Dimmakkel Idiay Nazaret

Dimmakkel ni Jesus idiay Nazaret, bassit ken saan a nalatak a siudad. Masarakan dayta iti amianan ti Judea, iti katurturodan a lugar iti Galilea, a lauden ti dakkel a dan-aw a maawagan Baybay ti Galilea.

Mabalin a dua ti tawen ni Jesus idi impan da Jose ken Maria idiay Nazaret manipud Egipto. Mabalin nga is-isu pay laeng idi ti anakda. Ngem di nagbayag, nayanak dagiti kakabsatna a da Santiago, Jose, Simon, ken Judas. Adda met babbai a kakabsat ni Jesus. Wen, mabalin nga innem amin ti ading ni Jesus.

Siempre, adda met kakabagian ni Jesus. Am-ammotayon ni Elisabet ken ti anakna a ni Juan. Agnanaed ni Juan iti abagatan, idiay Judea, nga adu a kilometro ti kaadayona. Agnanaed met iti Galilea ni Salome, a mabalin a kabsat ni Maria. Ngarud, isu ket anti ni Jesus. Ni Zebedeo ti asawa ni Salome. Ti dua nga annakda a da Santiago ken Juan ket mabalin a kakasinsin ni Jesus. Saantayo nga ammo no nakilanglangen ni Jesus kadakuada bayat a dumakdakkelda. Ngem idi agangay, nagbalinda a nadekket a kakadua ni Jesus ken nagbalinda nga apostolna.

Masapul nga agtrabaho a naimbag ni Jose tapno masuportaranna ti dumakdakkel a pamiliana. Isu ket maysa a karpintero. Pinadakkel ni Jose ni Jesus a kasla bukodna nga anak, isu a naawagan “anak daydi karpintero.” (Mateo 13:55) Sinuruan ni Jose ni Jesus nga agkarpintero, ket nalaka a nakasursuro. Kinapudnona, kuna dagiti tattao kenkuana idi agangay: “Daytoy ti karpintero.”—Marcos 6:3.

Nakasentro iti panagdayaw ken Jehova ti pamilia ni Jose. Tapno matungpalda ti Linteg ti Dios, insuro da Jose ken Maria kadagiti annakda dagiti naespirituan a bambanag ‘no nakatugawda iti balayda, no magmagnada iti dalan, no nakaiddada, ken no bumangonda.’ (Deuteronomio 6:6-9) Adda sinagoga idiay Nazaret. Masiguradotayo a kanayon nga ikuykuyog ni Jose ti pamiliana sadiay tapno agdayawda. Isu a naikuna idi agangay a napan ni Jesus iti sinagoga a “kas iti nakairuamanna iti aldaw ti Sabbath.” (Lucas 4:16) Maragragsakan met ti pamilia iti kanayon nga ipapanda iti templo ni Jehova idiay Jerusalem.