Determinado a Bumaknang iti Naespirituan

NO KAYATMO ti bumaknang iti material, masapul nga agregget ken agsakripisioka. Kasta met laeng no kayatmo ti bumaknang iti naespirituan. Impasimudaag dayta ni Jesus idi kinunana: “Agurnongkayo maipaay iti bagbagiyo kadagiti gameng idiay langit.” (Mateo 6:20) Dagiti naespirituan a kinabaknang ket saan nga automatiko a maurnong. Ti maysa a tao ket saan a kaskarina a bumaknang iti naespirituan gapu laeng ta adda relihionna no kasano a saan met a bumaknang iti pinansial ti maysa a tao gapu laeng ta adda depositona iti bangko. Kasapulan ti determinasion, tiempo, naipamaysa a panagregget, ken panagsakripisio tapno mapatanor ti maysa ti nasinged a relasionna iti Dios, agmataengan iti naespirituan, ken bumaknang kadagiti naespirituan a galad.—Proverbio 2:1-6.

Mabalin Kadi a Gun-odem nga Agpadpada?

Posible kadi a ti maysa a tao ket agpada a maaddaan iti naespirituan ken material a kinabaknang? Nalabit a posible, ngem maysa laeng kadagitoy ti mabalin a mapagreggetan a sibaballigi. Kinuna ni Jesus: “Saanyo a mabalin ti agpaadipen iti Dios ken iti Kinabaknang.” (Mateo 6:24b) Apay a saan? Gapu ta agkontra a kalat ti panagregget maipaay iti naespirituan a kinabaknang ken ti panagregget maipaay iti material a kinabaknang. Ti maysa lapdanna ti sabali. Gapuna, sakbay nga imbagana kadagiti adalanna nga agurnongda iti naespirituan a kinabaknang, kinuna ni Jesus: “Isardengyo ti agurnong maipaay iti bagbagiyo kadagiti gameng iti daga.”—Mateo 6:19.

No iyaleng-aleng ti maysa ti balakad ni Jesus ket ikagumaanna a gun-oden agpadpada ti naespirituan ken material a kinabaknang, ania ti mapasamak? Kinuna ni Jesus: “Awan ti makabalin nga agpaadipen iti dua nga appo; ta mabalin a guraenna ti maysa ket ayatenna ti sabali, wenno agtalinaed iti maysa ket umsienna ti sabali.” (Mateo 6:24a) No pagreggetan ti maysa a paggiddanen a gun-oden dagita, mabalin a mariknana a makataktak, kanayon a lapped dagiti naespirituan a banag nupay as-asikasuenna pay met laeng dagita kas obligasion. Imbes nga agpannuray iti Dios, mabalin nga agpannuray pay ketdin iti kuarta ken iti magatang dayta kas kangrunaan a pamay-an tapno marisutna dagiti pakaringgoran iti biag. Kas kinuna ni Jesus: “Ti pusoyo addanto la a kanayon iti kinabaknangyo.”—Mateo 6:21, Today’s English Version.

Rumbeng nga utoben a naimbag ti tunggal Kristiano ti kasta a balakad ti Biblia sakbay nga ikeddengna no ania ti pangipamaysaanna iti tiempo, atension, ken pusona. Saan a gapu ta di nangted ti Dios kadagiti espesipiko a limitasion no kasano kaadu ti tagikuaen ti maysa a Kristiano ket kaipapanannan nga awan ti pannusa a kakuyog ti pakdaarna maibusor iti kinaagum. (1 Corinto 6:9, 10) Kas naammuantayon, dagidiay mangyaleng-aleng iti balakad ti Biblia ken determinado a bumaknang agsagabadanto iti naespirituan, mental, ken emosional. (Galacia 6:7) Iti sabali a bangir, kinuna ni Jesus a naragsak dagidiay sipapanunot iti naespirituan a kasapulanda. (Mateo 5:3) Sigurado nga ammo ti Namarsua kadatayo ken ti Anakna no ania ti kasayaatan agpaay iti kinaragsak ken pagimbagantayo!—Isaias 48:17, 18.

