Ti Biag ken Ministerio ni Jesus

Panangpili kadagiti Apostolna

AGARUP maysa ket kagudua a tawenen nanipud inyam-ammo ni Juan a mammautisar ni Jesus kas Kordero ti Dios ket rinugian ni Jesus ti ministeriona. Iti dayta ni Andres, Simon Pedro, Juan, ken nalabit ni Santiago (kabsat ni Juan), agraman ni Felipe ken Nathanael (a managan met Bartolome), nagbalinda nga immuna nga ad-adalanna. Idi agangay, adu pay dagiti dadduma a timmipon kadakuada a simmurot ken Kristo.

Itan ni Jesus sisasaganan a mangpili kadagiti apostolna. Dagitoyto dagiti nasinged a kakaduana a maikkan iti naisangsangayan a panagsanay. Ngem sakbay ti panangpilina kadakuada napan ni Jesus iti maysa a bantay ket binusbosna ti agpatpatnag iti panagkararag, awan duadua indawatna a maaddaan ti kinasirib ken ti pammendision ti Dios. Idi bimmigaten, inawaganna dagiti adalanna ket manipud kadakuada pinilina dagitoy 12. Nupay kasta, yantangay nagtultuloyda a sursuruan ni Jesus kaskasdi maawaganda pay nga adalanna.

Innem kadagiti pinili ni Jesus a nainaganan iti ngato, isuda dagiti immuna nga adalanna. Ni Mateo, nga inawis ni Jesus manipud iti opisinana iti buis ti napili met. Dagiti dadduma a napili, isu da Judas (a napanaganan met Tadeo), ni Judas Iscariote, ni Simon a Cananeo, ni Tomas, ken ni Santiago nga anak ni Alfeo. Daytoy a Santiago ti naawagan met Santiago a Basbassit, nalabit tapno mailasin manipud iti daydiay sabali nga apostol Santiago.

Itan dagitoy a 12 ket dua ti nakikuykuyogen ken Jesus iti nawadwad metten a tiempo, ket pagaammona unay idan. Kinapudnona, sumagmamano kadakuada dagiti mismo a kabagianna. Ni Santiago ken ni Juan a kabsatna ti kaawatan a kasinsin ni Jesus. Ket mabalin a mapaneknekan a ni Alfeo ket kabsat ni Jose, ti nagsioman ken Jesus. Gapuna dagiti annak ni Alfeo, ni apostol Santiago, ket kasinsin met ni Jesus.

Ni Jesus, siempre, awan parikutna a manglaglagip iti nagan dagiti apostolna. Ngem malagipyo aya ida? Bueno, laglagipenyo laeng nga addada dua nga agnagan Simon, dua nga agnagan Santiago, dua nga agnagan Judas, ket ni Simon adda kabsatna a ni Andres, ket ni Santiago adda kabsatna a ni Juan. Dayta ti tulbek ti pananglaglagip kadagiti walo nga apostol. Dagiti dadduma nga uppat iramanna ti agsingsingir ti buis (Mateo), maysa iti kamaudiananna ti nagduadua (ni Tomas), maysa ti naawagan manipud sirok ti maysa a kayo (ni Nathanael), ken ni gayyemna a Felipe.

Sangapulo ket maysa kadagiti apostol ti taga Galilea, ti teritoria a pagtaengan ni Jesus. Ni Nathanael ti taga Cana. Ni Felipe, Pedro ken ni Andres idi damo ti taga Betsaida. Nupay kasta, ni Pedro ken ni Andres immakarda iti kamaudiananna idiay Capernaum a mabalin a nagtaengan met ni Mateo. Ni Santiago ken ni Juan addada iti trabaho a panagdaklis ket nalabit nagtaengda met idiay wenno iti arubayan ti Capernaum. Agparang a ni Judas Iscariote, nga isu ti nangliput ken ni Jesus iti kamaudiananna, ti kakaisuna nga apostol a taga Judea. Marcos 3:13-19; Lucas 6:12-16.

◆ Ania dagiti apostol a mabalin a kabagian ni Jesus?

◆ Asino dagiti apostol ni Jesus, ket kasanoyo a laglagipen ti nagnaganda?

◆ Manipud sadino a teritoria ti naggapuan ti dadduma kadagiti apostol?

[Ladawan iti panid 9]

Sakbay ti panangpilina kadagiti 12 nga apostolesna, nangbusbos ni Jesus iti intero a rabii a nagkarkararag ken Jehova