Ti di Kaikarian a Kinamanangaasi ti Dios—Dikay Awaten nga Awan Pagmamaayanna!
“TI PANAGSAO maipapan ti relihion. . . kinapudnona ket trabaho ti pastor dayta,” kuna ti maysa a miembro ti iglesia. (Kuami dagiti italiko.) Dadduma inadmitirda, “No iyar-arig mammano laeng a Kristiano ti agregregget a mangiranud ti pammatida kadagiti dadduma.” (Kuami dagiti italiko.) Dagita a sasao ti silalawag a mangipaganetget a para kadagiti kaaduan a mannakimisa itatta, ti Kinakristiano ket kaipapananna ti nasursurok la bassit ngem ti paspasaray a pammati iti Dios ken ni Kristo kas ti Mesias.
Ania ti panangmatmatyo? Dagiti adalan ni Jesus inranudda ti pammatida kadagiti dadduma. (Lucas 8:1) Kasta met aya ti rebbeng nga aramiden dagiti Kristiano itatta? Wenno no ti Dios saanan a kalikaguman dagiti agkunkuna a Kristiano nga agbalin nga ebanghelisador, aniat’ namnamaenna kadakuada? Adda aya panggep ti Dios para kadagiti Kristiano itatta? Wen! Ket gapu itoy a rason, ti pakdaar ni apostol Pablo kadagiti taga Corinto a Kristiano a “dikay awaten ti di kaikarian a kinamanangaasi ti Dios nga awan pagmamaayanna” ti addaan kaipapananna kadatayo. (2 Corinto 6:1) Kitaentayo no apay.
Nalasinen ti Panggep ti Dios
Kas ken Pablo, inawat dagiti Kristiano a taga Corinto ti daton ni Jesu-Kristo. Gapu iti pammatida iti daytoy a sagana, indeklara ni Jehova ida a nalinteg. Ti panangakseptarda kadagiti Mesianiko a kinapudno nga inawatda babaen iti ministerio ni Pablo ti nangispal kadakuada manipud pannakaadipen iti ulbod, pagano, ken imoral nga ar-aramid a pakadamdamagan idi ti kadaanan a Corinto. Kadakuada, ti di kaikarian a kinamanangaasi ni Jehova kinaipapananna ti pannakaispalda. Nupay kasta, ti kadi kasta a di kaikarian a kinamanangaasi ti awan panggepna?
Saan. Imbes ketdi, ti panggep ni Jehova iti panangispalna kadakuada ket kapada met laeng ti panggep a nangispalanna ken Pablo manipud kadagiti di nainkasuratan a tradision dagiti amma ni Pablo. Pinagbalin ni Pablo mismo a nalawag dayta a panggep: “Gapu itoy naaramidak a ministro kas iti sagut daydi di kaikarian a kinamanangaasi ti Dios a naited kaniak. . . a rebbeng ti panangikaskasabak kadagiti nasion dagiti di matukod a kinabaknang ni Kristo.” (Efeso 3:7, 8; idilig iti Galacia 1:15, 16.) Wen, ti panggep ti di kaikarian a kinamanangaasi ti Dios ket isut’ panangala dagiti adipenna ti pudno a panagdayaw—nga itan-ok ti naganna, a Jehova, ken ipakaammo dayta iti Nakristianuan a ministerio, kas inaramid ni Pablo.—Roma 10:10.
Nupay kasta, idi insurat ni Pablo ti umuna a suratna kadagiti taga Corinto, nabatad nga adu kadakuada ti naikapis iti panggep ti di kaikarian a kinamanangaasi ti Dios. Kasano a kasta? Imbes a taginayonen ti porma ti panagdaydayaw a nadalus ken makaay-ayo iti imatang ti Dios, pinalubosanda dagiti imoral wenno narugit nga impluensia dagiti taga Corinto a mangbibineg ti rikriknada. Naipakaammo nga adda kadakuada agpadpada ti panagsisinasina ken pannakiabig. (1 Corinto 1:11; 5:1, 2) Ti kaaduan kadagidiay naitimpuyog iti kongregasion ti napalinteg babaen iti balakad ni Pablo. Nupay kasta, saan a kayat ni Pablo ida a mariribuk pay manipud iti Nakristianuan a ministerio. Gapuna, pinalagipanna ida iti kamaudianan a “dikay awaten ti di kaikarian a kinamanangaasi ti Dios iti awan pagmamaayanna.”—2 Corinto 6:1.
