Sumaganad impakita ni Jesus a ti pannakapaay dagitoy narelihiusuan a papangulo ket saan laeng a ti liwayda nga agserbi iti Dios. Saan, no di ket iti kinapudnona tattaoda a managdakdakes. “Adda idi maysa a tao nga ama iti sangakabbalayan,” insalaysay ni Jesus, “a nagmula ti maysa a kaubasan ket linawlawna iti alad ket nangkali kenkuana ti maysa a pagaramidan ti arak ket nangbangon ti maysa a pagbantayan, ket intedna a pinaupaan kadagiti agtaltalon, ket napan iti sabali a daga. Ket idi umasideg ti tiempo ti panagapit, imbaonna dagiti adipenna kadagiti mannalon tapno awatenda ti abangna. Ket dagiti tumatalon, innalada dagiti adipenna ket minalmaloda ti maysa, ket pinatayda ti sabali, ket ti sabali binatoda. Nangibaon manen kadagiti sabali nga adipen, nga ad-adu ngem kadagidi immuna, ket inaramidda kadakuada ti kasdi met laeng.”

Dagiti “adipen” ket isuda dagiti mammadto a ti “ama ti sangakabbalayan,” a ni Jehova a Dios, imbaonna “kadagiti tumatalon” iti “kaubasanna.” Dagitoy a tumatalon isuda dagiti kangrunaan a pannakabagi ti nasion nga Israel, nga isut’ nasion nga ipabpabigbig ti Biblia kas ti “kaubasan” ti Dios.

Gapuna dagiti narelihiusuan a papangulo inwaragawagdat’ pannakaukomda iti bagida a saanda a napupuotan, ta nairamanda kadagiti Israelita a “mannalon” iti Israel a nasional a “kaubasan” ni Jehova. Ti bunga a ninamnama ni Jehova manipud ti kakasta a mannalon isut’ panamati iti Anakna, ti pudno a Mesias. Gaput’ saanda a panangted ti kasta a bunga, namakdaar ni Jesus: “Uray kaano dikay aya nabasa kadagiti Sursurat [idiay Salmo 118:22, 23], ‘Ti bato nga imbelleng dagiti managaramid ti balay isu met laeng ti maaramid a bato a pasuli. Manipud ken Jehova ti naggapuan daytoy, ket naskaskasdaaw kadagiti matatayo’? Gapuna kunak kadakayo, Ti pagarian ti Dios maikkatto kadakayo ket maitedto iti maysa a nasion a mangpataud kadagiti bungbungana. Ket ti matnag iti daytoy a bato maburakto. Ngem ti siasinoman a pagtinnaganna, matumekto a kasla tapuk.”