“Makigayyemkayo Babaen Kadagiti Nakillo a Kinabaknang”

“Makigayyemkayo babaen kadagiti nakillo a kinabaknang . . . Ti tao a matalek iti kabassitan matalek met iti adu.”​—LUCAS 16:9, 10.

 1. Kasano nga indaydayaw ni Moises ken dagiti annak ti Israel ni Jehova kalpasan ti ipapanawda idiay Egipto?

NAISPAL babaen ti milagro​—anian a makapabileg-pammati a kapadasan! Awan sabali no di ni Jehova, ti Mannakabalin-amin, ti nangipanaw iti Israel idiay Egipto. Di pakasdaawan nga inkanta ni Moises ken dagiti Israelita: “Ni Jah ti pigsak ken ti bilegko, ta isu ti nagbalin a salakanko. Daytoy isu ti Diosko, ket idaydayawkonto; ti Dios ni amak, ket itan-okkonto.”​—Exodo 15:1, 2; Deuteronomio 29:2.

 2. Aniat’ intugot ti ili ni Jehova idi pimmanawda idiay Egipto?

² Anian a naiduma ti wayawaya a kagun-gun-od ti Israel iti kasasaadda idiay Egipto! Makapagdaydayawda itan ken Jehova nga awan lapped. Ket saanda a pimmanaw idiay Egipto nga ima-ima. Impadamag ni Moises: “Dagiti annak ti Israel . . . nagdawatanda dagiti Egipcio kadagiti alikamen a pirak ken al-alikamen a balitok ken pagan-anay. Ket ni Jehova pinaraburanna dagiti tattao iti imatang dagiti Egipcio, iti kasta nga inyawatda kadakuada dagiti dinawatda; ket linabusanda dagiti Egipcio.” (Exodo 12:35, 36) Ngem kasanoda nga inusar dagitoy a kinabaknang ti Egipto? Nagbanag kadi dayta iti ‘pannakaitan-ok ni Jehova’? Aniat’ masursurotayo iti ulidanda?​—Idiligyo ti 1 Corinto 10:11.

“Sagut ken Jehova”

 3. Aniat’ reaksion ni Jehova iti panangusar ti Israel iti balitok iti ulbod a panagdaydayaw?

³ Bayat ti panagyan ni Moises idiay Bantay Sinai iti las-ud ti 40 nga aldaw tapno awatenna dagiti bilin ti Dios a maipaay iti Israel, natektekan dagiti tattao iti baba nga agur-uray. Inikkatda dagiti balitok nga aritosda, sada nagpaaramid ken ni Aaron iti maysa a ladawan a pagdaydayawanda. Imbangonan met ida ni Aaron iti maysa nga altar, ket iti kabigatanna, nagdatonda sadiay. Naay-ayo kadi ti Manangisalakanda iti kastoy a pannakausar dagiti balitokda? Saan a pulos! “Ita, bay-annak,” kinuna ni Jehova ken ni Moises, “tapno bumara ti pungtotko kadakuada ken tapno ibusek ida.” Gapu iti panagpakpakaasi ni Moises, saan nga inkisap ni Jehova ti nasion, nupay pinapatay ti maysa a saplit a naggapu iti Dios dagidiay nangisungsong iti yaalsa.​—Exodo 32:1-6, 10-14, 30-35.

 4. Ania ti “sagut ken Jehova,” ket siasino ti nangipaay iti dayta?

⁴ Idi kamaudiananna, naaddaan ti Israel iti gundaway a mangusar iti kinabaknangda iti wagas a makaay-ayo ken ni Jehova. Nangur-orda iti “sagut a maipaay ken Jehova.”a Nangtedda iti balitok, pirak, gambang, asul a panait, nadumaduma a tinina a material, lalat ti kalakian a karnero, lalat ti foca (seal), ken kayo ti akasia a mausar iti pannakabangon ken kadagiti alikamen ti tabernakulo. Iturong ti salaysay ti atensiontayo iti kababalin dagidiay nangted iti kontribusion: “Siasinoman a siaannugot ti pusona yegna koma ti sagut ken Jehova.” (Exodo 35:5-9) Sibubuslon a nangted ti Israel. Gapuna, ti tabernakulo ket maysa a pasdek ti “kinapintas ken naindaklan a kinadaeg,” sigun iti maysa nga eskolar.

