Inton Maaramid ti Pagayatan ti Dios Ditoy Daga

IDI insurona kadagiti adalanna nga ikararagda, “Maaramid koma ti pagayatam, kas sadi langit, kasta met iti daga,” agsasao ni Jesus kas maysa a nagbiag idi idiay langit a kaduana ti Amana. (Mateo 6:10; Juan 1:18; 3:13; 8:42) Sakbay nga immay ditoy daga, nagbiag ni Jesus iti tiempo a maitunos iti pagayatan ti Dios ti amin a mapaspasamak idiay langit ken ditoy daga. Naragsak dagidi a tiempo ti gapuanan ken pannakapnek.​—Proverbio 8:27-31.

Ti immuna a pinarsua ti Dios ket dagiti espiritu a parsua, “dagiti anghelna, a nabileg iti pannakabalin, a mangitungtungpal iti saona.” Agserserbida idi ken ita kas “ministrona, nga agar-aramid iti pagayatanna.” (Salmo 103:20, 21) Adda kadi wayawaya ti tunggal maysa kadakuada? Adda, ken idi maparsua ti daga, dagitoy nga “annak ti Dios nangrugida a nagdir-i buyogen ti panangpadayaw.” (Job 38:7) Ti pammadayawda ket kaipapananna a personal a maragsakanda kadagiti panggep ti Dios, ken umannugotda iti pagayatanna.

Kalpasan a pinarsuana ti daga, ti Dios insaganana dayta a pagnaedan ti tao sa pinarsuana ti immuna a lalaki ken babai. (Genesis, kapitulo 1) Maikari met kadi dayta iti pammadayaw? Kuna ti naipaltiing a salaysay: “Kalpasan dayta nakita ti Dios ti isuamin nga inaramidna ket, adtoy! nasayaat unay dayta,” wen, awan pagkuranganna, perpekto.​—Genesis 1:31.

Ania ti pagayatan ti Dios agpaay iti immuna a nagannak kadatayo ken kadagiti annakda? Sigun iti Genesis 1:28, nakasaysayaat met dayta: “Binendisionan ida ti Dios ket kinuna kadakuada ti Dios: ‘Agbungakayo ken agadukayo ket punnuenyo ti daga ken parukmaenyo, ket pagpasakupenyo dagiti ikan iti baybay ken dagiti agtaytayab a parsua iti langlangit ken tunggal sibibiag a parsua nga aggargaraw iti rabaw ti daga.’” Tapno maitungpalda dayta a nagsayaat nga annongenda, dagiti immuna a nagannak kadatayo masapul nga agtultuloyda nga agbiag​—agnanayon​—ken kasta met dagiti annakda. Awan ti mangipamatmat nga adda trahedia, kinaawan hustisia, saem, wenno ipapatay.

Bayat dayta a tiempo, maar-aramid ti pagayatan ti Dios agpadpada idiay langit ken ditoy daga. Dakkel ti rag-o dagidiay agbiag maitunos iti pagayatanna. Apay a saan a kasta ti napasamak?

Timmaud ti di ninamnama a panangkarit iti pagayatan ti Dios. Ngem mabalin a marisut dayta. Kaskasdi, namataud dayta iti naunday a saem ken panagleddaang a nangibunga iti kasta unay a pannakariro maipapan iti pagayatan ti Dios para iti sangatauan. Apektadotayo amin. Ania dayta a karit?

Ti Pagayatan ti Dios Bayat ti Tiempo ti Iyaalsa

Napanunot ti maysa kadagiti espiritu nga “annak ti Dios” a mabalinna a biangan ti pagayatan ti Dios agpaay iti sangatauan, para iti bukodna a pagimbagan. Pinampanunotna dayta, isu nga ad-adda nga impapanna a posible ken makaay-ayo dayta. (Santiago 1:14, 15) Mabalin a pinanunotna a no maallukoyna ti immuna a pagassawaan nga agtulnog kenkuana imbes nga iti Dios, mapilitan ti Dios a mangipalubos iti sabali pay nga agturay. Nalabit nga impagarupna a saan ida a papatayen ti Dios, ta kaipapanan dayta ti pannakapaay ti panggep ti Dios. Imbes ketdi, masapul a ni Jehova a Dios baliwanna ti panggepna, nga ipalubosna nga agtignay daytoy nga espiritu nga anak ket isunto ti pagtulnogan dagiti tattao a pinarsua ti Dios. Isu a daytoy a rebelde maitutop a naawagan idi agangay kas Satanas, kayatna a sawen, “Bumusbusor.”​—Job 1:6.

Maitunos iti tarigagayna, ni Satanas inasitganna ti babai. Ginuyugoyna ti babai a mangilaksid iti pagayatan ti Dios ket aramidenna ti ammona a naimbag, a kunkunana: “Sigurado a saankayto a matay. . . . Agbalinkayo a kas iti Dios, a makaammo iti naimbag ken dakes.” (Genesis 3:1-5) Para iti babai, kasla kaipapananna dayta ti wayawaya, ket namati a mangiturong dayta iti nasaysayaat a panagbiag. Kalpasanna, inallukoyna ni lakayna a tumulad iti inaramidna.​—Genesis 3:6.

