Salimetmetan ti Natimbeng, Simple a Panagbiag

“Kitaenyo ngarud a siaannad no kasano ti pannagnayo a saan a kasla nakuneng no di ket kasla masirib . . . ta dagiti al-aldaw dakesda.”​—EFESO 5:15, 16.

1, 2. Aniat’ pudno a karit itatta, ket aniat’ mabalin a pakaiyaspingan dayta?

MAYSA a karit ti mangpili kadagiti ipangpangruna, mangtaming kadagiti responsabilidad, mangiwaya iti tiempo ken pigsa kadagiti nasken a tay-ak ti panagbiag iti nainkalintegan a pamay-an. Maysa met a karit ti panangliklik kadagiti panaglablabes ken panangtaginayon ti mental ken emosional a kinatimbeng.​—Efeso 5:17; 1 Timoteo 4:8; 1 Pedro 1:13.

² Daytoy a karit mabalin a maipadis iti sarangten ti maysa nga aktor a mangkalangtay iti naingpis a barut iti ngato. Ti pannakapukaw ti kinatimbeng kaipapananna ti didigra kenkuana. Maiyasping iti dayta, ti pannakapukaw ti kinatimbeng iti naespirituan kaipapananna ti didigra kadatayo. Ti maysa a tao nga agkalkalangtay iti barut talaga a saanna a padagsenan ti bagina kadagiti adu a bambanag. Awitenna laeng dagiti nasken. Ngarud, tapno mataginayontay ti kinatimbeng iti naespirituan, masapul a salimetmetantayo ti simple, awan pakadadagsenanna a panagbiag.​—Hebreo 12:1, 2.

 3. Aniat’ masapul nga aramidentayo tapno masalimetmetan ti simple a panagbiag?

³ Tapno masalimetmetan ti simple a panagbiag, masapul nga iraman laeng ti bagbagitayo kadagiti nasken a bambanag tapno mataginayon ti rasonable a wagas ti panagbiag. Kas panamagiddiat iti no aniat’ kasapulan a biruken dagiti adalanna​—ti Pagarian ti Dios ken ti kinalintegna​—dinakamat ni Jesus “dagiti bambanag nga ipangpangruna a sapulen dagiti Gentil.” (Mateo 6:32, 33) Gapuna pinakdaarannatay ni Jesus a liklikan ti naruay a panagurnong kadagitoy a bambanag. Apay? Gapu ta mabalin a pagrikutenda ti panagbiagtayo ken itawtawdatayo. (Lucas 12:16-21; 18:25) Nasayaat daytoy a balakad, agpapanpay nabaknang wenno napanglawtayo, de-adal wenno saan.

No Apay a Nasken Unay itatta

 4. Apay a nasken ti panangsalimetmet iti natimbeng, simple a panagbiag itatta?

⁴ Ti panangsalimetmet iti natimbeng, simple a panagbiag ket nangnangruna a nasken itatta agsipud ta naipupoken ni Satanas ken dagiti demoniona ditoy daga ket tarigagayda a madagsenantayo ket iyadayo ti atensiontayo manipud panagserbi iti Dios. (Apocalipsis 12:7-12, 17) Gapuna, ad-adda a maiyaplikar ita daytoy a balakad ti Biblia: “Kitaenyo ngarud a siaannad no kasano ti pannagnayo, saan a kasla nakuneng no di ket kasla masirib, a kailalaanyo ti gundaway a panagaramid iti naimbag, ta dagiti al-aldaw dakesda.” (Efeso 5:15, 16) Wen, agbibiagtay iti dakes a lubong ni Satanas, saan nga iti baro a lubong ti Dios. Gapuna, ditay kabaelan ti agbalin a kampante.​—2 Corinto 4:4; 2 Pedro 3:7, 13.

 5. Kasano a dagiti ad-adipen ti Dios idi ugma nangipaayda kadatayo iti umiso nga ehemplo?

⁵ Dagiti adipen ti Dios a nagbiag idi ugma iti daytoy iturayan-Diablo a lubong mangipaayda iti nasayaat nga ulidan kadatayo. “Impudnoda nga isuda gangannaetda ken agpagpagnada iti rabaw ti daga.” Gapuna, tarigagayanda ti “nasaysayaat a pagnaedan, kayatna a sawen, ti nailangitan.” (Hebreo 11:13-16) Ti kinasungdoda ket maipaay iti nailangitan a Pagarian ti Dios, a kasta met koma kadatayo. Iti daytoy a rason, inawagan ni apostol Pedro dagiti Kristiano a “gangannaet ken agpagpagna.” (1 Pedro 2:11; Filipos 3:20) Kinapudnona, kinuna ni Jesus a dagiti pudno nga adipenna ket “saanda a paset ti lubong.” Kayatna a sawen, kas iti kinuna ni apostol Pablo, a dagiti Kristiano dida koma ‘aramaten ti lubong nga aglablabes.’​—Juan 17:16; 1 Corinto 7:31.

