Malagipyo Pay Aya?

Tinagiragsakyo kadi ti nangbasa kadagiti kallabes a ruar Ti Pagwanawanan? No kasta, interesadokay la ketdi a manglagip kadagiti sumaganad:

▫ Ania a nabatad a pammaneknek ti impaay ti nagduduma a panagtignay ti nasantuan nga espiritu idi umuna a siglo?

Nangipaay dagitoy a panagtignay iti makita a pammaneknek a saanen nga us-usaren ti Dios ti 1,500-tawennan a kongregasion ti Israel kas naisangsangayan nga ilina, no di ket addan ti anamongna iti baro a kongregasion Kristiano, nga impasdek ti bugbugtong nga Anakna. (Idiligyo ti Hebreo 2:2-4.)​—8/15, panid 5.

▫ Aniat’ makagapu iti nakaskasdaaw nga irarang-ay a napasaran dagiti Saksi ni Jehova?

Kangrunaanna, gapu iti pammendision ti Dios. Trabaho ti Dios dayta. Naibatay iti Biblia ti isursuro dagiti Saksi ni Jehova iti trabahoda a panagebanghelio. Sabali pay a tulbek iti panagballigida isu ti naan-anay a panangbigbigda ken Kristo Jesus kas nadutokan nga Ulo ti kongregasion Kristiano.​—9/1, panid 19.

▫ Apay a kinaasian ni Jehova ni David mainaig iti nadagsen a basolna ken Bat-seba?

Kangrunaanna gapu iti tulag ti Pagarian nga inaramid ti Dios ken David, ngem gapu met iti kinamanangaasi ken pudpudno a panagbabawi ni David. (1 Samuel 24:4-7; 2 Samuel 7:12; 12:13; Salmo 51:1, 2, 17)​—9/15, pinanid 10, 11.

▫ Ania a tallo a kita ti pammaneknek ti ipaay ti Kristiano a Griego a Kasuratan a mangpasingked iti kina-Mesias ni Jesus?

Ti kapuonan ni Jesus ti umuna a pammaneknek. (Mateo 1:1-16; Lucas 3:23-38) Maikadua isu ti natungpal a padto. Nagadu a padto, a kas ti masarakan idiay Daniel 9:25, ti nangipabigbig ken Jesus kas Mesias. Ti maikatlo nga ebidensia isu ti pammaneknek ti Dios a mismo; impaayna daytoy iti tallo a gundaway babaen ti timekna a mismo. (Mateo 17:5; Lucas 3:21, 22; Juan 12:28)​—10/1, pinanid 10, 12.

▫ Aniat’ kayat a sawen ni Jesus idi kinunana, kas nailanad idiay Mateo 24:37: “Kas kadagiti aldaw ni Noe, kastanto ti kaadda ti Anak ti tao”?

Nangbangon ni Noe iti daong ken namakdaar kadagiti nadangkes iti adu a dekada sakbay nga immay ti Layus ken inkisapna ti dakes a sistema ti lubong. Kasta met, ti di makita a kaadda ni Kristo saklawenna ti sumagmamano a dekada, a bayat dayta maipaay ti sangalubongan a panangpaneknek, sakbay nga agngudo met dayta iti dakkel a pannakadadael.​—10/1, panid 16.

▫ Ania dagiti nasken para iti nasayaat a panagadal ti Biblia ti pamilia?

Masapul a gatangen ti gundaway para iti panagadal. Ditay koma palubosan a singaen ti TV wenno dadduma pay a pakasingaan. Nasken nga ikkan ti atension dagiti partikular a kasapulan ti pamilia. Mangaramat kadagiti saludsod a mangallukoy iti panangiyebkas ti kapanunotan tapno masigurado no maaw-awatan met laeng dagiti annak ti ad-adalenda. (Mateo 17:25) Taginayonen a makapabang-ar ti panagadal. Agbalin a naganaygay, ken iraman ti tunggal maysa iti panagadal.​—10/15, panid 17.

▫ Kasano kaseknan koma dagiti Kristiano maipapan iti posibilidad a nalaokan dagiti produkto a taraon kadagiti sangkap ti dara?

Di rumbeng a mariribukan dagiti Kristiano gapu laeng iti posibilidad wenno saosao, ken kasapulan ti kinarasonable uray iti panangsukimat kadagiti etiketa wenno panagimtuod kadagiti partidor. Ngem, no pagaammo a gagangay a maar-aramat ti dara iti maysa a lugar​—iti man taraon wenno iti medikal a panangagas​—masapul nga agtulnog dagiti Kristiano iti bilin ti Dios nga adaywan ti dara. (Aramid 15:28, 29)​—10/15, pinanid 30-1.

▫ Kasano nga itampok ti libro ti Proverbio ti naespirituan a kinainget dagiti wagas ti panangisuro a nausar idiay Israel?

Ipakita ti libro ti Proverbio a ti panggepna isu ti panangisuro kadagiti “awan padasna” kadagiti natan-ok a galad kas ti sirib, disiplina, pannakaawat, kinasaririt, kinahustisia, kinasaldet, pannakaammo, ken abilidad nga agpanunot​—amin “iti panagbuteng ken ni Jehova.” (Proverbio 1:1-7; 2:1-14)​—11/1, panid 12.

▫ Ania a natimbeng a panangmatmat iti edukasion ti rumbeng nga alaen dagiti agtutubo ita?

Rumbeng a matmatan dagiti Kristiano ti edukasion kas maysa a pamay-an iti panangragpat iti kalat. Ti panggepda kadagitoy maudi nga al-aldaw isu ti panagserbi ken Jehova iti amin a kabaelanda ken iti kasayaatan a pamay-an iti amin-tiempo a ministerio no kabaelanda.​—11/1, panid 18.

▫ Apay nga impaannurot ni Jehova iti nasion ti Israel ti panagbayad kadagiti apagkapullo?

Umuna, tapno maipakitada ti panangapresiarda iti kinaimbag ni Jehova. Maikadua, tapno masuportaranda dagiti Levita, iti kasta maipamaysa dagitoy dagiti rebbengenda, agraman ti panangisuro ti Linteg. (Kitaenyo ti 2 Cronicas 17:7-9.)​—12/1, panid 9.

▫ Ania ti apagkapullo a naiyawis nga iyeg dagiti Kristiano? (Malakias 3:10)

Ti apagkapullo itakderanna ti paset ti kukuatayo nga iyegtayo ken Jehova wenno usaren iti serbisiona. Pakakitaan daytoy ti ayattayo kenkuana ken ti panangbigbigtayo iti kinapudno a kukuanatayo.​—12/1, panid 15.