Dagiti Saludsod Manipud Kadagiti Managbasa

◼ Apay a mammano laeng kadagiti Saksi ni Jehova ti makipaspaset iti tinapay ken arak iti tinawen a panangrambak ti Pangrabii ti Apo?

Ngamin ta, dagiti Saksi ni Jehova, maigiddiat kadagiti relihion ti Kakristianuan, inawat dagiti Saksi ni Jehova ti pannursuro ti Biblia a bassit laeng a bilang dagiti tattao ti makagun-od iti nailangitan a biag ket dagiti dadduma kadagiti matalek nga ad-adipen ti Dios magunggonaandanto iti biag nga agnanayon ditoy daga.

Dagiti simbaan nabayagen nga isursuroda a ti langit isu ti gunggona amin dagiti mangparagsak iti Dios; dagiti dadduma mapanda iti impierno nga apuy. Ngem saan a kasta ti kuna ti Biblia. Nalawag ti panangipakita dagiti Kasuratan a sumagmamano laeng a tattao, kas kadagiti apostol, ti makipagarinto ken Kristo idiay langit. Kuna ni Jesus a dagitoy ket “bassit nga ipastoran.” Kuna ti Biblia nga adda bilangda a 144,000. (Lucas 12:32; Apocalipsis 14:3, 4) Adu kadagiti agserserbi a simamatalek ken Jehova ken addaan iti anamongna ti natnatayda sakbay a linukatan ni Jesus ti dalan nga agturong iti nailangitan a biag. (Mateo 11:11; Hebreo 10:19-21) Ket kalpasan ti panangpilina iti “bassit nga ipastoran,” minilmilion a dadduma ti nagbalin a pudno a Kristiano. Agpaay kadagidiay amin a nasungdo a saan a kameng ti “bassit nga ipastoran,” salsalimetmetan ti Biblia ti namnama ti awan-inggana a biag iti maysa a naisubli a naindagaan a paraiso. (Salmo 37:20, 29; Apocalipsis 21:4, 5) Ngem apay a dagita ket saanda met a makiraman iti tinapay ken ti arak? Impamatmat ni Jesus a ti pannakipaset kadagiti emblema kabayatan ti Pangrabii ti Apo ket agpaay laeng kadagidiay naawagan iti biag idiay langit, dagidiay kameng ti baro a tulag.

Siempre, ti pammati iti daton ni Jesus ti nasken kadagiti isuamin a makagun-od ti pammakawan ti Dios ken ti biag nga agnanayon, iti biag man idiay langit wenno iti biag iti paraiso a daga. Impakita ni Kristo daytoy idiay Juan 6:51-54: “Siak ti tinapay a sibibiag a bimmaba nanipud langit; no adda mangan itoy a tinapay agbiagto nga agnanayon; . . . ti tinapay nga itdekto a pakabiagan ti lubong [iti masubbot a sangatauan] isu ti lasagko . . . Ti mangan ti lasagko ken uminum iti darak adda biagna nga agnanayon.”

Kaskasdi, kaawatan nga inturong ni Jesus dagidiay a sasao iti ad-adu ngem kadagiti adalanna. Maysa nga aldaw kalpasan ti simimilagro a panangtaraonna kadagiti rinibo, ti umariwekwek immayda ken ni Jesus idiay deppaar ti Capernaum. Daytoy nga umariwekwek ti nakipatpatang kenkuana a nangiramananna kadagiti sasao idiay Juan 6:51-54. Gapuna saan nga agsasao ni Jesus a nangnangruna kadagiti adalan idi a kinunana nga isu ti makailadawan a “tinapay a bimmaba manipud langit” a makaipaay ti ad-adda a napapaut a panagbiag ngem iti manna a kinnanda idiay let-ang.​—Juan 6:24-34.

Iti panangusig iti dayta a kadaanan a kapadasan idiay let-ang, lagipenyo no asino ti rummuar iti Egipto a nagturong iti let-ang. Isuda ‘dagiti annak ti Israel nga addaan bilang nga innem a gasut a ribo a lallaki a nagnagna, malaksid dagiti ubbing, ken ti nawadwad a bilang dagiti nadumaduma a tattao.’ (Exodo 12:37, 38; 16:13-18) Daytoy “nadumaduma a tattao” ramanenna dagiti Egipcio a naiyasawa kadagiti Israelitas ken dagiti dadduma nga Egipcio a pinilida ti gasatda a kadua ti Israel. Agpadpada dagiti Israelitas ken dagiti “nadumaduma a tattao” kasapulanda ti manna tapno agtalinaed a sibibiag. Ngem ti “nadumaduma a tattao,” addaanda kadi ti isu met laeng a namnama a kas kadagiti Israelitas? Saan, awananda. Nupay mabalinda ti makipagdayaw a kadua dagiti Israelitas ken mangnamnamada a makastrek iti Naikari a Daga, didanto pulos mabalin ti agbalin nga ar-ari wenno papadi iti sidong ti tulag ti Linteg. Gapuna ti pannangan ti literal a manna idiay let-ang ti di nangted iti tunggal maysa ti isu met laeng a panginanamaan.

