Nagsubli ti Napukaw nga Anak

Mabalin nga adda pay laeng ni Jesus idiay Perea iti daya ti Karayan Jordan idi imbagana ti ilustrasion maipapan iti napukaw a karnero ken ti napukaw a sinsilio a drakma. Ti mensahe nga isuro dagitoy ket rumbeng a maragsakantayo no agbabawi ken agsubli iti Dios ti maysa a managbasol. Dagiti Fariseo ken eskriba babbabalawenda ni Jesus gapu ta inawatna dagitoy. Ngem nakasursuro ngata dagitoy a manangbabalaw iti dua nga ilustrasion ni Jesus? Natarusanda ngata ti rikna ti Amatayo idiay langit no agbabawi dagiti managbasol? Nangted ni Jesus iti makatukay nga ilustrasion a mangipaganetget iti isu met laeng a napateg a leksion.

Maipapan daytoy iti ama nga addaan iti dua nga annak a lallaki. Ti inaudi ti kangrunaan a karakter iti ilustrasion. Adda koma masursuro dagiti Fariseo ken eskriba, agraman ti dadduma a dumdumngeg ken Jesus, iti maipapan iti inaudi nga anak. Ngem makasursurotayo met iti salaysay ni Jesus maipapan iti kababalin ti ama ken ti inauna nga anak. Panunotentayo ngarud dagitoy a tattao bayat nga ibaga ni Jesus ti ilustrasion:

“Adda maysa a tao a dua ti annakna a lallaki,” kinuna ni Jesus. “Kinuna ti inaudi, ‘Tatang, itedmo kaniakon ti tawidko.’ Isu a biningayna dagiti sanikuana nga ipatawidna iti dua nga annakna.” (Lucas 15:​11, 12) Paliiwenyo ta kayat nga alaen ti inaudi ti tawidna uray sibibiag pay ni amana. Kayatna itan nga alaen ti tawidna tapno agbiag a bukodna ken maaramidna ti kaykayatna. Ania ti kayatna a mapasamak?

Kinuna ni Jesus: “Kalpasan ti sumagmamano nga aldaw, innala ti inaudi ti amin a tawidna ket napan iti adayo a pagilian, ken ginastona ti amin a kuartana gapu iti naluho a panagbiag.” (Lucas 15:13) Saan a nagtalinaed daytoy nga anak iti pagtaenganda, a kaduana koma ti naasikaso nga amana ken mangipapaay iti kasapulanda. Imbes ketdi, napan iti sabali a pagilian. Ginastona sadiay ti amin a tawidna iti immoral a panagbiag ken panagragragsak. Kalpasanna, rimmigat ti panagbiagna, kas kinuna ni Jesus:

“Idi naibusen ti amin a kuartana, dimteng ti nakaro a bisin iti intero a pagilian, ket nangrugin nga agrigat. Napan pay ketdi nagtrabaho iti maysa kadagiti umili iti pagilian, a nangibaon kenkuana iti away tapno agtaraken kadagiti baboy. Kayatna payen ti mangan iti kankanen dagiti baboy, ngem awan met ti mangted kenkuana.”​—Lucas 15:​14-16.

Ibilang ti Linteg ti Dios a narugit dagiti baboy, ngem nagtrabaho daytoy nga anak kas agtartaraken iti baboy. Gapu iti bisinna, kayatna payen ti mangan iti kankanen laeng dagiti animal, dagiti tartaraknenna a baboy. Gapu iti rigatna, “nakapagpampanunot.” Ania ti inaramidna? Kinunana: “Agsobsobra ti kanen ti amin a trabahador ni amak idinto nga addaak ditoy a matmatayen iti bisin! Agawidakon ken amak ket ibagakto kenkuana: ‘Tatang, nakabasolak iti Dios ken uray kenka. Saanakon a maikari a maawagan iti anakmo. Pagbalinennak laengen a maysa kadagiti trabahadormo.’” Isu a nagsubli ken amana.​—Lucas 15:​17-20.

Ania ngata ti aramiden ti amana? Makapungtot kadi iti anakna ket ungtanna gapu ta pimmanaw iti pagtaenganda? Awaten ngata ti ama? No sika koma ti ama, ania ti aramidem? Kasano ngay no anakmo dayta?

Insalaysay ni Jesus ti rikna ken inaramid ti ama: “Uray adayo pay laeng [ti anak], nakitan ni amana ket naasian unay, isu a timmaray a simmabat. Inarakupna ti anakna ket sidudungngo nga inagkanna.” (Lucas 15:20) Nupay naammuan ti ama ti dakes a panagbiag ti anakna, inawatna ti anakna. Makita ngata dagiti Judio a lider ti relihion, nga agkunkuna a makaam-ammo ken agdaydayaw ken Jehova, no kasano a matmatan ti nailangitan nga Amatayo dagiti agbabbabawi a managbasol? Mabigbigda met ngata nga awaten ni Jesus dagita a tattao?

