KULLUONG, KUADRA

Naipaidda ti maladaga a ni Jesus iti kulluong ket nakita sadiay dagiti pastor, a kadakuada nga impakaammo dagiti anghel ti maipapan iti pannakayanakna. (Lu 2:7, 12, 16) Ti Griego a sao maipaay iti “kulluong” iti daytoy a kaso ket phatʹne, kaipapananna ti “pagpakanan.” Ti phatʹne mabalin met nga agaplikar iti kuadra a pakaipupokan dagiti animal. (Idiligyo ti Lu 13:15.) Ti Hebreo a termino nga ʼe·vusʹ kaaduanna a naitarusan a kaipapananna ti “kulluong” ken naipatarus a phatʹne iti Griego a Septuagint, kas iti tallo a dadduma pay a Hebreo a sao a naipatarus a “kuadra” (2Cr 32:28), “alug-og” (Hab 3:17), ken ‘taraon’ (Job 6:5).

Idiay Palestina, nakasarak dagiti arkeologo iti dadakkel a kulluong a naikungkong iti apug a bato ken addaanda iti rukod nga agarup 0.9 m (3 pie) a kaatiddog, 0.5 m (1.5 pie) a kaakaba, ken 0.6 m (2 pie) a kauneg. Pagarupen a nagpaay dagitoy kas pagpakanan. Kas kadagiti naglabas a tiempo, dagiti kulluong ket mabalin a naikungkong iti bato a diding dagiti rukib a nakailinongan dagiti animal.