Adtoy! Ti Adipen nga Inanamongan ni Jehova

“Adtoy! Ti adipenko, . . . nga inanamongan ti kararuak!”​—Isa. 42:1.

 1. Ania ti maiparparegta nga aramidentayo kas ili ni Jehova, nangruna bayat nga umas-asideg ti Memorial, ken apay?

BAYAT nga umas-asideg ti pananglaglagiptayo iti ipapatay ni Kristo, maiparparegta kadatayo kas ili ti Dios a surotentayo ti balakad ni apostol Pablo a “kumitatayo a sipapasnek iti Kangrunaan nga Ahente ken Manangan-anay iti pammatitayo, ni Jesus.” Innayon ni Pablo: “Pudno unay, utobenyo a sisisinged daydiay nakapagibtur iti kasta a mangbusor a panagsao dagiti managbasol maibusor kadagiti bukodda a pagimbagan, tapno saankay koma a mabannog ken agkapuy kadagiti kararuayo.” (Heb. 12:2, 3) Ti ad-adda a panangusig iti kinamatalek ni Kristo a naitampok iti sakripisiona ket makatulong kadagiti napulotan a Kristiano ken iti kakaduada a sabsabali a karnero nga agtultuloy nga agserbi a simamatalek ken Jehova ken mangliklik iti ‘panagkapuy dagiti kararuada.’​—Idilig ti Galacia 6:9.

 2. Ania dagiti maadaltayo kadagiti padto ni Isaias mainaig iti Anak ti Dios?

² Babaen ken mammadto nga Isaias, nangipaltiing ni Jehova iti agsasaruno a padto a direkta a nainaig iti Anakna. Dagita a padto ti makatulong tapno “kumitatayo a sipapasnek iti Kangrunaan nga Ahente ken Manangan-anay iti pammatitayo” a ni Kristo Jesus.a Mangipaay dagita iti impormasion maipapan iti personalidadna, dagiti panagsagabana, ken ti pannakaitan-okna kas Ari ken Mannubbottayo. Paunegenda ti pannakaawattayo iti Memorial, nga angayentayo ita a tawen inton Huebes, Abril 9, kalpasan ti ilelennek ti init.

Nayam-ammo ti Kinasiasino ti Adipen

3, 4. (a) Pagaplikaran ti sao nga “adipen” a nadakamat iti libro nga Isaias? (b) Kasano nga inyam-ammo a mismo ti Biblia ti kinasiasino ti Adipen a nadakamat iti Isaias kapitulo 42, 49, 50, 52, ken 53

³ Ti sao nga “adipen” ket namin-adu a nadakamat iti libro nga Isaias. Pasaray tumukoy dayta ken Isaias a mismo. (Isa. 20:3; 44:26) No dadduma, agaplikar met dayta iti intero a nasion ti Israel, wenno nasion ni Jacob. (Isa. 41:8, 9; 44:1, 2, 21) Ngem dagiti ngay naisangsangayan a padto maipapan iti Adipen a nailanad iti Isaias kapitulo 42, 49, 50, 52, ken 53? Kadagita a kapitulo, silalawag nga iyam-ammo kadatayo ti Kristiano a Griego a Kasuratan ti kinasiasino ti Adipen ni Jehova. Makapainteres ta ti opisial nga Etiope a nadakamat iti libro nga Aramid ket agbasbasa iti maysa kadagita a padto idi a ti ebanghelisador a ni Felipe ket inturong ti espiritu a makisarita kenkuana. Yantangay nabasan dayta nga opisial ti teksto a masarakantayo itan iti Isaias 53:7, 8, inyimtuod ni Felipe: “Ipakaasik kenka, Maipapan iti siasino a kunaen daytoy ti mammadto? Maipapan iti bagina wenno maipapan iti sabali pay a tao?” Dagus nga inlawlawag ni Felipe a ti dakdakamaten ni Isaias ket ti Mesias a ni Jesus.​—Ara. 8:26-35.