Desision a Dimonto Pagbabawyan

Ania ti piliem nga ipamaysa, ti Dios wenno kinabaknang? Siempre, nasken nga asikasuentayo met dagiti material a kasapulantayo. Iti umuna a suratna ken ni Timoteo, kinuna ni apostol Pablo: “Pudno unay no ti asinoman saanna nga ipaay ti kasapulan dagidiay kukuana, ken nangnangruna dagidiay kameng ti sangakabbalayanna, pinaglikudanna ti pammati ket isu dakdakes ngem ti tao nga awanan pammati.” Pinaregta met ni Pablo dagiti Kristiano a mangnamnamada, saan nga iti kuarta, no di ket iti Dios ken “agbalinda a nabaknang iti nasayaat nga ar-aramid.” (1 Timoteo 5:8; 6:17, 18) Ania ti ipamaysam? Ania ti gun-odem? Ti kangrunaan kadagiti nasayaat nga aramid a tinukoy ni Pablo ket ti trabaho a panangasaba ken panagaramid iti adalan nga impaannong ni Jesus kadagiti adalanna. (Mateo 28:19, 20) No agdisnudo dagiti Kristiano a mangpasimple iti panagbiagda, saan laeng a tapno makainana ken matagiragsakda ti biag no di ket tapno ad-adda a mabalinanda ti makipaset iti daytoy a nagpateg a trabaho, ‘agur-urnongda maipaay iti bagbagida iti nasayaat a pamuon maipaay iti masanguanan’ iti baro a lubong nga inkari ti Dios. Ken uray ita, mapaneknekanda a ti naespirituan a kinabaknang ket “O anian nga ad-adda a nasaysayaat ngem iti balitok!”—1 Timoteo 6:19; Proverbio 16:16; Filipos 1:10.

Utobem ti kapadasan ni Eddie, nga ubing pay idi nagbalin a Saksi ni Jehova ti pamiliada. Adda idi tiempo a napukaw ti amin a sanikuada ken napapanawda iti pagtaenganda. Inlawlawag ni Eddie: “Kanayon a pakadanagak idi no ania ngata ti mapasamak kadakami no dumteng ti tiempo a mapukaw amin a sanikuami. Bueno, dimteng dayta a tiempo. Ket ammoyo kadi no ania ti napasamak? Awan! Addaankami met latta iti taraon, mainum, ken pagkawes. Impaay ni Jehova dagiti kasapulanmi ken, idi agangay, nagun-odanmi met laeng dagiti napukawmi. Gapu iti dayta a kapadasan, nasursurok ti agtalek iti kari ni Jesus iti Mateo 6:33—a no ipangpangrunatayo iti biagtayo ti Pagarian ti Dios, ditay pulos pagdanagan ti maipapan kadagiti material a kasapulantayo.” Ita, agserserbi ni Eddie kas amin-tiempo nga agdaldaliasat a ministro, a kaduana ni baketna. Addaanda kadagiti material a kasapulan. Kapatgan iti amin, nabaknangda iti naespirituan.

Dagiti Di Magatadan a Pagimbagan

Saan a kas kadagiti gameng ditoy daga, a mabalin a matakaw, mabalin a permanente ti naespirituan a kinabaknang. (Proverbio 23:4, 5; Mateo 6:20) Pudno a narigrigat a tingitingen ti naespirituan nga irarang-ay. Nalaklaka nga amang ti panangammo no kasano kaadun ti pinansial a rimmang-ayan ti maysa ngem ti panangammo no anian ti rimmang-ayanna no iti panangiparangarang iti ayat, rag-o, wenno pammati. Ngem di magatadan dagiti gunggona nga itden ti naespirituan a kinabaknang. Maipapan kadagiti adalan a mangpanaw uray kadagiti balay ken talonda—wen, ti pagsapulanda—tapno maiwayaanda dagiti naespirituan a banag, kastoy ti kinuna ni Jesus: “Pudno kunak kadakayo, Awan asinoman a nangpanaw iti balay wenno kakabsat a lallaki wenno kakabsat a babbai wenno ina wenno ama wenno annak wenno taltalon maigapu kaniak ken maigapu iti naimbag a damag a saanto nga umawat iti maminsangagasut ita iti daytoy a las-ud ti tiempo, kadagiti balay ken kakabsat a lallaki ken kakabsat a babbai ken inna ken annak ken taltalon, agraman kadagiti pannakaidadanes, ket iti um-umay a sistema ti bambanag agnanayon a biag.”—Marcos 10:29, 30.

Ania ti ipangpangrunam iti biagmo? Ti Dios wenno ti kinabaknang?

[Dagiti Ladawan iti panid 8, 9]

Pagregreggetam kadi ti gumun-od iti material a kinabaknang . . .

. . . wenno iti naespirituan a kinabaknang?