Ti Biag ken Ministerio ni Jesus

Asino dagiti Pudpudno a Naragsak?

TUNGGAL maysa kayatda ti agbalin a naragsak. Iti pannakailasinna iti daytoy, rinugian ni Jesus ti Sermonna idiay Bantay babaen iti panangisalaysayna kadagidiay pudpudno a naragsak. Kas pagaammotayo, daytoy ti dagus a nangala ti atension kadagiti adu a managdengngegna. Kaskasdi dagiti panglukat a sasaona ti kasla agsusuppiatda kadagiti adu.

Iti panangiturongna kadagiti komentona kadagiti ad-adalanna, rinugian ni Jesus: “Naragsakkayo a napanglaw, ta kukuayo ti pagarian ti Dios. Naragsakkayo a mabisbisinan itan, ta mapnekkayto. Naragsakkayo nga agsangsangit ita, ta agragragsakkayto. Naragsakkayo inton guraendakayto dagiti tattao . . . Agrag-okayo iti dayta nga aldaw ket aglagtokayo iti ragsak, ta adtoy! Ti gunggonayo dakkelto sadi langit.”

Daytoy ti salaysay ni Lucas iti introduksion ti sermon ni Jesus. Ngem sigun ti salaysay ni Mateo, kuna met ni Jesua a dagiti naemma, dagiti naasi, dagiti nadalus iti puso, ken dagiti mannakikappia naragsakda. Dagitoy ti naragsak, kuna ni Jesus, agsipud ta tawidendanto ti daga, nga ipakitaandanto ti asi, makitadanto ti Dios, ket maawagandanto dagiti annak ti Dios.

Ti kayat a sawen ni Jesus iti panagbalin a naragsak, nupay kasta, ket saan laeng a ti panagbalin a naganaygay wenno managkatawa, kas daydiay no ti maysa ti maay-ayatan. Ti pudpudno a kinaragsak naun-uneg pay, nga addaan ti kapanunotan ti pannakapnek, nga addaan pannakakontento ken kaitungpalan iti biag.

Gapuna dagidiay pudpudno a naragsak, impakitan ni Jesus, ket isuda dagidiay tattao a makailasin iti naespirituan a kasapulanda, a napaladingitda gapu iti sibabasol a kasasaadda, ken dagidiay makaammo ken agserserbi iti Dios. Iti kasta, uray no isuda ti magurgura wenno maidaddadanes iti panagar-aramidda iti pagayatan ti Dios, naragsakda agsipud ta ammoda nga ay-ayuenda ti Dios ken awatendanto manipud kenkuana ti gunggona a biag nga agnanayon.

Nupay kasta, adu kadagiti agdengdengngeg ken Jesus, kas kadagiti dadduma a tattao met itatta, patienda a ti panagbalin a narang-ay ken nannanamenda ti nasayaat a panagbiag isut’ mamagbalin iti maysa a tao a naragsak. Ngem saan a kasta ti ammo ni Jesus. Babaen ti panangaramidna iti maysa a panamagdilig a nalabit nangkellaat iti adu kadagiti agdengdengngegna, kunana:

“Ngem asikay pay a babaknang, ta inawatyon a naan-anay ti liwliwayo. Asikay pay a sipepennek ita, ta agbisinkayonto. Asikay pay nga agkatkatawa ita, ta agdung-aw ken agsangitkayto. Asikay pay, inton amin dagiti tao idaydayawdakayo, ta kasta met laeng ti inaramid dagiti ammada kadagiti sinan mammadto.”

Ania ti kayat a sawen ni Jesus? Apay a ti kaadda ti kinabaknang, ti agkatkatawa a panangsursurot ti ragragsak, ken panangtagiragsak ti pammadayaw dagiti tattao ti mangyeg ti ay-ay? Agsipud ta no ti maysa a tao addaan ken ik-ikutanna dagitoy a bambanag, iti kasta ti serbisio iti Dios, nga isu laeng ti makaiyeg iti pudno a ragsak, dinton mairaman iti biagna. Maigiddato iti dayta, di kayat a sawen ni Jesus ti basta panagbalin a napanglaw, mabisbisin, ken maladladingitan ti mamagbalin a naragsak iti maysa a tao. Masansan, nupay kasta, dagita a tattao nga adda iti daksanggasat a kasasaad ti mangabrasa iti pannursuro ni Jesus, ket iti kasta mabendisionandanto iti pudpudno a kinaragsak.

Sumaganad, idi nagsao kadagiti adalanna, kuna ni Jesus: “Dakayo ti asin ti daga.” Siempre, dina kayat a sawen, nga isuda ti literal nga asin. Imbes ketdi, ti asin ket maysa a preserbatibo. Sangabunton dayta ti adda iti asideg ti altar idiay templo ni Jehova, ket us-usaren dayta dagiti agserserbi a papadi a mangasin kadagiti datdaton.

Dagiti adalan ni Jesus isuda “ti asin ti daga” ta addaanda ti makaispal nga impluensia kadagiti tattao. Pudno unay, ti mensahe nga aw-awitda ti makaispal ti biag amin dagiti dumngeg iti dayta! Daytat’ nangiyeg iti biag dagita a tattao kadagiti kualidad ti kinaagnanayon, kinasungdo, ken kinamatalek, a lapdanna ti aniaman a naespirituan a moral a panagdadael kadakuada.

“Dakayo ti silaw ti lubong,” kuna ni Jesus kadagiti adalanna. Ti maysa a silaw ket saan a maikabil iti uneg ti maysa a salop no di ket maikabil iti pagbatayan ti silaw, gapuna kuna ni Jesus: “Kasta koma ti panaglawag ti silawyo iti sanguanan dagiti tao.” Ar-aramiden dagiti adalan ni Jesus daytoy babaen ti panangaskasabada iti publiko, agraman ti panagserserbida kas naraniag a pagulidanan ti kababalin a maitunos kadagiti prinsipio ti Biblia. Lucas 6:20-26; Mateo 5:3-16.

◆ Asino dagiti pudpudno a naragsak, ken apay?

◆ Asinodanto dagiti umawat ti ay-ay, ken apay?

◆ Kasano a dagiti adalan ni Jesus isuda “ti asin ti daga” ken “ti silaw ti lubong”?