Ni Jose a Taga-Arimatea Impudnona ti Panagbalinna nga Adalan

SAAN nga ammo ti lalaki a ni Jose a taga-Arimatea no apay a naituredna ti sumango iti gobernador ti Roma. Pagaammo a nakauy-uyong ni Poncio Pilato. Ket tapno nadayaw ti pannakaipumpon ni Jesus, masapul nga adda mangkiddaw ken Pilato iti bangkayna. Ngem saan a kas iti namnamaen ni Jose ti karigat ti pannakisaritana ken Pilato. Kalpasan nga impasigurado ti guardia ken Pilato a natayen ni Jesus, pinatganna ti kiddaw ni Jose. Iti dayta a tiempo, nupay nakaro ti ladingit ni Jose, dinardarasna ti napan iti nakatayan ni Jesus.​—Mar. 15:42-45.

• Asino ni Jose a taga-Arimatea?

• Ania ti nakainaiganna ken Jesus?

• Ken apay a paginteresam ti pakasaritaanna?

Kuna ti naipaltiing nga Ebanghelio ni Marcos a ni Jose ket “maysa a mararaem a kameng ti Konseho.” Iti konteksto dayta, ti laeng Sanhedrin​—ti nangato a korte dagiti Judio ken mabigbigbig a grupo nga addaan nangato nga autoridad​—ti mabalin a tumukoy iti Konseho. (Mar. 15:1, 43) Maysa ngarud ni Jose kadagiti lider ti umili isu a nabalinanna ti nakisarita iti gobernador ti Roma. Di ngarud pakasdaawan a nabaknang met ni Jose.​—Mat. 27:57.

Kas grupo, naulpit idi ken Jesus ti Sanhedrin. Nagkukumplot dagiti miembrona tapno papatayenda ni Jesus. Nupay kasta, naawagan ni Jose kas “naimbag ken nalinteg a lalaki.” (Luc. 23:50) Saan a kas iti kaaduan a kakaduana iti Sanhedrin, napudno ni Jose, saan nga immoral ti biagna, ken ar-aramidenna ti amin a kabaelanna tapno matungpalna dagiti bilin ti Dios. Kasta met, “ur-urayenna idi ti pagarian ti Dios.” Mabalin a dayta ti makagapu no apay nga isu ket nagbalin nga adalan ni Jesus. (Mar. 15:43; Mat. 27:57) Mabalin a naginteres ni Jose iti mensahe ni Jesus ta talaga a sapsapulenna ti kinapudno ken kinahustisia.

Kuna ti Juan 19:38 a ni Jose ket “adalan idi ni Jesus ngem sililimed gapu iti butengna kadagiti Judio.” Ania ti kabuteng ni Jose? Ammona a kagurgura dagiti Judio ni Jesus ken paruarenda iti sinagoga ti asinoman a maaddaan iti pammati kenkuana. (Juan 7:45-49; 9:22) Ibabain, adaywan, ken ipuera dagiti Judio ti asinoman a maparuar iti sinagoga. Dayta ti makagapu a di impadlaw ni Jose ti pammatina ken Jesus. Ngamin, mabalin a mapukawna ti posision ken dayawna.

Saan la a ni Jose ti kasta ti situasionna. Sigun iti Juan 12:42, “adu uray pay kadagiti agtuturay ti naaddaan iti pammati [ken Jesus], ngem gapu kadagiti Fariseo isu saanda nga ipudno, tapno saanda a maparuar manipud iti sinagoga.” Ni Nicodemo ti maysa kadakuada, a miembro met laeng ti Sanhedrin.​—Juan 3:1-10; 7:50-52.

Maysa nga adalan ni Jose, ngem saanna a maibaga dayta iti publiko. Karit dayta kenkuana nangruna ta kinuna ni Jesus: “Tunggal maysa . . . a mangipudno a naikaykaysa kaniak iti sanguanan dagiti tattao, ipudnokto met a naikaykaysaak kenkuana iti sanguanan ni Amak nga adda iti langlangit; ngem siasinoman a mangtallikud kaniak iti sanguanan dagiti tattao, paglikudakto met iti sanguanan ni Amak nga adda iti langlangit.” (Mat. 10:32, 33) Saan met ketdi nga inlibak ni Jose ni Jesus, ngem nagbuteng a mangipudno iti pammatina kenkuana. Kastaka kadi met?

Nagsayaat ti inaramid ni Jose ta kuna ti Biblia a binusorna ti plano ti Sanhedrin a mangpapatay ken Jesus. (Luc. 23:51) Nalabit agpayso ti kuna ti dadduma nga awan ni Jose idi mabista ni Jesus. Aniaman ti napasamak, sigurado a nasaktan unay ni Jose iti pannakaballikug ti hustisia​—ngem awan a pulos maaramidanna!

