Manangapresiar a Dios ni Jehova

“Saan a nakillo ti Dios tapno lipatenna ti aramidyo ken ti ayat nga impakitayo maipaay iti naganna.”​—HEBREO 6:10.

 1. Kasano nga impakita ni Jehova ti apresasionna iti Moabita a ni Ruth?

APRESIAREN unay ni Jehova dagiti panagregget dagidiay sipapasnek a mangar-aramid iti pagayatanna, ken sibabaknang a gunggonaanna ida. (Hebreo 11:6) Ti matalek a tao a ni Boaz pagaammona dagiti agkakaimbag nga aspeto ti personalidad ti Dios, kas ipamatmat ti kinunana iti Moabita a ni Ruth, a siaayat a nangaywan iti nabalo a katuganganna: “Gunggonaan koma ni Jehova ti wagas a panagtignaymo, ket adda koma naan-anay a tangdan nga agpaay kenka manipud ken Jehova.” (Ruth 2:12) Ti Dios binendisionanna kadi ni Ruth? Wen! Nailanad pay ketdi iti Biblia ti pakasaritaanna! Maysa pay, isu ti nagbalin nga asawa ni Boaz ken kapuonan da Ari David ken Jesu-Kristo. (Ruth 4:13, 17; Mateo 1:5, 6, 16) Maysa dayta kadagiti adu a pagarigan iti Biblia a mangipakita nga apresiaren ni Jehova dagiti adipenna.

2, 3. (a) Apay a makaay-ayo dagiti ebkas ti apresasion ni Jehova? (b) Apay a maapresiar ni Jehova dagiti panagreggettayo? Iyilustrar.

² Ibilang ni Jehova a kinakillo iti biangna no isu ket saan a mangipakita iti apresasion. Kuna ti Hebreo 6:10: “Saan a nakillo ti Dios tapno lipatenna ti aramidyo ken ti ayat nga impakitayo maipaay iti naganna, ta nagserbikayo kadagiti sasanto ken agtultuloykayo nga agserbi.” Makaay-ayo dagitoy nga ebkas yantangay ipakitada a ti Dios ap-apresiarenna dagiti matalek a tattao uray managbasol ken agkurangda iti dayagna.―Roma 3:23.

³ Gapu iti kinaimperpektotayo, mabalin a mariknatayo nga awan serserbina ken saan a bendisionan ti Dios ti panagreggettayo nga agserbi kenkuana. Nupay kasta, naan-anay a maawatan ni Jehova dagiti motibo ken kasasaadtayo, ken pudno nga ipatpategna ti amin-kararua a panagserbitayo. (Mateo 22:37) Kas panangyilustrar: Iti lamisaanna, nakita ti ina ti maysa a regalo a para kenkuana―maysa nga ordinario laeng a kuentas. Mabalin a tagibassitenna dayta ket dina pagan-ano. Ngem sigun iti naipakuyog a kard, naggapu dayta iti balasitangna, nga inggatangna ti amin nga urnongna. Gapuna, mabalin nga agbaliw ti panangmatmat ti ina iti dayta a regalo. Nalabit a makalua a mangarakup iti balasitangna ket iyebkasna ti naimpusuan nga apresasionna.

4, 5. Kasano a tinulad ni Jesus ti kinamanangapresiar ni Jehova?

⁴ Gapu ta naan-anay nga ammona dagiti motibo ken limitasiontayo, apresiaren ni Jehova no ania ti kasayaatan a maipaaytayo kenkuana, bassit man dayta wenno dakkel. Kas naan-anay a ladawan ni Amana, kasta met ti kababalin ni Jesus. Lagipenyo ti salaysay ti Biblia maipapan iti balo iti templo. “Idi timmaliaw nakita [ni Jesus] dagiti nabaknang a mangipispisok iti sagsagutda kadagiti baul ti gameng. Kalpasanna, nakitana ti maysa a marigrigat a balo a babai a nangipisok sadiay iti dua a babassit a sinsilio a bassit unay ti pategna, ket kinunana: ‘Ibagak kadakayo a sipupudno, Daytoy a balo, nupay napanglaw, nangipisok iti ad-adu ngem iti impisokda amin. Ta amin dagitoy nangipisokda iti sagsagut manipud kadagiti teddada, ngem daytoy a babai manipud iti panagkasapulanna impisokna ti isuamin a pagbiag nga adda kenkuana.’”​—Lucas 21:1-4.

