Manginanamaka ken ni Jehova, ket Agturedka

“Manginanamaka ken Jehova; bumilegka ket pumigsa koma ta pusom. Wen, manginanamaka ken Jehova.”​—SALMO 27:14.

 1. Kasano kapateg ti namnama, ken kasano ti pannakausarna iti Kasuratan?

MAYARIG iti naraniag a lawag ti pudno a namnama. Tulongannatayo a mangtarus iti adda iti likudan dagiti agdama a pakasuotan ken mangsaranget iti masanguanan buyogen ti tured ken rag-o. Ni laeng Jehova ti makaipaay kadatayo iti natalged a namnama, ket kasta ti inaramidna babaen ti naipaltiing a Saona. (2 Timoteo 3:16) Kinapudnona, namin-adu a nagparang iti Biblia ti sumagmamano a sasao a nagtaud iti termino a “namnama,” a tumukoy agpadpada iti sigagagar ken natalged a panangpadpadaan iti maysa a naimbag a banag ken iti mismo a banag a padpadaanan.a Ti kasta a namnama ket saan a basta tarigagay nga awan nakaibatayanna wenno awan posibilidadna a matungpal.

 2. Kasano a nakatulong ken ni Jesus ti namnama?

² Idi naipasango kadagiti pakasuotan ken rigat, saan a naupay ni Jesus no di ket nanginanama ken ni Jehova. “Gapu iti rag-o a naikabil iti sanguananna inibturanna ti kayo a pagtutuokan, nga inumsina ti bain, ket nagtugaw iti makannawan ti trono ti Dios.” (Hebreo 12:2) Gapu ta determinado a mangalangon iti kinasoberano ni Jehova ken mangsantipikar iti nagan ti Dios, pulos a saan a simmukir ni Jesus iti Dios, aniaman ti napasaranna.

 3. Kasano a nakatulong kadagiti adipen ti Dios ti namnama?

³ Impatuldo ni Ari David no kasano nga agkanaig ti namnama ken ti kinatured idi a kinunana: “Manginanamaka ken Jehova; bumilegka [wenno, agturedka] ket pumigsa koma ta pusom. Wen, manginanamaka ken Jehova.” (Salmo 27:14) No kayattayo a natibker ti pusotayo, ditay koma pulos ipalubos a kumudrep ti namnamatayo no di ket kanayon koma a nalawag dayta iti isiptayo ken ipapusotayo dayta. No kasta ti aramidentayo, matuladtayo ti kinatured ken kinaregta ni Jesus bayat a makipaspasettayo iti trabaho nga intalekna kadagiti adalanna. (Mateo 24:14; 28:19, 20) Kinapudnona, malaksid iti pammati ken ayat, ti namnama ket maysa kadagiti napateg ken di agkupas a galad nga ik-ikutan dagiti adipen ti Dios.​—1 Corinto 13:13.

‘Aduankayo Kadi iti Namnama’?

 4. Ania ti sigagagar a segseggaan dagiti napulotan a Kristiano ken ti kakaduada a “sabsabali a karnero”?

⁴ Adda nagsayaat a masanguanan nga agur-uray kadagiti adipen ti Dios. Sigagagar a segseggaan dagiti napulotan a Kristiano ti pannakipagserbida ken ni Kristo idiay langit, bayat a ti “sabsabali a karnero” inanamaenda a ‘mawayawayaandanto iti pannakaadipen iti panagrupsa ken maaddaanda iti nadayag a wayawaya ti naindagaan nga annak ti Dios.’ (Juan 10:16; Roma 8:19-21; Filipos 3:20) Ti “nadayag a wayawaya” ramanenna ti pannakaispal manipud iti basol ken kadagiti dakes a bungana. Wen, kas ti Manangted iti “tunggal naimbag a sagut ken tunggal naan-anay a rangkap,” ipaay ni Jehova ti kasayaatan kadagiti nasungdo nga adipenna.​—Santiago 1:17; Isaias 25:8.

