Dandanin ti Maudi a Panangselebrar ni Jesus iti Paskua

Inleppas ni Jesus nga insuro ti uppat nga apostol iti Bantay Dagiti Olibo. Sinungbatanna ti saludsodda maipapan iti kaaddana iti masanguanan ken ti panungpalan ti sistema dagiti bambanag.

Okupado ni Jesus iti dayta nga aldaw ti Nisan 11! Nalabit agsubsublida idin idiay Betania idi imbaga ni Jesus kadagiti apostol: “Ammoyo a dua nga aldaw laengen sakbay ti Paskua, ket ti Anak ti tao mayawat kadagiti tattao tapno maibitay iti kayo.”​—Mateo 26:2.

Iti simmaruno nga aldaw, Mierkoles, mabalin a dagiti laeng apostolna ti kaduana. Iti aldaw ti Martes, tinubngar ni Jesus dagiti lider ti relihion ken imbutaktakna ti aramidda isu a kayatda a patayen. Gapuna, saan a nagpakita idi Nisan 12 tapno awan ti makalapped iti panangrambakna iti Paskua a kaduana dagiti apostolna kalpasan ti ilelennek ti init iti sumaganad a rabii, idi mangrugi ti Nisan 14.

Ngem makarurod dagiti panguluen a papadi ken dagiti panglakayen sakbay ti Paskua. Naguummongda iti paraangan ti nangato a padi a ni Caifas. Apay? Marurodda ta imbutaktak ni Jesus ti aramidda, isu a nagtutulagda “tapno maaresto ken mapapatayda.” Kasano ken kaano nga aramidenda dayta? Kinunada: “Ditay iranrana iti piesta amangan no agprotesta dagiti tattao.” (Mateo 26:​4, 5) Maamakda ta adu ti maay-ayatan ken Jesus.

Pagammuan ta adda immay a bisitada. Nasdaawda ta dayta ket maysa nga apostol ni Jesus, ni Judas Iscariote. Sinugsogan ni Satanas tapno traidorenna ti Apona! Kinuna ni Judas kadakuada: “Ania ti itedyo kaniak tapno traidorek ni Jesus ket tiliwenyo?” (Mateo 26:15) Naragsakanda iti dayta ket “nagaanamonganda nga ikkanda ni Judas iti kuarta.” (Lucas 22:5) Mano ti itedda? Nagnunumuanda nga ikkan iti 30 a sinsilio a pirak. Kinapudnona, aggatad ti maysa nga adipen iti 30 a siklo. (Exodo 21:32) Ngarud, ipakpakita dagiti lider ti relihion a bassit laeng ti pateg ni Jesus. Rinugianen ni Judas ti “nangbirok iti nasayaat a gundaway a mangtraidor ken Jesus tapno mayawatna kadakuada a saan a maammuan dagiti tattao.”​—Lucas 22:6.

Mangrugi ti Nisan 13 iti ilelennek ti init iti Mierkoles. Daytoyen ti maikanem ken maudi a rabii ni Jesus idiay Betania. Kabigatanna, masapul a maaramiden ti maudi a panagsagana para iti Paskua. Masapul a maisaganan ti urbon a karnero tapno maparti ken sibubukel a maituno apaman a mangrugi ti Nisan 14. Sadino ti pangananda, ken asino ti mangisagana? Saan nga imbaga ni Jesus tapno saan a maibaga ni Judas kadagiti panguluen a papadi.

Nalabit iti nasapa pay a malem ti Huebes, imbaon ni Jesus da Pedro ken Juan manipud Betania a mapan idiay Jerusalem. Kinunana: “Inkayo ket isaganayo ti pangrabiitayo iti Paskua.” Kinunada: “Sadino ti kayatmo a pangisaganaanmi iti dayta?” Insungbatna: “Inton sumrekkayo iti siudad, sabtennakayto ti maysa a lalaki a nakaawit iti karamba ti danum. Surotenyo iti balay a serkanna. Ket ibagayo iti makimbalay, ‘Ipaspasaludsod ti Mannursuro: “Ayanna ti kuarto para kadagiti bisita a mabalin a panganak iti pangrabii ti Paskua a kadua dagiti adalak?”’ Ipakitananto ti nalawa a makinngato a kuarto a kompleton kadagiti kasapulan. Agsaganakayo sadiay.”​—Lucas 22:​8-12.

Sigurado nga adalan ni Jesus ti makimbalay iti pangrambakanda iti Paskua. Nalabit namnamaenna a kiddawen ni Jesus nga usarenna ti balayna tapno selebraranna ti Paskua. Idi nakadanonen ti dua nga apostol idiay Jerusalem, nakitada ti amin nga imbaga ni Jesus kadakuada. Isu a siniguradoda a nakasaganan ti urbon a karnero ken amin a kasapulan iti pannangan iti Paskua, agraman dagiti kasapulan ti 13​—ni Jesus ken ti 12 nga apostol.