Saan a dayta ti pagayatan ti Dios iti immuna a pagassawaan. Isuda ti makin-pagayatan iti dayta. Ket makadidigra dagiti imbungana. Ti Dios imbagana kadakuada a matayda no agsukirda. (Genesis 3:3) Naparsuada a kasapulanda ti agpannuray iti Dios tapno agballigida. (Jeremias 10:23) Kanayonanna, agbalinda nga imperpekto, ket tawiden dagiti annakda ti kinaimperpekto ken ipapatay. (Roma 5:12) Ni Satanas saanna a mabaliwan dagitoy nga epekto.

Dagitoy kadi a pasamak permanente a baliwanna ti panggep wenno pagayatan ti Dios para iti sangatauan ken iti daga? Saan. (Isaias 55:9-11) Kaskasdi, namataudda kadagiti isyu a masapul a marisut: Dagiti kadi tattao ‘kabaelanda ti agbalin a kas iti Dios, a makaammo iti naimbag ken dakes,’ kas kinuna ni Satanas? Iti sabali a pannao, no maipaayantayo iti umdas a tiempo, kabaelantayo kadi nga ikeddeng no ania ti naimbag ken dakes, ti makagunggona ken makadangran, iti amin nga aspeto ti biag? Maikari kadi ti Dios iti naan-anay a panagtulnog, a ti panangiturayna ti kasayaatan? Maikari kadi a tungpalen a naan-anay ti pagayatanna? Ania ti sungbatyo?

Adda laeng maysa a pamay-an tapno marisut dagitoy nga isyu iti imatang ti amin a parsuana nga addaan panunot: Palubosan nga agbiag nga agwaywayas dagidiay dida kayat ti agpasakup iti Dios. Saan a marisut dagiti timmaud nga isyu no dagus a pinapatayna ida. Marisut dagitoy no bay-anna nga agwaywayas nga agbiag dagiti tattao iti las-ud ti naan-anay a tiempo agsipud ta agbalinto a nalawag ti resulta dayta. Impasimudaag ti Dios a kasta ti panangrisutna kadagiti bambanag idi imbagana iti babai a maaddaan daytoy iti annak. Mangrugi ngarud ti maysa a natauan a pamilia. Sibibiagtayo gapu iti dayta!​—Genesis 3:16, 20.

Ngem dina kaipapanan daytoy a ti Dios palubosanna dagiti tattao ken dagiti rebelde nga espiritu nga annak a mangaramid iti amin a kaykayatda. Saan nga impababa ti Dios ti kinasoberanona, ken saanna a binaybay-an ti panggepna. (Salmo 83:18) Imbatadna daytoy babaen ti panangipakpakaunana a madadaelto ti nangisungsong iti iyaalsa ken maikkatto dagiti amin a dakes nga epekto dayta. (Genesis 3:15) Gapuna, sipud idi rugrugina, naikari a mabang-aranto ti sangatauan.

Kabayatanna, dagiti immuna a nagannak kadatayo insinada ti bagbagida ken dagiti agbalin nga annakda manipud iti panangituray ti Dios. No lapdan ti Dios dagiti amin a naladingit a resulta ti pangngeddengda, kaipapananna nga ipaulogna ti pagayatanna kadakuada iti amin a gundaway. Umasping dayta iti saanna a panangipalubos kadakuada nga agbiag a naan-anay a naisina kenkuana.

Siempre, dagiti indibidual mabalinda a pilien ti panangituray ti Dios. Mabalinda nga ammuen no ania ti pagayatan ti Dios agpaay kadagiti tattao bayat daytoy a panawen ken agtulnogda iti dayta agingga iti mabalin. (Salmo 143:10) Nupay kasta, makapasarda latta kadagiti parikut agingga a di pay narisut ti isyu mainaig iti naan-anay a panagwaywayas ti sangatauan.

Idi rugrugi ti historia ti sangatauan, nagminar dagiti epekto ti panagwaywayas. Ti umuna a tao a nayanak, ni Cain, pinapatayna ti kabsatna a ni Abel agsipud ta ni Cain “nadangkes ti bukodna nga ar-aramid, ngem ti ar-aramid ti kabsatna nalinteg.” (1 Juan 3:12) Saan a pagayatan ti Dios dayta, yantangay nasakbay a binallaaganna ni Cain ken dinusana idi agangay. (Genesis 4:3-12) Pinili ni Cain ti wayawaya a mangikeddeng no ania ti naimbag ken dakes kas intukon ni Satanas; ngarud isu “nagtaud iti daydiay nadangkes.” Kasta met laeng ti inaramid ti dadduma.

Kalpasan ti nasurok a 1,500 a tawen sipud idi nangrugi ti tao, “ti daga nadadael iti imatang ti pudno a Dios ken ti daga napno iti kinaranggas.” (Genesis 6:11) Kasapulan ti determinado a tignay tapno saan a madadael ti daga. Nagtignay ti Dios babaen ti panangyegna iti sangalubongan a layus ket sinalaknibanna ti maysa a nalinteg a pamilia a nabatbati​—ni Noe, ti asawana, dagiti annakna, ken dagiti manugangna. (Genesis 7:1) Naggaputayo amin kadakuada.

