Imposible Daytoy!
“NALAKLAKA a lumsot ti maysa a kamelio iti abut ti maysa a dagum ngem ti maysa a baknang a sumrek iti pagarian ti Dios.” (Mateo 19:24) Kinuna ni Jesu-Kristo daytoy tapno isurona dagiti adalanna iti maysa a leksion. Kalkalpas la unay a nagtukkiadan ti maysa a nabaknang nga agkabanuag nga agturay ti awis nga agbalin a pasurot ni Jesus ket makiraman iti adu a nakaskasdaaw a naespirituan a gundaway. Pinili ti lalaki ti mangsalimetmet iti adu a sanikuana ngem ti sumurot iti Mesias.
Saan nga ibagbaga ni Jesus a naan-anay nga imposible para iti maysa a baknang a tao ti makagun-od iti biag nga agnanayon iti urnos ti Pagarian, ta sumagmamano a nababaknang ti nagbalin a pasurotna. (Mateo 27:57; Lucas 19:2, 9) Nupay kasta, imposible daytoy para iti asinoman a baknang nga addaan iti dakdakkel nga ayat kadagiti sanikuana ngem kadagiti naespirituan a bambanag. Ti laeng panagbalin a sipupuot kadagiti naespirituan a kasapulanna ken panangbiruk iti nadiosan a tulong a mabalinan dayta a tao ti umawat iti inted-Dios a pannakaisalakan.—Mateo 5:3; 19:16-26.
Ti ilustrasion ti kamelio ken ti abut ti dagum ti saan koma nga alaen a literal. Us-usaren ni Jesus ti hyperbole tapno ipaganetgetna ti kinarikut a sangsanguen dagiti nabaknang a tao a mayat a mangay-ayo iti Dios bayat a taginayonenda ti nabaknang, materialistiko nga estilo ti panagbiag.—1 Timoteo 6:17-19.
Kunaen ti dadduma a ti abut ti dagum ket maysa a bassit a ruangan iti bakud ti maysa a siudad a sadiay narigat nga aglasat ti maysa a kamelio no maidissaag dagiti kargana. Ngem ti Griego a sao a rha·phisʹ, a naipatarus a “dagum” idiay Mateo 19:24 ken Marcos 10:25, aggapu iti maysa a verbo a kaipapananna “agdait.” Idiay Lucas 18:25 ti termino a be·loʹne kayuloganna ti pagdait a dagum, ket sadiay mabasa iti New World Translation: “Nalaklaka, kinapudnona, para iti maysa a kamelio ti sumrek iti mata iti pagdait a dagum ngem iti baknang a sumrek iti pagarian ti Dios.” Suportaran dagiti nagduduma nga autoridad daytoy a patarus. Kunaen ni W. E. Vine: “Agparang a moderno ti kapanunotan ti panangiyaplikar ‘ti mata ti dagum’ kadagiti bassit a ruangan; awan ti kadaanan a pangtuntonan iti dayta.”—An Expository Dictionary of New Testament Words.
Ti maysa a dakkel a kamelio a mangikarkarigatan a lumsot iti abut ti maysa a bassit a pagdait a dagum ket maysa a “pangarigan ti kinaaglablabes iti Dumaya,” kuna ti maysa a pagreperensiaan. Ket maipapan iti dadduma a nasaldet unay ta kas ket tay maaramidanda ti imposible, kunaen ti The Babylonian Talmud: “Guyodenda ti elepante iti abut ti dagum.” Nagusar ni Jesus iti gagangay a hyperbole ken napatak a panamaggiddiat tapno maipaganetget ti kinaimposible. Imposible para iti kamelio, wenno elepante, a sumrek iti abut ti pagdait a dagum. Nupay kasta, babaen ti nadiosan a tulong, mabalin a panawan ti maysa a baknang ti materialistiko a panangmatmat ken pudpudno a mabirukanna ti biag nga agnanayon. Kasta met dagiti amin nga addaan iti naimpusuan a tarigagay a mangadal ken mangaramid iti pagayatan ti Kangatuan a Dios, ni Jehova.