 5. Kasano nga ‘umadu ti namnamatayo’?

⁵ Kasano koma kadakkel ti paset ti Nakristianuan a namnama iti biagtayo? Kastoy ti mabasatayo iti Roma 15:13: “Ti Dios a mangipaay iti namnama punnuennakay koma iti isuamin a rag-o ken talna babaen iti panamatiyo, tapno aduankay koma iti namnama buyogen ti pannakabalin ti nasantuan nga espiritu.” Wen, imbes a kas iti kandela iti kasipngetan, ti namnama ket mayarig iti naraniag a lawag manipud iti sumingsingising nga init, a mangyeg iti talna, ragsak, panggep, ken tured iti biag. Imutektekanyo ta naruay ti ‘namnamatayo’ no patientayo ti naisurat a Sao ti Dios ken awatentayo ti nasantuan nga espirituna. Kuna ti Roma 15:4: “Ti amin a bambanag a naisurat a nasaksakbay naisuratda a pakasursuruantayo, tapno babaen ti panagibturtayo ken babaen ti liwliwa manipud iti Kasuratan maaddaantay koma iti namnama.” Gapuna, imtuodenyo iti bagiyo: ‘Pagtaltalinaedek kadi a naraniag ti namnamak babaen ti panagbalinko a naanep nga estudiante ti Biblia, a basaek dayta iti inaldaw? Kanayon kadi nga ikarkararagko ti espiritu ti Dios?’​—Lucas 11:13.

 6. Tapno agtultuloy a naraniag ti namnamatayo, ania ti nasken a pagannadantayo?

⁶ Ti Pagwadantayo a ni Jesus kanayon a nagpannuray iti Sao ti Dios. No sisisinged nga utobentayo ti ulidanna, saan a ‘mabannog ken agkapuy dagiti kararuatayo.’ (Hebreo 12:3) No ti namnamatayo a naggapu iti Dios ket kumudrep iti isip ken pusotayo, wenno no agpasingatayo kadagiti dadduma a bambanag​—nalabit kadagiti material a pagnam-ayan wenno sekular a kalat​—mabalin nga iti di agbayag, saguyepyepentayo iti naespirituan, a mangpakapuy iti bileg ken turedtayo nga agaramid iti umiso. Nalabit a ‘marbanto pay ti pammatitayo.’ (1 Timoteo 1:19) Iti sabali a bangir, ti pudno a namnama pabilgenna ti pammatitayo.

Namnama​—Napateg nga Aspeto ti Pammati

 7. Iti ania a wagas a ti namnama ket napateg nga aspeto ti pammati?

⁷ “Ti pammati isu ti sigurado a panangsegsegga iti bambanag nga in-inanamaen, ti nabatad a parangarang dagiti kinapudno nupay saan a makita,” kuna ti Biblia. (Hebreo 11:1) No kasta, ti namnama ket saan laeng a kadua ti pammati; napateg ketdi dayta nga aspeto ti pammati. Usigenyo ni Abraham. Inkari ni Jehova a maaddaandanto ken ni Sara iti maysa nga agtawid. No iti panangmatmat ti tao, lakay ken baketda unayen tapno maaddaanda pay iti anak. (Genesis 17:15-17) Ania ti reaksion ni Abraham? “Nupay awan namnamanan, kaskasdi naibatay iti namnama isu naaddaan iti pammati, tapno agbalin koma nga ama ti adu a nasion.” (Roma 4:18) Wen, gapu iti namnamana a naggapu iti Dios, natalged ti pammati ni Abraham nga isu ket maaddaanto iti anak. Kas resultana, ad-adda a bimmileg ken timmalged ti namnamana gapu iti pammatina. Kinapudnona, dayta ti namagtured kada Abraham ken Sara a mangpanaw iti pagtaenganda ken kadagiti kakabagianda tapno agnaedda kadagiti tolda iti ganggannaet a lugar iti tungpal biagda!