Dagiti Sagut a Maipaay iti Templo

5, 6. Mainaig iti templo, kasano nga inusar ni David ti kinabaknangna, ket kasanot’ panagtignay dagiti dadduma?

⁵ Nupay ni Ari Solomon ti Israel ti nagpaibangon iti maysa a permanente a balay a pagdaydayawan ken Jehova, ni David nga amana ti nangisagana iti dayta. Nangurnong ni David iti adu a balitok, pirak, gambang, landok, troso, ken agkakapateg a bato. “Agsipud ta insaadko ti ragsakko iti balay ti Diosko,” kinuna ni David iti ilina, “addaanak iti naisangsangayan a gameng a kukuak met laeng a balitok ken pirak; itedko dayta iti balay ti Diosko, sabali laeng ti insaganak a maipaay iti nasantuan a balay: tallo a ribu a talento a balitok . . . ken pito a ribu a talento a nagugoran a pirak, a pangkalupkop kadagiti diding dagiti balay.” Pinaregta ni David dagiti dadduma a mangted met a sibubuslon. Aglaplapusanan ti intedda: ad-adu pay a balitok, pirak, gambang, landok, ken agkakapateg a bato. “Buyogen ti naan-anay a puso,” ‘nagidaton [dagiti umili] ken Jehova iti sibubulos a nakemda.’​—1 Cronicas 22:5; 29:1-9.

⁶ Babaen ti sibubulos a panangipaayda kadagitoy a sagut, inyebkas dagiti Israelita ti nasged a panangipategda iti panagdaydayaw ken Jehova. Sipapakumbaba nga inkararag ni David: “Asinoak ken ania ti ilik, tapno kabaelanmi koma ti mangidaton iti sibubulos a nakem a kas iti daytoy a kita?” Apay? “Ta naggapu amin a banag kenka, ket intedmi kenka ti naggapu iti mismo nga imam. . . . No maipapan kaniak, iti kinalinteg ti pusok indatonko iti sibubulos a nakemko amin dagitoy a bambanag.”​—1 Cronicas 29:14, 17.

 7. Ania a pammakdaar a leksion ti masursurotayo iti kaaldawan ni Amos?

⁷ Nupay kasta, saan nga intultuloy dagiti tribu ti Israel nga impangruna ti panagdaydayaw ken Jehova iti panunot ken pusoda. Idi maikasiam a siglo K.K.P., liniwayan ti nabingay nga Israel ti espiritualidadda. Maipanggep iti makin-amianan a pagarian ti Israel a buklen ti sangapulo a tribu, kinuna ni Jehova baeten ken Amos: “Asida pay dagiti agnaed a sinanam-ay idiay Sion ken dagiti agtalek iti bantay ti Samaria!” Inladawanna ida kas lallaki nga “agid-idda kadagiti pagiddaan a marfil . . . nga agin-inatda iti rabaw dagiti papagda, . . . agsidsida kadagiti kalakian a karnero ti pangen ken dagiti urbon a baka nga aggapu kadagiti napalukmeg a baka; . . . umin-inum iti arak kadagiti malukong.” Ngem saan ida a masalakniban ti kinabaknangda. Namakdaar ti Dios: “Maikuyogda kadagiti umuna a makayawan, ket maikkatton ti nalabes a panagragsak dagiti agin-inat.” Idi 740 K.K.P., nagsagaba ti Israel iti ima dagiti Asirio. (Amos 6:1, 4, 6, 7) Ket dimteng ti panawen a natnag met iti materialismo ti makin-abagatan a pagarian ti Juda.​—Jeremias 5:26-29.

