Maiparangarang ti Anak ti Tao

Mabalin nga adda idi ni Jesus idiay Samaria wenno idiay Galilea. Dinamag dagiti Fariseo kenkuana ti idadateng ti Pagarian, a namnamaenda a nadayag ti idadatengna. Nupay kasta, kinunana: “Saan a nakadkadlaw ti iyaay ti Pagarian ti Dios; saanto nga ibaga dagiti tattao: ‘Adda ditoy!’ wenno, ‘Adda idiay!’ Ta ti Pagarian ti Dios ket adda iti tengngayo.”​—Lucas 17:​20, 21.

Dadduma ti agkuna nga ibagbaga ni Jesus a ti Pagarian ket agturay iti puso dagiti agserserbi iti Dios. Nupay kasta, saan a kasta, ta ti pagarian ket awan iti puso dagiti Fariseo a kasarsarita ni Jesus. Ngem adda iti tengngada gapu ta ni Jesus, ti napili nga Ari ti Pagarian ti Dios, ket adda iti tengngada.​—Mateo 21:5.

Mabalin nga idi nakapanawen dagiti Fariseo, inlawlawag ni Jesus kadagiti adalanna dagiti detalye ti iyaay ti Pagarian. No maipapan iti kaaddana inton agturay iti Pagarian, namakdaar ni Jesus: “Addanto tiempo a kayatyo nga adda kadakayo ti Anak ti tao, ngem diyonto makita.” (Lucas 17:22) Ipakpakita ni Jesus a ti panagturay ti Anak ti tao iti Pagarian ket mapasamak iti masanguanan. Sakbay dayta a tiempo, mabalin a segseggaan ti dadduma nga adalan dayta, ngem masapul nga itultuloyda ti aguray agingga iti intuding ti Dios a tiempo ti iyaay ti Anak ti tao.

Intuloy ni Jesus: “Ibaganto kadakayo dagiti tattao, ‘Adda idiay!’ wenno, ‘Adda ditoy!’ Saankayo a mapan wenno sumurot kadakuada. Ta no kasano nga aggilap ti kimat iti maysa a paset ti langit sa aggilap iti sabali a paset, kastanto met iti aldaw ti Anak ti tao.” (Lucas 17:​23, 24) Kasano a masalakniban dagiti adalan ni Jesus tapno saanda a sumurot kadagiti palso a mesias? Imbaga ni Jesus nga umay ti pudno a Mesias kas iti kimat a makita iti adu a paset. Nalawag a makita dagiti agpalpaliiw ti pagilasinan iti kaaddana iti Pagarian.

Kalpasanna, indilig ni Jesus dayta kadagiti nagkauna a pasamak tapno ipakita ti kababalin dagiti tattao iti dayta a tiempo: “Kas idi kaaldawan ni Noe, kastanto met ti mapasamak iti kaaldawan ti Anak ti tao . . . Kasta met laeng ti napasamak idi kaaldawan ni Lot: mangmangan, umin-inum, gumatgatang, aglaklako, agmulmula, ken agibangbangon dagiti tattao. Ngem iti aldaw a pimmanaw ni Lot iti Sodoma, nagtudo iti apuy ken asupre manipud langit ket dinadaelna amin ida. Kastanto met laeng ti mapasamak iti aldaw a maiparangarang ti Anak ti tao.”​—Lucas 17:​26-30.

Saan nga ibagbaga ni Jesus a nadadael dagiti tattao idi kaaldawan ni Noe ken idi kaaldawan ni Lot gapu ta intultuloyda dagiti normal nga aktibidad kas iti pannangan, panaginum, panaggatang, panaglako, panagmula, ken panagbangon. Inaramid met da Noe ken Lot ken ti pamiliada ti dadduma kadagita. Ngem ar-aramiden dayta ti dadduma a saanda nga inkaskaso ti pagayatan ti Dios ken dagiti mapaspasamak idi panawenda. Gapuna, balbalakadan ni Jesus dagiti adalanna nga ammuenda ti pagayatan ti Dios ken aktibo a makiramanda iti dayta. Ipakpakitana ngarud kadakuada ti pamay-an tapno maispalda​—ti pamay-an tapno agtultuloyda nga agbiag​—inton iyeg ti Dios ti panangdadael iti masanguanan.

Masapul a saan a masinga dagiti adalan iti bambanag iti lubong iti aglawlawda, dagiti bambanag a nalikudan. Imbaga ni Jesus: “Iti dayta nga aldaw, ti tao nga adda iti tuktok ti balay saan koman nga umulog a sumrek iti balayna tapno alaenna dagiti sanikuana. Uray ti tao nga adda iti talon, saan koman nga agawid tapno alaenna dagiti nabatina. Laglagipenyo ti asawa ni Lot.” (Lucas 17:​31, 32) Nagbalin nga adigi nga asin.

Intuloy ni Jesus nga iladawan ti kasasaad inton agari ti Anak ti tao. Kinunana kadagiti adalanna: “Iti dayta a rabii, addanto dua a tao iti maymaysa a pagiddaan; maalanto ti maysa, ngem mabatinto ti sabali.” (Lucas 17:34) Maisalakanto ti dadduma, ngem mabaybay-anto ti dadduma ket mapukawda ti biagda.

Dinamag dagiti adalan: “Sadino, Apo?” Kinuna ni Jesus kadakuada: “No sadino ti ayan ti bangkay, idiay met nga aguurnong dagiti agila.” (Lucas 17:37) Dadduma ti kaslanto kadagiti nasiput nga agila. Dagitoy nga adalan sumurotdanto iti pudno a Kristo, ti Anak ti tao. Iti dayta a tiempo iti masanguanan, ipaayto ni Jesus kadagiti adalanna ti makaispal iti biag a kinapudno para kadagiti addaan iti pammati.