⁵ Wen, gapu ta ammo ni Jesus a balo ken napanglaw dayta a babai, maawatanna ti pudpudno a pateg ti sagutna, isu nga inapresiarna dayta. Kasta met laeng ni Jehova. (Juan 14:9) Saan kadi a makaparegta a maammuan nga aniaman ti kasasaadyo, mabalinyo a magun-od ti anamong ti manangapresiar a Dios ken ti Anakna?

Ginunggonaan ni Jehova ti Etiope a Managbuteng iti Dios

6, 7. Apay ken kasano nga impakita ni Jehova ti apresasionna ken ni Ebed-melec?

⁶ Maulit-ulit nga ipakita ti Kasuratan nga apresiaren ni Jehova dagidiay mangar-aramid iti pagayatanna. Usigenyo ti pannakilangenna iti managbuteng iti Dios nga Etiope a ni Ebed-melec, kasadaran ni Jeremias ken maysa nga adipen iti sangakabbalayan ti saan a matalek nga ari iti Juda a ni Zedekias. Naammuan ni Ebed-melec a dagiti prinsipe iti Juda siuulbod a pinabasolda ni propeta Jeremias iti iyaalsa isu nga impisokda iti maysa a pagurnongan ti danum tapno matay iti bisin. (Jeremias 38:1-7) Yantangay ammona a kasta unay ti panangbusorda ken ni Jeremias gapu iti mensahe nga ipakpakaammona, inrisgo ni Ebed-melec ti biagna ket nagpakpakaasi iti ari. Situtured a kinuna ti Etiope: “O apok nga ari, dagitoy a lallaki nagaramidda iti dakes iti isuamin nga inaramidda ken Jeremias a mammadto, nga impisokda iti pagurnongan ti danum, iti kasta isu matayto iti ayanna gapu iti nakaro a bisin.” Maitunos iti bilin ti ari, nangala ni Ebed-melec iti 30 a lallaki ket inyaonda ti propeta ti Dios.​—Jeremias 38:8-13.

⁷ Nakita ni Jehova a nagtignay ni Ebed-melec buyogen ti pammati, a timmulong a nangdaer iti aniaman a panagbuteng a mabalin a nariknana. Iti kasta, impakita ni Jehova ti apresasionna ket kinunana ken ni Ebed-melec babaen ken ni Jeremias: “Adtoy papudnuek ti sasaok iti daytoy a siudad maipaay iti didigra ket saan a maipaay iti pagimbagan . . . Ket ispalenkanto iti dayta nga aldaw, . . . ket saankanto a mayawat iti ima dagiti lallaki a kaamakmo. Ta di bumurong nga ipaayankanto iti itatalaw . . . ; ket sigurado a matagikuamto ti kararuam kas maysa a samsam, agsipud ta nagtalekka kaniak.” (Jeremias 39:16-18) Wen, inispal ni Jehova da Ebed-melec ken Jeremias manipud kadagiti dakes a prinsipe ti Juda ken idi agangay kadagiti taga-Babilonia, a nangdadael iti Jerusalem. “[Ni Jehova] saluadanna dagiti kararua dagidiay nasungdona; iti ima dagidiay nadangkes ispalenna ida,” kuna ti Salmo 97:10.

“Ni Amam a Kumita iti Nalimed Supapakannakanto”

8, 9. Kas impakita ni Jesus, aniada a kararag ti apresiaren ni Jehova?

⁸ Ti sabali pay a pammaneknek nga apresiaren ken ipateg ni Jehova dagiti panagreggettayo nga agserbi kenkuana ket agminar kadagiti sasao ti Biblia maipapan iti kararag. “Ti kararag dagidiay napalungdo pakaragsakan [ti Dios],” kinuna ti masirib a tao. (Proverbio 15:8) Idi kaaldawan ni Jesus, adu a papangulo ti relihion ti nagkararag iti publiko, saan a gapu iti pudno a kinapasnek, no di ket tapno agparammagda kadagiti tattao. “Aw-awatendan a naan-anay ti gunggonada,” kinuna ni Jesus. Binilinna dagiti pasurotna, “Nupay kasta, inton agkararagka, sumrekka iti pribado a siledmo ket, kalpasan a nairikepmon ti ridawmo, agkararagka ken ni Amam nga adda iti nalimed; iti kasta ni Amam a kumita iti nalimed supapakannakanto.”​—Mateo 6:5, 6.