⁴ Idi maladaga pay laeng ni Jesus, maysa a nalinteg a lalaki nga agnagan iti Simeon ti nangideklara babaen iti pannakabalin ti nasantuan nga espiritu a “ni ubing a Jesus” ket agbalinto “a silaw a pangikkat iti abbong manipud kadagiti nasion,” kas naipadto iti Isaias 42:6 ken 49:6. (Luc. 2:25-32) Kanayonanna, ti nakababain a pannakamaltrato ni Jesus idi rabii ti pannakabistana ket naipadto iti Isaias 50:6-9. (Mat. 26:67; Luc. 22:63) Kalpasan ti Pentecostes 33 K.P., ni apostol Pedro silalawag nga inyam-ammona ni Jesus kas ti ‘Adipen’ ni Jehova. (Isa. 52:13; 53:11; basaen ti Aramid 3:13, 26.) Ania ti masursurotayo kadagita a padto maipapan iti Mesias?

Sinanay ni Jehova ti Adipenna

 5. Ania a pannakasanay ti inawat ti Adipen?

⁵ Iti maysa kadagiti padto ni Isaias maipapan iti Adipen ti Dios, nailawlawag ti nasinged a relasion ni Jehova ken ti inauna nga Anakna sakbay a nagbalin a tao dayta nga Anak. (Basaen ti Isaias 50:4-9.) Impalgak a mismo ti Adipen nga isu ket kanayon a sinanay ni Jehova. Kinunana: “Riingenna ti lapayagko tapno dumngeg a kas kadagidiay nasursuruan.” (Isa. 50:4) Iti unos dayta a tiempo, ti Adipen ni Jehova ket nagimdeng ken nagsursuro ken Amana. Isu ket nagbalin a managpasakup nga adalan. Anian a naisangsangayan a pribilehio ti agpaisuro iti Namarsua iti uniberso!

 6. Kasano nga impakita ti Adipen ti naan-anay a panagpasakupna ken Amana?

⁶ Iti dayta a padto, ti Adipen dinakamatna ti Amana kas ti “Soberano nga Apo Jehova.” Dayta ti mangipakita a ti Adipen ammonan ti nakapatpateg a kinapudno a ni Jehova ti soberano iti intero nga uniberso. Kas panangipakitana iti naan-anay a panagpasakupna ken Amana, kinunana: “Ti met laeng Soberano nga Apo Jehova linuktanna ti lapayagko, ket siak, iti biangko, saanak a rebelioso. Saanak a bimmaw-ing iti sungani a turong.” (Isa. 50:5) “Kas ti nasigo a managobra,” isu ket adda idi iti sibay ni Jehova idi naparsua ti uniberso ken ti tao. Dayta a “nasigo a managobra” ket ‘maragragsakan iti sanguanan ni Jehova iti isuamin a tiempo, yantangay maragragsakan iti nabunga a disso iti daga ni Jehova, ket ti bambanag a pakaay-ayatanna kas ti Anak ti Dios ket mainaig iti annak ti tattao.’​—Prov. 8:22-31.

 7. Ania ti mangipakita a nasigurado ti Adipen ti tulong ni Amana kabayatan ti pannakasuotna?

⁷ Dayta a pannakasanay nga inawat ti Adipen ken ti ayatna iti sangatauan ti nangisagana kenkuana iti iyaayna ditoy daga ken iti panangsangona iti nakaro nga ibubusor. Kanayon a nagragsakanna ti panangaramid iti pagayatan ni Amana, agpapan pay ti nakaro a pannakaidadanes. (Sal. 40:8; Mat. 26:42; Juan 6:38) Kabayatan ti pannakasuotna ditoy daga, nasigurado ni Jesus ti anamong ken tulong ni Amana. Kas impadto ni Isaias, naikuna ni Jesus: “Daydiay mangidekdeklara kaniak a nalinteg ket asideg. Siasino ti makabalin a makisupiat kaniak? . . . Adtoy! Ti met laeng Soberano nga Apo Jehova tulongannakto.” (Isa. 50:8, 9) Talaga a tinulongan ni Jehova ti matalek nga Adipenna iti unos ti ministeriona ditoy daga, kas ipakita ti maysa pay a padto ni Isaias.

