Nagaramid Kadagiti Milagro, Ngem Saan a Naawat Uray Idiay Nazaret

Okupado ti aldaw ni Jesus. Kalpasan ti panagdaliasatna manipud Decapolis, inagasanna ti agpadpadara a babai ken pinagungarna ti anak ni Jairo. Ngem adda pay aramidenna iti dayta nga aldaw. Idi pumanawen iti balay ni Jairo, dua a bulsek a lallaki ti simmurot kenkuana. Ipukpukkawda: “Kaasiannakami, Anak ni David.”—Mateo 9:27.

Idi inawaganda ni Jesus nga “Anak ni David,” ipakpakitada a mamatida nga isu ti Mesias ken agtawid iti trono ni David. Mabalin a saan nga inkankano ni Jesus ti pakaasida tapno makitana no napasnekda met laeng. Ngem talaga a napasnekda! Idi simrek ni Jesus iti maysa a balay, simmurot kenkuana ti dua a lallaki. Insaludsod ni Jesus kadakuada: “Mamatikayo kadi a kabaelak nga aramiden daytoy?” Insungbatda: “Wen, Apo.” Idi kuan, sinagid ni Jesus ti matada ket kinunana: “Maaramid ti pinatiyo a mapasamak.”—Mateo 9:28, 29.

Dagus a nakakitada! Kas iti imbilin idin ni Jesus, imbagana a saanda nga ibagbaga ti inaramidna. Ngem gapu iti ragsakda, impadamagda ti maipapan ken Jesus idi agangay.

Idi nakapanawen ti dua a lallaki, impan dagiti tattao ken Jesus ti lalaki a saan a makasao ta naluganan iti demonio. Pinaruar ni Jesus ti demonio ket nakapagsaon ti lalaki. Nasdaaw dagiti tattao. Kinunada: “Saantay pay a nakakita iti kastoy ditoy Israel.” Adda met idi sadiay dagiti Fariseo. Saanda a mailibak dagiti milagro ni Jesus isu nga inakusaranda manen no sadino ti naggapuan ti pannakabalinna: “Parparuarenna dagiti demonio babaen ti panguluen dagiti demonio.”—Mateo 9:33, 34.

Di nagbayag, nagsubli ni Jesus iti ilina a Nazaret a kaduana itan dagiti adalanna. Sadiay, nangisuro idi iti sinagoga agarup makatawen ti napalabasen. Idi damo, nasdaaw dagiti tattao iti imbagana, ngem nasaktanda iti pannursurona idi agangay isu a ginandatda a patayen. Ita, tulongan manen ni Jesus dagiti dati a kaarrubana.

Iti aldaw ti Sabbath, napan manen iti sinagoga tapno mangisuro. Adu ti nasdaaw, ket insaludsodda: “Nangalaan daytoy a tao iti siribna ken pannakabalinna nga agaramid kadagiti milagro?” Kinunada: “Saan aya a daytoy ti anak daydi karpintero? Saan aya a ni Maria ti inana, ket da Santiago, Jose, Simon, ken Judas ti kakabsatna? Saan aya nga agnanaed met ditoy dagiti kabsatna a babbai? Nangalaanna ngarud kadagitoy nga abilidadna?”—Mateo 13:54-56.

Pampanunoten dagiti tattao a ni Jesus ket ordinario laeng a tao. ‘Nasaksianmi ti idadakkelna,’ pampanunotenda, ‘isu a kasano koma nga isu ti Mesias?’ Ngem uray nagadu ti pammaneknek—agraman ti naisangsangayan a sirib ken dagiti milagro ni Jesus—saanda latta nga inawat ken pinati. Gapu ta am-ammoda, naitibkol kenkuana uray dagiti kabagianna isu nga imbagana: “Mapadayawan ti maysa a propeta iti sadinoman ngem saan nga iti ilina ken iti pamiliana.”—Mateo 13:57.

Kinapudnona, nasdaaw ni Jesus ta nakapuy ti pammatida. Gapuna, awanen ti milagro nga inaramidna sadiay no di ti ‘panangpaimbagna iti sumagmamano a masakit babaen ti panangiparabawna iti imana kadakuada.’—Marcos 6:5, 6.