Ti Kadi Pagarian ti Dios Adda Laeng iti Puso?

“Umay ti Pagarian ti Dios iti managimdeng a puso,” kinuna ni Papa Benedict XVI iti librona a napauluan iti Jesus of Nazareth. Para iti dadduma, kasta laeng ti kaipapanan ti Pagarian ti Dios​—maysa a panagbalbaliw a mapasamak iti maysa a tao no awaten ken patienna ni Jesu-Kristo. Ti kadi Pagarian ti Dios ket maysa laeng a personal a panagbalbaliw, maysa a pagarian nga ‘adda laeng iti pusom’?

TALAGA a napateg ken Jesus ti Pagarian ti Dios. Ti Pagarian ti “nakaisentruan ti panangasaba ni Jesus,” kinuna ni Papa Benedict. Bayat ti ababa a ministeriona, nawatiwat ti dinaliasat ni Jesus a “nangikaskasaba iti naimbag a damag ti pagarian.” (Mateo 4:23) Babaen iti pannursurona ken dagiti milagro nga inaramidna, imbatad ni Jesus a ti Pagarian ket saan laeng a basta panangawat ken panagtulnog iti Dios. Nainaig met dayta iti turay, panangukom, ken dagiti agnanayon a bendision.

Turay ken Panangukom

Naminsan, bayat dagiti maudi nga aldaw ti ministerio ni Jesus, kinuna kenkuana ti ina dagiti nasinged nga adalanna a da Santiago ken Juan: “Itedmo ti bilin a dagitoy dua nga annakko agtugawda, maysa iti makannawanmo ken maysa iti makannigidmo, idiay pagariam.” (Mateo 20:21) Nabatad a saanna a tuktukoyen ti banag nga adda laeng iti puso dagiti annakna. Ammona a ti Pagarian ket mainaig iti panagturay ni Jesus, ket kayatna nga adda akem dagiti annakna iti dayta. Kinapudnona, inkari ni Jesus kadagiti 11 a matalek nga apostolna a makiramandanto iti Pagarianna ken ‘agtugawdanto kadagiti trono’ ken ‘mangukomda’ a kaduana. (Lucas 22:30) No kasta, para kadagiti pasurot ni Jesus, ti Pagarian ket maysa a pudpudno a turay​—maysa nga administrasion wenno gobierno.

Dagiti ngay kaaduan a tattao idi kaaldawan ni Jesus? Ti kadi natarusanda a kaipapanan ti Pagarian ket personal laeng a panagbalbaliw, wenno adda pay sabali a namnamaenda? Sakbay la unay ti Paskua idi 33 K. P. bayat a sumsumrek ni Jesus iti Jerusalem a nakasakay iti asno, sinabet ti bunggoy ti tattao ket impukkaw ti dadduma: “Mangisalakanka, ikararagmi, iti Anak ni David!” (Mateo 21:9) Apay a kasta ti ipukpukkawda? Awan duadua a nabigbigda a ni Jesus ti naikari a Mesias ken itedto kenkuana ti Dios ti agnanayon a Pagarian, “ti trono ni David nga amana.” Tartarigagayanda ti pannakaisalakan, talna, ken kinahustisia nga iyeg ti Pagarian.​—Lucas 1:32; Zacarias 9:9.

Dagiti Agnanayon a Bendision

Uray dagiti tattao a saan unay nga interesado iti ministerio ni Jesus ammoda ti maysa kadagiti pannursurona. Idi nailansa ni Jesus, impakaasi kenkuana ti kriminal nga adda iti sibayna: “Laglagipennak inton makagtengka iti pagariam.” Ania ti sungbat ni Jesus? “Makikaduakanto kaniak idiay Paraiso,” impanamnamana iti matmatayen a lalaki.​—Lucas 23:42, 43.

Nabatad a namati ti mannanakaw a kalpasan a mapagungar ni Jesus, awaten wenno iturayannanto ti maysa a Pagarian. Adda autoridad ni Jesus a mangpagungar ken mangbalbaliw iti dayta a lalaki​—agraman ti minilion a dadduma pay​—ket tarigagayanna met nga aramiden dayta. Wen, ni Jesus a nadutokan nga Agturay kadagiti espiritu, iyegnanto dagiti agnanayon a bendision iti amin a tattao iti intero a daga babaen iti Pagarian.​—Juan 5:28, 29.

Ti Pagarian Adda iti Tengngada

Saan kadi a kinuna ni Jesus: “Ti pagarian ti Dios adda iti tengngayo”? Wen, masarakan dayta a sasao ni Jesus iti Lucas 17:21. Iti kinapudnona, kuna ti sumagmamano a bersion ti Biblia a “ti pagarian ti Dios adda iti unegyo,” idinto ta ti dadduma aramatenda ti sasao nga “adda kadakayo.” (Kas pagarigan, kitaem Ti Biblia ken ti Naimbag a Damag Biblia.) Ania ti kayat a sawen ni Jesus iti dayta?

Ipakita ti konteksto a dagiti Fariseo ti pangibagbagaan ni Jesus kadagitoy a sasao. Dayta a relihioso a grupo dagiti Judio a bumusbusor kenkuana ket adda bukodda a panangmatmat iti Mesias ken iti Pagarianna. Para kadakuada, umay ti Mesias “buyogen dagiti ulep iti langlangit” kas nadayag nga Ari, tapno isalakanna dagiti Judio iti turay dagiti Romano ken isublina ti pagarian ti Israel. (Daniel 7:13, 14) Ngem imbatad ni Jesus ti biddutda a kunkunana: “Ti pagarian ti Dios saan nga umay a buyogen ti nakadkadlaw a pannakapaliiw.” Sana innayon dagiti sasao nga: “Adtoy! ti pagarian ti Dios adda iti tengngayo.”​—Lucas 17:20, 21.

Bayat nga insuro ni Jesus ti Pagarian ken nagaramid kadagiti milagro, ad-adda a naipabigbig nga isu ti naikari nga Ari dayta a Pagarian, ngem ad-adda met a binusor dagiti aginsisingpet ken awanan pammati a Fariseo. Pinagduaduaanda a ni Jesus ti Mesias. Isu nga impabigbigna iti sanguananda: Ti Pagarian, nga inrepresentar ti nadutokan nga Arina, ket ‘adda iti tengngada.’ Saanna a kinuna a kitaenda ti unegda.a Agtaktakder idi ni Jesus ken dagiti adalanna iti sanguanan dagitoy a Fariseo, ket kinunana: “Ti pagarian ti Dios adda ditoy a kaduayo.” (Lucas 17:21, Contemporary English Version) Nalawag ngarud nga awan ti Pagarian ti Dios iti puso dagiti managbasol a tao.