 8. Kasano a ti matalek a panagibtur pabilgenna ti namnama?

⁸ Nataginayon ni Abraham a natalged ti namnamana babaen ti naan-anay a panagtulnogna ken ni Jehova, uray kadagiti gundaway a narigat nga aramiden dayta. (Genesis 22:2, 12) Umasping iti dayta, makapagtalektayo a masagraptayo ti gunggona no agtulnog ken agibturtayo bayat nga agserserbitayo ken ni Jehova. “Ti panagibtur,” insurat ni Pablo, agresulta iti “maysa a naanamongan a kasasaad,” kalpasanna mangyeg met iti namnama, “ket ti namnama saan a mangiturong iti pannakaupay.” (Roma 5:4, 5) Dayta ti makagapu nga insurat ni Pablo: “Tarigagayanmi a tunggal maysa kadakayo mangipakita iti isu met laeng a kinagaget tapno maaddaan iti naan-anay a pammasiguro iti namnama agingga iti panungpalan.” (Hebreo 6:11) Ti kasta a positibo a panangmatmat, a naibatay iti nasinged a relasion ken ni Jehova, matulongannatayo a mangdaer a situtured ken sirarag-o iti aniaman a rigat.

“Agrag-okayo iti Namnama”

 9. Ania ti regular nga aramidentayo tapno ‘makapagrag-otayo iti namnama’?

⁹ Ti naggapu iti Dios a namnamatayo ket natantan-ok nga amang ngem iti aniaman a maitukon daytoy a lubong. Kuna ti Salmo 37:34: “Manginanamaka ken Jehova ket salimetmetam ti dalanna, ket itan-oknakanto a mangtagikua iti daga. Inton magessat dagidiay nadangkes, makitamto dayta.” Wen, addaantayo iti naimbag a rason nga ‘agrag-o iti namnama.’ (Roma 12:12) Ngem tapno maaramidtayo dayta, masapul nga agtalinaedtayo a sipapanunot iti namnamatayo. Regular kadi nga ut-utobenyo dayta a namnamayo a naggapu iti Dios? Mailadawanyo kadi iti isipyo nga addakayo idiay Paraiso, a nasalibukagkayo, awan pakaburiboranyo, nga adda iti dennayo dagiti tattao nga ipatpategyo, ken makiramramankayo iti pudpudno a makapnek a trabaho? Ut-utobenyo kadi dagiti buya ti Paraiso a nailanad kadagiti publikasiontayo? Ti kasta a regular a panagmennamenna mabalin a mayarig iti panangdalus iti tawa a pangtan-awan iti napintas a buya. No maliwayantayo a dalusan ti sarming ti tawa, di agbayag ditayto makita ti nalawag ken makaay-ayo a buya gapu iti rugit. Mabalin a masinga ti atensiontayo kadagiti dadduma a banag. Ditay koma pulos ipalubos a mapasamak dayta!

10. Apay a ti panangseggatayo iti gunggona ipakitana nga adda nasayaat a relasiontayo ken ni Jehova?

¹⁰ Siempre, ti kangrunaan a rason nga agserserbitayo ken ni Jehova isu ti panagayattayo kenkuana. (Marcos 12:30) Ngem nasayaat latta a sigagagar a seggaantayo ti gunggona. Kinapudnona, kasta ti kayat ni Jehova nga aramidentayo! Kuna ti Hebreo 11:6: “No awan ti pammati isu di mabalin nga ay-aywen a naan-anay, ta ti umadani iti Dios masapul a patienna nga isu adda ken isu agbalin a mananggunggona kadagidiay sipapasnek a mangsapsapul kenkuana.” Apay a kayat ni Jehova nga isu ket matmatantayo kas Mananggunggona? No kasta ngamin ti panangmatmattayo kenkuana, ipakpakitatayo nga am-ammotayo a naimbag ti nailangitan nga Amatayo. Isu ket naparabur ken managayat kadagiti annakna. Panunotenyo no kasano kaladingit ken kalakatayo a maupay no awanantayo iti “maysa a masanguanan ken maysa a namnama.”​—Jeremias 29:11.