Idi natayen ni Jesus, nalawag a naparmek ni Jose ti butengna ken sinuportaranna dagiti pasurot ni Jesus. Makita dayta a desisionna iti Marcos 15:43: “Pinaturedna ti pakinakemna a sumrek iti sanguanan ni Pilato ket dinawatna ti bagi ni Jesus.”

Agparang nga adda ni Jose idi natay ni Jesus. Kinapudnona, ammona a natayen ni Jesus sakbay pay a naammuan ni Pilato. Ngamin, idi kiniddawna ti bangkay, dinamag ti gobernador no “natayen” ni Jesus. (Mar. 15:44) No nasaksian ni Jose ti panagrigrigat ni Jesus iti kayo a pagtutuokan, saan ngata a sukimatenna ti konsiensiana ket ipudnona nga isu ket maysa nga adalan ni Jesus? Mabalin a kasta. Ngem imbag ta nagtignay met laeng ni Jose idi agangay. Saannan nga ilimlimed ti panagbalinna nga adalan.

Ipaannurot ti linteg dagiti Judio a maitabon dagiti bangkay sakbay a lumnek ti init. (Deut. 21:22, 23) Ngem para kadagiti Romano, baybay-anda lattan nga agrupsa ti bangkay dagiti kriminal iti kayo wenno ibellengda latta dagitan iti gagangay a pagitabonan. Ngem saan a kasta ti plano ni Jose ken Jesus. Adda kukua ni Jose a kaar-aramid a pagitabonan nga asideg iti nakatayan ni Jesus. Awan pay ti naitabon iti dayta, a mangipakita a nabiit pay idi nga immakar ni Jose iti Jerusalem manipud Arimateaa ken planona koma nga usaren dayta a pagitabonan no adda matay a kapamiliana. (Luc. 23:53; Juan 19:41) Kinaparabur ti panangted ni Jose iti pagitabonan a para koma kenkuana. Natungpal ngarud ti padto a maitabon ti Mesias a kadua dagiti nabaknang.​—Isa. 53:5, 8, 9.

Mabasa iti uppat nga Ebanghelio a kalpasan a naibaba ti bagi ni Jesus manipud iti kayo, binalkut ni Jose ti bangkay iti napino a lupot ken impumponna. (Mat. 27:59-61; Mar. 15:46, 47; Luc. 23:53, 55; Juan 19:38-40) Ni laeng Nicodemo, a nangyeg iti pangbangbanglo, ti espesipiko a nadakamat a timmulong ken Jose. Gapu iti saadda iti kagimongan, posible a saan la nga isuda ti nangyakar iti bangkay. Mabalin a nangibaonda kadagiti adipen nga agbagkat ken agitabon. Uray no kasta ti napasamak, nagpateg latta ti inaramid dagitoy dua a lallaki. Sigun iti linteg, maibilang a narugit iti pito nga aldaw ti asinoman a mangsagid iti bangkay ken ti amin a masagidna. (Num. 19:11; Hag. 2:13) Gapu iti dayta, saanna a mabalin ti makikadua iti tattao bayat ti Paskua ken makiraman iti amin a selebrasion a nainaig iti dayta. (Num. 9:6) Gapu iti panangasikaso ni Jose iti pannakaipumpon ni Jesus, mabalin nga uyawen pay dagiti kakaduana. Ngem uray no kasta, situtulok ni Jose a mangsango iti aniaman a resulta ti panangipaayna iti nadayaw a pumpon ni Jesus ken ti panangipakitana nga isu ket adalan ni Kristo.

Malaksid iti estoria ti pannakaipumpon ni Jesus a nadakamat iti Ebanghelio, saanen a nadakamat iti Biblia ni Jose a taga-Arimatea. Isu a mabalin a maisaludsodtayo: Ania ti napasamak kenkuana? Kinaagpaysuanna, saantayo nga ammo. Ngem no ibataytayo kadagiti nadakamat nga impormasion, dakkel ti posibilidadna a dinan inlimed ti panagbalinna a Kristiano. Ngamin, imbes a kumapuy ti pammatina idi naipasango iti pannubok ken rigat, ad-adda pay a timmured ken bimmileg dayta. Nasayaat a pagilasinan dayta.

Gapu iti daytoy nga estoria, adda saludsod a nasayaat a panunotentayo: Adda kadi aniaman​—posision, karera, sanikua, kabagian, wenno uray ti wayawayatayo​—a napatpateg kadatayo ngem iti relasiontayo ken Jehova?