Malagipyo Pay Kadi?

Nakagunggona met laeng kadi kadakayo dagiti nabiit pay a ruar ti Pagwanawanan? No kasta, apay a diyo suboken ti memoriayo kadagiti sumaganad a saludsod:

◻ Ania a dua a saludsod ti nakatulong iti adu a Kristiano a makaaramid iti personal a desision mainaig iti panggedan?

Ti umuna a kangrunaan a saludsod isu daytoy: Kondenaren kadi ti Biblia dayta a sekular a trabaho? Ti maikadua a saludsod isu daytoy: Ti kadi panangaramid iti daytoy a trabaho ikalam-itna ti maysa iti makondenar nga aramid?​—4/15, panid 28.

◻ Iti ania a pamay-an a ‘ti sangaparsuaan naipasakup iti kinabarengbareng’? (Roma 8:20)

Datayo ket “naipasakup iti kinabarengbareng” gapu iti inaramid dagiti immuna a nagannak kadatayo, da Adan ken Eva. Napasamak daytoy “saan a babaen ti kabukbukodan[tayo] a nakem” wenno kas bunga ti bukodtayo a pangngeddeng. Natawidtayo dayta. Nupay kinaimperpekto, basol, ken ipapatay laengen ti maipatawid dagiti immuna a nagannak kadatayo, siaasi a pinalubosan ida ni Jehova a maaddaan iti annak. Nagsaknap ti ipapatay iti amin a tao, ket iti kasta nga anag, ti Dios ‘impasakupna [ti sangaparsuaan] iti kinabarengbareng.’​—5/1, panid 5.

◻ Apay a nainkalintegan a kunaen nga addanto masanguanan a ‘panagtakder ti makarimon a banag iti nasantuan a disso’? (Mateo 24:15)

Iti nagkauna a padron, ti ‘makarimon a banag a sitatakder iti nasantuan a disso’ ket nainaig iti iraraut dagiti Romano iti panangidaulo ni Heneral Gallus idi 66 K.P. Ti moderno-aldaw a katupag dayta nga iraraut​—ti panagbettak ti “dakkel a rigat”​—ket mapasamakto pay laeng iti masanguanan. (Mateo 24:21) Isu a “ti makarimon a banag a mamataud iti panaglangalang” ket agtakderto pay laeng iti nasantuan a disso.​—5/1, panid 16, 17.

◻ Kasano a makaiwaya iti tiempo dagiti mangmangged nga ama ken ina agpaay kadagiti annakda?

Ti ina a napaksuyan kalpasan ti agmalem a panagtrabaho mabalinna a kiddawen kadagiti annakna a tulonganda nga agisagana iti pangrabiyanda. Ti ama nga okupado iti adu a banag kadagiti ngudo ti lawas mabalinna nga aramiden ti dadduma kadagita a kaduana dagiti annakna.​—5/15, panid 6.

◻ Ania ti rumbeng nga aramiden dagidiay ‘magna iti dalan ni Jehova’? (Jeremias 7:23)

Ti pannagna iti dalan ni Jehova kalikagumanna ti kinasungdo​—ti determinasion nga isu laeng ti pagserbian. Kalikagumanna ti panagtalek​—ti naan-anay a pammati a mapagpiaran ken matungpalto dagiti kari ni Jehova. Ti pannagna iti dalan ni Jehova kalikagumanna ti panagtulnog​—ti panangtungpal kadagiti lintegna a di sumiasi ken panangannurot kadagiti nangato a pagalagadanna. (Salmo 11:7)​—5/15, panid 14.

◻ Ania nga uppat a napapateg a rebbengen ti maaramidan dagiti “sagut a tattao”? (Efeso 4:8)

Sidudungngo nga aturendatayo, siaayat a pabilgendatayo, salimetmetanda ti panagkaykaysatayo iti kongregasion, ken situtured a salaknibandatayo. (Efeso 4:12-14)​—6/1, panid 14.

◻ Ania ti maadaltayo iti pannakilangen ni Pablo iti agarup sangagasut a tattao a nadakamat iti Aramid ken kadagiti suratna?

Kanayon koma a makipagtrabahotayo iti organisasion ti Dios, iti kongregasion a nakaitimpuyogantayo, ken kadagiti kapammatiantayo. Kasapulantayo ti tulong, suporta, ken panangandingayda iti tiempo ti nam-ay ken rigat.​—6/1, panid 31.

◻ Aniada a tallo nga argumento ti mausar a pangtulong kadagiti dadduma a mangpanunot maipapan iti Namarsua?

Ti kinaeksakto a naipalgak iti naglawa nga uniberso, ti punganay ti biag ditoy daga, ken ti di mailibak a kinanaisalsalumina ti utek ti tao, agraman dagiti nagduduma a kapasidadna.​—6/15, panid 18.

◻ Apay a nasken unay a matarusantayo ti kaipapanan ti personal a nagan ti Namarsua?

“Pagbalinenna” ti kayulogan ti nagan ti Dios ket ipaganetgetna nga isu ket agpada nga agpanggep ken agaramid. No ammuen ken usarentayo ti naganna, ad-adda a maapresiartayo a tungpalenna dagiti karina ken di bumurong nga ibanagna ti panggepna.​—6/15, panid 21.

◻ Kasano a makapartisipar dagiti annak iti sangapamiliaan a panagadal iti Biblia?

Aginggat’ mabalin, siguraduenyo nga addaan ti tunggal ubing iti bukodna a Biblia ken publikasion a mapagadalan. Mabalin a pailawlawag iti ubing ti ladawan nga agparang iti material nga ad-adalen, ken mabalin a matudingan a nasaksakbay ti ubing a mangbasa iti maysa a teksto. Mabalin a matudingan ti natataengan a mangdakamat kadagiti gundaway a pakayaplikaran ti material nga ad-adalen.​—7/1, panid 15.

◻ Aniada a kalat ti mabalin nga iraman ti pamilia kas panagsagana kadagiti gimong ti kongregasion?

(1) Nakasagana ti tunggal maysa iti pamilia nga agkomento kadagiti gimong; (2) agkomento ti tunggal maysa iti bukodna a sasao; (3) panangiraman kadagiti kasuratan iti komento; ken (4) panangusig no kasano a personal a mayaplikar ti material.​—7/1, panid 20.

◻ Ania ti maysa a tulbek iti naballigi a panagasawa?

Tapno masarakan ken mapasaran dagiti naisangsangayan a rag-o nga itden ti naballigi a panagasawa, napateg ti nasayaat a komunikasion. Iramanna daytoy ti panangiranud iti karirikna ken kapanunotan. Saklawen ti nasayaat a komunikasion dagiti bambanag a makapabileg, makapagin-awa, natakneng, nadayaw, ken makaliwliwa. (Efeso 4:29-32; Filipos 4:8)​—7/15, panid 21.

◻ Ania ti ‘dalan ni Jehova’? (Salmo 25:8, 9, 12)

Isu dayta ti dalan ti ayat. Naibasar dayta iti panagaramid iti umiso maitunos kadagiti pagalagadan ti Dios. Ti panangipatungpal iti daytoy nga ayat a naibatay iti prinsipio ket inawagan ti Biblia a “dalan a naringringbaw.” (1 Corinto 12:31)​—8/1, panid 12.