11. Kasano a nakatulong ken ni Moises ti naggapu iti Dios a namnama tapno makaaramid kadagiti nainsiriban a pangngeddeng?

¹¹ Ti maysa a nagsayaat a pagwadan no maipapan iti panagtalinaed a sikikita iti namnama a naggapu iti Dios isu ni Moises. Kas “anak daydi anak a babai ni Faraon,” agik-ikut ni Moises iti autoridad, saad, ken kinabaknang ti Egipto. Dagita ngata ti ipangpangrunana, wenno ti panagserbina ken ni Jehova? Situtured a pinili ni Moises ti agserbi ken ni Jehova. Apay? Gapu ta “kimmita a sipapasnek iti pannakabayad ti gunggona.” (Hebreo 11:24-26) Saan a tinagibassit ni Moises ti namnama nga indatag ni Jehova iti sanguananna.

12. Apay a ti Nakristianuan a namnama mayarig iti kabal ti ulo?

¹² Sigun ken apostol Pablo, ti namnama ket mayarig iti maysa a kabal ti ulo. Ti piguratibo a kabal ti ulotayo salaknibanna ti abilidadtayo nga agpanunot. Kas resultana, makaaramidtayo kadagiti nainsiriban a desision, makaikeddengtayo kadagiti umiso a prioridad, ken mataginayontayo ti kinatarnawtayo. (1 Tesalonica 5:8) Kanayon kadi a nakasuot ti piguratibo a kabal iti uloyo? No wen, kas kada Moises ken Pablo, isadagyo ti namnamayo, “saan nga iti pagduaduaan a kinabaknang, no di ket iti Dios, a sibabaknang a mangipaay kadatayo iti amin a bambanag a pagragsakantayo.” Pudno, kasapulam ti tured tapno maliklikam a tuladen ti ar-aramiden ti kaaduan babaen ti panangtallikudmo kadagiti nainlasagan a tarigagay. Ngem pagimbagam dayta! Kinapudnona, apay koma a gun-odem ti maysa a banag nga awan pakaimudinganna iti “pudpudno a biag,” nga agur-uray kadagidiay siiinanama ken agayat ken ni Jehova?​—1 Timoteo 6:17, 19.

“Saankanto a Pulos Panawan”

13. Ania ti ipanamnama ni Jehova kadagiti nasungdo nga adipenna?

¹³ Dagidiay nangisaad ti namnamada iti daytoy agdama a sistema dagiti bambanag nasken a panunotenda a naimbag ti masakbayanda yantangay lumanlanlanen “dagiti ut-ot ti panagrigat” iti daytoy a lubong. (Mateo 24:8) Ngem kadagidiay mangnamnama ken ni Jehova, awan ti rumbeng a pagbutnganda. Agtultuloy nga ‘agtaengda iti kinatalged ket saandanto a masinga manipud alinggaget ti didigra.’ (Proverbio 1:33) Gapu ta saanda a mangnamnama iti daytoy agdama a sistema, sirarag-o nga ipangpangagda ti balakad ni Pablo: “Ti wagas ti panagbiagyo siwayawaya koma iti panagayat iti kuarta, bayat a mapnekkayo iti agdama a bambanag. Ta kinunana: ‘Saankanto a pulos panawan ket saankanto a pulos baybay-an.’”​—Hebreo 13:5.