Maysa a Pagulidanan Idi Ugma
Ti situasion nga umas-asping iti daytoy ti timmanor adu a siglo a nasapsapa. Idi primavera ti 537 K.K.P., winayawayaan ni Jehova a Dios ti pinilina a nasion ti Israel manipud panangkayaw ti Babilonia babaen iti Persiano nga ari Ciro. Ti panggep ti pannakawayawayada ti nailasin ni Ciro mismo babaen iti sumaganad a bilin: “Uray siasinoman nga adda kadakayo amin nga ilina, ti Diosna adda koma kenkuana. Sumang-at koma idiay Jerusalem nga adda sadi Juda ket bangonenna ti balay ni Jehova, ti Dios ti Israel.”—Esdras 1:1-3.
Wen, isut’ tiempo nga intudingen ni Jehova a maisubli ti pudno a panagdayaw idiay daga ti Juda. Gapu iti di kaikarian a kinamanangaasi ni Jehova, dagidiay napasubli a Judio ti naaddaan ti pribilehio a mangibangon manen iti templona idiay Jerusalem. Iti panangawatda iti karit, dagiti nakasublin a nakayawan ti nagpermidan idiay ilida ket rinugianda ti trabaho a panangibangon manen iti templo.—Esdras 1:5-11.
Iti ababa laeng a tiempo, nupay kasta, daytoy napasubli a nasion a Judio pinalubosanda dagiti makinruar nga ibubusor a mangsinga iti trabahoda. Imbes nga ipamaysa a nalawag iti isipda ti panggep ti pannakaispalda, nangrugi a kinunada: “Saan pay a dimteng ti panawen a maipaay iti panagbangon iti balay ni Jehova.” (Haggeo 1:2) Kas resultana, ti trabaho a panagbangon ti interamente a nabaybay-an iti agarup 16 a tawen.
Kabayatanna, nagbalinda a kupado kadagiti inaagum nga ar-aramid, nga impagpaganetgetda dagiti material a bambanag, dagiti linalasag a nam-ay, a nangnangruna ngem ti panangibangon manen iti sagrado a balay ni Jehova. (Haggeo 1:3-9) Idiay Haggeo 1:4 mabasatayo: “Panawen aya a maipaay kadakayo met laeng nga agtaengkayo kadagiti nabobedaan a balbalayyo, idinto a daytoy a balay agwalangwalang?” Ti balay a pagdaydayawan ken Jehova ti “agwalangwalang,” a ti laeng pundasion ti adda, bayat a dagiti Judio aggigiandan kadagiti nasayaat pannakaatepnan a balbalayda a dagiti didingda nagpipintas pannakaaramidda babaen kadagiti nasasayaat a kayo.
Babaen kada mammadtona a Haggeo ken Zacarias, pinalagipan ni Jehova dagiti Judio iti panggep ti pannakaispalda, ket ti trabaho a panagbangon manen ti nairingpas a naan-anay met laengen. Nupay kasta, asinoman a nangitultuloy a mangipangpangruna unay kadagiti material a sanikua ngem iti pribilehio a makita a maisubli ti pudno a panagdaydayaw idiay Jerusalem ti nalawag a naikapis iti panggep iti di kaikarian a kinamanangaasi ti Dios.
Ti Panggep ti Pannakaispaltayo
Aniat’ maadaltayo itatta manipud iti ulidan dagiti Judio a napasubli idi 537 K.K.P. ken manipud kadagiti Kristiano a taga Corinto idi kaaldawan ni Pablo? Kas dedikado nga ad-adipen ni Jehova a Dios, naglak-amtay met ti pannakaispal. Babaen iti di kaikarian a kinamanangaasina, saantayon a naadipen kadagiti ulbod a doktrina ken tradision ti Babilonia a Dakkel wenno iti kinadakes daytoy daan a sistema dagiti bambanag. (Juan 8:32; 2 Corinto 4:4-6) Ti kasta a pannakaispal, agraman iti wayawaya nga inyegna, ti mangted gundaway kadatayo a mangipakita iti Dios ti panangipategtayo iti ayatna kadatayo. (Juan 4:9) Kasano?
Babaen ti saantayo a pannakaikapis iti panggep ti di kaikarian a kinamanangaasi ti Dios. Pareho met laeng daytoy kadagidiay immun-una nga adipen ni Jehova, ti intay panangala ti pudno a panagdaydayaw. Itatta, kas idi kaaldawan ni Pablo, kaipapanan daytoy a rebbengna nga “ikaskasaba kadagiti nasion ti naimbag a damag maipapan. . . ken Kristo.” (Efeso 3:8) Ngarud, amin, a nangawat iti di kaikarian a kinamanangaasi ti Dios masapul a makiramanda iti Nakristianuan a ministerio. Kaipapanan daytoy a kas dedikado nga ad-adipen ni Jehova a Dios, addaantay responsabilidad nga iparangarang ti kinapudno kadagiti dadduma, nga itan-ok ken idayaw ti nagan ti Dios, ken agserbi kenkuana iti panagdayaw a nadalus ken nasantuan.—Mateo 28:19, 20; Hebreo 13:15; Santiago 1:27.