Mabalin a makita ti mannakaawat nga ama iti naliday a langa ti anakna nga isu ket talaga nga agbabbabawi. Nupay kasta, ti naayat a panangawat ti ama ti mangtignay iti anak a mangipudno kadagiti basolna. Insalaysay ni Jesus: “Kinuna kenkuana ti anak, ‘Tatang, nakabasolak iti Dios ken uray kenka. Saanakon a maikari a maawagan iti anakmo.’”​—Lucas 15:21.

Imbilin ti ama kadagiti adipenna: “Darasenyo! Mangiruarkayo iti bado, daydiay kasayaatan, ket ikawesyo kenkuana, ket mangikabilkayo iti singsing iti ramayna ken mangisuotkayo iti sandalias kadagiti sakana. Inkay met alaen ti napalukmeg nga urbon a baka, partienyo ket mangan ken agrambaktayo, ta natay daytoy nga anakko ngem nagungar; napukaw ngem nabirokan met laeng. Ket nagragragsakda.”​—Lucas 15:​22-24.

Adda pay idi iti talon ti inauna nga anak. Kinuna ni Jesus maipapan kenkuana: “Idi agawid ti inauna nga anakna manipud iti talon ken asidegen iti balay, nakangngeg iti tokar ken panagsasala. Inayabanna ti maysa kadagiti adipen ket dinamagna no ania ti mapaspasamak. Insungbat ti adipen, ‘Nagsublin ti kabsatmo, ket gapu ta simmangpet a nasalun-at, impaparti ni amam ti napalukmeg nga urbon a baka.’ Ngem nakapungtot ti inauna ken saan a simrek, isu a rimmuar ti amana ket inay-ayona. Kinunana ken amana, ‘Adun a tawen nga agserserbiak kenka ken uray naminsan, diak sinukir dagiti bilinmo, ngem dinak man la pulos inikkan iti uray maysa nga urbon a kalding a pagsasanguanmi kadagiti gagayyemko. Ngem apaman a simmangpet ti anakmo a nangibus iti sanikuam kadagiti balangkantis, impartiam iti napalukmeg nga urbon a baka.’”​—Lucas 15:​25-30.

Asino ti kas iti inauna nga anak a mangbabbabalaw iti asi ken pannakilangen ni Jesus kadagiti gagangay a tattao ken managbasol? Dagiti eskriba ken Fariseo. Imbaga ni Jesus daytoy nga ilustrasion gapu ta babbabalawenda ti pannakilangenna kadagiti managbasol. Siempre, asinoman a mangbabalaw iti panangipakita ti Dios iti asi masapul a makasursuro koma iti daytoy.

Impatingga ni Jesus ti ilustrasionna babaen ti panangibagana iti imbaga ti ama iti inauna nga anak: “Anakko, kanayon nga addaka iti dennak, ket kukuam ti amin a kukuak. Ngem masapul nga agrambak ken agragragsaktayo, ta natay ti kabsatmo ngem nagungar; napukaw ngem nabirokan met laeng.”​—Lucas 15:​31, 32.

Saanen nga imbaga ni Jesus no ania ti inaramid ti inauna kalpasanna. Nupay kasta, kalpasan ti ipapatay ken panagungar ni Jesus, “maysa a dakkel a bunggoy ti papadi ti nangrugi nga agtulnog iti pammati.” (Aramid 6:7) Mabalin a nairaman kadagitoy ti dadduma a nakangngeg iti ilustrasion maipapan iti anak a napukaw. Wen, uray dagitoy ket posible a makapagpanunot, agbabawi, ken agsubli iti Dios.

Manipud idin, kabaelan ken masapul nga ipapuso dagiti adalan ni Jesus dagiti kangrunaan a leksion a maadal iti daytoy a nagsayaat nga ilustrasion. Ti umuna a leksion ket talaga a nagsayaat ti agtalinaed iti ili ti Dios nga iwanwanwan ti Amatayo a mangay-ayat ken mangipapaay iti kasapulantayo, imbes a pumanawtayo gapu kadagiti makaawis a ragragsak iti “adayo a pagilian.”

Ti maysa pay a leksion ket no adda asinoman nga umadayo iti Dios, masapul a sipapakumbaba nga agsubli iti Amatayo tapno matagiragsakna manen ti bendision ti Dios.

Ti sabali pay a leksion ket ti nagdumaan ti manangpakawan a kababalin ti ama ken ti makapungtot ken saan a panangawat ti inauna nga anak. Nalawag a masapul koma a manangpakawan dagiti adipen ti Dios ken awatenda ti asinoman a napukaw a pudno nga agbabawi ken agsubli ‘iti balay ti Ama.’ Maragsakantayo koma no ti kabsattayo a ‘natay ket nagungar’ ken “napukaw ngem nabirokan.”