Daytoy ti panaggiddiat a laglagipenyo no pampanunotenyo ti kinuna ni Jesus kadagiti adalanna agarup maysa a tawen kalpasan a nasaona dagiti sasao iti Juan 6:51-54. Iti daytoy naud-udi nga okasion, salsalaysayen ni Jesus ti maysa a baro nga aramid a nakairamanan ti aktual a tinapay ken arak a mangisimbolo iti lasag ken darana. Nupay isu ti mangirugrugi ti pannakarambak ti Pangrabii ti Apo, kinuna ni Jesus kadagiti nasinged a pasurotna: “Daytoy a kopa kaipapananna ti baro a tulag iti darak, a maibuyat gapu kadakayo.” Iti isu met laeng a bassit a grupo dagiti apostolna, innayonna: “Ngem dakayo dagiti nagtalinaed kaniak kadagiti pannakasusuotko; ket mangaramidak iti maysa a tulagan kadakayo, kas ti pannakitulag ni Amak kaniak, a maipaay iti maysa a pagarian, tapno makapangan ken makainumkayo iti panganak iti pagariak, ket agtugawkayto kadagiti trono a mangukom kadagiti sangapulo ket dua a tribo ti Israel.”​—Lucas 22:20, 28-30.

Paliiwenyo a manipud kadagitoy maudi a sasao kadagidiay mangan iti aktual a tinapay ken uminum ti aktual nga arak kas kadagiti emblema a mangisimsimbolo iti bagi ken dara ni Jesus isu dagiti adalanna nga adda “iti baro a tulag.” Dagita addada met iti sabali pay a tulag, daydiay inaramid ni Jesus kadakuada a mabalinda ti makipagturay kenkuana ‘iti pagarianna.’ Nalawag, tuktukoyen ni Jesus ditoy dagidiay ‘buklenda ti pagarian ken papadi ti Diostayo, a makipagturay kas ar-ari iti daga.’ (Apocalipsis 5:10) Idi umuna a siglo, rinugian a pinili ti Dios ti 144,000 a makiraman iti nailangitan a Pagarian. Dagiti Kristiano idiay Corinto ti pasetda dayta a grupo ta nailadawanda kas dagidiay “napagsanto ken Kristo Jesus, naayaban nga agsanto.” (1 Corinto 1:2; idiligyo iti Roma 1:7; 8:15-17.) Dagita a “sasanto” makiramanda iti Pangrabii ti Apo, makiramanda a buyogen iti panangipateg iti emblematiko a tinapay ken kasta met ti arak a kaipapananna “ti baro a tulag gapu iti dara[na].”​—1 Corinto 11:23-26.

Itatta addada pay nabati a sibibiag ditoy daga a bassit laengen a natda dagidiay pinili ti Dios a maipaay iti nailangitan a biag. Dagita laeng adda “iti baro a tulag” ti autorisado a makipaset kadagiti emblema ti tinapay ken ti arak, kabayatan ti tinawen a panangrambak ti Memorial.

Siempre, amin dagiti pudno a Kristiano itatta a manginanama iti panagbiagda nga agnanayon ditoy daga iti sidong ti panagturay iti Pagarian ammoda a daytoy ket posible laeng babaen ti panangalagadda iti pammati iti daton ni Jesus. Kas kinuna ni Jesus iti umariwekwek, isu “ti tinapay a sibibiag a bimmaba manipud langit.” (Juan 6:51) Kaskasdi, di kayat a sawen dayta a dagidiay addaan naindagaan a namnama ket rebbeng a makipasetda iti literal nga emblema ti Memorial, ta awanda “iti baro a tulag,” wenno addaanda met ti pannakitulag ken ni Jesus a ‘maaddadanto iti pagarianna, nga agtugawda kadagiti trono.’

Gapuna, daytoy dakkel a grupo nga addaan ti naindagaan a namnama saanda a makipaset kadagiti emblema ti tinapay ken ti arak. Ngem daytoy saanna nga ipamatmat ti aniaman a kinakurang iti pammati wenno panangapresiar iti bagi ken dara ni Jesus. Kinapudnona, gapu iti nauneg a panangipategda iti datonna ken iti makaparagsak a naindagaan a namnama iti sanguananda, isuda ti siimatang iti kada tawen kas dagiti nadayaw a managpaliiw iti pannakarambak ti Pangrabii ti Apo. Iti daytoy a pamay-an, ipampamatmatda ti bukod a pammati ken mangtedda ti naragsak a pammaneknek a ti natda ti “bassit nga ipastoran” ken ti umariwekwek a “sabsabali a karnero” ket adda nabara a panagkaykaysada.​—Juan 10:16.