Ti Naindagaan a Ministerio ti Adipen

 8. Ania ti mangpaneknek a ni Jesus ti ‘pinili’ ni Jehova kas naipadto iti Isaias 42:1?

⁸ Sigun iti Biblia, kastoy ti napasamak idi nabautisaran ni Jesus idi 29 K.P.: “Bimmaba kenkuana ti nasantuan nga espiritu . . . ket adda timek a naggapu iti langit: ‘Sika ti Anakko, ti dungdungnguen; inanamonganka.’” (Luc. 3:21, 22) Silalawag ngarud nga inyam-ammo ni Jehova ti ‘pinilina’ a nadakamat iti padto ni Isaias. (Basaen ti Isaias 42:1-7.) Bayat ti ministerio ni Jesus ditoy daga, tinungpalna dayta a padto iti naisangsangayan a wagas. Iti Ebangheliona, inadaw ni Mateo ti sasao a masarakan iti Isaias 42:1-4 ken inyaplikarna dayta ken Jesus.​—Mat. 12:15-21.

9, 10. (a) Kasano a tinungpal ni Jesus ti Isaias 42:3 bayat ti ministeriona? (b) Kasano a ni Kristo ‘nangyeg iti hustisia’ idi adda ditoy daga, ken kaano a “maipasdekna ti kinahustisia iti mismo a daga”?

⁹ Dagiti ordinario a Judio ket lalaisen dagiti papanguluen ti relihionda. (Juan 7:47-49) Saan a nasayaat ti pannakatrato dagita a tattao ken mayaspingda iti “naparpar a runo” wenno agkurkuridemdemen a “pabilo a lino.” Ngem kinaasian ni Jesus dagiti napanglaw ken agsagsagaba. (Mat. 9:35, 36) Siaasi nga inyawisna kadakuada: “Umaykayo kaniak, dakayo amin a mabambannogan ken madagdagsenan, ket pagin-awaenkayto.” (Mat. 11:28) Kanayonanna, ni Jesus ‘nangyeg iti hustisia’ babaen ti panangisurona kadagiti pagalagadan ni Jehova maipapan iti umiso ken di umiso. (Isa. 42:3) Insurona pay a nasken a maipaannurot ti Linteg ti Dios buyogen ti kinanainkalintegan ken asi. (Mat. 23:23) Impakita met ni Jesus ti hustisia babaen ti di mangidumduma a panangasabana kadagiti nabaknang ken napanglaw.​—Mat. 11:5; Luc. 18:18-23.

¹⁰ Impadto met ni Isaias a ti ‘pinili’ ni Jehova “maipasdekna ti kinahustisia iti mismo a daga.” (Isa. 42:4) Asidegen nga aramidenna dayta. Kas Ari ti Mesianiko a Pagarian, dadaelennanto ti amin a napolitikaan a pagarian ken suktanna dagita iti mismo a nalinteg a turayna. Mangipasdekto iti baro a lubong a sadiay “agtaeng ti kinalinteg.”​—2 Ped. 3:13; Dan. 2:44.

“Maysa a Silaw” ken “Tulag”

11. Iti ania nga anag a ni Jesus ti “silaw dagiti nasion” idi umuna a siglo, ken agtultuloy agingga ita?

¹¹ Kas kaitungpalan ti Isaias 42:6, talaga a pinaneknekan ni Jesus nga isu ti “silaw dagiti nasion.” Bayat ti naindagaan a ministeriona, nangipaay iti naespirituan a lawag nangnangruna kadagiti Judio. (Mat. 15:24; Ara. 3:26) Ngem kinuna ni Jesus: “Siak ti silaw ti lubong.” (Juan 8:12) Isu ket nagbalin a silaw agpadpada kadagiti Judio ken kadagiti nasion saan laeng a babaen ti panangipaayna iti naespirituan a pannakalawlawag no di ket babaen met iti panangisakripisiona iti perpekto a biagna kas subbot agpaay iti sangatauan. (Mat. 20:28) Kalpasan ti panagungarna, imbilinna kadagiti adalanna nga isu ket saksianda “agingga iti kaadaywan a paset ti daga.” (Ara. 1:8) Bayat ti ministerioda, inadaw da Pablo ken Bernabe ti sasao a “silaw dagiti nasion” ken inyaplikarda dayta iti trabahoda a panangasaba kadagiti di Judio. (Ara. 13:46-48; idilig ti Isaias 49:6.) Agtultuloy pay laeng dayta a trabaho bayat a dagiti napulotan a kakabsat ni Jesus ditoy daga ken ti kakaduada ket mangisaksaknap iti naespirituan a lawag ken tultulonganda dagiti tattao a mamati ken Jesus kas ti “silaw dagiti nasion.”

