Ti Biag ken Ministerio ni Jesus

Simimilagro a Pinakan ni Jesus ti Rinibo

NARAGSAKAN dagiti 12 nga apostoles iti naisangsangayan a panagdaliasat a panangaskasaba iti intero a Galilea. Itatta, di nagbayag kalpasan ti pannakapapatay ni Juan, nagsublida ken ni Jesus ket insalaysayda dagiti nakaskasdaaw a kapadasanda. Iti pannakakitana a nabannogda ken nakaad-adu a tattao ti um-umay ken mapmapan nga awan payen ti panawenda a mangan, kinuna ni Jesus: ‘Umaykayo a pumakni iti maysa a disso a let-ang ket aginanakay bassit.’

Sisasakayda iti barangay, nalabit iti asideg ti Capernaum, nagturongda iti disso a putputong, a nalawag nga idiay daya ti Jordan iti labes ti Betsaida. Nupay kasta, adu a tattao ti nakakita kadakuada a pumanaw, ket naammuan dagiti dadduma maipapan iti dayta. Amin dagitoy dimtengda nga immun-una iti igid ti baybay, ket idi nga agsadsad ti barangay, addadan idiay tapno sumabat kadakuada.

Iti ididissaagna iti barangay ken pannakakitana ti umariwekwek a tattao, naasian ni Jesus agsipud ta dagiti tattao kasda la karnero nga awan pastorda. Gapuna pinaglaingna dagiti masaksakitda ket rinugianna a sinursuruan ida kadagiti adu a banag.

Napardas a limmabas ti oras, ket dagiti adalan ni Jesus immasidegda kenkuana ket kinunada: “Let-ang daytoy a disso, ket malem unayen. Pagawidem ida, ta mapanda kadagiti aw-away ken purpurok iti kaparanget tapno gumatangda iti kanenda.”

Nupay kasta, iti isusungbatna kinuna ni Jesus: “Ikkanyo ida ti kanen.” Kalpasanna, agsipud ta ammon ni Jesus no ania ti aramidenna, sinuotna ni Felipe babaen iti panagsaludsodna kenkuana: “Adino ti gatangantayo ti tinapay tapno makapangan dagitoy?”

Iti punto de vista ni Felipe ti kasasaad ket imposible. Ta, adda agarup 5,000 a lallaki, ket nalabit nasurok a 10,000 a tattao no ibilang pay ti babbai ken ub-ubbing! “Dua gasut a denario [ti maysa a denario ket katupag idi ti sueldo iti maysa nga aldaw] a tinapay saan nga umanay kadakuada, tapno tunggal maysa kadakuada makapangan bassit,” insungbat ni Felipe.

Nalabit tapno maipakita ti kinaimposible ti panangpakan kadagiti adu, nagboluntario ni Andres: “Adda ditoy ti maysa nga agtutubo a lalaki nga adda lima a tinapayna a sebada ken dua nga ikan,” innayonna: “Ngem aniada dagitoy iti kastoy a kaadu dagiti tattao?”

Gapu ta panawen ti primavera, asidegen ti Paskua iti 32 K.P., naruay dagiti berde a ruot. Gapuna imbilin ni Jesus kadagiti adalanna a pagtugawenda dagiti tattao iti karuotan nga aglalasin iti tunggal 50 ken 100. Ket innalana dagidi lima a tinapay ken dagidi dua nga ikan, timmangad sadi langit, ket binendisionanna ida. Ket rinugianna a pinispisi dagiti tinapay ken ginudgudua dagiti ikan. Intedna dagitoy kadagiti adalanna, nga, isuda met, ti nangted kadagitoy kadagiti tattao. Nakaskasdaaw unay, nangan amin dagiti tattao agingga a nabsogda!

Kalpasanna imbilin ni Jesus kadagiti adalanna: “Urnongenyo dagiti pispisi a natda, tapno awan ti mapukaw.” Idi inaramidda dayta, pinunnoda ti 12 nga alat kadagiti pispisi a natidda dagiti nangan! Mateo 14:13-21; Marcos 6:30-44; Lucas 9:10-17; Juan 6:1-13.

◆ Apay a simmapul ni Jesus iti pribado a lugar para kadagiti apostolesna?

◆ Sadino ti nangipanan ni Jesus kadagiti adalanna, ket apay a napaayda iti panagkasapulanda nga aginana?

◆ Idi mumalemen, aniat’ inkalikagum dagiti apostol, ngem kasanot’ panangaywan ni Jesus kadagiti tattao?