Ipakpakitayo Kadi a Managyamankayo?

Iti maysa a pagtaengan dagiti misionero idiay West Africa, adda idi maysa nga aso a para bantay nga agnagan teddy. No adda mangipalladaw ken teddy iti karne, sakmalenna a dagus, a dina nanamen, ngalngalen. Agal-al-al iti kainitan nga agur-uray iti sumaruno a makan a maipalladaw iti dalanna. No awanen ti karne, pumanawen.

Pulos a di man la nagyaman ni teddy iti naited kenkuana. Awan ti mangnamnama nga aramidenna dayta. Total, maysa laeng nga aso.

NO MAIPAPAN iti panagyaman, masansan nga ad-adu ti namnamaentayo kadagiti padatayo a tattao ngem kadagiti animal. Masansan a mapaaytayo. Adu a tattao ti manggammat iti aniaman a banag a maalada iti biag ket agsapulda iti ad-adu pay. Saan met a makapasiddaaw daytoy. Impakpakauna ti Biblia a kadagiti maudi nga al-aldaw, awanan panagyaman dagiti tattao.​—2 Timoteo 3:1, 2.

Nupay kasta, naiduma ti kababalin dagiti adipen ti Dios. Ipapusoda ti balakad ni apostol Pablo, a namagbaga kadagiti padana a manamati: “Ipakitayo a managyamankayo.”​—Colosas 3:15.

Managyaman ni Jehova

Impaay ni Jehova a Dios ti perpekto nga ulidan iti panangipakita iti apresasion. Usigenyo no kasano ti panangmatmatna kadagiti matalek nga adipenna. Napaltiingan nga insurat ni Pablo kadagiti Hebreo a Kristiano: “Saan a nakillo ti Dios tapno lipatenna ti aramidyo ken ti ayat nga impakitayo iti naganna, iti panagserbiyo kadagiti sasanto ken agtultuloykayo nga agserserbi.”​—Hebreo 6:10.

Nawadwad dagiti ehemplo ti panangapresiar ni Jehova kadagiti matalek nga adipenna. Binendisionanna ni Abraham babaen ti panangpaaduna kadagiti literal a kaputotanna, iti kasta nagbalinda a “kas kadagiti bitbituen ti langit, ken kas iti darat nga adda iti igid ti baybay.” (Genesis 22:17) Kas panangapresiar iti kinamatalek ni Job iti sidong ti pakasuotan, saan laeng nga insubli ni Jehova ti dakkel a kinabaknang ni Job no di pay ket intedna ti “mamindua.” (Job 42:10) Ti pannakilangen ni Jehova kadagiti tattao iti las-ud dagiti milenio paneknekanda ti kinapudno ti sasao a: “Dagiti mata ni Jehova mapanda nga agsublisubli iti amin a lubong, tapno isu agparang a napigsa a bumadang kadagidiay a ti pusoda napalungdo a maiturong kenkuana.”​—2 Cronicas 16:9.

Ti panangapresiar ken tarigagay ti Dios a manggunggona kadagidiay mangar-aramid iti pagayatanna ket karaman kadagiti kangrunaan a paset ti personalidadna. Nasken iti Nakristianuan a pammati ti panangbigbig iti daytoy. Insurat ni Pablo: “No awan ti pammati isu di mabalin nga ay-aywen unay, ta ti umadani iti Dios masapul a patienna nga . . . isu agbalin a mananggunggona kadagidiay sipapasnek a mangsapsapul kenkuana.”​—Hebreo 11:6.

No naulpit ken manangbabalaw ni Jehova, nakondenartay koma aminen. Idi un-unana, kastoy ti kinuna ti salmista: “No sika, O Jehova,mingmingam koma dagiti kinadangkes, O Apo, siasino koma ti makapagtakder?” (Salmo 130:3) Saan a narigat a pagustuan wenno manangbabalaw ni Jehova. Ipatpategna dagidiay agserserbi kenkuana. Isu ket managyaman.

Ni Jesus​—Managyaman Unay a Tao

Naan-anay a mangyanninaw kadagiti galad ti nailangitan nga Amana, impakita ni Jesu-Kristo ti panagyamanna kadagiti inaramid dagiti sabsabali nga addaan pammati. Usigenyo ti napasamak naminsan iti templo sadi Jerusalem: “Itan idi a timmaliaw [ni Jesus] nakitana dagiti nabaknang a mangipispisok kadagiti sagutda kadagiti baul ti gameng. Kalpasanna nakitana ti maysa a marigrigat a balo a nangipisok sadiay iti dua a babassit a sinsilio a bassit unay ti pategna, ket kinunana: ‘Ibagak kadakayo a sipupudno, Daytoy a balo, nupay napanglaw, nangipisok iti ad-adu ngem iti isuda amin. Ta amin dagitoy nangipisokda iti sagsagut manipud kadagiti teddada, ngem daytoy a babai manipud iti panagkasapulanna impisokna ti isuamin a pagbiag nga adda kenkuana.’”​—Lucas 21:1-4.

No gatad ti pagsasaritaan, bassit ti abuloyna, nangruna no idilig iti inyabuloy dagiti nabaknang. Isu ket saan a nadlaw ti kaaduan kadagidiay adda sadiay. Ngem nakita ni Jesus dayta a balo. Naawatanna ti kasasaadna. Nakita ni Jesus ken inapresiarna ti inaramidna.