 6. (a) Aniat’ masapul a laglagipentayo, ket iti aniat’ pakaiyaspingan ti kasasaadtayo? (b) Ania a mamakdaar nga ehemplo ti masapul nga ipangagtayo?

⁶ Gapuna kasapulan a laglagipentayo a kanayon a daytoy lubong ni Satanas ket napeggad a lugar a pagnaedan. Ti maysa a panagbiddut mabalin a kaipapananna ti didigra. (1 Juan 5:19; 1 Pedro 5:8) Ti kasasaadtayo mabalin a maiyasping iti maysa a tao a magmagna iti lugar a namulaan kadagiti bomba. Iti panangisitarna iti maysa nga ehemplo a mamakdaar kadagiti Kristiano, dinakamat ni apostol Pablo dagiti Israelitas a nakasaganan a sumrek iti Naikari a Daga. Adut’ nakapukaw ti kinatimbengda iti naespirituan, nairaman iti imoralidad ket dinadael ida ti Dios. “Gapuna,” insurat ni Pablo, “ti mangipagarup nga adda a sitatakder, kitaenna ta di [mapukaw ti kinatimbengna iti naespirituan ket] maikulbo.”​—1 Corinto 10:12.

No Apay a Salaknib Dayta

 7. Ania a panangsukimat iti bagi ti masapul nga aramidentayo?

⁷ Ti panangsalimetmet iti natimbeng, simple a panagbiag salaknibannakayo agsipud ta ipaayannakayo iti ad-adu a tiempo ken pigsa para iti naespirituan a bambanag. Ngarud nainsiriban a saludsodanyo ti bagiyo: Pagbalbalinek kadi a simple ti panagbiagko, wenno parikrikutek dayta? Aniada a bambanag ti talaga nga iyun-unak iti biagko? Dadduma kunaenda a bassit panawenda nga agadal ti Biblia wenno makipaset iti ministerio iti tay-ak. Ngem aniat’ makagapu? Mabalbalin, isut’ pannakapaayda a mangsalimetmet iti natimbeng, simple a panagbiag. Apay a diyo idilig ti kaadu ti oras a busbusbusenyo iti panaglinglingay, kas iti panagbuya iti telebision, iti oras a busbusbusenyo iti panagserbi ken Jehova iti maysa a tay-ak iti Nakristianuan nga aktibidad wenno iti sabali? Balanse kadi ti panangusaryo iti tiempo? Ti panamagbalin a simple iti panagbiagyo iwayaanna ti ad-adu a tiempo para kadagiti ad-adda a nasken a bambanag, a pakairamanan ti dakdakkel a pannakiraman iti napateg unay a naespirituan a panagani.​—Filipos 1:9, 10; Mateo 9:37.

 8. Kasano a maipangag ti maysa ti pammakdaar ni Jesus a biruken nga umuna ti Pagarian, ket aniat’ mangiyilustrar iti kinapateg ti paabante a puersa?

⁸ Kinapudnona, ti naespirituan nga aktibidadyo ket maysa a pangrukodan no salsalimetmetanyo ti natimbeng, simple a panagbiag wenno saan. Dagiti Kristano a mangipangpangag iti pakdaar ni Jesus a biruken nga umuna ti Pagarian ti Dios ket rumangrang-ayda a nalaing iti regular a panagadal iti Biblia, itatabuno iti gimong, ken iti tay-ak ti panagserbi. Dayta a paabante a panagtignay ket pudno a maysa a proteksion manipud iti pannakatnag. Mabalin a maiyarig dayta iti bisikleta. Dagidiay nakapadasen a mangbalanse iti bisikleta nga agarup agsardengen apresiarenda ti kinapateg ti paabante a puersa. Kasta met, no la ket agtultuloykayo nga agabante iti umiso a kapartak iti rutina ti naespirituan nga aktibidad, masalaknibankayo manipud iti pannakapukaw iti kinatimbeng ken pannakatnag.​—Filipos 3:16.