12. Kasano nga inted ni Jehova ti Adipenna kas “maysa a tulag dagiti tattao”?

¹² Iti dayta met la a padto, kinuna ni Jehova iti Adipen a pinilina: “Saluadankanto ken itedka kas maysa a tulag dagiti tattao.” (Isa. 42:6) Inkagumaan unay ni Satanas a papatayen ni Jesus ken lapdan ti panangiringpasna iti ministeriona ditoy daga, ngem ni Jesus ket sinalakniban ni Jehova agingga iti naikeddeng a tiempo ti ipapatayna. (Mat. 2:13; Juan 7:30) Kalpasanna, pinagungar ni Jehova ken intedna kas “tulag,” wenno pammatalged kadagiti tattao ditoy daga. Dayta a napasnek a kari ti nangipasigurado a ti matalek nga Adipen ti Dios ket agtultuloy kas “silaw dagiti nasion” a mangwayawaya kadagidiay adda iti naespirituan a kinasipnget.​—Basaen ti Isaias 49:8, 9.b

13. Kasano nga insalakan ni Jesus dagiti “agtugtugaw iti kinasipnget” bayat ti ministeriona ditoy daga, ken kasanona a naitultuloy dayta agingga ita?

¹³ Maitunos iti dayta a pammatalged, ti Adipen a pinili ni Jehova ‘luktanna dagiti bulsek a mata,’ ‘iruarna dagiti balud manipud iti bartolina,’ ken isalakanna dagiti “agtugtugaw iti kinasipnget.” (Isa. 42:7) Bayat ti ministeriona ditoy daga, inaramid ni Jesus dayta babaen ti panangibutaktakna kadagiti palso a narelihiosuan a tradision ken babaen ti panangikasabana iti naimbag a damag maipapan iti Pagarian. (Mat. 15:3; Luc. 8:1) Iti kasta, dagiti Judio a nagbalin nga adalanna ket insalakanna manipud iti palso a relihion. (Juan 8:31, 32) Iti umasping a wagas, nangyeg ni Jesus iti naespirituan a pannakaisalakan iti minilion a di Judio. Imbilinna kadagiti pasurotna: “Inkayo . . . ket mangaramidkayo iti ad-adalan kadagiti tattao iti amin a nasion.” Inkarina met nga isu ket addanto kadagiti pasurotna “agingga iti panungpalan ti sistema ti bambanag.” (Mat. 28:19, 20) Manipud iti nailangitan a saadna, ay-aywanan ni Kristo Jesus ti sangalubongan a trabaho a panangasaba.

Intal-o ni Jehova ti ‘Adipen’

14, 15. Apay ken kasano nga intal-o ni Jehova ti Adipenna?

¹⁴ Iti maysa pay a padto maipapan iti Mesianiko nga Adipenna, kinuna ni Jehova: “Adtoy! Ti adipenko agtignayto buyogen ti pannakatarus. Addanto iti nangato a saad ket sigurado a maital-onto ken maitan-okto iti kasta unay.” (Isa. 52:13) Maigapu iti nasungdo a panagpasakup ni Jesus iti kinasoberano ti Dios ken iti kinamatalekna iti sidong ti kakaruan a suot, isu ket intal-o ni Jehova.

