anak a lalaki dayta a pamilia tapno suportaranna ti maysa a naiputputong a grupo. Nakadkadlaw ti dakkel a rag-ona a nangtukay kadagiti nagannakna ket di nagbayag, immakar ti intero a pamilia​—agraman ti uppat nga annak a lallaki nga agtawen manipud 14 agingga iti 25​—tapno agserbi sadiay. Payunir itan ti tallo kadagiti lallaki , ken nabiit pay a nageskuela iti Ministerial Training School ti anakda nga immuna iti dayta a lugar.

“Adu dagiti karit,” kuna ti taga-Canada a ni Angelica, agtawen iti 30 ken agserserbi iti Makindaya a Europa, “ngem mariknak ti pannakapnek iti panangtulongko kadagiti tattao iti ministerio. Natukay met ti riknak kadagiti adu nga ebkas ti panagyaman dagiti lumugar a Saksi a masansan nga agyaman kaniak gapu iti panangtulongko kadakuada.”

“Adu a kostumbre ti masapul a sursuruen,” kuna ti taga-Estados Unidos nga agkabsat nga agtawen iti dandani 30 ken agserserbi iti Dominican Republic. “Ngem nagan-anuskami iti nakaibaonanmi, ket pito kadagiti iyad-adalanmi iti Biblia ti makigimgimong itan.” Nakatulong dagitoy a dua a kakabsat iti pannakabukel ti maysa a grupo dagiti agibumbunannag iti Pagarian iti maysa nga ili nga awan ti kongregasion.

Ni Laura, maysa a kabsat nga agtawen iti dandani 30, ket agserserbi iti sabali a pagilian iti nasurok nga uppat a tawenen. Kunana: “Ikagkagumaak a salimetmetan ti simple a panagbiag. Nakatulong daytoy kadagiti kakabsat tapno makitada a ti simple a panagbiag ket maysa a kinasimbeng ken pinili a desision, saan ket a gapu ta napanglawka. Gapu ta matultulongak dagiti sabsabali, nangnangruna dagiti agtutubo, naaddaanak iti rag-o a mangringbaw kadagiti rigat ti panagserbi iti ganggannaet a tay-ak. Diak isukat ti panagserbik ditoy iti aniaman a klase ti biag, ket agtalinaedak ditoy agingga nga ipalubos ni Jehova.”

[Kahon/Ladawan iti panid 26]

Dagiti Linaon ti Bokleta a Good News for People of All Nations

Ti bokleta a Good News for People of All Nations ket naglaon iti maysa a panid a mensahe a nailanad iti 92 a lenguahe. Ti presentasion ket naisurat iti wagas a kasla makisarsaritakayo iti maysa a tao. Isu a no basaen ti bumalay ti mensahe, kasla dakayo ti makisarsarita kenkuana.

Ti makin-uneg a paset ti akkub ipakitana ti mapa ti lubong. Usarenyo dayta a mapa tapno maam-ammonakayo ti bumalay. Mabalin nga itudoyo no ania a lugar ti naggapuanyo ket iparipiripyo a kayatyo a maammuan no ania a pagilian ti naggapuanna. Iti kasta, mabalin a maallukoyyo ken agbalin a komportable ti riknana kadakayo.

Dagiti pakauna a sasao ti bokleta dakamatenna dagiti sumagmamano nga addang a nasken nga aramidentayo tapno sieepektibo a matulongantayo dagidiay agsasao iti lenguahe a ditay maawatan. Basaenyo koma a naimbag dagita nga addang ken siiinget nga iyaplikaryo.

Iti listaan dagiti linaonna, nailanad saan laeng a dagiti lenguahe no di ket uray dagiti katupagna a simbolo. Daytoy a paset ti bokleta ket tumulong kadakayo a mangilasin kadagiti simbolo ti lenguahe a nayimprenta kadagiti polietotayo ken dadduma pay a publikasion iti nagduduma a lenguahe.

[Ladawan]

Us-usarenyo kadi daytoy a bokleta iti ministerio?

[Dagiti Ladawan iti panid 23]

Magun-odanen iti nasurok nga 400 a pagsasao dagiti naibatay iti Biblia a publikasiontayo

GHANA

LAPLAND (SWEDEN)

PILIPINAS

[Dagiti Ladawan iti panid 24, 25]

Mabalinyo kadi ti agserbi kadagiti lugar nga agkasapulan iti ad-adu a manangiwaragawag iti Pagarian?

ECUADOR

DOMINICAN REPUBLIC