Kadagiti panawen sipud idi, imbagnos ti Dios dagidiay sipapasnek nga agtarigagay a mangammo iti pagayatanna. Pinaltiinganna dagiti nasungdo a lallaki a mangirekord kadagiti mensahena para iti siasinoman nga agpaiwanwan kenkuana. Dagitoy a mensahe ket nairekord iti Biblia. (2 Timoteo 3:16) Siaayat nga inawatna dagiti matalek a tattao tapno maaddaanda iti relasion kenkuana, nga agbalinda pay ketdi a gagayyemna. (Isaias 41:8) Pinakiredna ida tapno maibturanda dagiti nakaro a pakasuotan a sinagaba ti sangatauan bayat ti adu a milenio a pannakaisina manipud iti Dios. (Salmo 46:1; Filipos 4:13) Anian ti panagyamantayo gapu kadagitoy a tulongna!

Naan-anay a ‘Maaramid ti Pagayatam’

Dagiti nagapuanan ti Dios agingga kadagitoy a tiempo ket saan nga isu ti pakabuklan ti pagayatanna agpaay iti sangatauan. Insurat ni Kristiano nga apostol Pedro: “Adda baro a langlangit ken baro a daga nga ur-urayentayo sigun iti karina, ket kadagitoy agtaeng ti kinalinteg.” (2 Pedro 3:13) Kadagitoy a sasao, simboliko a natukoy ti maysa a baro a gobierno a mangituray iti sangatauan ken maysa a baro a kagimongan dagiti tattao iti sidong dayta a gobierno.

Babaen ti nalawag a pannarita, insurat ni propeta Daniel: “Iti kaaldawan dagidiay nga ar-ari mangipasdekto ti Dios ti langit iti maysa a pagarian a saanto a pulos madadael. . . . Rumekennanto ken pagpatinggaenna amin dagitoy a pagarian, ket dayta agtalinaedto agingga kadagiti tiempo a di nakedngan.” (Daniel 2:44) Ibatad daytoy a padto a manungpal ti depektibo a sistema ti bambanag ket sumukat ti Pagarian, wenno gobierno, ti Dios. Anian a naimbag a damag dayta! Agpatingganto dagiti susik ken kinaagum a pakaigapuan ti panagraira ti kinaranggas iti lubong ita ken agpangpangta manen a mangdadael iti daga.

Kaano a maaramid dagitoy? Inyimtuod dagiti adalan ni Jesus: “Kaanonto a mapasamak dagitoy a banag, ket anianto ti pagilasinan ti kaaddam ken ti panungpalan ti sistema ti bambanag?” Kas paset ti sungbatna, kinuna ni Jesus: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.”​—Mateo 24:3, 14.

Agdindinamag ita ti trabaho a panangasaba iti sangalubongan. Nalabit a napaliiwyo dayta iti lugaryo. Iti librona a These Also Believe, insurat ni Propesor Charles S. Braden: “Dagiti Saksi ni Jehova literal nga insaknapda iti daga ti panangasabada. . . . Dagiti laeng Saksi ni Jehova ti relihion iti lubong a nangipakita iti kasta a regta ken kinapinget a mangisaknap iti naimbag a damag ti Pagarian.” Dagiti Saksi aktibo nga iwarwaragawagda ti naimbag a damag iti nasurok a 230 a pagilian ken iti nganngani 400 a lenguahe. Ita pay la a kastoy kasaknap ti nadanon daytoy naipakpakauna a trabaho. Maysa dayta kadagiti adu a pammaneknek nga umas-asidegen ti tiempo a panangsukat ti Pagarian kadagiti amin a gobierno ti tao.

Ti Pagarian nga imbaga ni Jesus a maikasaba isu a mismo ti insurona nga ikararagtayo idi intedna ti modelo a kararag: “Umay koma ti pagariam. Maaramid koma ti pagayatam, kas sadi langit, kasta met iti daga.” (Mateo 6:10) Wen, dayta a Pagarian isu ti ahensia nga usaren ti Dios a mangitungpal iti panggepna, iti pagayatanna, para iti sangatauan ken iti daga.

Ania ti kaipapanan dayta? Bay-anyo a sumungbat ti Apocalipsis 21:3, 4: “Nangngegko ti maysa a natbag a timek manipud iti trono a kunana: ‘Adtoy! Ti tolda ti Dios adda iti sangatauan, ket isu makipagnaedto kadakuada, ket isudanto dagiti ilina. Ket ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.’” Kalpasanna, ti pagayatan ti Dios talaga a naan-anayto a maaramid ditoy daga ken idiay langit.a Kayatyo kadi ti agbalin a paset dayta?

[Footnote]

[Ladawan iti panid 5]

Nangyeg iti didigra ti panagbiag a maikaniwas iti pagayatan ti Dios