Umiso a Panangusar iti Sanikua iti Tiempo Dagiti Kristiano

 8. Ania a nasayaat nga ulidan ti impaay da Jose ken Maria iti panangusar iti sanikua?

⁸ Maigidiat iti dayta, nupay adda kurkurapay dagiti adipen ti Dios kadagiti simmarsaruno a panawen, saan a daytoy ti nanglapped kadakuada a mangipakita iti regta iti pudno a panagdaydayaw. Alaentayo a pagarigan da Maria ken Jose. Kas panagtungpal iti bilin ni Cesar Augusto, napanda idiay Betlehem nga ili ti kapuonanda. (Lucas 2:4, 5) Sadiay a naipasngay ni Jesus. Kalpasan ti uppat a pulo nga aldaw, simmarungkar da Jose ken Maria iti templo idiay Jerusalem a kabangibang [ti ilida] tapno idatagda ti naibilin a daton ti pannakagugor. Nangidaton ni Maria iti dua a babassit a billit, a mangipasimudaag a napanglawda. Pulos a saan a pinagpambar [ni Maria] wenno ni Jose ti kinapanglawda. Sitatallugod ketdi nga inusarda ti bassit a sanikuada.​—Levitico 12:8; Lucas 2:22-24.

9-11. (a) Aniat’ masursurotayo iti sasao ni Jesus idiay Mateo 22:21 maipapan iti panangusartayo iti kuarta? (b) Apay a saan nga ubbaw ti bassit a kontribusion nga impaay ti balo?

⁹ Iti kamaudiananna, pinadas dagiti Fariseo ken dagiti pasurot ni Herodes a sikapan ni Jesus, a kunkunada: “Ibagam kadakami, ngarud, Ania ti pagarupem? Nainkalintegan kadi ti agbayad iti panguluen a buis ken Cesar wenno saan?” Impasimudaag ti sungbat ni Jesus ti nauneg a pannakaawatna. Tuktukoyenna ti sinsilio nga intedda kenkuana, sinaludsod ni Jesus: “Makinladawan ken surat daytoy?” Insungbatda: “Ni Cesar.” Nainsiriban nga ingngudona: “Ngarud, ibayadyo ken Cesar dagiti bambanag ni Cesar, ngem iti Dios dagiti bambanag ti Dios.” (Mateo 22:17-21) Ammo ni Jesus a namnamaen ti autoridad a nangiruar iti sinsilio ti panagbayad iti buis. Ngem iti daydi a gundaway, tinulonganna nga agpada dagiti pasurot ken kabusorna a makabigbig nga ikagumaan met ti maysa a pudno a Kristiano nga ited “iti Dios dagiti bambanag ti Dios.” Ramanen daytoy ti umiso a panangusar kadagiti material a sanikua ti maysa.

¹⁰ Naipakita daytoy iti maysa a pasamak a naimatangan ni Jesus idiay templo. Kalkalpasna idi a binabalaw dagiti naagum nga eskriba ‘a nangalun-on kadagiti balay dagiti balo a babbai.’ “Idi a timmaliaw nakitana dagiti nabaknang a mangipispisok kadagiti sagutda kadagiti baul ti gameng,” impadamag ni Lucas. “Kalpasanna nakita [ni Jesus] ti maysa a marigrigat a balo a nangipisok sadiay iti dua a babassit a sinsilio a bassit unay ti pategna, ket kinunana: ‘Ibagak kadakayo a sipupudno, Daytoy a balo, nupay napanglaw, nangipisok iti ad-adu ngem iti isuda amin. Ta amin dagitoy nangipisokda iti sagsagut manipud kadagiti teddada, ngem daytoy a babai manipud iti panagkasapulanna impisokna ti isuamin a pagbiag nga adda kenkuana.’” (Lucas 20:46, 47; 21:1-4) Dinakamat ti sumagmamano kadagiti tattao a naarkosan ti templo iti agkakapateg a batbato. Kinuna ni Jesus: “No maipapan kadagitoy a bambanag a makitkitayo, umayto dagiti aldaw nga awan ti maysa a bato iti rabaw ti maysa a bato a matda ditoy a di marba.” (Lucas 21:5, 6) Awan kadit’ serserbi ti bassit a kontribusion ti balo? Adda. Sinuportaranna ti urnos nga impasdek ni Jehova kadaydi a tiempo.

¹¹ Kinuna ni Jesus kadagiti pudno a pasurotna: “Awan ti adipen iti balay a makapagpaadipen iti dua nga appo; ta, mabalin a guraennanto ti maysa ket ayatenna ti sabali, wenno agtalinaedto iti maysa ket umsienna ti sabali. Dikay mabalin ti agpaadipen iti Dios ken kadagiti kinabaknang.” (Lucas 16:13) Ngarud, kasanotay a maipakita ti umiso a kinatimbeng iti panangusar iti kuartatayo?

