Sidadaanka Kadi a Mangaramid iti Panagbalbaliw?

 1. Gapu ta agbaliwbaliw ti lubong, ania a panagbalbaliw ti masapul nga aramidentayo?

¹ Iti 1 Corinto 7:31, ti lubong ket inyarig ti Biblia iti maysa a pabuya nga agbaliwbaliw dagiti eksena ken dagiti karakterna. Gapu ta agbaliwbaliw ti lubong, masapul a mangaramidtayo met iti panagbalbaliw iti pamay-an ti panangasaba, iti iskediul, ken iti presentasiontayo. Sidadaanka kadi a mangaramid iti panagbalbaliw?

 2. Apay a masapul a mannakibagaytayo tapno makadanggaytayo iti organisasion?

² Pamay-an ti Panangasaba: Kanayon a sidadaan a makibagay ti kongregasion Kristiano. Idi damo nga imbaon ni Jesus dagiti adalanna, binilinna ida a saanda a mangitugot iti supot ti taraon wenno kuarta. (Mat. 10:9, 10) Ngem idi agangay, binalbaliwanna dagita nga instruksion kas panangisagana kadagiti adalanna iti ibubusor a pakaipasanguanda ken iti lumawlawa a teritoria a pangasabaanda. (Luc. 22:36) Iti napalabas a siglo, ti organisasion ni Jehova ket nagusar iti nagduduma a pamay-an ti panangasaba, kas iti testimony card, radio broadcast, ken sound car—depende iti kasapulan kadagidi a panawen. Ita, gapu ta manmano a madanon dagiti tattao iti pagtaenganda, kanayon a maipaganetget a makiramantayo iti panangasaba iti publiko ken iti di pormal, malaksid iti panangasabatayo iti binalaybalay. Maiparparegta met ti panangasaba iti binalaybalay iti sardam no dagiti tattao ket adda kadagiti pagtrabahuanda iti aldaw. Makidangdanggayka kadi iti nailangitan a karuahe ni Jehova no agbaliw ti turongna?—Ezeq. 1:20, 21.

 3. Kasano a makatulong ti pannakibagay tapno naballigi ti ministeriotayo?

³ Presentasion: Ania ti pakaseknan dagiti tattao iti teritoriayo? Ti kadi ekonomia? Pamilia? Krimen? Nasayaat no ammotayo ti gagangay a problema ken kasasaad dagiti tattao iti teritoriatayo tapno maibagaytayo ti presentasiontayo. (1 Cor. 9:20-23) No yebkas ti bumalay ti kaririknana, imbes a basta sungbatantayo lattan sa ituloytayo ti insaganatayo a presentasion, nasaysayaat no ibagaytayo ti presentasiontayo sigun iti pakaseknanna.

 4. Apay a masapul nga alistotayo a mangaramid iti panagbalbaliw?

⁴ Iti din agbayag, aggibuston ti maudi a ‘pabuya’ daytoy a lubong ket mangrugin ti dakkel a rigat. “Ti tiempo a nabati ket ababan.” (1 Cor. 7:29) Anian a nagpateg a baliwbaliwantayo ti presentasiontayo tapno ad-adu ti maaramidantayo bayat nga adda pay tiempo!