¹⁵ Kastoy ti insurat ni apostol Pedro maipapan ken Jesus: “Isu adda iti makannawan ti Dios, ta napan sadi langit; ket dagiti anghel ken dagiti autoridad ken dagiti pannakabalin naipasakupda kenkuana.” (1 Ped. 3:22) Umasping iti dayta, insurat ni apostol Pablo: “Impakumbabana ti bagina ket nagtulnog agingga iti ipapatay, wen, ipapatay iti kayo a pagtutuokan. Iti daytoy met laeng a rason isu intan-ok ti Dios iti nangatngato a saad ket siaasi nga inikkanna iti nagan a nangatngato ngem iti tunggal sabali pay a nagan, tapno iti nagan ni Jesus agparintumeng koma ti tunggal tumeng dagidiay adda sadi langit ken dagidiay adda ditoy daga ken dagidiay adda iti uneg ti daga, ket sipapanayag a bigbigen koma ti tunggal dila a ni Jesu-Kristo ket Apo iti dayag ti Dios nga Ama.”​—Fil. 2:8-11.

16. Kasano a ni Jesus ket ‘naitan-ok iti kasta unay’ idi 1914, ken ania dagiti naaramidannan sipud idi?

¹⁶ Idi 1914, ni Jesus ket ad-adda pay nga intal-o ni Jehova. Isu ket ‘naitan-ok iti kasta unay’ idi introno ni Jehova kas Ari ti Mesianiko a Pagarian. (Sal. 2:6; Dan. 7:13, 14) Sipud idin, ni Kristo ket ‘mangparparukman iti tengnga dagiti kabusorna.’ (Sal. 110:2) Pinarmekna nga immuna ni Satanas ken dagiti demonio sana intapuak ida iti kaparanget ti daga. (Apoc. 12:7-12) Kalpasanna, ni Kristo kas Dakdakkel a Ciro inispalna ti natda kadagiti napulotan a kakabsatna ditoy daga iti panangadipen ti “Babilonia a Dakkel.” (Apoc. 18:2; Isa. 44:28) Idadauluanna ti sangalubongan a trabaho a panangasaba a nagresulta iti pannakaurnong “dagiti natda” kadagiti naespirituan a kakabsatna ken ti minilion a “sabsabali a karnero” a nasungdo a kakadua ti “bassit nga ipastoran.”​—Apoc. 12:17; Juan 10:16; Luc. 12:32.

17. Ania ti naadaltayo kadagiti padto ni Isaias maipapan iti ‘adipen’?

¹⁷ Ti panangadaltayo kadagitoy naisangsangayan a padto iti libro nga Isaias pinarayrayna la ketdi ti apresasiontayo iti Ari ken Mannubbottayo a ni Kristo Jesus. Ti panagpasakupna kas anak bayat ti ministeriona ditoy daga ti nangyanninaw iti pannakasanayna iti sibay ni Amana sakbay nga immay ditoy daga. Pinaneknekanna ti bagina kas “silaw dagiti nasion” babaen iti ministeriona ken iti trabaho a panangasaba nga ay-aywananna agingga ita. Kas iti sumaganad nga adalentayo, ipalgak ti maysa pay a padto maipapan iti Mesianiko nga Adipen nga isu ket agsagaba ken ipaayna ti biagna a pakagunggonaantayo, bambanag a rumbeng nga ‘utobentayo a sisisinged’ bayat nga umad-adani ti Memorial ti ipapatayna.​—Heb. 12:2, 3.

[Footnotes]

Kas Pangrepaso

• Siasino ti ‘adipen’ a nadakamat kadagiti padto ni Isaias, ken kasanotayo nga ammo?

• Ania a pannakasanay ti inawat ti Adipen manipud ken Jehova?

• Kasano a ni Jesus ti “silaw dagiti nasion”?

• Kasano a naital-o ti Adipen?

[Ladawan iti panid 21]

Impatuldo ni Felipe a ti “adipen” a dinakamat ni Isaias ket ni Jesus a Mesias

[Ladawan iti panid 23]

Kas Adipen a pinili ni Jehova, kinaasian ni Jesus dagiti napanglaw ken agsagsagaba

[Ladawan iti panid 24]

Ni Jesus ket intan-ok ni Amana ken intronona kas Ari ti Mesianiko a Pagarian