Ti Biag ken Ministerio ni Jesus

Panagtalek Bayat Dagiti Maudi nga Al-aldaw

IDI dandani agngudon ti Martes, Nisan 11, kadua ni Jesus dagiti apostolna idiay Bantay dagiti Olibo. Kapampanawda idiay templo, a makitadan iti babaenda, ket sinalaysay ni Jesus kadakuada ti pagilasinan ti kaaddana iti pannakabalin ti Pagarian ken iti panungpalan ti sistema dagiti bambanag.

Idi intuloyna ti komentona, pinakdaaran ni Jesus ida maikontra iti isusurotda kadagiti palso a Kristo. Ipamuspusandanto, kunana, “nga allilawen, no mabalin, uray dagidiay napili.” Ngem, kas kadagiti agila nga adayo ti masiputanda, dagitoy a napili aguummongdanto iti lugar a pakasarakan ti pudpudno a naespirituan a taraon, iti daydiay pudpudno a Kristo bayat ti di makita a kaaddana. Didanto maallilaw a sumurot iti palso a Kristo.

Ti laeng kabaelan dagiti palso a Kristo isu daydiay makitkita a panagparang. Maisupadi, ti kaaddan Jesus ket di makita. Maangayto dayta iti nakaam-amak a tiempo ti historiat’ tao, kas kinunan Jesus: “Ti init aglulemto, ket ti bulan saannanto nga ited ti lawagna.” Wen, daytoyto ti kasipngetan a periodo ti historiat’ sangatauan. Mayaspingto a kasla ti init limmulem iti aldaw, ket ti bulan dina itden ti lawagna iti rabii.

“Dagiti pannakabalin dagiti langit agkintayegdanto,” intuloy ni Jesus. Impasimudaagna ngarud a dagiti pisikal a langit nakaam-amakto ti langada. Dagiti langit saanto laengen a pagturayan dagiti billit, no di ket mapnodanto kadagiti eroplano a pakigubat, rockets, ken lugan ti law-ang. Ti panagbuteng ken kinaranggas lab-awandanto ti aniaman a napasaran ti immun-una a historia ti tao.

Kas resultana, kunan Jesus, addanto “rigat dagiti nasion, nga agdanag gapu ti daranudor ti baybay ken dagiti dalluyon, bayat a dagiti tao agkapuydanto gapu ti buteng ken danagda kadagiti maar-aramid nga umayto iti napagnaedan a daga.” Wen, daytoy kasipngetan a periodo iti historia ti tao agtungpalto iti tiempo inton, sigun ken Jesus, “agparangto ti pagilasinan ti Anak ti tao iti langit, ket agdung-awto dagiti amin a tribo ti daga.”

Ngem saanto nga agdung-aw dagiti isuamin inton ‘ti Anak ti tao umay a buyogen ti pannakabalin’ a mangdadael itoy nadangkes a sistema dagiti banag. “Dagidiay napili,” a 144,000 a makipagturayto ken Kristo iti nailangitan a Pagarian, didanto agdung-aw, ket kastanto met dagiti kakaduada, dagidiay inawagan nga immun-una ni Jesus a kas “sabali a karnero.” Nupay sibibiagda bayat dayta kasipngetan a periodo ti natauan a historia, agtulnogda iti pammaregta ni Jesus: “Inton dagitoy a banag mangrugida a maaramid, kumitakayo ket itangadyo dagiti uloyo, ta ti pannakaispalyo umasidegen.”

Tapno maikeddeng dagiti disipulona nga agbibiag kabayatan dagiti maudi nga al-aldaw ti kinaasideg ti panungpalan, inted ni Jesus daytoy nga ilustrasion: “Kitaenyo ti kayo a higos ken dagiti isuamin a kayo: Inton aguggotda, no paliiwenyo ammoyon a mismo a ti kalgaw asidegen. Kastakayo met, inton makitayo dagitoy a maar-aramid, ammuenyo a ti pagarian ti Dios asidegen. Kinapudnona kunak kadakayo, Dinto pay makalabas daytoy a kaputotan maaramidton amin dagitoy.”

Gapuna, no makitan dagiti disipulona a matungtungpal dagiti nadumaduma a paset ti pagilasinan, mabigbigda koma a ti panungpalan ti sistema dagiti bambanag asidegen ken ti Pagarian ti Dios ikisapnanton iti mabiit amin a kinadangkes. Kinapudnona, ti panungpalan umayto bayat ti periodo a panagbiag dagidiay tao a nakakita iti kaitungpalan amin dagiti banag nga impadton Jesus! Kas pammalakadna kadagiti disipulo a sibibiagto bayat dagitoy naisalsalumina a maudi nga al-aldaw, kuna ni Jesus:

“Agaluadkayo di la ket ta dagiti pusoyo mapnoda ti kinarawet ken panagbartek ken kadagiti tarigagay itoy a biag, ket umayto a kellaat kadakayo dayta nga aldaw a kas maysa a silo. Ta umayto kadagiti amin nga agnaed iti rabaw ti isuamin a daga. Agsalukagkayo, ngarud, nga umararawkayo nga agnanayon tapno makalisikayo kadagitoy amin a maaramid nga umayto, ken makapagtakderkayo iti sanguanan ti Anak ti tao.” Mateo 24:23-51; Marcos 13:21-37; Lucas 21:25-36; Apocalipsis 14:1, 3; Juan 10:16.

◆ Aniada a kasasaad toy lubong ti mangtanda iti kaaddan Kristo?

◆ Inton-ano nga ‘agdung-aw amin a tribo ditoy daga,’ ngem anianto ti aramiden dagiti pasurot ni Kristo?

◆ Aniat’ inted ni Jesus nga ilustrasion a tumulong kadagiti masanguanan a disipulona a mangilasin nga asidegen ti panungpalan?

◆ Aniat’ imbalakad ni Jesus kadagidiay disipulona nga agbibiagto kabayatan dagiti maudi nga al-aldaw?