⁹ Siempre, saan a konkondenaren ni Jesus ti panagkararag iti publiko, ta uray isu a mismo nagkararag iti publiko iti sumagmamano a gundaway. (Lucas 9:16) Apresiaren unay ni Jehova no naimpusuan nga agkararagtayo kenkuana, nga awan ti motibotayo nga agparammag kadagiti tattao. Kinapudnona, dagiti pribado a kararagtayo ket nasayaat a pagilasinan ti nasged a panagayat ken panagtalektayo iti Dios. Gapuna, saan a pakasdaawan a masansan a nangbirok ni Jesus kadagiti pribado a lugar tapno agkararag. Naminsan, inaramidna dayta a “nasapa iti bigat, bayat a nasipnget pay laeng.” Iti sabali a gundaway, “simmang-at a maymaysa idiay bantay tapno agkararag.” Ken sakbay a pinilina dagiti 12 nga apostolna, agmaymaysa a nagkararag ni Jesus iti agpatnag.​—Marcos 1:35; Mateo 14:23; Lucas 6:12, 13.

10. Ania ti manamnamatayo no napasnek ken naimpusuan dagiti kararagtayo?

¹⁰ Panunotenyo no kasano nga inimdengan a naimbag ni Jehova ti naimpusuan a kararag ti Anakna! Kinapudnona, adda dagiti gundaway a nagkararag ni Jesus “buyogen dagiti napigsa nga ikkis ken lulua, ket isu naipangag buyogen ti pannakaanamong gapu iti nadiosan a butengna.” (Hebreo 5:7; Lucas 22:41-44) Manamnamatayo nga umimdeng a naimbag ken apresiaren ti nailangitan nga Amatayo no napasnek ken naimpusuan dagiti kararagtayo. Wen, “ni Jehova asideg kadagidiay amin . . . nga umawag kenkuana iti kinapudno.”​—Salmo 145:18.

11. Ania ti rikna ni Jehova kadagiti ar-aramidentayo no agmaymaysatayo?

¹¹ No apresiaren ni Jehova ti pribado a kararagtayo, sigurado nga apresiarenna ti panagtulnogtayo uray di makitkita dagiti dadduma! Wen, ammo ni Jehova dagiti ar-aramidentayo no agmaymaysatayo. (1 Pedro 3:12) Kinapudnona, no matalek ken natulnogtayo uray awan ti makakitkita, pagilasinan dayta nga addaantayo iti “naan-anay a puso” agpaay ken ni Jehova, maysa a puso a nasin-aw ti motibona ken sititibker a mangitantandudo iti umiso. (1 Cronicas 28:9) Anian a makaparagsak ken ni Jehova ti kasta a kababalin!―Proverbio 27:11; 1 Juan 3:22.

12, 13. Kasanotayo a masaluadan ti isip ken pusotayo ket matuladtayo ti matalek nga adalan a ni Natanael?

¹² Gapuna, agannad dagiti matalek a Kristiano maibusor kadagiti nalimed a basol a mangdadael iti isip ken puso, kas iti panagbuya iti pornograpia ken kinaranggas. Nupay dadduma a basol ti mabalin a mailimed kadagiti tattao, ammotayo nga “amin a bambanag lamolamoda ken sipapanayagda a naiparang kadagiti mata daydiay pagidatagantayo.” (Hebreo 4:13; Lucas 8:17) No ikagumaantayo a liklikan dagiti bambanag a mamagladingit ken ni Jehova, maaddaantayo iti nadalus a konsiensia ken rag-o gapu ta ammotayo a maay-ayotayo ti Dios. Wen, awan duadua a pudno nga apresiaren ni Jehova ti maysa a “magmagna nga awan pagkuranganna ken mangan-annurot iti kinalinteg ken agsasao iti kinapudno iti pusona.”​—Salmo 15:1, 2.

¹³ Nupay kasta, kasanotay a masaluadan ti isip ken pusotayo iti lubong a napno iti kinadakes? (Proverbio 4:23; Efeso 2:2) Malaksid iti naan-anay a panangaprobetsar kadagiti amin a naespirituan a probision, masapul nga ikagumaantayo a laksiden ti dakes ken aramiden ti naimbag, a sigaganat a paruten ti aniaman a di umiso a tarigagay tapno saan nga agturong iti basol. (Santiago 1:14, 15) Sigurado a maragsakankayo no ibaga kadakayo ni Jesus ti imbagana ken ni Natanael: “Kitaenyo, [maysa a lalaki] a kenkuana awan ti allilaw.” (Juan 1:47) Ni Natanael, a naawagan met iti Bartolome, ket nagbalin idi agangay a maysa kadagiti 12 nga apostol ni Jesus.―Marcos 3:16-19.

