Makin-kararag Dagiti Masungbatan?

NI Jehova isut’ Dios a mangsungbat kadagiti kararag. Kinapudnona, ti Saona, ti Biblia, isut’ awaganna ti “Managdengngeg iti kararag.” (Salmo 65:2) Isut’ sidadaan a mangsungbat kadagiti kararag. Ngem makin-kararag ti agpayso a sungbatanna?

Sungbatan ti Dios dagiti kararag ti tattao a makaay-ayo kenkuana. Adda kadakuada ti managraem a kababalin ti salmista a nagkuna: “Kas iti ugsa a mawaw kadagiti baresbes ti danum, kasta ti kararuak a mawaw kenka, O Dios. Ti kararuak pudno a mawaw iti Dios, iti pudno a Dios.” (Salmo 42:1, 2) Ngem, ania ti adda nga ebidensia tapno mapaneknekan a sungbatan ni Jehova ti karkararag dagiti pudno a managdaydayawna?

Pammaneknek a Sungbatan ti Dios dagiti Kararag

Naglaon ti Biblia iti nalawa a rekord a mangpaneknek a sungbatan ni Jehova ti karkararag dagiti matalek nga adipenna. Kas pangarigan, idi nagkararag ni Ari Josafat ti Juda maipaay ti pannakaispal, sinungbatan ti Dios ti kararagna ket isut’ pinagballigina babaen ti panamagkakabilna kadagiti kabusorna. (2 Cronicas 20:1-26) Idi a ni Ari Ezekias ti nakiranget met iti nakaam-amak a puersa militar, isut’ sipapakumbaba a nagkararag iti Dios maipaay iti tulong. Nakita ni Ezekias ti panangisalakan ni Jehova idi a maysa nga anghel ti nangpasag kadagiti 185,000 nga Asiriano iti maysa a rabii.​—Isaias 37:14-20, 36-38.

Apay a sinungbatan ti Dios dagidiay a kararag? Agpada kadagitoy a dua a kasasaad, inyasug dagiti ari a ti pannakaabak iti gubat ti mangibunga ti saan a nasayaat iti nagan ni Jehova. (2 Cronicas 20:6-9; Isaias 37:17-20) Maseknanda iti dayawna. “Ti kangrunaan a tema ti kararag,” kunaen ti The International Standard Bible Encyclopedia, “ket saan laeng a ti pagimbagan ti agkidkiddaw no di ket ti dayaw iti nagan ti Dios.” No kasta, makasigurado dagiti matalek nga adipen ni Jehova a tulonganna ida “maipaay iti naganna.” Ti rekord a mangpaneknek a dagiti kakasta a kararag ti nasungbatan ti mangted panagtalek iti ili ti Dios nga ipangagna dagiti kararagda.​—Salmo 91:14, 15; 106:8; Proverbio 18:10.

Uray no ti kasasaad iramanna ti nagan ni Jehova, nupay kasta, ti Dios ti mangikeddeng no sungbatanna wenno saan dagiti kararag. Mabalin nga isut’ addaan kadagiti maawat a rason iti saanna a panangsungbat kadagiti dadduma a kararag. No mariknatayo a saan a mangmangngegan dagiti kararagtayo, nasayaat nga usigentayo no apay a kasta.

Apay a Dadduma a Kararag ti Saan a Masungbatan?

“Uray pay agaramidkayo kadagiti adu a lualo, diakto ipangag,” naminsan kinuna ni Jehova kadagiti Israelitas. Iti panangitudona ti makagapu, intultuloyna: “Dagiti im-imayo napnoda iti dara.” (Isaias 1:15) Kasano koma nga adda dumngeg iti maysa a tao idinto a dina met ikankano dagiti linteg ni Jehova? Maysa a proverbio ti Biblia ti mangipaay iti nabatad a sungbat, a kunkunana: “Ti di mangiyallingag iti lapayagna iti panangdengngegna ti linteg​—uray ti kararagna makarimon.”​—Proverbio 28:9.

Mangted pay ti Biblia ti sabali a rason no apay a saan a maipangag dagiti kararag, idi kunaenna: “Agdawatkayo, ket dikay umawat, ta saan a nasayaat ti panggepyo nga agdawat, tapno raritenyo daytoy kadagiti panagtarigagayyo ti ragragsak.” (Santiago 4:3) Saan, dinto sungbatan ni Jehova dagiti kararag a pangpennek kadagiti di umiso a tarigagay. Rebbeng a laglagipentayo met a saan a pamanmandaran ti Dios kadagiti tattao, no iyar-arig. Isut’ mangikeddeng no kasanona a sungbatan dagiti kararagtayo.

Sigurado a masungbatan ket isu dagiti kararag a maiturong iti Dios manipud iti nadalus a puso, buyogen ti umiso a panggep, ken iti intudingna a pamay-an​—baeten ken Jesu-Kristo. (Juan 14:6, 14) Ngem uray pay ti karkararag dagiti makapudno kadagita a kiddaw nariknada no dadduma nga isudat’ saan a naipangag. Apay a saan a dagus a sungbatan ti Dios ti dadduma a kararag dagiti adipenna?

