Salsaludsod Dagiti Agbasbasa

Idi imbilin ni Jesus kadagiti pasurotna nga ‘agpautangda nga awanan patubo, a saan a mangnamnama iti aniaman a supapak,’ kayatna kadi a sawen a dida singiren uray ti gatad nga impautangda?

Nalaklaka a maawatan ti sasao ni Jesus a nairekord iti Lucas 6:35 no ammotayo ti Mosaiko a Linteg. Imbilin ti Dios kadagiti Israelita nga agpautangda a di agpatubo kadagiti kailianda a napanglaw ken agkasapulan iti tulong. (Exodo 22:25; Levitico 25:35-37; Mateo 5:42) Dagita nga utang ket saan a pagnegosio. Imbes ketdi, dayta nga awanan patubo nga utang ket agserbi a tulong kadagidiay marigrigat wenno nakapasar iti didigra. Maysa pay, talaga a saan a kinamanagayat no panguartaan ti maysa a kaarruba a marigrigat. Kaskasdi, maiparbeng laeng a singiren ti nagpautang ti gatad nga impautangna, nga adda makalikaguman a tani no dadduma.​—Deuteronomio 15:7, 8.

Nupay raemenna ti Linteg, nalawlawa ti aplikasionna nga insuro ni Jesus ta kinunana a saan koma a mangnamnama “iti aniaman a supapak” daydiay mangipaay iti tulong. Kas kadagiti Israelita, no dadduma makapasar dagiti Kristiano iti rigat ti biag wenno dadduma a kasasaad a mamagbalin kadakuada a napanglaw. No agpatulong iti pinansial ti maysa a kabsat nga adda iti narigat a kasasaad, saan aya a kinamanangngaasi ti tumulong? Kinapudnona, ti napudno nga ayat tignayenna ti pada a Kristiano a tumulong iti maysa a kabsat a marigrigatan iti pinansial a dina met nagayatan. (Proverbio 3:27) Mabalin nga ipaayan iti pinansial a sagut ti agkasapulan a kabsat, uray basbassit dayta ngem iti gatad a mabalin koma nga ipautang.​—Salmo 37:21.

Idi umuna a siglo K.P., nadutokan da apostol Pablo ken Bernabe a mangipan kadagiti donasion dagiti Kristiano sadi Asia Minor agpaay kadagiti kakabsat idiay Judea gapu iti bisin. (Aramid 11:28-30) Umasping ita, no sumangbay dagiti didigra, masansan a mangipatulod dagiti Kristiano kadagiti sagut agpaay kadagiti agkasapulan a kakabsatda. Babaen iti dayta, mangipapaayda met iti nasayaat a pammaneknek kadagiti sabsabali. (Mateo 5:16) Siempre, masapul nga ikabilangan ti kababalin ken kasasaad daydiay agpatpatulong. Apay nga isu ket agkasapulan? Napateg ti kinuna ni Pablo: “No ti asinoman saanna a kayat ti agtrabaho, saan met koma a mangan.”​—2 Tesalonica 3:10.

No umutang ti maysa a kabsat a saan met nga agkasapulan unay ngem kayatna laeng nga adda temporario a pagpuonanna tapno makalung-aw manipud iti pannakaisagmakna iti pinansial a parikut, mabalin a pautangan nga awanan patubo. Iti sidong dagiti kasta a kasasaad, saan a pananglabsing ti bilin ni Jesus iti Lucas 6:35 no namnamaen a maisubli ti gatad nga impautang. Ngem masapul nga adda kasuratan, ket ikagumaan ti immutang a bayadan ti utangna sigun iti napagnumuanda. Wen, ti Nakristianuan nga ayat koma ti mangtignay iti immutang a mangbayad iti inutangna, no kasano a dayta met laeng ti nangtignay iti kabsat a nagpautang.

Daydiay agpalplano nga agpautang (wenno mangited iti sagut) masapul met a sukimatenna ti kasasaad ti pamiliana. Kas pagarigan, maikompromiso ngata ti responsabilidadna a mangipaay iti kasapulan dagiti kameng ti pamiliana, maysa a kangrunaan a pagrebbenganna sigun iti Kasuratan? (2 Corinto 8:12; 1 Timoteo 5:8) Kaskasdi, ikagumaan dagiti Kristiano ti agiinnayat, nga iyebkasda dayta kadagiti praktikal a pamay-an a maitunos kadagiti pagalagadan ti Biblia.​—Santiago 1:27; 1 Juan 3:18; 4:7-11.