Dagiti Matalek a Mayordomo

12-14. (a) Ania a sanikua ti naitalek kadagiti Kristiano? (b) Kadagiti ania a napateg a pamay-an a simamatalek a tungtungpalen dagiti tattao ni Jehova iti kaaldawantayo ti kinamayordomoda? (c) Sadino ti paggapgapuan ti kuarta a pangsuportar iti trabaho ti Dios iti kaaldawantayo?

¹² Ti panangidedikartay iti biagtayo ken Jehova ipasimudaagna a bigbigentayo a kukuana amin nga adda kadatayo, amin a sanikuatayo. Kasanotay ngarud nga usaren ti adda kadatayo? Iti panangsalaysayna iti panagserbi dagiti Kristiano iti kongregasion, insurat ni Kabsat C. T. Russell, immuna a presidente ti Watch Tower Society: “Rumbeng nga ibilang ti tunggal maysa ti bagina kas dinutokan ti Apo a mayordomo iti mismo a tiempo, impluensia, kuartana, kdpy., ket ikagumaan koma ti tunggal maysa nga usaren dagitoy a talento iti amin a kabaelanna, iti pakaidayawan ti Maestro.”​—The New Creation, panid 345.

¹³ “Ti sapsapulen kadagiti mayordomo ket tao a matalek,” kuna ti 1 Corinto 4:2. Kas maysa a sangalubongan nga organisasion, ikagkagumaan dagiti Saksi ni Jehova ti agtignay a maitunos iti dayta a panangiladawan, nga us-usarenda ti amin a panawen a kabaelanda nga ipaay iti Nakristianuan a ministerio, a siaannad a suksukayenda ti abilidadda a mangisuro. Mainayon pay, situtulok nga us-usaren ti binungbunggoy a boluntario nga adda iti babaen ti panangiturong dagiti Regional Building Committee ti panawen, pigsa, ken laingda iti panangbangon kadagiti nasayaat a paggigimongan a maaramat iti panagdaydayaw. Makaay-ayo amin dagitoy ken ni Jehova.

¹⁴ Sadino ti paggapgapuan ti kuarta a pangsuportar iti daytoy nasaknap a kampania a panangisuro ken panagbangon? Manipud kadagiti tattao a siaannugot ti pusoda, kas iti panawen a pannakabangon ti tabernakulo. Makiramraman kadi ti tunggal maysa kadatayo? Ti kadi pamay-an a panangusartay iti kuartatayo ipakpakitana a ti panagserbi ken Jehova ti kapatgan iti biagtayo? No kuarta ti pagsasaritaan, agbalintay koma a matalek a mayordomo.

Maysa a Pagtuladan iti Kinamanagparabur

15, 16. (a) Kasano nga impakita dagiti Kristiano idi kaaldawan ni Pablo ti kinamanagparabur? (b) Kasanot’ rumbeng a panangmatmattayo iti agdama a salsalaysayentayo?

¹⁵ Nagsurat ni apostol Pablo maipapan iti kinamanagparabur dagiti Kristiano idiay Macedonia ken Acaya. (Roma 15:26) Nupay napanglawda, sidadaanda a nangted iti abuloy a pangtulong kadagiti kakabsatda. Pinaregta met ni Pablo dagiti Kristiano a taga-Corinto a mangted a sipaparabur, a yabuloyda ti pagsursurokanda tapno mapunnuan ti pagkurkurangan dagiti dadduma. Awan ti nainkalintegan a makaidarum ken ni Pablo iti panagkikil. Insuratna: “Ti agmula a siiimut aganinto met a siiimut; ket ti agmula a siwawadwad aganinto met a siwawadwad. Tunggal maysa aramidenna koma kas iti inkeddengna iti pusona, saan nga iti dakes a nakem wenno iti sidong ti pannakapilit, ta ti Dios ayatenna ti naragsak a manangited.”​—2 Corinto 8:1-3, 14; 9:5-7, 13.