14. Apay a saan koma a madanagan unay dagiti Kristiano no maipapan kadagiti material a kasapulanda?

¹⁴ Ti mangipaganetget a sasao a “saankanto a pulos” silalawag a patalgedanna nga aywanannatayo ti Dios. Ipanamnama met kadatayo ni Jesus ti naayat a pannakaseknan ti Dios idi kinunana: “Itultuloyyo, ngarud, a sapulen nga umuna ti pagarian ken ti kinalintegna, ket amin dagitoy sabali pay a bambanag [dagiti material a kasapulantayo iti biag] mainayonto kadakayo. Gapuna, dikay pulos maringgoran maipapan iti sumaganad nga aldaw, ta ti sumaganad nga aldaw addaanto kadagiti bukodna a pakaringgoran.” (Mateo 6:33, 34) Ammo ni Jehova a talaga a narigat a paggiddanen ti naregta a panagserbitayo iti Pagarian ken ti obligasiontayo nga agsapul iti pagbiagtayo no awan ti tulongna. Gapuna, naan-anay koma nga agtalektayo iti abilidad ken tarigagayna a mangipaay kadagiti kasapulantayo.​—Mateo 6:25-32; 11:28-30.

15. Kasano a mataginayon dagiti Kristiano ti ‘simple a mata’?

¹⁵ Maipakitatayo nga agtalektayo ken ni Jehova no taginayonentayo a ‘simple ti matatayo.’ (Mateo 6:22, 23) Ti simple a mata ket napasnek, nasin-aw ti motibona, ken saan a naagum ken managimbubukodan. Ti simple a mata dina kaipapanan nga agbalintayo a mamirmiraot wenno baybay-antayo lattan dagiti material a kasapulantayo. Imbes ketdi, kaipapananna ti panangipakita iti “kinasimbeng ti panunot” bayat nga iyun-unatayo ti panagserbi ken ni Jehova.​—2 Timoteo 1:7.

16. Tapno mataginayontayo ti simple a mata, apay a kasapulan ti pammati ken tured?

¹⁶ Ti panangtaginayon iti simple a mata kalikagumanna ti pammati ken tured. Kas pagarigan, no ipilit ti amoyo a regular nga agtrabahokayo iti oras a maigiddan iti Nakristianuan a panaggigimong, situtured kadi nga itungpalyo latta dagiti naespirituan a prioridadyo? No ti maysa dina naan-anay a pagtalkan ti kari ni Jehova nga aywananna dagiti adipenna, ti aramidento laengen ni Satanas ket pakaruenna ti situasion agingga a naan-anayto nga agsardeng a makigimong dayta a tao. Wen, no kurang ti pammatitayo, ipalpalubostayo a ni Satanas ti mangkontrol kadagiti prioridadtayo, saan a ni Jehova. Anian a nakaay-ay-ayto dayta!​—2 Corinto 13:5.

“Manginanamaka ken Jehova”

17. Kasano a dagidiay agtalek ken ni Jehova magunggonaanda uray ita?

¹⁷ Maulit-ulit nga ipakita ti Kasuratan a di pulos mapaay dagidiay siiinanama ken agtalek ken ni Jehova. (Proverbio 3:5, 6; Jeremias 17:7) Pudno a no dadduma, masapul a makontentoda iti saan a nanam-ay a biag, ngem matmatanda dayta kas bassit laeng a sakripisio no idiligda kadagiti gunggona nga agur-uray kadakuada. Iti kasta, ipakpakitada a ‘manginanamada ken Jehova’ ken agtalekda nga iburaynanto kadagiti nasungdo nga adipenna ti amin a nalinteg a tarigagay dagiti pusoda. (Salmo 37:4, 34) Dayta ti makagapu a naragsakda uray ita. “Ti inanama dagidiay nalinteg maysa a panagrag-o, ngem ti mismo a namnama dagidiay nadangkes mapukawto.”​—Proverbio 10:28.

18, 19. (a) Ania ti siaayat nga ipanamnama kadatayo ni Jehova? (b) Kasanotayo a mataginayon nga adda ni Jehova iti ‘makannawantayo’?