“Naasi ken Matalek a Nangato a Padi”

14. Ania ti reaksion ni Jesus iti inaramid ni Maria no idilig iti reaksion dagiti dadduma?

¹⁴ Kas “ti ladawan ti di makita a Dios” a ni Jehova, naan-anay nga inyanninaw ni Jesus ti Amana no maipapan iti panangapresiar kadagidiay agserserbi iti Dios buyogen ti nadalus a puso. (Colosas 1:15) Kas pagarigan, lima nga aldaw sakbay nga insukona ti biagna, ni Jesus ken ti dadduma nga adalanna napanda iti pagtaengan ni Simon iti Betania. Iti dayta a rabii, ni Maria a kabsat da Lazaro ken Marta ‘nangala iti maysa a libra ti bangbanglo a lana, pudpudno a nardo, a nangina unay’ (nga aggatad iti agarup makatawen a sapul), ket sinapsapuanna dagiti ulo ken saka ni Jesus. (Juan 12:3) “Apay daytoy a panangsayang?” kinuna ti dadduma. Nupay kasta, sabali ti panangmatmat ni Jesus iti dayta nga inaramid ni Maria. Minatmatanna dayta kas panangiparangarang ti kinaparabur ken addaan iti napateg a kaipapanan mainaig iti umad-adani nga ipapatay ken pannakaitabonna. Gapuna, imbes nga umsienna ni Maria, pinadayawan ni Jesus ti babai. “Sadinoman a pakaikasabaan daytoy naimbag a damag iti intero a lubong,” kinunana, “ti inaramid daytoy a babai maisaritanto met kas pakalaglagipan kenkuana.”​—Mateo 26:6-13.

15, 16. Ania ti pagimbaganna kadatayo a ni Jesus nagbiag ken nagserbi iti Dios kas maysa a tao?

¹⁵ Anian a pribilehiotayo a maaddaan iti kasta a manangapresiar a Lider a kas ken Jesus! Kinapudnona, gapu ta napadasan ni Jesus ti nagbiag kas tao, nakatulong dayta tapno masaganaanna ti trabaho nga intalek kenkuana ni Jehova―kas maysa a Nangato a Padi ken Ari, umuna iti kongregasion dagiti napulotan ken kalpasanna, iti lubong.―Colosas 1:13; Hebreo 7:26; Apocalipsis 11:15.

¹⁶ Sakbay pay nga immay ditoy daga, ipatpateg ken kaay-ayo ni Jesus ti sangatauan. (Proverbio 8:31) Gapu ta nagbiag kas tao, ad-adda a naawatanna dagiti pakasuotan a mapaspasarantayo bayat nga agserserbitayo iti Dios. “Rebbengen [ni Jesus] ti agbalin a kas iti ‘kakabsatna’ iti amin a bambanag,” insurat ni apostol Pablo, “tapno isu agbalin a naasi ken matalek a nangato a padi . . . Gapu ta isu nagsagaba idi masubsubok, kabaelanna ti bumadang kadagidiay masubsubok.” Kabaelan ni Jesus ti “makipagrikna kadagiti kinakapuytayo” gapu ta isu ket “nasuboken iti amin a bambanag kas kadatayo, ngem awanan basol.”​—Hebreo 2:17, 18; 4:15, 16.

17, 18. (a) Ania ti ipalgak dagiti surat kadagiti pito a kongregasion idiay Asia Menor no maipapan iti kadakkel ti apresasion ni Jesus? (b) Iti ania a maisagsagana dagiti napulotan a Kristiano?

¹⁷ Idi napagungar ni Jesus, ad-adda a naawatanna dagiti pakasuotan dagiti pasurotna. Nagminar dayta iti suratna kadagiti pito a kongregasion iti Asia Menor, nga inlanad ni apostol Juan. Iti kongregasion ti Smirna, kinuna ni Jesus: “Ammok ti rigat ken kinakurapaymo.” Kasla ibagbaga ditoy ni Jesus a, ‘Maawatak a naan-anay dagiti parikutmo; ammok no ania ti mapaspasaram.’ Kalpasanna, buyogen ti asi ken autoridad a nagun-odna gapu iti panagsagabana a mismo agingga ken patay, innayon ni Jesus: “Paneknekam ta bagim a matalek uray agingga ken patay, ket itedkonto kenka ti korona ti biag.”​—Apocalipsis 2:8-10.