¹⁶ Ti nabuslon a kontribusion nga ipapaay dagiti kakabsattayo ken dagiti interesado a tattao para iti sangalubongan a trabaho ti Pagarian iti kaaldawantayo paneknekanna no kasano kapateg kadakuada daytoy a pribilehio. Ngem, kas impalagip ni Pablo kadagiti taga-Corinto, nasayaat no matmatantay daytoy a panangsalaysay kas palagip.

17. Ania nga urnos iti panangted ti imparegta ni Pablo, ket mayaplikar kadi daytoy iti kaaldawantayo?

¹⁷ Indagadag ni Pablo kadagiti kakabsat a surotenda ti maysa nga urnos iti panangtedda. “Tunggal umuna nga aldaw ti lawas,” kinunana, “tunggal maysa kadakayo iti bukodna a balay mangilasin koma a mangidulin iti aniaman a kas iti irarang-ayna.” (1 Corinto 16:1, 2) Mabalin nga agserbi dayta a pagtuladantayo ken dagiti annaktayo iti panangitedtayo iti kontribusion, itedtay man dayta iti kongregasion wenno direkta iti kaasitgan a sanga nga opisina ti Watch Tower Society. Inawis ti maysa a pagassawaan a misionero a naibaon a mangasaba iti maysa nga ili ti Makindaya nga Africa dagiti interesado a tattao a makipagadal iti Biblia kadakuada. Iti panagngudo daytoy damo a panaggigimongda, siaannad a nangipisok dagiti misionero iti sumagmamano a sinsilio iti maysa a kahon a namarkaan iti “Kontribusion para iti trabaho ti Pagarian.” Kasta met laeng ti inaramid ti dadduma kadagiti timmabuno. Iti saan a nabayag, idi naorganisar dagitoy a kabbaro iti maysa a Kristiano a kongregasion, simmarungkar ti manangaywan ti sirkito ket dinakamatna ti regular a panangitedda iti kontribusion.​—Salmo 50:10, 14, 23.

18. Kasanotay a matulongan dagiti kakabsattayo a marigrigatan?

¹⁸ Addaantay met iti pribilehio a mangusar kadagiti sanikuatayo iti panangsaranay kadagiti biktima dagiti natural a didigra ken kadagidiay agnanaed kadagiti lugar a dinadael ti gubat. Anian a ragsaktayo a nakabasa maipapan kadagiti tulong a naipatulod idiay Makindaya nga Europa kabayatan ti nariribuk a kasasaad ti ekonomia ken politika iti dayta a paset ti lubong! Iparangarang dagiti nadumaduma a tulong ken kuarta a nayabuloy ti kinamanagparabur ken pannakipagkaykaysa dagiti kakabsattayo kadagiti daksanggasat a Kristiano.b​—2 Corinto 8:13, 14.

19. Kasanotay a matulongan iti praktikal a pamay-an dagidiay agserserbi iti amin a tiempo?

¹⁹ Saan kadi a tagipatgentay unay ti trabaho dagiti kakabsattayo nga agserserbi iti amin a tiempo kas payunir, agdaldaliasat a manangaywan, misionero, ken boluntario iti Bethel? No la ket ipalubos ti kasasaadtayo, mabalintay ti tumulong kadakuada a mismo iti material a pamay-an. Kas pagarigan, no sumarungkar ti manangaywan ti sirkito iti kongregasionyo, mabalinyo a padagusen, sangailien, wenno tulongan kadagiti magastona iti panagdaliasat. Ti kasta a kinamanagparabur ket saan a yaleng-aleng ti nailangitan nga Amatayo, a kayatna a maaywanan dagiti adipenna. (Salmo 37:25) Sumagmamano a tawenen ti napalabas, inawis ti maysa a kabsat ti agdaldaliasat a manangaywan ken ti asawana nga agmerienda iti pagtaenganna ta dayta laeng ti kabaelanna nga ipaay. Idi agrubbuat ti agassawa a mapan mangasaba iti rabii, inyawat ti kabsat ti maysa a sobre kadagiti sangailina. Naglaon ti sobre iti maysa a papel de banko (katupag ti maysa a doliar ti E.U.) a napakuyogan iti ababa a sasao nga insurat ti ima: “Para iti sangatasa a tsa wenno sangagalon a gasolina.” Anian a nagsayaat a panangipateg ti nayebkas iti kastoy a nanumo a pamay-an!