‘Dikay Paikapis iti Panggepna’
Posible ngata nga asinoman kadatayo, kas kadagidiay immuna a Kristiano, ket agpegpeggad a ‘maikapis iti panggep’ ti di kaikarian a kinamanangaasi ti Dios? Wen. Kas kadakuada, adu kadatayo, agtartrabaho man wenno ages-eskuela, ti masapul a maipulapol kadagiti tattao nga agar-aramid ti seksual nga imoralidad, agtatakaw, managulbod, ken managkusit, agraman kadagiti dadduma a bambanag a makarimon ken Jehova a Dios. (1 Corinto 6:9, 10; Galacia 5:19-21) Gapuna nasken a liklikantay ti pannakitimtimpuyog kadagita a tattao, di la ket ta mangrugitay met a makapatanor ti panangnanam iti dakes. (1 Corinto 15:33) Ti kasta a pannakitimtimpuyog nga addaan laeng ti makapakapuy nga epekto iti pammatitayo. Maiyanatup unay, ni Pablo sinuratanna ni Tito: “Ta nagparang ti di kaikarian a kinamanangaasi ti Dios a mangyeg ti pannakaisalakan kadagiti isuamin a tattao, nga isursuronatayo a no pagtalawantayo ti saan a kinasingpet ken dagiti tartarigagay a nailubongan, agbiagtay koma a sipaparbeng ken sililinteg ken sisisingpet itoy agdama a sistema dagiti bambanag.”—Tito 2:11, 12.
Mabalin nga ipato dagiti dadduma a tungtungpalendan ti ministerioda no makigimgimongdan idiay Kingdom Hall, no makiramramandan a regular iti panangiwarwaragawag ti naimbag a damag ti Pagarian ti Dios, ken saanda met nga agar-aramid iti aniaman a kita ti imoral a kababalin. Nupay kasta, adda pay sabali a banag nga usigen. Kuna ni Jesus: “Awan ti tao a mabalin nga agserbi iti dua nga appo.” (Mateo 6:24) Aniat’ kayatna a sawen? Nga uray no mangipapaaytayo ti tiempo a mangiyadelantar ti naimbag a damag, posible met a ti kangrunaan nga interestayo iti biag ket isut’ panagregget a maipaay iti ad-adu pay a material a bambanag. Pudno, mabalin a makitatayo ti pananginanama ti baro a sistema dagiti bambanag iti sidong ni Kristo Jesus a pudpudno a makaallukoy, kaskasdi mabalin met a tarigagayantayo ti makaala ti dakkel met manipud iti daytoy a sistema bayat pay ti kaaddana. Ti kasta a kababalin ti mangikapis laeng kadatayo manipud iti pudpudno a panggep ti nakaispalantayo. Saan aya ti umas-asping a kababalin kadagiti material a tarigagay ti nangikapis kadagiti napasubli a Judio manipud panangitungpalda ti panggep ti nakaispalanda?
Ipakita aya dagiti ar-aramidtayo a naikapistayo iti panggep ti nakaispalantayo manipud itoy dakes a daan a sistema ken iti ulbod a relihionna? Imbaga ni Pablo kadagiti taga Corinto nga “ita isu ti tiempo a maiparbeng” a panangtulong kadagiti dadduman a makagun-od ti pannakaisalakan. (2 Corinto 6:2) Itatta, gapu ta ti dandanin a pannakadadael daytoy dakes a sistema umasidegen, adda ti kinaganat unay kadagiti sasao ni Pablo. Nupay nalawag a ti kaaduan kadagiti mannakimisa itatta pinilida a di iranud ti pammatida kadagiti dadduma, dagiti Kristiano a mangipampamatmat ti naimpusoan a panagayat ken Jehova a Dios ibilangda a pribilehioda a makiraman a naan-anay iti Nakristianuan a ministerio nga intudingna kadakuada. Amin dagidiay simamatalek a mangiwaragawag ti naimbag a damag iti daytoy makaay-ayo a tiempo ken agserbi ken Jehova iti panagdayaw a nadalus ken nasantuan maaramidanda dayta nga addaan pammasiguro a ‘saanda inawat ti di kaikarian a kinamanangaasi ti Dios nga awan pagmamaayanna.’—2 Corinto 6:1.