ANAS

[manipud Heb., kaipapananna ti “Mangipapaay iti Parabur; Managparabur”].

Dinutokan ni Quirinio, ti Romano a gobernador ti Siria, kas nangato a padi idi agarup 6 wenno 7 K.P., ken nagserbi agingga idi agarup 15 K.P. (Lu 2:2) Ngarud ni Anas ket nangato a padi idi a ni Jesus nga agtawen iti 12 napagsiddaawna dagiti rabbiniko a mannursuro idiay templo. (Lu 2:42-49) Gapu iti naipadamag a panangsalungasingna iti inted ti Roma nga autoridadna, ni Anas ket inikkat ni Procurador Valerius Gratus kas nangato a padi. Nupay awanen kenkuana ti opisial a titulo, nakabatbatad a nagtultuloy nga addaan dakkel nga autoridad ken impluensia kas retiradon a nangato a padi ken isu pay laeng ti ad-adda a denggen ti Judio a hirarkia. Nagakem kas nangato a padi ti tunggal maysa iti lima kadagiti annakna kasta met ti manugangna a ni Caifas. Gapu iti natan-ok a saad ni Anas, umiso ti panangdakamat kenkuana ti Kasuratan kas maysa kadagiti panguluen a papadi. (Mt 26:3; Lu 3:2) Idi naaresto ni Jesus impanda nga immuna ken Anas tapno mapagsaludsodan ket kalpasanna naibaon ken Caifas tapno mausig. (Jn 18:13) Ti nagan ni Anas ti umuna iti listaan dagiti kangrunaan a kabusor dagiti apostol ni Jesu-Kristo.​—Ara 4:6.

Ti nabaknang ken naturay a sangakabbalayan ni Anas ket kameng iti tribu ni Levi, ket ti panaglako kadagiti sakripisio iti uneg dagiti paraangan ti templo isu ti maysa kadagiti kangrunaan a pamastrekanda​—umanayen a rason tapno papatayenda ni Jesus, ta namindua a dinalusanna ti templo a pinagbalinda a “rukib dagiti mannanakaw.” (Jn 2:13-16; Mt 21:12, 13; Mr 11:15-17; Lu 19:45, 46) Nalabit ti kanayonan a makagapu no apay a ni Anas kagurana ni Jesus ken dagiti apostolna isu ti panangisuro ni Jesus iti panagungar, ti pannakaibangon ni Lazaro kas nabiag a pammaneknek, ken ti panangikasaba ken panangisuro dagiti apostol iti dayta met laeng a doktrina, ta saan a mamati ni Anas iti panagungar no isu ket pudno a Saduceo.​—Ara 23:8; idiligyo ti Ara 5:17.