20. Ania a pribilehio ken pagrebbengan ti ditay kayat a liwayan?

²⁰ Iti naespirituan a pamay-an, naparaburan ti ili ni Jehova! Tagtagiragsakentayo dagiti naespirituan a parambak kadagiti asamblea ken kombensiontayo, a pakaaw-awatantayo kadagiti baro a publikasion, nasayaat a pannursuro, ken praktikal a balakad. Buyogen ti puso a nalapunos iti panangipateg kadagiti naespirituan a bendision nga aw-awatentayo, ditay liwayan ti pribilehio ken pagrebbengantayo a mangted iti kontribusion a pangpadur-as iti intereses ti Pagarian ti Dios iti intero a lubong.

“Makigayyemkayo Babaen Kadagiti Nakillo a Kinabaknang”

21, 22. Aniantot’ mapasamak iti saanen a mabayag kadagiti “nakillo a kinabaknang,” ket aniat’ rumbeng nga aramidentay itan?

²¹ Pudno la unay, nakaad-adu dagiti pamay-an a maipakitatayo a ti panagdaydayaw ken Jehova ti kapatgan iti biagtayo, ket ti maysa a napateg a pamay-an a panangipakita iti daytoy isu ti panangipangag iti balakad ni Jesus: “Makigayyemkayo babaen kadagiti nakillo a kinabaknang, tapno iti kasta, inton mapaay dagita, awatendakayto kadagiti agnanayon a pagnaedan a disso.”​—Lucas 16:9.

²² Paliiwenyo ta dinakamat ni Jesus ti maipapan iti pannakapaay dagiti nakillo a kinabaknang. Wen, addanto aldaw nga awanen ti pateg ti kuarta iti daytoy a sistema. “Ipalladawdanto ti pirakda kadagiti lansangan, ket ti balitokda kaslanto narugit a banag,” impadto ni Ezequiel. “Ti pirakda ken ti balitokda didanto mabalin nga ispalen ida iti aldaw ti pungtot ni Jehova.” (Ezequiel 7:19) Agingga iti mapasamak daytoy, rumbeng a nainsiriban ken siuumiso nga usarentay dagiti material a sanikuatayo. Iti kasta saantayto nga agbabawi gapu iti ditay panangipangag iti pakdaar ni Jesus: “No dikay napaneknekan a matalek ti bagbagiyo mainaig kadagiti nakillo a kinabaknang, asinonto ti mangitalek kadakayo iti napudno? . . . Dikay mabalin ti agpaadipen iti Dios ken kadagiti kinabaknang.”​—Lucas 16:11-13.

23. Aniat’ rumbeng nga usarentay a nainsiriban, ket aniantot’ gunggonatayo?

²³ Ngarud, simamatalek nga ipangagtay koma amin dagitoy a palagip a yun-unatay ti panagdaydayaw ken Jehova iti biagtayo ken nainsiriban nga usarentay amin a sanikuatayo. Iti kasta, mataginayontay ti pannakigayyemtayo kada Jehova ken Jesus, a nangikari nga inton mapaay ti kuarta awatendatayto “kadagiti agnanayon a pagnaedan a disso,” nga addaan namnama nga agbiag nga agnanayon iti man nailangitan a Pagarian wenno iti maysa a paraiso a daga.​—Lucas 16:9.

[Dagiti Footnote]

◻ Kasanot’ panangipangag ti Israel iti awis ni Jehova a tumulongda iti pannakabangon ti tabernakulo?

◻ Apay a saan nga ubbaw ti kontribusion ti balo?

◻ Aniat’ responsabilidad dagiti Kristiano iti panangusarda kadagiti sanikuada?

◻ Tapno saantayto nga agbabawi gapu iti panangusartay iti kuarta, aniat’ rumbeng nga aramidentayo?

[Ladawan iti panid 15]

Saan nga ubbaw ti kontribusion ti balo, nupay bassit ti pategna

[Dagiti Ladawan iti panid 16, 17]

Maus-usar dagiti kontribusiontayo a pangsuportar iti sangalubongan a trabaho ti Pagarian