Ammo ni Jehova ti kasasayaatan a tiempo ti panangsungbat kadagiti kararag. Nupay agkiddaw ti maysa nga ubing a lalaki iti bisikleta, isut’ saan nga iyalaan ni tatangna agingga nga isut’ dakkelen tapno sitatalged nga aglugan iti dayta. Pudno met dayta kadagiti dadduma a kararag dagidiay nga agayat iti Dios. Gapu ta ammona no ania ti kasayaatan para kadakuada, ipaayna no ania ti kasapulan iti umiso la unay a tiempo.

Nupay kasta, saan a magun-odan dagiti adipen ni Jehova ti isuamin nga ikararagda. Gapu ta imperpektoda, mabalin a tarigagayanda ti dadduma a banag a saan a naimbag para kadakuada. Ti naayat a nailangitan nga Amada ti saan a mangted ti aniaman a makadangran a banag kadakuada, gapu ta isu ti Manangted iti “isuamin a naimbag ken naan-anay a sagsagut.” (Santiago 1:17) Umas-asping, mabalin a di ipaay ti Dios ti banag a saan a nasken iti panangmatmatna. (Idiligyo ti 2 Corinto 12:7-10.) Sungbatanna dagiti kararag a maitunos iti pagayatanna ken panggepna agpaay iti ilina.​—1 Juan 5:14, 15.

“Siuumiso a Naipangag” ni Jesus

Ni Jesu-Kristo ket maysa a tao a managkararag. (Mateo 6:9-13; Juan 17:1-26) Isut’ addaan iti naan-anay a panagtalek a denggen ken sungbatan ti nailangitan nga Amana dagiti kararagna. Naminsan kinuna ni Jesus: “Ama, . . . ammok a kanayon a denggennak.” (Juan 11:41, 42) Ngem saan kadi a naupay ni Jesus iti ngudo ti naindagaan a kursona? Saanna kadi nga inyasug: “Diosko, Diosko, apay a binaybay-annak?”​—Mateo 27:46.

Idi inyebkas ni Jesus dagidiay a sasao, nabatad a tungtungpalenna ti maysa a padto maipapan ti ipapatayna. (Salmo 22:1) Iti nakedngan a pannakaawat, mabalin met nga impasimudaag ni Jesus nga inikkat ni Jehova ti pannalaknibna ken impalubosna a matay ti Anakna iti nasaem ken nakababain nga ipapatay tapno masuot no sadino ti pagpatinggaan ti kinatarnawna. Ti panangusig kadagiti pasamak iti dayta a maudi nga aldaw ti naindagaan a ministerio ni Jesus ipakitana a dinengngeg ti Dios dagiti kararagna.

Iti karabian ti pannakatiliwna, nagkararag ni Jesus idiay hardin ti Getsemani. Namitlo nga inyasugna: “Ama, no mabalin, lumabas koma kaniak daytoy a kopa.” (Mateo 26:39, 42, 44) Saan a nagkedked ni Jesus a mangited iti biagna kas subbot kadagiti manamati ti sangatauan. Saan, ngem isut’ nalawag a maseknan unay maipapan ti posibilidad iti panangibabainna ken impatpategna unay nga amana babaen ti ipapatay iti kayo a pagtutuokan kas nailunod a managtabbaaw. Impangag kadi ni Jehova ti kararag ni Jesus?

Tawtawen kalpasanna insurat ni apostol Pablo: “Kadagidi aldaw ti panaglasagna ni Kristo nangidaton kadagiti kararag ken dawdawat iti Daydiay makabalin idi a mangispal kenkuana iti ipapatay, a nabuyogan iti nasged nga araraw ken lulua, ket isut’ naipangag gapu iti nadiosan nga amakna.” (Hebreo 5:7; Lucas 22:42, 44) Wen, iti makatuok a rabii kasakbayan ti ipapatayna, ni Jesus “ket siuumiso a naipangag.” Ngem kasano?

Nangibaon ni Jehova ti maysa nga anghel a “nagparang ken [Jesus] ket isut’ pinakiredna.” (Lucas 22:43) Gaput’ pannakapakiredna, nabalinan ni Jesus a sinango ti ipapatay iti kayo a pagtutuokan. Nalawag, isut’ inikkan idin ni Jehova ti pammasiguro a ti ipapatayna iti kayo ti saan a mangiyeg ti pakaibabainan iti nasantuan a nagan imbes ketdi inton agangay isunto daytat’ mausar a pangsantipikar iti dayta. Pudno, ti ipapatay ni Jesus iti kayo a pagtutuokan linuktanna ti dalan kadagiti Judio, nga iti kasumbabangirna ket nailunodda iti babaen ti Linteg, tapno maisalakanda manipud pannakaukom iti ipapatay.​—Galacia 3:11-13.