¹⁸ Natalged ti rikna ti ubing no kibinen ni tatangna. Kasta met laeng ti mariknatayo bayat a makipagnatayo iti nailangitan nga Amatayo. “Dika agbuteng,” kinuna ni Jehova iti Israel, “ta addaak kenka. . . . Pudno a tulongankanto. . . . Ta siak, ni Jehova a Diosmo, ig-iggamak ti makannawan nga imam, Daydiay agkunkuna kenka, ‘Dika agbuteng. Siak tulongankanto.’”​—Isaias 41:10, 13.

¹⁹ Anian a makaay-ayo a buya dayta​—iggem ni Jehova ti ima ti adipenna! “Insaadko ni Jehova iti sanguanak a patinayon,” insurat ni David. “Agsipud ta isu adda iti makannawanko, saanakto a mapagdiwengdiweng.” (Salmo 16:8) Kasano a mataginayontayo ni Jehova iti ‘makannawantayo’? Maaramidtayo dayta iti dua a pamay-an. Umuna, naan-anay koma nga agpaiwanwantayo iti Saona; ken maikadua, iturongtayo ti atensiontayo iti nadayag a gunggona nga intuyang ni Jehova kadatayo. Inkanta ni salmista nga Asaf: “Patinayon nga addaak kenka; tinengngelmo ti makannawan nga imak. Babaen iti pammatigmaanmo idalannakto, ket kalpasanna ipannakto iti mismo a kinadayag.” (Salmo 73:23, 24) Babaen ti kasta a pammatalged, makapagtalektayo a madaerantayo ti aniaman a dumteng iti masanguanan.

“Ti Pannakaispalyo Umas-asidegen”

20, 21. Ania a masakbayan ti agur-uray kadagidiay manginanama ken Jehova?

²⁰ Bayat a lumablabas dagiti aldaw, ad-adda a kasapulan a pagtalinaedentayo ni Jehova iti makannawantayo. Iti din agbayag, mapasaran ti lubong ni Satanas ti maysa a rigat a dina pay pulos napasaran, ket mangrugi dayta babaen ti pannakadadael ti palso a relihion. (Mateo 24:21) Ti buteng ti mangringbawto iti awanan pammati a sangatauan. Ngem kabayatan dayta a nariribuk a tiempo, dagiti maingel nga adipen ni Jehova agrag-odanto iti namnamada! “Bayat a mangrugi a mapasamak dagitoy a banag,” kinuna ni Jesus, “tumakderkayo a sililinteg ket itangadyo dagiti uloyo, agsipud ta ti pannakaispalyo umas-asidegen.”​—Lucas 21:28.

²¹ Agrag-otayo koma iti namnamatayo a naggapu iti Dios ket ditay agpaallilaw wenno agpasulisog kadagiti nasikap a panangsinga ni Satanas. Malaksid iti dayta, pagreggetantayo a patanoren ti pammati, ayat, ken nadiosan a panagbuteng. No aramidentayo dayta, situtured a makapagtulnogtayo ken ni Jehova iti sidong ti aniaman a kasasaad ken masarangettayo ti Diablo. (Santiago 4:7, 8) Wen, “bumilegkayo [wenno, agturedkayo] ket pumigsa koma ti pusoyo, dakayo amin nga agur-uray ken Jehova.”​—Salmo 31:24.

[Footnote]

Ania ti Sungbatyo?

• Kasano a ti namnama ad-adda a pinaturedna ni Jesus?

• Kasano nga agkanaig ti pammati ken ti namnama?

• Kasano a ti namnama ken pammati paturedenna ti maysa a Kristiano a mangipasdek kadagiti umiso a prioridad iti biagna?

• Apay a dagidiay ‘manginanama ken Jehova’ mabalinda ti kumita iti masanguanan buyogen ti panagtalek?

[Ladawan iti panid 28]

Ubing man wenno nataengan, mailadawanyo kadi iti isipyo nga addakayo iti Paraiso?