LEKSION 54
Ti Papel “ti Matalek ken Masirib nga Adipen”
Ni Jesus ti Ulo ti kongregasion Kristiano. (Efeso 5:23) Manipud langit, idaldalan ita ni Jesus dagiti pasurotna ditoy daga babaen ti “matalek ken masirib nga adipen.” (Basaen ti Mateo 24:45.) Inapointaran ni Jesus dayta nga “adipen” ken inikkanna iti autoridad nga agaramid kadagiti desision. Ngem masapul latta nga agtulnog dayta nga adipen ken Kristo ken agserbi kadagiti kakabsat ni Kristo. Asino dayta nga adipen? Kasano ti panangaywanna kadatayo?
1. Asino ti “matalek ken masirib nga adipen”?
Kanayon a nagusar ni Jehova iti maysa a lalaki wenno bassit a grupo dagiti lallaki a mangidalan kadagiti agserserbi kenkuana. (Malakias 2:7; Hebreo 1:1) Kalpasan ti ipapatay ni Jesus, dagiti apostol ken panglakayen idiay Jerusalem ti nangidaulo. (Aramid 15:2) Kasta met laeng ita. Adda bassit a grupo dagiti panglakayen a maawagan iti Bagi a Manarawidwid dagiti Saksi ni Jehova a mangipapaay kadagiti naespirituan a taraon ken mangiturturong iti trabaho a panangasaba. Dayta a grupo ket “ti matalek ken masirib nga adipen a dinutokan [ni Jesus].” (Mateo 24:45a) Amin a miembro ti Bagi a Manarawidwid ket Kristiano a dinutokan ti espiritu. Inton agpatingga ti biagda ditoy daga, makipagturaydanto ken Kristo iti Pagarianna idiay langit.
2. Ania a naespirituan a taraon ti ipapaay ti matalek nga adipen?
Imbaga ni Jesus a ti matalek nga adipen “ipaayna ti taraon [dagiti padana a Kristiano] iti umiso a tiempo.” (Mateo 24:45b) Makatulong ti taraon a kankanentayo tapno agbalintayo a napigsa ken nasalun-at. Kasta met laeng dagiti naespirituan a taraon—dagiti instruksion a naggapu iti Sao ti Dios. Mangted dagita iti bileg a kasapulantayo tapno makapagtalinaedtayo a matalek ken Jehova ken maaramidtayo ti trabaho nga inted ni Jesus kadatayo. (1 Timoteo 4:6) Maaw-awattayo dagita a naespirituan a taraon babaen kadagiti gimong, asamblea, ken kombension, kasta met kadagiti naibatay iti Biblia a publikasion ken video a makatulong kadatayo a mangammo iti pagayatan ti Dios ken mangpabileg iti pannakigayyemtayo kenkuana.
AMMUEM TI AD-ADU PAY
Kitaem no apay a kasapulantayo ti “matalek ken masirib nga adipen” wenno ti Bagi a Manarawidwid.
Mangipapaay ti Bagi a Manarawidwid kadagiti naespirituan a taraon, instruksion, ken tulong para kadagiti Saksi ni Jehova iti intero a lubong
3. Masapul nga organisado ti ili ni Jehova
Idaldalan ni Jesus ti Bagi a Manarawidwid a mangorganisar iti trabaho dagiti Saksi ni Jehova. Kasta met laeng idi ti panangidalanna kadagiti immuna a Kristiano. I-play ti VIDEO.
Basaen ti 1 Corinto 14:33, 40, sa pagsaritaan daytoy a saludsod:
Kasano nga ipakita dagitoy a bersikulo a kayat ni Jehova nga organisado dagiti Saksina?
4. Or-organisaren ti matalek nga adipen ti trabahotayo a panangasaba
Ti panangasaba ti kapatgan idi a trabaho dagiti immuna a Kristiano. Basaen ti Aramid 8:14, 25, sa pagsaritaan dagitoy a saludsod:
Asino idi ti mangidadaulo iti trabaho a panangasaba dagiti immuna a Kristiano?