Adda sabali pay a pasamak a nakainaigan ti maysa a nabaknang a babai, ni Maria. Bayat a nakasadag ni Jesus iti panganan, nangibukbok ni Maria iti nangina unay a nabanglo a lana kadagiti saka ken iti ulo ni Jesus. Binabalaw dagiti dadduma ti inaramidna, nga inkalinteganda a nailako koma ti lana ket mausar ti kuarta a pangtulong kadagiti napanglaw. Ania ti insungbat ni Jesus? Kinunana: “Baybay-anyo. Apay a padasenyo a riribuken? Inaramidna kaniak ti maysa a nasayaat nga aramid. Pudno kunak kadakayo, Sadinoman a ti naimbag a damag maikaskasaba iti isuamin a lubong, ti inaramid daytoy a babai maisaritanto met kas pakalaglagipan kenkuana.”​—Marcos 14:3-6, 9; Juan 12:3.

Saan a nagreklamo ni Jesus ta sabali ti nakausaran ti napateg a lana. Inapresiarna ti naparabur nga ebkas ti ayat ken pammati ni Maria. Nailanad iti Biblia daytoy a pagteng kas pakalaglagipan iti naimbag nga inaramidna. Ipakita dagitoy a salaysay ken dadduma pay a ni Jesus ket managyaman unay a tao.

No maysaka nga adipen ti Dios, masiguradom nga apresiaren unay ni Jehova a Dios ken ni Jesu-Kristo ti panangikagumaam a mangitandudo iti nasin-aw a panagdayaw. Ti kasta a pannakaammo iyadaninatayo kadakuada ken tignayennatay a mangtulad kadakuada babaen ti panagbalintayo a managyaman.

Ti Kinamanangbabalaw ni Satanas

Ita usigentayo ti ehemplo ti maysa nga awanan panagyaman​—ni Satanas a Diablo. Ti kinaawan panagyaman ni Satanas ti nangituggod kenkuana a mangyussuat iti nakaam-amak nga iyaalsa iti Dios.

Idi nakaramuten kenkuana ti nakaro nga espiritu ti kinaawan pannakapnek, inrugi ni Satanas nga imula dayta kadagiti sabsabali. Usigenyo dagiti pasamak idiay minuyongan ti Eden. Naparsua idin ni Jehova ti immuna a lalaki ken babai, insaadna ida iti paraiso a minuyongan, ken imbilinna kadakuada: “Kadagiti amin a kayo iti minuyongan mangankanto a siwayawaya.” Adda maysa laeng a maiparit. Kinuna ti Dios: “Ngem ti aggapu iti kayo ti pannakaammo ti imbag ken ti dakes saanmonto a kanen: ta iti aldaw a pannanganmo iti daydiay mataykanto a di bumurong.”​—Genesis 2:16, 17.

Ngem di nagbayag, kinarit ni Satanas ti kredibilidad ni Jehova. Kayatna a pagbalinen ni Eva nga awanan panagyaman ken Jehova, iti kasta matignay nga umalsa kenkuana, kas iti iyaalsa ni Satanas a mismo. “Pudno aya a kinuna ti Dios, Saankay a mangan iti amin a kayo iti minuyongan?” insaludsod ni Satanas. (Genesis 3:1) Nalawag nga impasimudaagna nga adda napateg a banag nga ipapaidam ti Dios ken Eva, banag a manglukat kadagiti matana ken mamagbalin kenkuana a kas iti Dios a mismo. Imbes nga agyaman kadagiti adu a bendision nga imburay ni Jehova kenkuana, rinugian ni Eva a kinalikaguman daydiay naiparit.​—Genesis 3:5, 6.

Pagaammotayo dagiti nakaam-amak a bungana. Nupay napanaganan iti Eva “gapu ta isu ti ina dagiti isuamin a nabiag,” iti sabali nga anag, nagbalin nga ina dagiti isuamin a matay. Manipud ken Adan, natawid amin a tattao ti basol a mangibunga iti ipapatay.​—Genesis 3:20; Roma 5:12.

Tuladenyo ti Dios ken ni Kristo

Usigenyo ti naggidiatan da Satanas ken ni Jesus. Nadeskribir ni Satanas kas “manangidarum kadagiti kakabsattayo . . . , isu a mangidardarum kadakuada iti aldaw ken rabii iti sanguanan ti Diostayo.” (Apocalipsis 12:10) Ni Jesus “kabaelanna met nga isalakan a naan-anay dagidiay umadani iti Dios baeten kenkuana, agsipud ta isu kankanayon a sibibiag tapno agdawat maipaay kadakuada.”​—Hebreo 7:25.

Idardarum ni Satanas dagiti adipen ti Dios. Ipatpateg ida ni Jesus ken idawdawatanna ida. Kas tumutulad ken Kristo, ikagumaan koma dagiti Kristiano a kitaen ti naimbag iti maysa ken maysa, nga agiinnapresiar ken agpipinnategda. Iti panangaramidda iti dayta, ipakpakitada ti panagyamanda iti daydiay kasayaatan a pagwadan iti kinamanagyaman, ni Jehova a Dios.​—1 Corinto 11:1.

[Ladawan iti panid 17]

Inapresiar ni Jesus ti naimbag nga inaramid ni Maria