 9. (a) Aniat’ maysa a nasayaat a palagip kadatayo amin? (b) No agpalplano iti proyekto, ania a salsaludsod ti masapul nga iyimtuodtay iti bagbagitayo?

⁹ Kaskasdi, kasapulan ti panagalibtak, a laglagipen a ti panangpalag-an ti bagbagitayo kadagiti bambanag maipaayannatayo ti ad-adu a tiempo para iti panagadal, para iti panagsagana ti gimong, ken para iti panangtulong kadagiti sabsabali. “Kada magargariak a gumatang iti banag a diak kasapulan, wenno aramiden ti trabaho a di nasken kaniak,” kuna ti maysa a Kristiano a negosiante, “Pasardengek ti bagik iti palagip a salimetmetan dayta a simple. No dadduma kasapulan nga agbalinak a prangko iti bagik.” Saan kadi a naimbag a palagip dayta kadatayo? No pampanunotenyo ti sumagmamano a proyekto, nalabit panangibangon iti kanayonan ti balayyo wenno sabali pay, apay a diyo saludsodan ti bagiyo: Parang-ayennanto kadi ti espiritualidadko wenno iti daydiay pamiliak wenno lapdannanto dayta? Talaga kadi a kasapulak amin dagitoy a bambanag a sigagar a tartarigagayan ti tattao daytoy a lubong, wenno kabalinak kadi nga awan kaniak dagita?

10. Kasano a dagiti panangmatmat ti “tao a linalasag” maigiddiat iti daydiay “tao a naespirituan”?

¹⁰ Nupay kasta, mabalin a di umanamong ti dadduma: ‘Nasken kadi a talaga ti kasta a panagsakripisio iti bagi? Makalikagumantayo kadi a mangsalimetmet iti natimbeng, simple a panagbiag?’ Bueno, dinakamat ni Pablo “dagiti bambanag ti maysa a tao” ken “dagiti bambanag ti Dios” ken kinunana: “Ti tao a linalasag saanna nga awaten dagiti banag ti espiritu ti Dios, ta isuda ti kasla kinanengneng; ket dina met ida mabalin nga ammuen, agsipud ta dagitoy naespirituan ti pannakabigbigda. Ngem, ti tao a naespirituan mailasinna a sipupudno dagiti amin a bambanag.” (1 Corinto 2:11, 14, 15) Nalakakayo la nga agbalin a “tao a linalasag” babaen iti panangbiruk ken pananggun-od kadagiti di nasken a namaterialan a bambanag. Iti kasta a kasasaad, ti panagsakripisio iti bagi agparang a nalabes, nakakatkatawa pay ketdi. Ngem daytat’ panangmatmat ti “tao a linalasag,” saan a ti panangmatmat iti “tao a naespirituan.”

11. Ania koma ti kurso a di kinatimbeng ken Noe, ket kasanotayo a masalimetmetan ti natimbeng a panagbiag itatta?

¹¹ Ti maysa a tao a naespirituan matmatanna dagiti bambanag babaen iti mata ti pammati. Matmatanna ti bambanag manipud iti panangmatmat ti Dios. Imutektekanyo ni Noe. Isu kadit’ natimbeng koma no, kalpasan a naammuanna ti panggep ti Dios a dadaelenna ti lubong babaen iti maysa a layus, binusbosna ti panawenna iti panangibangon iti dakdakkel ken nasaysayaat a pagtaengan ken pananggun-od iti ad-adu a material a sanikua? Siempre saan! Ti daong isut’ pudpudno a kinatalgedna. Para ken Noe, ti panangsalimetmet iti natimbeng, simple a panagbiag iramanna ti panangipaay iti naan-anay nga atension iti panangibangon iti daong ken panagbalin a “manangaskasaba iti kinalinteg,” agpapanpay iti pananguy-uyaw dagiti awanan-pammati a ‘tao a linalasag.’ (2 Pedro 2:5; Mateo 24:37-39) Umasping iti dayta, agsipud ta nalawlawagantayon maipapan iti kinaasideg ti panungpalan toy lubong, ti kakaisuna a natimbeng a wagas ti panagbiag kadatayo isut’ panangisentro ti atensiontayo iti panangaramid iti pagayatan ti Dios ken panangiwaragawag iti naimbag a damag, uray no mabalin nga iramanna ti matmatmatan ti adu kas panangisakripisio ti makunkuna a normal a wagas ti panagbiag.​—1 Juan 2:17.

Insuro ni Jesus Kadatayo ti Pamay-an

12. (a) Aniat’ imbaga ni Jesus nga isardentay nga aramiden, ket imbes ketdi ania komat’ intay aramiden? (b) Apay a kasapulan daytoy a panagbalbaliw iti panggep?