Ania ti inaramid da Pedro ken Juan idi nakaawatda iti instruksion manipud kadagiti padada nga apostol?
Ti panangasaba ti kapatgan a trabaho nga or-organisaren ti Bagi a Manarawidwid. I-play ti VIDEO.
Impakita ni Jesus a nakapatpateg ti panangasaba. Basaen ti Marcos 13:10, sa pagsaritaan dagitoy a saludsod:
Apay a nakapatpateg ti trabaho a panangasaba para iti Bagi a Manarawidwid?
Apay a kasapulantayo “ti matalek ken masirib nga adipen” a mangorganisar iti daytoy a trabaho a maar-aramid iti intero a lubong?
5. Mangipapaay ti matalek nga adipen kadagiti instruksion
Mangipapaay ti Bagi a Manarawidwid kadagiti instruksion para kadagiti Kristiano iti intero a lubong. Kasano a makabukel kadagiti instruksion nga itedna? Kitaem no kasano nga inaramid dayta ti bagi a manarawidwid idi panawen dagiti immuna a Kristiano. Basaen ti Aramid 15:1, 2, sa pagsaritaan dagitoy a saludsod:
Ania idi nga isyu ti nagriririan ti dadduma nga immuna a Kristiano?
Asino idi ti nagpatulongan da Pablo, Bernabe, ken ti dadduma pay tapno masolbar ti isyu?
Basaen ti Aramid 15:12-18, 23-29, sa pagsaritaan daytoy a saludsod:
Sakbay idi a desisionan dagiti miembro ti bagi a manarawidwid ti maysa a banag, ania ti aramidenda tapno masiguradoda nga idalan ida ti Dios?—Kitaen ti bersikulo 12, 15, ken 28.
Basaen ti Aramid 15:30, 31 ken 16:4, 5, sa pagsaritaan dagitoy a saludsod:
Ania ti inaramid dagiti immuna a Kristiano idi nakaawatda iti instruksion ti bagi a manarawidwid?
Kasano a binendisionan ni Jehova ti kinatulnogda?
Basaen ti 2 Timoteo 3:16 ken Santiago 1:5, sa pagsaritaan daytoy a saludsod:
Asino ti pagpapaiwanwanan ti Bagi a Manarawidwid ita no agaramid kadagiti desision?
KUNA TI DADDUMA: “Apay koma a surotem ti Bagi a Manarawidwid ket taoda lang met?”
Apay a patiem a ni Jesus ti mangiturturong iti Bagi a Manarawidwid?
SUMARIO
Ti Bagi a Manarawidwid ket “ti matalek ken masirib nga adipen” nga inapointaran ni Kristo. Mangipapaay ti Bagi a Manarawidwid kadagiti instruksion ken naespirituan a taraon kadagiti Kristiano iti intero a lubong.
Rebiu
Asino ti nangdutok iti “matalek ken masirib nga adipen”?
Kasano ti panangaywan kadatayo ti Bagi a Manarawidwid?
Patiem kadi a ti Bagi a Manarawidwid ket “ti matalek ken masirib nga adipen”?
AGDISKOBREKA PAY
Kitaem no kasano a maor-organisar ti Bagi a Manarawidwid tapno maaramidna ti trabahona.
“Ania ti Bagi a Manarawidwid Dagiti Saksi ni Jehova?” (Artikulo iti website)
Ammuem no kasano a sigsiguraduen ti Bagi a Manarawidwid a mapagtalkan dagiti maaw-awattayo a naespirituan a taraon.
Panagaramid Kadagiti Publikasion nga Umiso ti Linaonna (17:18)
Ania ti marikrikna dagiti miembro ti Bagi a Manarawidwid maipapan iti trabaho nga inted ni Jesus kadakuada?
Kasano nga ipakita dagiti gimong ken kombensiontayo nga iturturong ni Jehova ti Bagi a Manarawidwid?