Tallo nga aldaw kalpasanna, ni Jehova pinagungarna ni Jesus ken isut’ dina pinagsungbat manipud aniaman a posibilidad ti pammabasol iti panagtabbaaw babaen ti panangitan-okna kenkuana iti nangato a nailangitan nga akem. (Filipos 2:7-11) Anian a nakaskasdaaw a pamay-an tapno sungbatan ti kararag ni Jesus maipapan iti “daytoy a kopa”! Nasungbatan dayta a kararag iti pamay-an ni Jehova. Ket napasaran ni Jesus dagiti nakaskasdaaw a bendision agsipud ta kinunana iti nailangitan nga Amana: “Saan koma a maaramid ti pagayatak, no di ti pagayatam.”​—Lucas 22:42.

Kasano ti Panangsungbat ni Jehova kadagiti Kararag Ita

Kas ken Jesus, dagidiay nga agregget a mangparagsak ken Jehova ita rebbengna a kanayon nga idawatda a maaramid koma ti pagayatan ti Dios. Kasapulandat’ maaddaan ti pammati a sungbatan ni Jehova dagiti kararagda iti pamay-an a kangrunaan a makagunggona kadakuada. Kinapudnona, isu ti ‘agaramid nga aglaplapusanan unay a manglab-aw kadagiti bambanag a kiddawenda wenno mapanunotda.’​—Efeso 3:20.

Maysa nga agtutubo a Kristiano a babai a nakipagnaed kadagiti di mamati a nagannakna ti nakapadas ti kinaagpayso dayta a kasuratan. Iti maysa a surat manipud Watch Tower Society, nakiddaw kenkuana nga usigenna a sikakararag ti posibilidad ti panangawatna iti espesial a trabaho ti kinamisionero. Nupay ti napasnek a tarigagayna ket isut’ panagtalinaedna iti balay tapno tulonganna dagiti nagannakna nga agbalin a Kristiano, inimtuodna ti Dios iti kararag: “Ania ti pagayatam? Isu kadi ti panangawatko iti daytoy nga awis iti laksid ti ibubusor dagiti nagannakko, wenno ti kadi panangtulongko kadagiti nagannakko babaen ti panagtultuloyko a makipagnaed kadakuada?” Tunggal panagkararagna, imbaga kenkuana ti konsiensiana nga awatenna ti awis. Inkeddengna nga isu daytoy ti sungbat manipud ken Jehova.

Pinatibker ti Dios daytoy a babai tapno salimetmetanna ti pangngeddengna. Idi isut’ nakiddaw nga umakar idiay Awaji Island, Japan, naklaat dagiti dadakkelna ket kimmaro ti ibubusorda. Nupay kasta, gapu ta dida naallukoy a mangbalbaliw iti pangngeddengna, inkeddeng ni nanangna ti agadal ti Biblia tapno kitaenna no apay nga inaramid ti balasangna dayta a desision. Tallo a bulan kalpasanna dagiti dadakkelna bimmisitada kenkuana. Iti pannakakitada no kasano kasayaat ti panangtaripato dagiti sabsabali a Saksi ni Jehova kenkuana, nasdaaw unay ti amana ken isut’ nagsangit idi awan ti makakitkita. Di nagbayag nangrugi metten nga agadal ti Biblia. Kamaudiananna dagiti nagannak daytoy nga agtutubo a babai ti nabautisaran ken nangrugidan nga agserbi a simamatalek ken Jehova. Saan kadi a binendisionan ni Jehova daytoy a Kristiano a babai iti aglaplapusanan unay?

Nasungbatan dagiti Kararagda

Malagipyo kadi dagiti sasao ti babai a nadakamat iti rugi ti immuna nga artikulo? Dina pay pulos narikna ti ragsak ti pannakasungbat dagiti kararagna. Nupay kasta, nailasinna met laeng a sungsungbatanen ti Dios dagiti kararagna. Nangaramid daytoy a babai ti listaan dagiti kangrunaan a punto iti karkararagna. Maysa nga aldaw rinepasona ti listaan ket nausigna nga impangag ni Jehova ti kaadduan kadagiti kararagna, uray pay dagidiay nalipatannan a mismo! Naammuanna ngarud a maseknan ti Dios kenkuana ken sungsungbatanna dagiti kararagna iti naayat a pamay-an a kangrunaan a nanggunggona kenkuana.

No mariknayo a di masungsungbatan dagiti kararagyo, saludsodanyo ti bagiyo: ‘Addaanak kadi ti personal a pannakirelasion ken Jehova, ti “Manangdengngeg iti kararag?” No awan, mangal-alaak kadi kadagiti addang tapno maadalko ti maipapan kenkuana ken agbalin a maysa kadagiti dedikado nga adipenna?’ Sungbatanna dagiti kararag dagidiay a mangayat kenkuana ken mangaramid ti pagayatanna. “Agtalinaedda iti panagkararag” ket isudat’ siuumiso a maimdengan, kas ken Jesus. (Roma 12:12) Gapuna, “ibukbukmo ta pusom” ken Jehova ket aramidem ti pagayatanna. (Salmo 62:8) Iti kasta maipangagto dagiti kararagmo.

Ita, minilion a tattao ti mangikarkararag iti naisangsangayan a banag. Wen, ket maipangpangag dagiti kararagda. Kitaentayo no apay a makasiguradotayo a masungbatan dagiti kakasta a kararag.