¹² Iti sermonna idiay Bantay, nangted ni Jesus iti naimbag a balakad iti panangsalimetmet iti natimbeng, simple a panagbiag. Kinunana: “Isardengyo ti agurnong kadagiti gupgupit nga agpaay kadakayo ditoy daga, isu a ti sanga ken lati dadaelenna ida, ken isu a dagiti mannanakaw kalienda ken takawenda.” Inusar ni Jesus ti sao nga “isardengyo” gapu ta ti tattao kadawyanna nga itultuloyda ti “agurnong” kadagiti material a banag maipaay iti bagbagida. Ngem ti tao a nagbalin nga adalan ni Jesus saannan a mabalin nga aramiden dayta. Masapul a ti biagna addaan iti naidumduma a panggep, kas ipakita ti sumaruno a bilin ni Jesus: “Ngem, agurnongkayo kadagiti gupgupit sadi langit, isu a ti sanga ken ti lati dida dadaelen, ken isu a dagiti mannanakaw dida kalien ken takawen.” Iti panangitedna ti rason no apay a kasapulan daytoy a panagbalbaliw ti panggep, ni Jesus kinunana: “Ta no adino ti yan ti gupityo, addanto met idiay ti pusoyo.”​—Mateo 6:19-21.

13. Tapno makaurnongtay kadagiti gupit idiay langit, masapul a kumbinsidotayo iti ania?

¹³ Ti gupityo ket ibilangyo a pudno a napateg. Dagiti kadi material a bambanag ti gupityo? Wenno dayta kadi ti pannakasantifikar ti nagan ni Jehova ken ti inkarina a gunggona. Tapno busbosenyo ti biagyo iti panagurnong iti gupgupit sadi langit imbes a ditoy daga, masapul a kumbinsidokayo iti kinapudno ti pagarian. Masapul a ti baro a lubong ket pudpudno unay kadakayo ta makitayo dayta iti mata ti isipyo ket mamatmatanyo ti bagiyo sadiay nga agtartrabaho maipaay iti pannakaibanag ti paggep ni Jehova para ti daga. Kas ken Moises, masapul a ‘kitkitaenyo Daydiay saan a makita’ ket kumbinsidokayo unay a ‘gunggonaanna dagidiay sipapasnek a mangsapul kenkuana.’​—Hebreo 11:6, 27.

14. Anianto dagiti resultana no dagiti pusotayo ket nakasentro kadagiti material a banag?

¹⁴ Ngem ania ngay no ti pusoyo, a mangiraman kadagiti tarigagayyo ken pagay-ayatyo, ket naisentro kadagiti material a gupit? Ti Biblia kunaenna: “Ta ti ayat ti pirak isu ti ramut ti isuamin a kita ti dakes nga idi inaguman dagiti dadduma, nayaw-awanda iti pammati ket nasalputda kadagiti adu a ladladingit.” Ti panagtarigagay kadagiti material a banag a magatang ti pirak basta saan a makaipaay iti pudpudno a manayon a kinaragsak. (1 Timoteo 6:10; Eclesiastes 5:10) Ngem ti nakalkaldaang iti amin, ti panagayat iti pirak ken material a bambanag perdienna ti panagayatyo iti Dios, a manginanama ti panagserbitay kenkuana buyogen iti “maysa a puso a sipapalungdo.”​—1 Cronicas 28:9.

15. (a) Ania nga ilustrasion ti inted ni Jesus maipapan iti mata? (b) Kasano a mataginayon ti maysa a tao ti simple a mata, agpadpada iti pisikal ken naespirituan a pannakaawat? (c) No simple ti matatayo, kasano a ti naespirituan a panangmatmattayo ket maipada kadagidiay tallo nga apostol ni Jesus?