¹⁸ Dagiti suratna kadagiti pito a kongregasion ket naglaon kadagiti sasao a mangipakita a naan-anay nga ammo ni Jesus dagiti pakarigatan a mapaspasaran dagiti adalanna ken ti napasnek a panangapresiarna iti panangsalimetmetda iti kinatarnawda. (Apocalipsis 2:1–3:22) Laglagipenyo a ti kasarsarita ni Jesus ket dagiti napulotan a Kristiano a mangnamnama a makipagturay kenkuana idiay langit. Kas iti Apoda, maisagsaganada agpaay iti natan-ok nga akemda, ti napnuan-asi a panangiburayda kadagiti gunggona nga iyeg ti pangsubbot a daton ni Kristo iti masaksakit a sangatauan.―Apocalipsis 5:9, 10; 22:1-5.

19, 20. Kasano nga impakita dagiti kameng ti “dakkel a bunggoy” nga agyamyamanda ken ni Jehova ken iti Anakna?

¹⁹ Siempre, malaksid kadagiti napulotan a Kristiano, ay-ayaten met ni Jesus ti nasungdo a “sabsabali a karnero,” a minilion kadakuada ita ti agbalinto a kameng ti “dakkel a bunggoy . . . manipud kadagiti amin a nasion,” a makalasat iti umad-adani a “dakkel a rigat.” (Juan 10:16; Apocalipsis 7:9, 14) Dumasdasigda ken ni Jesus kas panangipakita iti panagyamanda iti pangsubbot a datonna ken gapu iti namnamada a biag nga agnanayon. Kasanoda nga ipakpakita ti apresasionda? Babaen ti ‘sagrado a panagserbida iti Dios iti aldaw ken rabii.’―Apocalipsis 7:15-17.

²⁰ Ti sangalubongan a report para iti 2006 a tawen serbisio, a masarakan iti panid 27 agingga iti 30, silalawag a paneknekanna a pudno nga ipapaay dagitoy a matalek a ministro ti “sagrado a panagserbi iti aldaw ken rabii.” Kinapudnona, iti dayta a tawen, kaduada ti sumagmamano laengen a natda a napulotan a Kristiano a nangbusbos iti 1,333,966,199 nga oras iti trabaho a panangasaba―katupag ti nasurok a 150,000 a tawtawen!

Itultuloy nga Ipakita ti Apresasion!

21, 22. (a) No maipapan iti panangipakita iti apresasion, apay a nasken a nangnangruna nga agannad ita dagiti Kristiano? (b) Ania ti mausig iti sumaganad nga artikulo?

²¹ Iti pannakilangenda kadagiti imperpekto a tattao, impakita ni Jehova ken ti Anakna ti saan a matukod a kadakkel ti apresasionda. Nupay kasta, makapaladingit ta kaaduan a tattao ti saan a mangikankano iti Dios, nga ipangpangrunada dagiti bukodda a pagnam-ayan. Iti panangdeskribirna kadagiti tattao nga agbibiag “kadagiti maudi nga aldaw,” insurat ni Pablo: “Dagiti tattao managayatdanto iti bagbagida, managayat iti kuarta . . . saan a managyaman.” (2 Timoteo 3:1-5) Anian a naiduma ti kasta a tattao kadagiti pudno a Kristiano, a mangiparparangarang iti apresasionda kadagiti amin nga inaramid ti Dios agpaay kadakuada babaen ti naimpusuan a kararagda, sidadaan a panagtulnogda, ken amin-kararua a panagserbida!―Salmo 62:8; Marcos 12:30; 1 Juan 5:3.

²² Iti sumaganad nga artikulo, repasuentayo ti dadduma kadagiti adu a naespirituan a probision a siaayat nga impaay kadatayo ni Jehova. Bayat nga utobentayo dagitoy a “naimbag a sagut,” sapay koma ta ad-adda a rumayray ti apresasiontayo.―Santiago 1:17.

Ania ti Sungbatyo?

• Kasano nga impakita ni Jehova nga isu ket manangapresiar a Dios?

• No agmaymaysatayo, kasanotayo a maparagsak ti puso ni Jehova?

• Kadagiti ania a pamay-an nga impakita ni Jesus ti apresasionna?

• Kasano a nakatulong ken ni Jesus ti panagbiagna kas tao tapno agbalin a naasi ken manangapresiar nga agturay?

[Ladawan iti panid 17]

No kasano a ti maysa a naayat a nagannak apresiarenna ti simple a sagut ti anakna, apresiaren ni Jehova no ania ti kasayaatan a maipaaytayo kenkuana