¹⁵ Tapno matulongantayo a mangliklik iti silo ti materialismo, nangted ni Jesus iti dua nga ilustrasion: “Ti pagsilawan ti bagi isu ti mata. Gapuna, no ti matam nadalusto, amin a bagim nalawagto; ngem no ti matam dakes, amin a bagim nasipngetto.” (Mateo 6:22, 23) Iti pisikal a pannakaawat, ti “simple” a mata ket isu daydiay nakapukos, a mangidanon kadagiti nalawag a ladladawan iti isip. Ti saan a nakapukos a mata idanonna dagiti makariro ken nakudrep a ladladawan. Umasping iti dayta, ti “simple,” wenno nakapukos a naespirituan a mata, iyegna ti nalawag a ladawan ti Pagarian ti Dios, saan a nakudrep, di nakapukos a ladawan a mamagbalin iti baro a lubong a kasla maysa laeng nga estoria wenno sarsarita. No nakapukos ti naespirituan a matayo, ti baro a lubong nga inkari ti Dios agbalinto a pudpudno kadakayo kas iti Pagarian idi kadagiti tallo nga apostoles a naaddaan pribilehio a makakita iti pakpakaunana iti maysa a namilagruan a sirmata iti panagbalbaliw ti langa ni Jesus.​—Mateo 16:28–17:9; Juan 1:14; 2 Pedro 1:1:16-19.

16. Iti maikadua nga ilustrasion ni Jesus, kasanot’ panangipakitana ti pannakasapul iti kinamaymaysa iti panggep?

¹⁶ Ni Jesus nangted iti maikadua nga ilustrasion. “Awan ti tao a makabalin nga agserbi iti dua nga appo,” kinunana, “ta guraennanto ti maysa ket ayatennanto ti sabali, wenno sumurotto iti maysa ket umsienna ti sabali.” Iti panangiruarna ti punto, impaganetgetna manen ti pannakasapul a mangipakita iti kinamaymaysa ti panggep, a kunkunana: “Dikay mabalin ti agserbi iti Dios ken iti Kinabaknang.” (Mateo 6:24) Saanto a basta agkurri dayta. Gapuna intuloy ni Jesus: “Gapuna kunak kadakayo: Dikay naagawa iti maipaay iti biagyo no ania ti kanenyonto wenno inumenyonto, ket uray iti bagiyo no ania ti ikawesyonto. . . . Ta dagiti Gentil ipangpangrunada a sapulen amin dagitoy a bambanag. Ta ni Amayo a nailangitan ammona ti pannakasapulyo amin kadagitoy.”​—Mateo 6:25-32.

17. (a) Ania a punto ti patpatauden ni Jesus iti panangipaayna iti instruksion maipapan kadagiti material a banag? (b) Aniat’ ipagpaganetget ditoy ni Jesus, ket aniat’ iraman ti panangsalimetmet iti natimbeng, simple a panagbiag?

¹⁷ Di kayat a sawen ni Jesus a dagiti pasurotna dida ikankanon dagiti material a kasapulanda wenno agbalinda a nasadut ken agkitakitda nga agtrabaho tapno ipaayan ti bagbagida ken ti pamiliada. (1 Timoteo 5:8) Saan, ngem ti punto ket dagitoy a material a banag nga ipangpangruna a sapulen dagiti Gentil saanda koma nga agbalin a kangrunaan. Imbes ketdi, impakdaar ni Jesus: “Itultuloyyo, ngarud, a biruken nga umuna ti pagarian ken ti kinalintegna, ket isuamin dagitoy a bambanag mainayondanto kadakayo.” (Mateo 6:33) Gapuna sarsaritaen ditoy ni Jesus ti maipapan kadagiti kalat iti panagbiag ket ipagpaganetgetna ti kinabarengbareng ti panagtarigagay kadagiti material a banag. Ti panangsalimetmet iti natimbeng, simple a panagbiag ramanenna ti panangisentro iti matatayo a naipamaysa kadagiti intereses ti Pagarian, a pagbalinen ti isuaminen a maikadua laeng.

Ehemplo ni Jesus ken dagiti Dadduma

18. Kasanot’ panangipaay ni Jesus iti nasayaat nga ulidan para kadatayo?

¹⁸ Idi inggunamgunamna kadagiti Kristiano nga “iwagsakyo ti amin a pakadagsenan ken ti basol [iti kinakurang wenno pannakapukaw ti pammati] a manglawlaw a silalaka kadatayo,” inggunamgunam ni Pablo: “Tarayentayo koma a siaanus ti tarayen a naikabil iti sanguanantayo, a kitkitaentayo ni Jesus a Pangulo ken Mangtungpal ti pammati.” (Hebreo 12:1, 2) Ni Jesus ket naipamaysa unay ti debosionna iti intereses ti Pagarian ta ti kasaadna ket dineskribirna kas: “Dagiti musang addaanda kadagiti rukib ket dagiti tumatayab iti tangatang addaanda kadagiti um-umok, ngem ti Anak ti Tao awan ti pangisadaganna ti ulona.” (Mateo 8:20) Kageddan dayta, ni Jesus saan met nga asetiko wenno sobrat’ panangpaidamna iti bagina. Ipakita ti Kasuratan a tinagiragsakna dagiti nasasayaat a taraon ken pagan-anay, kaskasdi ti kangrunaan a kalatna iti biag isut’ panangturposna iti ministeriona. Iti kasta sinalimetmetan ni Jesus ti natimbeng, simple a panagbiag.​—Lucas 5:29; Juan 19:23, 24.

19, 20. (a) Ania nga ulidan ti inted ni apostol Pablo maipapan kadagiti material a banag? (b) Ania a leksion ti naadal dagiti adu itatta, ket kasanot’ panagriknada maipapan iti kurso ti panagbiagda?

¹⁹ Ni apostol Pablo naaddaan met iti umiso a panagsasaganad dagiti ipangpangrunana. Inlawlawagna: “Ngem diak met ilalaen a pulos ti biagko a kas napateg kaniak met laeng, no la ket no maturposko ti dalanko ken ti annongen nga inawatko ken Apo Jesus, tapno paneknekak ti ebanghelio ti parabur ti Dios.” (Aramid 20:24) Wen, tapno maitungpal ti kaskenan iti amin a ministerio, nakontento ni Pablo iti nanumo a panagbiag ngem no maminsan tinagiragsakna met ti panaglaplapusanan. Insuratna: “Iti tunggal disso ken iti isuamin a kasasaad, naadalko ti palimed ti pannakapnek ken ti panagsagaba iti bisin, kasta met ti panaglaplapusanan ken ti kinakirang.”​—Filipos 4:12.

²⁰ Pinulpullo a ribo ti literal a nakaadal iti daytoy met la a leksion itatta. Adu kadakuada ket amin-tiempo a ministro dagiti Saksi ni Jehova, nga iramanna dagiti misionero, payunir, agdaldaliasat a manangaywan, ken dagidiay agserserbi kadagiti internasional a hedkuarters ken sanga nga opisina ti organisasion. Kalpasan ti adu a tawen a panagserbida iti amin a tiempo, kaaduanna kunaenda: “No paulitendak koma manen, daytanto met lat’ aramidek.”

Gunggona a Mabalinyo a Tagiragsaken

21, 22. (a) Ania dagiti gunggona a tagiragsakentayo uray pay itan no salimetmetantayo ti natimbeng, simple a panagbiag? (b) Ania dagiti gunggona iti masanguanan ti mabalin a tagiragsakenyo?

²¹ Nupay no ti panangsalimetmet iti natimbeng, simple a panagbiag ramanenna ti panagsakripisio, dagiti bendision ken rag-ona ket di maartapan. Ad-adunto ti tiempoyo iti panangiyadelantar ti intereses ti Pagarian ken dakdakkel ti gundawayyo a mangsapul kadagiti interesado a tattao ken mangisuro kadakuada kadagiti panggep ti Dios. Maaddaankayto iti pudno a pannakapnek ken pannakakontento, agraman iti talna ti panunot ken ti pammasiguro a makaay-ayokayo ken Jehova a Dios. Daytat’ gunggona a mabalinyo a tagiragsaken uray pay itan.​—Filipos 4:6, 7.

²² Ngem dakdakkel pay nga amang dagiti gunggona iti masanguanan, a ringbawanna a naan-anay dagiti agdama a panagsakripisiotayo no idildilig. Dagiti bendision ni Jehova iramanna ti “biag nga agnanayon.” Wen, daytat’ mabalin a bendision kadakayo​—biag nga awan inggana iti nalinteg a baro a lubong ni Jehova. Salimetmetanyo ti natimbeng, simple a panagbiag, a di pulos palubosan dagiti aniaman a banag daytoy a lubong a mamagbalin kadakayo a di natimbeng. Laglagipenyo nga ipaayto ni Jehova ti kiddawen ti pusoyo​—Salmo 21:3, 4; 37:4; 133:3.

Salsaludsod a Pangrepaso

◻ Aniada nga ehemplo ken ilustrasion ti naimutektekanyo a makatulong kadakayo a mangsalimetmet iti natimbeng, simple a panagbiag?

◻ Kasano a ti panangsalimetmet iti natimbeng, simple a panagbiag salaknibannatayo?

◻ No simple ti naespirituan a matatayo, aniantot’ kaipapanan daytoy kadatayo?

◻ Kasanot’ panangisuro ni Jesus kadatayo a mangsalimetmet iti simple panagbiag?

◻ Ania dagiti bendision ti panangsalimetmet iti natimbeng, simple a panagbiag?